Kissaatigineqarput: Ikiorti-pioneerit 3000-t — Ikiorti-pioneeriusinnaavit marsimi? Apriilimi? Maajimi?
1 „Oqaluussisartut 1000-t kissaatigineqarput,“ atuagassiami Watch Tower-imi apriili 1881-imoortumi ilanngutassiaq taama qulequtaqarpoq. Ilanngutassiami tamatumani ’tamarmik Naalakkamit sallusuissut pillugu paasisaqartinneqartut’, angutit arnallu kuisimasut kajumissaarneqarput sapinngisamik piffissartik Biibilip sallusuissutaanik siaruaasseqqullugit. Piffissap affaanik annerusumilluunniit Naalakkap suliaanut atuisinnaasut kajumissaarneqarput kolportøriunissaminnut nalunaaqqullugit — ullumikkut pioneerinik taaneqartarput.
2 1800-kkunnit pissutsit maanna allanngorsimapput, ataaserli suli atuuppoq — Guutip tunniulluinnarlutik kiffaasa sapinngisamik piffissartik nutaarsiassap nuannersup siaruarternissaanut atorusuppaat. Ikiorti-pioneerisut kiffartornerup oqaluussisartut ikiortarpai sunniuteqarluarnerulernissaannik piffissartik oqaluussinermut atornerusaramikku. — Kul. 4:17; 2 Tim. 4:5.
3 Ikiorti-pioneeriusarneq atulersinneqarmalli qatanngutit angutit arnallu hundredetuusintilikkuutaat iluaqutigisarsimaqaat kiffartuussinermullu tamatumunnga ilaasarnertik qiimmassaatigisarsimaqalugu. Taamaattumik upernaamut 1997-imi Danmarkimi ikiorti-pioneerit 3000-t angunissat ilimanarluarpoq.
4 Kajumissaarusuppassi ikiorti-pioneeriunissamik anguniagaqaqqullusi qaammatini ataatsimi arlalinniluunniit marsimi, apriilimi maajimilu. Sooq marsi ilanngullugu eqqaasimavarput? Aap, ukioq manna eqqaaniaaneq nalliuttorsiutigissavarput sapaammi marsip 23-ani. Tamanna sioqqullugu sapaatip-akunneri aallussilluarluni oqaluussinermut Naalakkatta Annaassisittalu, Jesus Kristusip aallarnisarsimasaanut atussallugit allamik pitsaanerusoqanngilaq. Marsimi nalunaajaanissarsuarmi soqutiginnittunik amerlasuunik Kristusip toquneranik eqqaaniaalluni nalliuttorsiutiginninnissamut qaaqqusisinnaavugut. Marsi aamma immikkut ittuussaaq siullerpaamik atuagaq nutaaq, Ilaqutariittut pilluarneq isertugaateqarpoq neqeroorutigissagatsigu. Aammattaaq marsimi weekendit tallimaassapput sivisuumik oqaluussinissamut periarfissaalluassallutik. Aammattaarli ilaasa apriilimi maajimiluunniit ikiorti-pioneeriujumanissartik qinerumanerussavaat. Qaammatini taakkunani pulaaqqiinissamut atuagassiaararlu Guutip sumik piumaffigaatigut? ikiortigalugu nutaanik Biibilimik atuaqqissaaqateqalerniarnissamut periarfissaqassaaq. Angalaartarfigisattaaq angalaarfigilluarneqarumaarput, pingaartumik weekendini, atuagassiat Napasuliaq Alapernaarsuiffik Iteritsi!-lu atorlugit.
5 Kikkut ikiorti-pioneeriunissamut piukkunnarpat?: Atuakkami Organiseret til at fuldføre vor tjeneste-mi qupperneq 110-mi oqaatigineqarpoq: „Kuisereersimaguit ileqqorissaartuullutillu ilisimaneqarluartuullutit qaammatip ingerlanerani nalunaaquttap akunneri 60-t kiffartuussinermut atornissaat aaqqissorsinnaallugit, isumaqarlutillu ikiorti-pioneeriusinnaassallutit qaammammi ataatsimi arlalinniluunniit ilagiinni utoqqaanertat nuannaarutigalugu kiffartuussinissamut immikkut pisinnaatitaaffiusumut tamatumunnga qinnuteqaatit eqqarsaatigeqqissaassavaat.“ Immikkut pisinnaatitaaffimmut tamatumunnga inissaqartitsisinnaassavit marsimi? Apriilimi? Maajimi?
