Ataatsimiinnerit tamaasa najuuffigisaraanni pitsaassaaq
1 Ukiuni qulikkuutaani qatannguterpassuatsinnut Europap kangianiittunut ataatsimiigiartarneq inerteqqutaasimavoq. Inerteqqut atorunnaarsinneqarmat ammasumillu ataatsimiissinnaanngoramik qanoq nuannaartiginerat takorlooriaruk.
2 Nakkutilliisup angalasartup ilagiit taakku ilaannut tikeraarnini oqaluttuaraa: „Marlunngornikkut unnukkut sapaatip-akunnerani tikeraarnera aallartittorlu kiassaatit aserorput. Silami issisiut 0 gradit missaanniippoq, illullu iluani tallimat missaannaanni kialluni. Qatanngutit kavaajalerlutik, qungasequtilerlutik, aaqqaserlutik, nasalerlutik kamippalerlutillu issiapput. Kialuunniit allassimaffiit biibiliminiittut quppersinnaanngilai, qupperaasoqarsinnaanngimmat. Jakkiinnaqarlunga qiuliivillunga oqaluttarfimmi qeqarpunga, oqalukkaangamalu anernera takusinnaasarpara. Ataatsimilluunniilli naammagittaalliortoqannginnera maluginiarpara. Qatanngutit tamarmik najuussimanertik nuannernerarlugulu ineriartornarsimanerarpaat!“ Qatanngutit taakkua ataatsimiinnerup tamatuma najuuffiginngitsoornissaa eqqarsaatigisinnaanngilaat.
3 Taamatut isiginnittaaseqarpugut? Sapaatip-akunneranut ammasumik ataatsimiissinnaanerput pingaartipparput? Pissutsilluunniit atoruminaraangata ataatsimiinnerit taamaattussaannartut isigisarpavut? Ataatsimiigiartuaannarneq ajornanngitsuujuaannanngilaq, ilaannikkullu najuutinnginnissatsinnut pissutissaqavittarpugut. Akornatsinniittulli ukioqqortuujugaluarlutik, sualuttumik peqqiilliuuteqaraluarlutik, innarluuteqaraluarlutik, ullorsuaq sulereeraluarlutik allarpassuarnillu pingaarutilinnik pisussaaffeqaraluarlutik ataatsimiinnerit pisariaqartillugit miserratiginninngitsut najuuttuaannangajattullu eqqarsaatigeriakkit. Maligassaalluarput malittariaqakkavut. — Naleqqiuguk Lúkarse 2:37.
4 Kristumiut ataatsimiittarneri tamaasa, ilagiit atuakkamik atuaqqissaaqatigiinnerannit ataatsimeersuarnernut, najuuffigisarnerisigut pallorfiginninnerup ilumoortup tapersersornera ileqquliutsigu. Ataatsimiinnerit najuuffigisarneri sooq taama ilumoorutsigissavavut? Guutip katerisimaaqqusarmatigut. Allarpassuarnilli pingaartunik aamma pissutissaqarpoq. Tamatta Jehovamit ilinniartinneqarnissarput anersaallu illernartup ikiuinera ataatsimiinnerni pineqarsinnaasoq pisariaqartippavut. (Mat. 18:20) Qatanngutitta katerisimaaqatigineranni ineriartortarpugut kajumissisinneqartarlutalu. — Epr. 10:24, 25.
5 Jesusip qaqqami allatut isikkoqalerneranut atatillugu Peter oqarsimavoq: ’Ajoqersuisoq, tamaaniikkuminaqaaq.’ (Lúk. 9:33) Kristumiut ataatsimiinneri tamaasa taamatut isigisariaqarpavut. Aap, ataatsimiinnerit tamaasa najuuffigisaraanni pitsaassaaq.