’Misissoritsi eqqumaniarlusilu’
1 Pissutsit aaqqissuussaanerata matuma ulluini kingullerni pisussanut nalunaaqutaasut pingaartut eqqartoreeramigit, Jesusip ajoqersukkani ’misissoqqullugit eqqumaniaqqullugillu’ kajumissaarpai. (Mák. 13:33) Sooq eqqumaniassaagut? Inuiaat oqaluttuarisaanerata ulorianartorsiornerpaaffiani inuugatta. Anersaakkut aramalernissatsinnut pissutissaqanngilagut. Taamaalisoorutta naggatissap takutinnginnerani Jehovap uagutsinnut suliareqqusaata nalinga takusinnaanavianngilarput. Suliassaq suna?
2 Jehovap kissaatigaa innuttami naalagaaffik, inuiaat neriuutissatuaat, pillugu nutaarsiassaq nuannersoq nunarsuaq tamakkerlugu oqaluussissutigissagaat. Guutip peqatigiissortai suleqatigigutsigik kristumiutut ilumoortutut isigineqassaagut, piffissamik allallu ’oqaatsimik naassaanngitsumik inuussutilimmik’ tusarsinnaaqqullugit ikiortariaqarnerannik eqqumaffiginnilluta. (Juá. 6:68) Suliami pingaarutilimmi tamatumani peqataagutta anersaakkut eqqumanitsinnut takussutissaavoq.
3 Oqaluussinissamut kajumilersitsisoq: Jehovamut nalunaajaasutut oqaluussineq isumalluartumik isumaqarfigisariqarparput. Guutimut tullitsinnullu asanninnitta oqaluussiumalersissavaatigut. (1 Kor. 9:16, 17) Taamatut immitsinnut annatsikkumaarpugut tusartivullu annatikkumaarlugit. (1 Tim. 4:16) Taamaattumik aalajangiulluartigu akuttoqatigiimmik, kipisuitsumik qasusuitsumillu Guutip naalagaaffia, naalagaaffik inuiaat pisinnaasaat pitsaanerpaaq, oqaluussissutigalugu.
4 Kiffartornitta pingaaruteqassusianik qularunnaarsinneqarpugut paasigatsigu suli oqaluussinermi ulapputeqartilluta annikilliornartussaq angisooq allartikkumaartoq. Ulloq piffissarlu nalugatsigit mississortuartariaqarpugut, eqqumaniarlutalu Jehova Guuti qinujuarnikkut tunaaralugu. (Evf. 6:18) Oqaluussinermik suliaq suli annertusiartuinnarpoq. Ungasinngitsukkulli inuiaat oqaluttuarisaaneranni oqaluussersuaarnermik suliap annerpaaffissani tikissavaa.
5 ’Misissorluta eqqumanissatsinnut’ Jesusip kajumissaarutaa aalajaalluta malitsigu. Tamanna aatsaat taama pingaartigaaq. Takutiguk kajumissaarut ilumoorukkit. Ullut tamaasa misissorta Jehovamullu kiffartornitsinni sulilluarluta. Aap, ’eqqumaniarta putumatsaalillutalu.’ — 1 Tás. 5:6.