6 Utoqqaanertaqatigiit tungaannit ajunngitsumik isumaqarfigineqarnikkut oqaluussisartullu tungaannit uummatikkut iluunngarluni tapersersorneqarnikkut qularutissaanngilaq ajunngitsumik qisuariartoqarumaartoq ikiorti-pioneeriunissamik 3000-nik kajumissaarummut. (Epr. 13:7) Ilaqutariinni ittuusut tamarmik kajumissaarneqarput ilaquttaminni qassit ikiorti-pioneeriunissamut qaammatini aggersuni ataatsimi arlalinniluunniit nalileeqqullugit. — Tuss. 148:12, 13; naleqqiuguk apustilit suliait 21:8, 9.
7 Oqajaarpallaaqinak ikiorti-pioneeriunissat periarfissaqarfiginngilluinnarlugu ulloq naallugu suliffeqarnerit pillugu, atuarnerit pillugu, ilaqutariinni pisussaaffeqarnerit pillugu imaluunniit allamik Biibilimut tunngasumik akisussaaffeqaravit. Ilaannut immaqa peqataaniarnissaq ajornakusuussagaluartoq kisiannili aaqqissuussilluarnikkut Jehovallu ikiuineratigut iluatsissinnaavoq. (Tuss. 37:5; Uss. 16:3) Periarfissaqanngissorinninnerpit ikiorti-pioneeriunissamut kissaateqarnerit aqunngikkiliuk. (Uss. 13:19a) Jehovamut tullermullu asanningaarnikkut amerlasuut sapaatip-akunneranut sungiussimasatik naleqqussarsinnaanngorsimavaat qaammallu ataaseq ikiorti-pioneeriunissamut nalunaarlutik. (Lúk. 10:27, 28) Tamaviaarlutik Naalagaaffimmik kiffartuussisunut pilluaqqussutissarpassuaqarpoq. — 1 Tim. 4:10.
8 Ikiorti-pioneerisut kiffartuussinerup nassatarisartagai: Guutip kiffaasa tuusintilikkuutaat ikiorti-pioneerisut uummatikkut iluunngarlutik kiffartuussinerisa, kingunerisarpaa nipertik illugalugu Jehovamut qiimmattaatiginninneq. Allanut amerlanerusunut nutaarsiassamik nuannersumik avitseqatiginnikkusunnertik naapertorlugu oqaluussisartut taakkua, Jehova qaninnerusumik attaveqarfigilertarpaat taassumannga tapersersorneqarnissartik ilikkartaramikku malugisinnaallugulu anersaaminik pilluaqqussutinillu tunisaraatik.
9 Ikiorti-pioneerit, naliginnaasumik pioneerit specialpionerillu akornatsinniittut ilagiinni anersaamik qiimanartumik inuummarissinartumillu pilersitsisarput. Kiffartuussisimanerminnit misilittakkaminnik angorniorlutik oqaluttuartarnerat tuniluuttarpoq. Tamatuma allat killisissavai anguniakkaminnik tigusinissaannik eqqarsaatiginnilersissallugillu oqaluussinermut pingaartumut annertunerusumik peqataasinnaanissaannik. Qatanngut arnaq 70-inik ukioqarluni kuisissimasoq ingerlaannaq aalajangersimasumik ikiorti-pioneerinngorpoq. Ukiualuit qaangiummata aperineqarpoq sooq taama utoqqaatigaluni qaammatit tamaasa qasusuilluni suli ikiorti-pioneeriusarnersoq, oqarpoq misigaluni inuunermini ukiut 70-t siulliit maangaannaq atorsimallugit, kissaatiginagulu piffissaq sinnera maangaannaq atussallugu.
10 Kialuunniit ikiorti-pioneerisut kiffartuussinermut peqataasup oqaluussinermut piginnaanini pitsanngornerulersittarpai. Oqaluussisartoq inuusuttoq oqaluttuarpoq: ’Meeraagallarama angajoqqaakka oqaluussiartuleraangata ilagisarpakka. Nuannertaqaaq oqaluussinermut peqataalluni. Piffissap ingerlanerani paasilerpara atuaqatinnit avissaarsimallunga. Tamatuma kingorna atuaqatikka sallusuissummik oqaloqatiginissaat ajornarnerulerpoq. Illumiit illumut oqaluussigaangatta, atuarfimmi ilisarisimasannik naapitsinissara siooragisarpara. Ajornartorsiutiga tassaagunarpoq inunnut ersineq. [Uss. 29:25] Atuarunnaarama aalajangerpunga ilaannikkooriarlunga ikiorti-pioneeriusarniarlunga. Oqaluussisarneq maanna allatorluinnaq uannut sunniuteqarpoq. Nuannariinnarlugu taama iliorneq ajorpunga, aammattaarli uannut artornartuunngilaq. Biibilimik atuaqqissaaqatigisartakkakka sallusuissummi siumukartut takugaangakkit qamuuna itisuumik nalerisimaarneq misigisarpara nalunaajaasimanermi tamatumani Jehovap ilungersorninnut pilluaqqusisarmat.’ Oqaluussisartoq inuusuttoq taanna nalinginnaasumik pioneeriuneq ingerlatiinnarpaa.
