Ataatsimiinnerni akisarnitsigut ineriartorteqatigiinniarta
1 Eprîarinut agdlagkat 10:24-mi kajumissaarneqarpugut ’asanninnermut ajunngitsuliornermullu kajumissaaqatigiissasugut’. Tamatumunnga ilaavoq ataatsimiinnerni akisarnitsigut ineriartorteqatigiinnissarput. Sooq qanorlu ataatsimiinnerni akisariaqarpugut? Tamanna kimut iluaqutaava?
2 Eqqarsaatigiinnariaruk allat akissutaat persuarsiunngitsut erseqqissullu qanoq akulikitsigisumik paasisaqarnerulissutigalugillu anersaakkut nakussatsissutigisarsimallugit. Illittaaq allanut taamaaliorsinnaanerit immikkut pisinnaatitaaffigaat. Akisarnikkut ersersittarpat ’anersaap pianik tunissuteqarnissat’ kissaatigigit, najuuttunut tamanut qiimmaallaataasumik. — Rûm. 1:11, 12.
3 Qanoq pitsaasumik akisoqarsinnaasoq: Immikkoortumi eqqarsaatinik tamanik matusisumik takisuumik akisariaqanngilatit. Takisuumik akineq akissummik aalajangersimasumik erseqqissaaneq ajorajuppoq allallu akinissamut kajuminnerannik annikillisitsisarluni. Immikkoortumut akissut siulleq naatsuullunilu eqqortuusariaqarpoq. Tulliullutik akisut sammineqartup nalinga atoriaannaasoq tikkuarsinnaavaat imaluunniit allassimaffiit qanoq atorneqarsinnaanerat ersersillugu. — Takuuk ’Skolehåndbogen’, qupperneq 89-91.
4 Akinissannut annilaangasaruit akissutissannik naatsumik piareersartarsinnaavutit atuaqqissaarnermillu aqutsisoq siumoortumik qinnuigalugu immikkoortumut tassunga akiteqqullutit. Ataatsimiinnerni ikittuinnarni taamatut akisareeruit peqataanissat ajornannginnerutilissavat. Eqqaamajuk Moses Jeremiasilu inuppassuarnut oqalunnissaminnut imminut tatiginermik amigaateqarsimammata. (2 Mos. 4:10; Jer. 1:6, Ny Verden-nutsikkami ataani ilanngussaq.) Jehovalli sinnerluni oqalunnissaannut ikiorpai, illittaarlu ikiussavaatit.
5 Akissutitit kimut iluaqutaassappat? Ilinnut iluaqutaassapput, akisarnikkummi sallusuissut isumakkut uummatikkullu pigiliunnerusarpat paasissutissalllu eqqaamajuminartinnerulersarlugit. Allattaaq akissutitit ineriartornartut tusaallugit iluaqutigisarpaat. Tamarmik, misilittagartuut, inuusuttut, ittoortut nutaalluunniit, ataatsimiinnerni uppernerminnik ersersitsiniaraangata qiimmaallannartaqaaq.
6 Ataatsimiinnerni akissutit ineriartornartut tusaraangatsigik ’oqaasissat piffissaasigut anillugit ajunngittassusia’ qularnanngivissumik misigisassavarput. — Uss. 15:23.