Ataatsimeersuarneq „Guutip inuunermut aqqutigeqqusaa“

¹ ’[Jehova] iluartumik ingerlasut sernissortigigaat’, Ussatit 10:29-mi eqqaasinneqarpugut. Ukioq manna ataatsimeersuarnissaq naleqqulluartumik ima qulequtaqarpoq: „Guutip inuunermut aqqutigeqqusaa“. Saqqummiussassat ingerlaneranni qulequtaq tamanna qanoq erseqqissarneqassava? Ataatsimeersuarnissap ulluini pingasuni pisussanut tamatta qilanaarpugut.

² Ajoqersuiartortitat, nunani tamalaani sanaartortut oqaluussisarfinniluunniit takornartani kiffartortut allat immaqa ilissi ataatsimeersuarnersi najuuffigissavaat. Ataatsimeersuarnernut inuiannit tamalaanit peqataaffigineqartunut ataatsimeersuariat tuusintilikkuutaat najuunnissaat ilimagineqarpoq. Immaqa ilaat naapissavatit. Saqqummiussassani oqaluussisarfinni assigiinngitsuni suliaq Jehovap qanoq pilluaqqusimaneraa oqaluttuarineqassaaq.

³ Ullut pingasut ataatsimeersuarneq: Ukioq manna aamma ulluni pingasuni ataatsimeersuarnissaq pilersaarutigineqarpoq. Saqqummiussassat piffissaat: Ulloq siulleq: 9.30-12.05 aamma 13.50-17.20. Ullut aappaat: 9.30-12.05 aamma 13.50-17.30. Ullut pingajuat: 9.30-12.20 aamma 14.00-16.30. Ilaqutariit tamarmik najuussinnaaqqullugit sulinngiffeqarnissat qinnutigisimaviuk? — 5 Mos. 31:12.

⁴ Ataatsimeersuarnerit pilersaarutit uku malillugit ingerlassapput:

Silkeborgimi Jehovap Nalunaajaasuisa Ataatsimeersuartarfiat: 2.-4. juuli (J-2, S-3, S-5; ussersorluni); 9.-11. juuli (F-2, J-1); 16.-18. juuli (F-1, J-5); 23.-25. juuli (J-3, S-2, S-4A); 30. juuli–1. aggusti (J-4, S-1, S-4B); 6.-8. aggusti (tamilisut).

Herlufmaglemi Jehovap Nalunaajaasuisa Ataatsimeersuartarfiat: 3.-5. juuli (S-1, S-4B); 10.-12. juuli (S-3, S-5; ussersorluni); 17.-19. juuli (S-2, S-4A).

Bornholm, Rønnemi: 30. juuli–1. aggusti.

Kalaallit Nunaat, Nuummi: 31. juuli–2. aggusti.

Strängnäsimi: 26.-28. juuni (tuluttut).

⁵ Herlufmaglemi Bornholmimilu inissat killeqarput. Herlufmaglemi ataatsimeersuarneq peqqiilliorneq pissutsilluunniit allatut ajornartitsisut pissutigalugit Silkeborgiliarsinnaanngitsunut naatsorsuussaavoq. Bornholmimi ataatsimeersuarneq Peqatigiiffimmiit akuerisaallutik peqataatitaasunuinnaq naatsorsuussaavoq.

⁶ Ataatsimeersuariarluta ataatsimeersuareerlutalu angalatilluta torrutiinnarlugu oqaluussinissamut periarfissat alapernaattariaqarpavut. Orsersortarfinni, pisiniarfinni hotelinilu sulisut immaqa Naalagaaffiup tusarliussaanut soqutiginnipput. Naqitaaqqanik, atuagassiat normuinik kingullernik, atuagassiaaqqanik atuagassanilluunniit allanik nassarnikkut piareersimagit, inuit immaqa nutaarsiassamik nuannersumik anguneqarneq ajortut oqaluussiffigisinnaajumallugit. — 2 Tim. 3:17.

⁷ ’Sianiginiarit qanoq ilillutit tusarnaartutit’: Ataatsimeersuartut Lúkarse 8:18-imi unnersuussut maleruarunikku silatusaassapput. Biibili, erinarsuutit allattaaviillu nassakkit. Saqqummiussinerni tamani pingaarnersat tusarnaaqqissaakkit, naatsunillu allattuigit. Inuttut nammineq qanoq atorsinnaanerlugit imminut aperigit. Ataatsimeersuarnerup ullua naagaangat allattukkat atuartarneri Jehovallu inooriaasereqqusaa nammineq qanoq maleruartiginerlugu eqqarsaatigissallugu iluaqutaassaaq. — Uss. 4:10-13.