11 Amerlanerit ilagiinni ikiorti-pioneeriugaangata, angalaartarfiit peqqissaartumik angalaarfigineqartarnerannik kinguneqartarpoq. Qatanngutip angutip angalaartarfinnik isumaginnittup ikiorti-pioneerit qinnuigisinnaavai angalaartarfinnut qaqutigut angalaarfigineqartartunut peqataaqqullugit. Taqualioriarluni ullorlu naallugu angalaarnissamut immikkoortikkaanni, angalaartarfiit ungasinnerusut aamma angalaarfigineqarsinnaasarput.
12 Utoqqaanertat, peqqissaartumik piareersaanerit isumagisigit: Qaammatinut pingasunut tulliuttunut oqaluussiartortarnissamut sapaatip-akunneranut piffissat assigiinngitsut aaqqissorneqartariaqarput, aammattaaq ualikkut kingusinnerusukkut unnulaarneranilu, amerlanerusut peqataaffigisinnaasaatigut. Aqqusinikkut angalaarnissat niuerniartarfeqarfinnilu angalaartarnissat aaqqissorneqartariaqarput, illumiillu illumut oqaluussiartornerup saniatigut angerlarsimanngitsut tiguneqartariaqarput. Taamaaliornikkut utoqqaanertat ikiorti-pioneeriusut piffissamik pilersaarusiornerannut naleqquttumik ilagiinnut suleqataanissaannut periarfissiissapput. Kiffartuussinissamik aaqqissuussinerit pillugit ilagiit paasitineqarluartariaqarput. Katersuutsitsisarnerit aaqqissugaalluartariaqarput. Aammattaaq naammattunik angalaartarfissanik piareersimasuuteqartariaqarpoq, piffissaalluartukkut atuagassianik allanillu naammattunik piniareertoqartariaqarpoq.
13 Kiffartuussinissamut immikkut pilersaarusiorit: Qatanngut angut aallaqqaammut ikiorti-pioneeriusarnissamut tunuarsimaartarsimasoq oqarsimavoq: „Naatsorsuutigisannik oqinneerarsuuvoq. Nalunaaquttap-akunnerisa pilersaarusiorluarnissaat kisimi pisariaqarpoq.“ Ilanngussap matuma tunuani ikiorti-pioneerit pilersaarusiornissaannut siunnersuuteqarpoq. Taakkua arlaat ilinnut naleqquppa? Taamaallaat sapaatip-akunneranut nalunaaquttap-akunneri 15-it kiffartuussinissamut immikkoortinneqartariaqarput.
14 Illumi ningiuusut allallu unnukkut sulisartut ikiorti-pioneeriunissamut nalunaarunik immaqa ullaap tungaa oqaluussiartornermut atorumassavaat. Atuartut allallu unnuakkut sulisartut immaqa unnulaakkuunerusoq kiffartuussinissaminnut atorumassavaat. Ulloq naallugu sulisartut sapaatip-akunneranut ataasiarlutik sulinngiffeqarnissaminnut periarfissarsisarsimapput imaluunniit unnukkut weekendinilu oqaluussiartortarlutik. Amerlasuut weekendit atorluarniarnerusarpaat, ikiorti-pioneeriunissartillu aalajangertarlugu qaammammi weekendit tallimaagaangata. 1997-imi taamaassaaq marsimi, aggustimi novembarimilu. Pilersaarusiorfik qupperneq 6-imiittoq atorsinnaavat. Eqqarsaatigilluaruk qinunikkullu naammineq qanoq nalunaaquttap-akunneri pilersaarusiorlugit aaqqissorsinnaanerlugit.
15 Ikiorti-pioneeriusarnerup ajunngequtaasa ilagaat eqaatsumik periaaseqarneq. Illit nammineq aalajangersinnaavat qaammammi sorlermi nalunaassanerlutit illillu nammineq kissaatigisattut qasseriarlutilluunniit taamaaliorsinnaallutit. Qaammatit tamaasa aalajangersimasumik ikiorti-pioneeriorusukkuit angusinnaanaguli, taava eqqarsaatigisimaviuk qaammat ataaseq allortarlugu taamaaliortarnissat? Ilaasa sivisunerusumik ikiorti-pioneeriunissartik nalunaarutigisarpaat.
