Ataatsimmiinnermut peqataaneq - akisussaffik annertooq
1 Ataatsimiigiartarneq qanoq pingaartitsigaajuk? Apeqqut imminut killisiornarpoq, ilaa? Qularnanngitsumik amerlanersatta ataatsimiittarnerit pingaartippaat, nalunaarusialli takutippaat ilagiinni amerlasuuni ataatsimiigiartartut ikiliartortut. Suut pissutaasinnaappat? Ilatta pisariaqanngitsumik sulineq, qasuneq, ilinniagassat, perusussuseqannginneq silarlunnerluunniit ataatsimiigiarnissamut akisussaaffitsinnut akulikitsumik akornutaatittarnerpaat? (5 Mos 31:12) Biibilimit peqqussutaammat, tamatta qinunikkut apeqqut una eqqarsaatigisariaqarparput: „Ataatsimiinnernut najuuttarneq uanga qanoq pingaartitsigaara?“
2 Qatanngutitta ilaat nunani allani akunnerpaaluit atorlugit aqqusinikkut pujoralattukkut kuutsigullu kuukkooriarsualikkut ingerlallutik ataatsimiigiartarput. Qularnanngitsumik ilissi ilagiinni „amigaataaneq ajortunik“ aamma ilaqarpusi, naak peqqiillioraluarlutik, innarluuteqaraluarlutik, sulerulunnartumik suliffeqaraluarlutik ilinniagassarpassuaqaraluarlutilluunniit. (Lúk. 2:37) Taamaakkaluartoq sooq aggertuaannarpat? Nalunnginnamikku silarsuarmi ulapaarfiusumi unamminiarnartut nammineerlutik ajugaaffigisinnaanagit. Nakuussut Guutip tunissutaa tunaaraat. — 2 Kor. 12:9, 10.
3 Kristumiut siulliit qinuniarlutik, misigisanik aveqatigiinniarlutik Guutillu oqaasianik atuaqqissaarniarlutik akulikitsumik ataatsimiigiartarnermut maligassiaat ullumikkut malipparput. (ap. sul. 4:23-30; 11:4-18; Kul. 4:16) Biibilip siulittuutai ajoqersuutaalu ilinniartarpavut, aamma pitsaanerusumik inuuniarnitsinni pisariaqartitatsinnik Biibilimik maleruaanissatsinnik oqaaqqissaarneqartarpugut. (1 Tim. 4:8) Aammattaaq ajornartorsiutit naalliuutillu siunissami soraarsinneqarnissaannik neriuuterput nakussatsinneqartarpoq. Neriuutip tamatuma uummaaritsinneqarnissaa pingaarpoq. — Epr. 6:19.
4 Ilaqutariillusi ataatsimiigiartarneq qanoq pingaartitsigaasiuk? Nerisarnissitulli suliartortarnissitullu pilersaarutinut ilaatigaa? Ataatsimiigiarfissanngoraangat eqqartortarpisiuk ataatsimiigiassanerlusi ataatsimiigiassannginnerlusiluunniit? Qatanngutit aalajangersimasumik ilaginissaat nammineq kajumissutsimik pisussatut ilaqutariinnissinni isigaasiuk? Oqaluussisartut amerlasuut alliartornerminni angajoqqaamik maligassiaat eqqaamavaat. Utoqqaanertap eqqaamavaa: „Ilaqutariit ataatsimiigiarnissat ataatama isumagiuaannarpaa. Napparsimasoqaraangat arlatta najortarpaa, sinneri ataatsimiigiartarput!“
5 Naalagaaffimmut Kiffartuuteqarneq-p normuani tullermi ataatsimmiinnernik anersaakkut aaqqissuussaasunik pingaartitsinermik ineriartortitsinissatsinnik ikiorneqassaagut. Ataatsimiigiartarnitit amerlanerusariaqarpata, qularutiginngilarput ilanngutassiat taakku paasitissagaatit suna arajutsinerit. Ataatsimmiinnernullu aqutsisunut iluaqutaasunik ilaqassapput, siunnersuutillu piareersaraangatta peqataagaangattalu atorsinnaasavut aamma ilaassapput. Soormi ilaqutariittut qinunikkut ataatsimiigiartarnersi eqqarsaatigigussigik? Taava inuunissinni pisariaqartunik allannguillusi. Aalajangersimasumik ataatsimeeqataaneq teokratiimik ilinniartitaanitsinnut ilaavoq pingaartoq pingaartingaartariaqartoq. (km 9401 Mødedeltagelse-et stort ansvar . . .)