Meeqqat — nuannaarutissittarpatsigut!
1 Niviarsiaqqat nukappiaqqallu, ilisimavisiuk Jehovap peqqusimammasi ilagiit sammisassaanni peqataaqqullusi? (5 Mos. 31:12; Tus. 127:3) Jehovamut pallorfiginninnitsinni peqatigigassi nuannaarutigaarput. Uummatitsigut kissaammertarpugut ataatsimiinnerni naalallusi issiasusi tusarnaartusilu takullusi. Ingammik nuannaartarpugut nammineq oqaatsisi atorlugit akiniaraangassi. Ilagiit tamarmik tipaatsuttarput Teokratiimik Atuarfimmi saqqummiussigaangassi, kajumillusi oqaluussinermut peqataagaangassi, nakimanasilu atuaqatissinnut ilinniartitsisussinnullu oqaluussisimagaangassi. — Tus. 148:12, 13.
2 Oqaatigerusupparput tulluusimaarutigisarlugu pissuserissaarnersi, atisasi nutsasilu torersuusut, minguitsumik ileqqoqarnersi inersimasunullu ataqqinninnersi takugaangatsigik. Pingaartumillu nuannaarutigisarparput takutikkaangassiuk ’Pinngortitsisorsuarsi eqqaamagissi’ teokratiikkut anguniagaqarnissigut. — Nal. oq. 12:1; Tus. 110:3.
3 Anguniakkasi pillugit oqaluttuuttartigut: Nukappiaqqap arfineq-pingasunik ukiullip nakkutilliisoq angalasartoq ima oqaluttuussimavaa: ’Siullermik kuisikkusuppunga; taava kissaatigisinnaavara ilagiinni mikrofoninik højttalerillu atornissaannik ikiuinissara, atuagaasivimmi ikiuinissara atuakkamillu atuaqatigiinnermi Napasuliaq Alapernaarsuiffimmillu atuaqqissaarnermi atuartuunissara. Taava ilagiinni kiffartortunngorusuppunga, kingusinnerusukkut utoqqaanertanngorlunga. Aamma pioneeriorusuppunga, taamaalillunga pioneerit atuarfiannut ilaaniassagama. Aamma Betelimi kiffartorusuppunga imaluunniit ilageeqatigiinnut nakkutilliisunngorlunga.’ Nukappiaqqap taassuma paasilluarsimavaa Guutimut kiffartorneq tassaasoq immikkut pisinnaatitaaffik.
4 Nuannaarutigaarput takullutit anguniakkatit angugitit, timikkut anersaakkullu ineriartornerit ilutigalugu. (Naleqqiuguk Lúkarse 2:52.) Ukiut tamaasa ilasi tuusintilippassuit kuisimanatik oqaluussisartunngortarput taamaalillutik Jehovamut tunniulluinnarsimasutut kiffartortutut kuisissinnaanngorlutik. Ilissi pillusi nuannaarnerput alliartortarpoq takugaangatsigit ikiorti-pioneerinngortusi imaluunniit piffissaq tamaat atorlugu oqaluussisartunngortusi. Aap, meeqqat inuusuttullu uatsinnut annertuumik nuannaarutaavusi, Ataatattalu qilammiusup unnersiutigineqaatigaasi. Qinnuppassi Jehovap pilluaqqungaarumaaraasi. — Uss. 23:24, 25.