16 Nalinginnaasumik pioneeritut kiffartuussilernissamut aallarniut: Amerlasuut pioneeritut anersaaqarneq pigaat nalinginnaasumillu pioneerinngorusullutik, kisiannili pissutsit atukkamik pisinnaatinneraatik aammalu piffissaqarfigissanerlugu nukissaqarfigissanerlugulu nangaassutigisarlugu. Maannakkut nalinginnaasumik pioneerit amerlanersaasa qularnanngitsumik ikiorti-pioneerisut kiffartorneq piffissaq tamaat atorlugu kiffartuussinissamut ikiuutitut atortarsimassavaat. Ikiorti-pioneeriunissamut pilersaarutit annertusigukku ullut tamaasa nalunaaquttap akunneranik ataasiinnarmik imaluunniit sapaatip-akunneranut ulloq ataaseq naallugu kiffartuussillutit pioneerinut kiffartuussinissamut nalunaaquttap akunnerinik piumasaqaatigineqartut anguneqarsinnaapput. Tamanna ajornannginnersoq paasiniarlugu qaammammi ikiorti-pioneeriunissannut nalunaarfinni ataatsimi arlalinniluunniit nalunaaquttap-akunneri 90-it anguniarsinnaavatit. Tamanna ilutigalugu pulaaqqittagaqalissaatit atuaqqissaaqateqartalerlutillu, tamannalu tunngavissiilluassaaq oqimaaqatigiilluartumik pionerisut kiffartornissamut.
17 Qatanngut arnaq ukiut arfinillit aalajangersimasumik ikiorti-pioneeriusimavoq. Piffissami tamatumani anguniagariuarsimavaa nalinginnaasumik pioneerinngornissani. Tamanna siunertaralugu suliffiit assigiinngitsut sisamat misilittarsimavai neriuutigalugu nalunaaquttap-akunneri 90-it angunissaat ajornarunnaassasoq. Qaammatit tamaasa pilersaarusiortarpoq tamanna pisinnaanersoq naatsorsorniarlugu. Qimerloorlualeraangamigilli ajornartutut isumaqarfigilertarsimavai. Jehovamit siulersorneqarnissani qinnutigiuartarpaa. Ullut ilaanni oqaluussinissamut tunngasumik ataatsimiinnermut piareersartilluni ilanngutassiaq Naalagaaffimmik Kiffartuuteqarneq-meersoq septembari 1991-imoortumi atuarpaa ima allassimasoq: ’Nalunaaquttap akunnerinut piumasaqaatinut pisariaqanngitsumik nakkutiginneqqissaarpallaarnermut taarsiullugu soormi katersuilluni sulinermut annertunerusunut suleqataasinnaanerit eqqumaffigigukku? (Juá. 4:35, 36)’ Oqaluttuarpoq: „Oqaaseqaatit taakku uteqattaarlugit tallimariarlugit imaluunniit arfinileriarlugit atuarpakka qularinngilluinnarlugulu Jehovap tamanna akissutigigaa. Taava nalinginnaasumik pioneerinngornissara aalajangerpara.“ Naak ullup affaanut sulisarnera pitsaalluinnanngikkaluartoq nalinginnaasumik pioneerinngornissaminut qinnuteqaateqarpoq. Sapaatip-akunnera qaangiummat piffissaq suliffigisartagaa allanngorpoq naleqqulluinnartunngorluni. Ima naggasiivoq: „Tamanna Jehovap siulersuineranut ersiutaannginnerpoq? Jehovamut qinnutigisannik ilitsersuunneqaraangavit tunuartinngisaannaruk — ilassiulli.“ Ilumoorlutit nalinginnaasumik pioneerinngornissat kissaatigigukku qaammatini pingasuni ikiorti-pioneerisut kiffartuussineq marsimi, apriilimi maajimilu tamanna anguniassallugu immaqa ilinnik qularunnaarsitsisinnaavoq.
18 Qularutiginngilarput Jehovap innuttami aallussilluarnerat pilluaqqussagaa upernaamullu suliniarluni annassut pillugu nutaarsiassamik nuannersumik oqaluussinermut ilungersuutiginninnerat tapersersorumaaraa. (Jes. 52:7; Rûm. 10:15) Illit marsimi, apriilimi maajimilu iliuuseqassavit anguniakkamik ikiorti-pioneerit 3000-t anguneqarsinnaaqqullugit?
[Qupp. 3-mi ungalusaq]
Ikiorti-pioneeritut kiffartuussinissaq qanoq naammassineqarsinnaasoq
◼ Periarfissatit isumalluartumik isigikkit
◼ Ilungersuutitit Jehovap pilluaqqussagai qinnutigikkit
◼ Oqaluussisartoq alla ikiorti-pioneerioqatigiumallugu qaaqqujuk
◼ Pitsaasumik nalunaaquttap-akunneri pilersaarusiukkit
◼ Atuagassianik naammattunik inniminniigit
◼ Ilagiit kiffartuussinissanut aaqqissorsimasaat tapersersukkit
◼ Torrutiinnarlugu oqaluussinissamut pisinnaasatit alapernaasikkit