Oqaluussinitsigut allanit immikkooruteqarpugut
1 Amerlasuut aperisarput: „Jehovap Nalunaajaasui upperisassiortullu allat suna assigiinngissutigaat?“ Illit qanoq akissagaluarpit? Aap, immaqa ajoqersuutigisatta ilaat innersuutigiussavatit. Kisianni aamma eqqarsaatigisimaviuk oqaluussisarnitsigut upperisassiortunit allanit immikkooruteqarnerput eqqartussallugu? — Mat. 24:14, 28:19, 20.
2 Ullutsinni inuit ikittuinnaat kissaateqarput upperisartik pillugu inunnut allanut eqqartussallugu. Immaqa inatsisinik maleruaasuunertik, kusanartumik torersumillu inuunertik imaluunniit ajunngitsuliortarnertik naammagaat. Kisianni qanoq ililluni annannissaq anguneqarsinnaasoq pillugu Biibilimi eqqartorneqartunik allat ajoqersussallugit pisussaasutut misiginngillat. Qanoq ililluta taakkunannga allaaneruvugut?
3 Ilungersuullugu oqaluussinerput upperisassiortut allat suliniutaannut assigiinngilluinnassuseqarpoq. Ullutsinni Jehovap Nalunaajaasuisa kristumiut siulliit maligassiaat malippaat, ukiullu 100-t sinnerlugit nutaarsiassaq nuannersoq eqiasuillutik oqaluussissutigalugu, allaat nunarsuup isua angullugu. Suliniutitta siunertaraa sapinngisamik inuit amerlasuut Guutip piumasaanut naleqquttumik inuunissaannut ikiussallugit. — 1 Tim. 2:4; 2 Pît. 3:9.
4 Illit qanoq ilisimaneqarpit? Guutip oqaasia oqaluussissutigissallugu ilungersuussisutut ilisimaneqarpit? (ap. sul.17:2, 3; 18:25) Oqaluussinermi suliniutinit illit upperisavit allat upperisaannit allaanerunera ersarippa? Upperisat pillugu oqaloqatiginnikkumatuutut ilisimaneqarpit? Aalajangersimasumik oqaluusseqataasarpit? Taaguutigisatta kisimi allanit immikkoortinngilaatigut, aammattaarli tassuuna allaatigineqartutut iliortarnitsigut — tassa Jehova nalunaajaassutigigatsigu. — Jes. 43:10.
5 Guutimut tullitsinnullu asanninnitta oqaluussineq ulappussutigissallugu kajumilersippaatigut. (Mat. 22:37-39) Taamaattumik kissaatigaarput periarfissat tamaasa atorlugit Jesus ajoqersugaalu assigalugit Naalagaaffimmik tusagassaq allanut oqaluttuarissallugu. Nutaarsiassamik nuannersumik tusarumasunut tamanut pilerilluta oqaluussiuarniartariaqarpugut. Taava inuit eqqortuliorusuttut „malugiumaarpaat . . . Guuti kiffartuussisaasa kiffartuussisiginngisaasalu atugaqartitaaneri qanoq assigiinngitsigisut“. — Malaki 3:18.