Illernartitat pingaartippigit?
1 Illernartitamik pingaartitsinersugut aperineqarutta qularnanngitsumik angipallassaagut. Guutip aaqqissuussai suut illernartillugit pingaartippavut?
2 Ataatatsinnut qilammiusumut tamatta immikkut attaveqarsinnaanerput pingaartingaarparput. Taassuma neriorsoqqissaarpaatigut imminut ’palligukkutta, taava uagutsinnut palligukkumaartoq’. (Jâko 4:8) Utertitsissutissatut Jesus pilliutigisimanngikkaluarpat kinaluunniit inuunermik naassaanngitsumik periarfissaqarsinnaassanngikkaluarpoq. (Juá. 3:16) Ullut tamaasa kissaatigisarparput qinunitsigut Guuti tunissutaanut erlinangaartunut qamannga pisumik qutsaviginissaa.
3 Guutip oqaasia isumassarsiarititaasoq Biibili Jehovallu peqatigiissortai nunamiittut aammattaaq illernartutut isigaavut. Jehovap tunissutaanut pingaartitsinerput takutissavarput Biibilimi najoqqutareqqusat malillugit inuunitsigut, qatanngutigiittut asanninnerup nakussatsinneratigut, teokratiimik aaqqissussaanerup maleqqissaarneratigut, siulersuisullu suleqatiginerisigut. — 1 Pît. 1:22.
4 Inussiaq aalajaallunilu silatooq aqqutigalugu anersaakkut inuussutissarpassuarnik pissarsisarpugut. Aammattaaq tamatumunnga periarfissaqassaaq ukioq manna ataatsimeersuarnermi ’Oqaatsimik naammassinnittut’-mi. Tassani inuunermi pingaarutilimmik ilinniartitaassaagut asannittumillu katerisimaarnissaq pisariaqarteqisarput iluaqutissarssiffigisinnaassallugu. Tamanna illernartutut, qujamasuutigisariaqakkatut isigigipput qanoq takutissinnaavarput?
5 Jehovap illua sumiginnaqinagu: Nehemiap Jerusalemip qarmaasa qarmaqqinneqarnerannik ilungersorlutik sulisut oqaaqqissaarpai ’Guutip illua sumiginnassanngikkaat’. (Neh. 10:39) Nalitsinni Jehovap ’illua’ tassaavoq pallorfiginninneq aaqqissuussaa, ataatsimeersuarnerlu aaqqissussamut tamatumunnga ilaavoq. Sumiginnaqinagu, najuuffigiulli tusarnaaqqissaarlutillu. Taamaalillutit takutissavat tunissut taanna qanoq illernartitsigalugu. (Epr. 10:24, 25) Sunik pilersaaruteqarsinnaavugut aaqqissuussamik illernartumik tamatuminnga eqqortumik pingaartitsinitsinnik takutitsisunik?
6 Ullut pingasut tamaasa ilaaffigikkit: Tamatta ataatsimeersuarneq ulluni pingasuni pisussaq tamaat peqataaffigiumallugu pilersaarutigisariaqarparput. Ullut tamaasa aggiaarnissat ullormilu kingullermi ataatsimeersuarnermi naggasiilluni qinusoqarnera ilanngullugu najuunnissat pilersaarutigaajuk? Taava ataatsimeersuarneq pissarsiffigilluassavat. Ullut pingasut tamaasa ilaaffiginissaat tamatigut ajornaatsuinnaanngilaq. Suliffipput tamatumunnga naleqqussartariaqarpoq, aalajangertariaqarpugullu. Ataatsimeersuariarnissamut aqqutissaq aamma ajornakusoorsinnaavoq. Tamakkuli takkunnissannut akornutigeqinagit.
7 Misigisaq kajumissinartoq: Siorna Afrikami nunami eqqissiviilliorfioqisumi qatannguterpaaluit ataatsimeersuariartortillutik aqqutaani sakkutuut naammattoorsimavaat. Qatanngutit aperineqarput: „Kikkuuisi, sumunnarpisilu?“ Akippullu: „Jehovamut Nalunaajaasuuvugut, ataatsimeersuariarpugullu.“ Sakkutuut ilaat oqarpoq: „Ilissi Jehovap Nalunaajaasui sumilluunniit ersigisaqannginnguatsiarpusi. Ingerlaannaritsi, akornuteqarasi ataatsimeersuarsinnaassaasi. Nalussanngilarsili sakkutoorpassuit naammattoorumaarassigit. Aqqusernup qeqqatigoortuaannassaasi. Inunnik eqimattanik takugussi, uninnasi ingerlaannassaasi, aqqusernulli qeqqatiguuinnassaasi.“ Taamaaliorput, ajoratillu ataatsimeersuarfissamut apuupput. Qatanngutit pilluaqquneqarput illernartitanik pingaartitsinertik takutikkamikku.
8 Afrikami qatanngutitta misigisimasaattut unamminiarnartunik taama annertutigisunik nalaatassaqanngikkaluarluta, uppernerat malissinnavarput ataatsimeersuarnerlu tamaat najuuffiginiarlugu aalajangerluinnarluta. Allannguisariaqarutta Jehovamut siulersoqqulluta qinusariaqarpugut, qularinagu ataatsimeersuarneq tamaat najuuffiginiarlugu ilungersornerput pilluaqqujumaaraa.
9 Pilluaqqusaaniarniarit: Guutip oqaasia kajungeraarput, nalunnginnatsigu tassuuna annannissamut anersaakkut alliartorsinnaalluta. (1 Pît. 2:2) Ataatsimeersuarnerup najuuffigineratigut saqqummiunneqartullu eqqumaffiginerisigut Guutip oqaasianut uppernerput ineriartortissavarput Satanillu saassussinera akiorluarsinnaanerussallugu. Taamaalilluta Jehova isiginnaartullu tamaasa takutissavavut illernartitat pingaartikkivut, uagullu ’nigortut tammarumaartut ilaginngikkaatigut, uppertulli tarnimikkut annakkumaartut ilagigaatigut’. — Epr. 10:39; 12:16; Uss. 27:11.
10 Jehovap qilaap suppivii ammarumaarai pilluaatissiissutinillu killeqanngitsunik kueraaffigissagaatigut qilanaarisinnaavarput. (Mal. 3:10) Ataatsimeersuarnerup ’Oqaatsimik naammassinnittut’-p aallartinneranit ullormilu kingullermi naggasiilluni qinunermi „amen“-eertoqarneranut najuuffiginissaa anguniagariuk. Peqqissimissutigissanngilat.