⁸ Malugisimavarput ilaat, inersimasut inuusuttullu, saqqummiussat nalaanni iniminni tusarnaarnatik torsuusarsuarni silamilu uteqattaarnermik allanillu oqaloqateqartarnermik ileqquliussisimasut. Inuusuttut eqimattakkuutaat ualikkut ataatsimeersuartarfimmit qimaguttut takuneqarsimapput. Meeqqat ilaat aamma eqqissiveeruttarunarput aninissaminnullu perusuersartarfiliarnissaq utoqqatsissutigisarlugu. Angajoqqaat eqqumaffiginnittut taamaaliornissaq akiorniassavaat. Ajoraluartumik aamma inuusuttut eqimattakkuutaat issiaqatigiittarput, issiavinni tunorliunerugajullutik, saqqummiussanut tusarnaarnatik, isussualuuttaqattaarlutik imminnullu allaffigisaqattaarlutik. Inuusuttortatta saqqummiussanut tusarnaarnissartik immikkut pisariaqartippaat allarpassuarnik eqqarsaateqaratik. „Inussiap aalajaallunilu silatuup“ ilinniartitaalluarnermut tamatta pisariaqartitatsinnut piffissaq nukiillu annertuut atorsimavai. (Mat. 24:45, NV) Paulusip siunnersuutaa maleruartariaqarparput: ’Tusakkavut pingaarnerusumik aalajangiussavavut, peersinneqaqqunata.’ (Epr. 2:1) Itsaq Jehovap kiffaasa ilaat sualuttumik ajortuliorsimapput Jehovap eqqaasitsissutaanut tusarnaaqqissaarsimannginnamik. Soorunami taakku malikkusunngilavut. — 2 Kun. 17:13-15.

⁹ Jehovap ataqqinaatissaanut atisalersoriaaseqarneq: Ulluni makkunani nalorninartuni silap matuma anersaavanik sunnertinnginnissarput eqqumaffigeqqissaartariaqarparput. (1 Kor. 2:12) Atisalersoriaaserput qallikkullu torersuunerput pilimanianngitsuusariaqarpoq ataqqinaallu Jehovap ilisarnaatigisaa ersersillugu. (1 Tim. 2:9, 10) ’Guutip annaassisitta ajoqersuutaa tamatigut naalannarsisinniarlugu’ akisuunik atisaqartariaqanngilagut. (Tít. 2:10) Jehovap ataqqinaatissaanut atisalersoriaaseqarnitsigut nalunaajaasinnaanerput sunniinertooq suusupaginngisaannaruk.

¹⁰ Oqaluussisartoq 16-inik ukiulik oqaluttuarpoq saqqummiussat kingorna qatanngutinilu neriniartarfiliarsimallutik, tassanilu malugisimallugu qatanngutit angutit arnallu naleqqutinngitsunik atisaqartut. Neriniartarfimmili neriniartut amerlasuut Jehovap nalunaajaasui torersumik naleqquttumillu atisallit kinaassutsimullu allagartallit takullugit ajunngitsumik qisuariarput. Tamatuma inuit ilaannut oqaluussinissaq aqqutissiuuppaa.

¹¹ Jehovap ataqqinaatissaanut ileqqorissuuneq: Nalunngilarput kristumiutut ileqqoqarnerput allat pallorfiginninnermik ilumoortumik isiginninnerannut sunniuteqartorujussuusinnaasoq. Taamaattumik kissaatigaarput nutaarsiassap nuannersup Jehovallu ataqqinaatissaanut ileqqoqarnissarput. — Fil. 1:27.

¹² Ataatsimeersuarnermi immaqa siullerpaamik najuuttunut ileqqorput qanoq sunniuteqassava? Nammineq kajumissutsiminnik kiffartortut akornanni suleqataajumassuseq malugissavaat? Avatangiisit eqqiluitsuusut, uagulluunniit meeqqavullu inigisavut qimatsinnagit iluarsaassisugut, malugissavaat? Ataatsimeersuartarfiliarnitsinni tamatumalu qimannerani ileqqorinnerput malugissavaat? Angajoqqaat meeqqaminnik nakkutiginneqqissaartut malugissavaat? Isiginnittunut tamanut pitsaanerpaamik sunniuteqarnissarput qulakkeertigu.

