Nakkutilliisut siuttuusut — Nakkutilliisoq siulittaasoq
1 Ilagiinni nakkutilliisutut kiffartorneq akisussaafferujussuuvoq. (ap. sul. 20:28; 1 Tim. 3:1) Allaaserisani nangeqattaartuni utoqqaanertat akisussaaffii assigiinngitsut sammineqassapput, taamaalilluta utoqqaanertat suliaannik pingaartunik pingaartitsinerulersinnaaqqulluta, allaaserisarlu manna siullersaraat.
2 Nakkutilliisoq siulittaasoq piffissami killiligaanngitsumi kiffartortussatut Peqatigiiffimmit toqqarneqartarpoq. Taassuma utoqqaanertaqatigiit sulinerat nakkutigalugulu ataqatigiissaartarpaa, utoqqaanertat imminnut pisussaaffiliussanik eqqortumik nakkutiginninnissaminnut iluaqutigisaannik. (Organiseret til at fuldføre vor tjeneste, qupperneq 40, 41) Tamanna sunik nassataqarpa?
3 Nakkutilliisup siulittaasup ilagiit allagarsiassaat tigusarpai allatsimullu ingerlateqqikkasuartarlugit. Utoqqaanertat ataatsimiinnissaasa siornagut utoqqaanertat allat ataatsimiinnermi oqaluuserineqartussatut siunnersuutinik nakkutilliisumut siulittaasumut tunniussisarput, taakkualu tunngavigalugit ullormut oqaluuserisassat taassuma aaqqissuuttarpai. Aamma utoqqaanertat ataatsimiinnerini aqutsisuusarpoq. Aalajangiunneqartut piviusunngortinnissaat isumagisarpaa. Kiffartorneq pillugu ataatsimiinneq tamanullu ammasumik oqalugiarnerit nakkutigisarpai. Ilagiinnut nalunaarutigineqartussat akiligassallu aalajangersimasut akilerneqarnissaat taassumannga akuerineqaqqaartarput, ilagiillu naatsorsuutaasa qaammatit pingasukkaarlugit misissorneqarnissaat isumagisarlugu.
4 Kiisalu nakkutilliisup siulittaasup kiffartornermut ataatsimiititaliap suliai aqutsisutut ataqatigiissaartarpai. Atuaqqissaaqatigineqartoq kuisimanngitsutut oqaluussisartunngorusuppat, imaluunniit oqaluussisartoq kuisikkusuppat, utoqqaanertanik naapeqateqarnissaa isumagisarpaa. Aamma nakkutilliisup siulittaasup nakkutilliisup angalasartup tikeraarnissaanut piareersarneq siuttuuffigisarpaa, sapaatip-akunnerani immikkut ittumi tamatumani ilagiit sapinngisamik tamakkiisumik iluaqutissarseqqullugit.
5 Nakkutilliisoq siulittaasoq assigiinngitsorpassuarnik suliassaqarpoq. Maniguulluni ’ilungersorlunilu’ tamakkuninnga isumaginninnerani uagut utoqqaanertanut suleqataanitsigut iliuuseqaqataasinnaavugut. (Rûm. 12:8) Akornatsinni siuttuusunut ’naalakkutta tusartarlutalu’, suliassatik piviusumik nuannaarnerullutik isumagisinnaassavaat. — Epr. 13:17.