Kikkut tamarmik ’oqaatsimik ilassinnittariaqarput’
1 Inuit millionilikkuutaat Jehovap nalunaajaasuinit Biibilimik atuaqqissaaqatigineqartarput. Inuuneq naassaanngitsoq angujumagunikku ukiumi 33-mi piinsip ulluani allamik isumataarlutillu kuisittut 3000-it assigalugit ’oqaaseq ilassisariaqarpaat’. (ap. sul. 2:41) Tamatuma uagut ullumikkut inuusugut sumik akisussaaffilerpaatigut?
2 Atuaqqissaaqatigisartakkavut Jehovamut tunniusimalernissaannik ikiortariaqarpavut. (1 Tim. 4:7-10) Naalagaaffimmut Kiffartorneq-mut juuni 1996-imoortumut ilanngussami immikkoortoq 20-mi ima siunnersuuteqarpoq: ’Atuaqqissaarnerup nalaani Jehovap pissusiinik pingaartitsinermik ineriartortitsinissamut periarfissaasinnaasut eqqumaffigikkit. Guutimut misigissutsitit itisuut oqaatigisakkit. Atuaqqissaaqatigisat qamannga pisumik Jehovamut attaveqalernissaanik ikioruk.’
3 Unamminiarnartoq: Upperisarsiornermit ilumuunngitsumit sunnerneqarlutik inuit amerlanersaat piffissaajarnannginnerpaamik ilungersornannginnerpaamillu, inuunerminnilu pingaaruteqarpianngitsumik, upperisaqarnertik naammagaat. (2 Tim. 3:5) Uagutsinnut unamminiarnartoq tassaavoq atuaqqissaaqativut paasitinniassallugit ilumoortumik pallorfiginninneq tassaaginnanngitsoq oqaatsimik tusarneq. Ilikkakkatik ulluinnarni atortariaqarpaat. (Jâk. 1:22-25) Guutip akuerisinnaanngisaanik iliuuseqartarunik paasisariaqarpaat ’saanniartariaqarlutik’ eqqortumillu iliornermikkut taassuma iluarisaanik iliulertariaqarlutik. (ap. sul. 3:19) Inuuneq naassaanngitsoq angujumagunikku ’assoruuttariaqarput’ aalajaatsumillu sallusuissut aalajangiuttariaqarlugu. — Lúk. 13:24, 25.
4 Biibilimik atuaqqissaaqatigisartakkat ileqqussanut tunngasunik assigiinngitsunik oqaloqatigigaangakku tamakkununnga ilumoorluni isumaanik, arlaannillu allanngugassaqarluni paasisuuguniuk qanoq iliussanersoq, aperisarsinnaavat. Peqatigiinnik aaqqissuussaasunik sallusuissummik ilikkarfigisimasaanik innersuuttaruk, ilagiillu ataatsimiittarnerinut tamatigut orniguttarnissaanik kajumissaartarlugu. — Epr. 10:25.
5 Ilinniartitsinitsigut atuaqqissaaqatigisartakkatta uummataanik killiinissarput anguniagaraarput. Nutaat Guutip oqaasianik ilassinninnissaannut kuisinnissaannullu kajumissisinnerisigut nuannaarutissarsingaassaagut. — 1 Tás. 2:13.