Ilaqutariit qanoq ilillutik suleqatigiissinnaasut — oqaluussinermi
1 Aappariit imaluunniit angajoqqaat meeqqatik ilagalugit oqaluussinermi suleqatigiikkaangata Jehovallu aqqa tamanut unnersiutigigaangassuk takullugit allamik qiimmannarnerusoqarnerpa? (Tus. 148:12, 13) Ilaqutariit tamarmik oqaluussinissamut akuttoqatigiimmik peqataanissamik pilersaaruteqarluartariaqarput. Ilissi ilaqutariittut sapaatip-akunneri tamaasa ulloq ataaseq kiffartuussinissamut immikkoortittarpisiuk? Taamaappat tamarmik qanoq pilersaaruteqarnissartik nalussanngilaat aammalu oqaluussinermi peqataalluarsinnaallutik. — Uss. 21:5a.
2 Ilaqutariittut oqaluussinnginnermi aallarneeriaatsit suut atussanerlugit piareersaqatigiittoqarsinnaavoq. Sungiusaraanni iluaqutaassaaq, sungiusartarnerit ilaqutariinnut ataqatigiilersitsisinnaapput. Oqaluussinermi ilaqutariit suleqatigiilluarpata piareersarluarsimappatalu kinguneqarluarsinnaavoq.
3 Nakkutilliisup angalasartup ilaqutariit atuagassianik agguaassinermi suleqatigisimavai. Illumiit illumut angalaartillutik paniisa ilaat aperisimavoq: „Qanoq sivisutigisumik angalaaqatigiissaagut?“ Nangilluni oqaluttuaraa kingusinnerusukkut ataatani angalaaqatigisussaallugu. Taassuma ataatanilu oqaluussinermi suleqatigiinnertik nuannaarutigisimavaa. Ilaqutariit iluanni taamatut isumaqarneq ajunngeqaaq.
4 Ilaqutariit ilaat immaqa periarfissaqartarput ukiumut qaammat ataaseq ikiorti-pioneerioqatigiinnissaminnut. Imaluunniit ilaqutariit iluanni ataaseq qaammatit tamaasa ikiorti-pioneeriunissamut imaluunniit pioneeriunissamut periarfissaqarnerpoq. Aaqqissuussilluarnikkut suleqatigiilluarnikkullu ilaqutariinniittut tamarmik immaqa kiffartornertik annertusisinnaavaat pioneeritut kiffartortup tapersersorneratigut. Taamatut suliniuteqarneq misigisartakkallu nuannersut qularnanngitsumik ilaqutariinnut pilluaqqussutaassapput. — Mal. 3:10.
5 Oqaluussinermi uummammit pisumit peqataasarnikkut ilaqutariit ataqatigiilluarneq nuannaarutigissavaat, angusaqarluarsinnaallutik Jehovamullu kiffartornermi ilungersuussisinnaallutik nuannaarsinnaallutillu. — Naleqqiuguk Filípimiut 2:1, 2.