Annerusunik suliaqarsinnaavugut
1 Jesusip kiffartornera nalissaqanngilluinnartunik ilisarnaateqarpoq. Tuusintilikkuutaat tupinnartuliornikkut nerisippai, amerlasuut ajorunnaarsillugit toqusunillu makititsilluni. (Mat. 8:1-17; 14:14-21; Juá. 11:38-44) Suliarisimasai inuiaqatigiinnit tamakkiisunit eqqumaffigineqarsimapput. Toqunissili sioqqullugu unnuk kingulleq ajoqersukkaminut aalajaatsunut oqarsimavoq: ’Suliat suliarisakka uannut uppertuttaaq suliariumaarpai; [tamakkunannga annerusut, NV] suliariumaarpai.’ (Juá. 14:12) Qanoq ililluta ’annerusunik’ suliaqarsinnaavugut?
2 Oqaluussisarfiup annertunerusup oqaluussiffigineratigut: Jesusip Palæstina kisiat oqaluussiffigaa, ajoqersugaali ’nunap isuanut allaat’, aap, Jesusip nammineerluni nalunaajaaffigisaanit annerungaartumi, nalunaajaaqquneqarput. (ap. sul. 1:8) Oqaluussineq aallartitaa nunarsuarmi tamarmi nunanut 232-nut anngussimavoq. (Mat. 24:14) Ilagiit attavigisavit oqaluussiffigisartagaanni oqaluussisarneq tamakkiisumik peqataaffigaajuk?
3 Inuit amerlanerusut tusarlernerisigut: Jesus toqummat ajoqersugaasa amerlavallaanngitsut oqaluussineq ingerlateqqippaat. Ukiumi 33-mi piinsip uuluani oqaluussinermi aallussilluarnerat inuit 3000-it missaasa sallusuissummik ilassinninnerannik kuisinnerannillu kinguneqarpoq. (ap. sul. 2:1-11, 37-41) ’Inuunermik naassaanngitsumik pissaqaqqusaasut’ katersorneqarnerat nalerput tikillugu ingerlasimavoq, ullormut agguaqatigiissillugu 1000-t sinnerlugit kuisittarput. (ap. sul. 13:48) Eqqortumik isumallit sumiluunniit nassaariniarlugit soqutiginninnerlu sukkanerpaamik malittariniarlugu sapinngisat tamaat iliuuseqartarpit?
4 Sivisunerusumik oqaluussinikkut: Jesusip nunami kiffartornera ukiut sisamassaat qiteqqutiinnarlugu sivisussuseqarpoq. Amerlanersavut sivisunerusumik oqaluussisarsimapput. Qanorluunniit sivisutigisumik suliaq tamanna ingerlatissagaluarutsigu ajoqersukkat nutaat aqqummut inuunermut sammisumut ikiorsinnaanerat qujamasuutigaarput. (Mat. 7:14) Qaammatit tamaasa Naalakkap suliaanik naammassisaqangaartuinnartarpit? — 1 Kor. 15:58.
5 Jesusip ikiuineratigut ajoqersugaasut ilumoortutut annerusunik suliaqarsinnaanerput tatigisinnaavarput. — Mat. 28:19, 20.