Napparsimasutut piuminartuugit
1 Inuuneq nuannaraarput paarilluarumallugulu. Biibilip najoqqutassiai ulluinnarni malikkaangatsigik aliasuutinik anniaatinillu amerlasuunik asattuunneqartarpugut, sallusuissullu sernissuutaalersarluni. (Uss. 22:3) Napparsimalersinnaavugulli nakorsiartariaqalerlutalu, allaallu pilatsittariaqarsinnaalluta. Qanorli iliorsinnaavugut suleqataalluarsinnaajumalluta?
2 Piffissaalluartukkut ikiortissarsiorit. Inuuneq illernartutut isigaarput ilisimasalinnullu ikiortissarsiupallattarluta. Aammik annaasaqarnissaq aarlerinarpat nakorsiarnissap kinguartinnissaa silatusaarnerussanngilaq, kingunerlutsinneqaannarsinnaammat nakorsamullu piuminaallisitsisinnaalluni. Pissutsit ajorsivitsinnagit ikiortissarsiornikkut piumassuseqarluarnerit takutiguk.
3 Paasinartumik nassuiaagit. Pingaaruteqarpoq aallaqqaammulli unnerluusserpalunnak pasinnikkajuppalunnallu inussiarnersumik ataqqinnippaluttumillu periaaseqarlutit paasinartumik nassuiaanissat. Aap akuinik akuneqarsimasunik nakorsaatitorneq pilatsinnerullu nalaani nammineq aammik atueqqittarneq pillugu aalajangiusimasannik nakorsaq oqaluttuuguk. Nakorsartinnissaq pillugu siumoortumik peqqussut annertusisaq suleqatigiilluarnissamut aallarniutaasinnaavoq.
4 Siumut sillimareerit. Ulorianartorsiorsinnaasut ilagippatit pilatsittussanngoruillu imaluunniit ernisussanngoruit nakorsaq aperisinnaavat: „Annertunerusumimmi aanaalissagaluaruma? Sapissanngilisiuk? Qanoq iliussavisi?“ Pissutsit pillugit nakorsaq passussissussaq oqaloqatigalugu piffissaq erlinnartoq asiutinngitsoorneqarsinnaavoq inuunerlu annaanneqarsinnaalluni.
5 Qujamasuttuugit. Napparsimmavinni sulisut amerlanerit suliffitsik qinersimavaat inuit allat ikiornissaat ilumoorlutik kissaatigigamikku. Suliaannik pingaartitsinikkut nalunaajaalluassaatit. (1 Pît. 2:12) Angerlareernerup kingorna qujallutit allagaqalaaruit immaqa ataavartumik sunniuteqarluarsinnaavoq.
6 Isumalluartuugit. Inuuneq pillugu isumalluartuunerit peqqinnartuuvoq. (Uss. 4:20-22) Nakorsap periarfissai killeqarput, Jehovalli isumassuinera tatigisinnaavat toqqissillutillu isumakuluutitit assaanut tunniussinnaallugit. — Lúk. 12:24; Fil. 4:6, 7.
7 Angerlareernerup kingorna napparsimasutut suli piuminartuusinnaavutit. Nakorsap ikiuiniarnerani suleqatigiuk peqqinnartumik nerisarnikkut naammattumillu qasuersertarnikkut. Aammattaaq ingasaannagu eqaarsaarneq naleqarpoq. (1 Tim. 4:8) Inuuneq nuannarigit nakorsap paasiguniuk peqqinnerillu paarilluarniarit takuleruniuk qularnanngitsumik ’napparsimasutut piuminartutut’ isigissavaatit.