Immikkut pisinnaatitaaffik inuusuttut peqataaffigisinnaasaat
1 Maannakkut angajoqqaajusut meeraagallaramik ulluni aalajangersimasuni atuagassianik agguaasseqataasarsimanertik nuannersutut eqqaamavaat. Peqataasinnaanertik immikkut pisinnaatitaaffissuartut isigaat. 1949-mi ilagiit tamarmik ulluni aalajangersimasuni atuagassianik agguaassisarlutik aallartipput. Sapaatip-akunnerani ullormi aalajangersimasumi Napasuliaq Alapernaarsuiffik-up Iteritsi!-llu aqqusinerni, illumiit-illumut, pisiniarfinni sumiluunniillu neqeroorutiginissaat samminerusussaasimavaat. Oqaluussisartut inuusuttut ingammik ullut taakku atuagassianik agguaassiffissat qilanaarisarsimavaat, ilagiinni inersimasut suleqatiginissaannut periarfissinneqartaramik. Illittaaq meeraagallaravit taama misigisimavit?
2 Meeqqatit peqataatikkit: Meeqqat immaqa suli matuni oqaluussillutik aallarniisinnaanngitsut atuagassiat neqeroorutigisinnaavaat. Saqqummiussassamik naatsunnguamik ilinniartinnissaat kisimi pisariaqarpoq. Oqaaseqalaarnissaq naammappoq, immaqa atuagassiap saqqaaniittoq pillugu. Pulaartakkatta amerlasuut atuagassiat inuusuttortatsinniit nangaanatik piumasarpaat ilumoornerat pissuserinnerallu nersualaakulasarlugit. Meeqqat ikiorneqalaarlutik kiffartoriaatsimut tamatumunnga pikkorinnerulersinnaapput, taamaalillutillu Guutip naalagaaffia pillugu tusagassamik naleqangaartumik siaruartereqataasinnaallutik. Meeqqat alliartorneranni angajoqqaavisa soorunami ilinniartittariaqarpaat siumukartuarniassammata toqqaannartumillu oqaluussinermut pikkorinnerulerniassammata.
3 Ullorsiutini Jehovas Vidners kalender 2000-mi arfininngornerit tamarmik ullutut atuagassianik agguaaffissatut allassimapput. Malugaarpulli ullut atuagassianik agguaassiffissat ukiuni kingullerni atorneqarpallaarsimanngitsut. Taamaattumik angajoqqaajususi kajumissaarumavassi kiffartuusseriaaseq tamanna immikkut ittumik soqutigeqqullugu meeqqasilu paasinninnissaannut ikiorlugit akuttoqatigiimmik taamatut oqaluussinermi peqataaneq immikkut pisinnaatitaaffiusoq. Qularutissaanngilaq tamanna ilutigalugu kiffartornerat nuannaarnermik annerusumik nassataqarumaartoq.