¹³ Tamatumunnga atatillugu ajoraluartumik eqqaasitsissutigisariaqarparput Silkeborgimi unnuisarfik ataatsimeersuarnermut najuukkumasunuinnaq naatsorsuussaasoq. Siorna inuusuttorpaaluit kingusissorujussuakkut angerlarsimapput aqaguanilu unnuisarfimmiillutik. Inuusuttut taamaattut takutitsinerlupput, allanik akornusersuillutik Jehovallu sassaalliussaanut ataqqinninnginnermik ersersitsillutik. Unnuisarfik feeriarniartunut silamiutullu sukisaarsarniartunut naatsorsuussaanngilaq. (1 Pîtruse 4:3 atuaruk.) Ataatsimeersuarnerit sioqqullugit utoqqaanertat unnuisarfinni ineqarniartut oqaloqatigisariaqarpaat, anersaap qulaani unnersuussutigineqartup maleruarneqarnissaa qulakkeerniarlugu. Unnersuussineq tamanna sumiginnarneqarpat, imigassamullu qasungasumik isiginnittaaseqartoqarpat qatanngutinulluunniit nakkutilliisunut ataqqinninnginnermik ersersitsisoqarpat unnuisarfimmiit anisitaanermik kinguneqarsinnaavoq.

¹⁴ Ataatsimeersuarnermi aningaasartuutit: Naak ataatsimeersuarnerni nerisassat aningaasartuutaajunnaaraluartut, nammineq ataatsimeersuartarfitsinnut, ilaatigut unnuisarfimmut, atatillugu suli assigiinngitsunik aningaasartuuteqarpoq. Aningaasat tungaatigut tukkorlusi tunissutisi pingaartinneqaqaat. — ap. sul. 20:35; 2 Kor. 9:7.

¹⁵ Issiavinnik inniminniineq: Ilaquttat qaniginerusat angalaqatigisalluunniit issiavinnik inniminniissunnissaat ajunngilaq. Saqqummiussalli ilaminiinnaannut najuunniartunut issiavinnik inniminniisoqartariaqanngilaq. Immikkut pisariaqartitsisoqalerpat saqqummiussat aallartinnerata kingorna issiaviit atorneqanngitsut nakkutilliisunit innersuunneqarsinnaapput.

¹⁶ Ullut tamaasa saqqummiussat naagaangata issiavinnit tæppit, erinarsuutit il. il. peerneqartassapput qatanngutinut eqqiaasussanut akornutaaqqunagit. Aqaguanut issiavinnik inniminniisoqarsinnaanngilaq. Qimatat KATATAT QIMATALLU-mi aaneqarsinnaapput.

Silkeborgimi issiaviit tammaarsimaarnermi atugassiat qulineqarsimasumi qulineqarsimanngitsumilu inissaqarput. Issiaviit ataatsimeersuarneq naallugu tassaniissinnaapput.

Herlufmaglemi inimi oqalugiartarfimmi natermi inissat utoqqarnut, napparsimasunut, angajoqqaanut meeraaqqanut qamutilisartunut allanullu immikkut pisariaqartitsisunut inniminnigaapput.

¹⁷ Utoqqarnut allanullu immikkut pisariaqartitalinnut ataatsimeersuarnerni tamani aaqqissuussisoqassaaq. Issiaviit nerisarfiillu taamaattunut naatsorsuussat ingiffiginaveersaakkit. Ikiortigisinnaasaminnik ilaqanngitsut inissarsiorneranni ikiornissaat eqqumaffigiuk. Silkeborgimi inersuarmi oqalugiartarfimmi innarluutillit biilinut inissiisarfiat saqqummiussanut allatut ilillutik tusarnaarsinnaanngitsunut naatsorsuussaavoq. Inissat killeqarmata tamanna ataqqineqartariaqarpoq.

¹⁸ Ataatsimeersuarnerup nalaani ataatsimeersuartarfik naalagaaffilersaartarfittut angisuutut isigaarput. Ataatsimeersuarnerli tamanut ammasuummat pigisavut, nalillit soorlu assiliiviit, videoliuutit immiussissutillu pooqattallu il. il. paarisariaqarpavut. Biilit qimakkaangakku parnaarnissaa eqqaamajuk nalilinnillu saqqumititseqinak. Angajoqqaat qitornamik nakkutigineqartuaannarnissaat isumagisariaqarpaat.

¹⁹ Assiliiviit, videoliuutit immiussissutillu: Tamakkua atornissaat ajornanngilaq najuuttulli allat innimigisariaqarpavut. Saqqummiussat nalaanni assiliiartortaqattaarutta allat akornusersuinnarnagit aamma nammineq saqqummiussanut pissarsiaqanngitsuussaagut. Amerlanertigut saqqummiussat pissarsiffiginerussavavut tusarnaaqqissaarutta naatsunillu allattuigutta. Immaqa qatanngummut napparsimasumut saqqummiussat immiuppavut, tamannalu ajunngeqaaq; namminerli atorniarlugit immiussisut amerlasuut paasisimavaat nalunaaquttap akunnerpassuini saqqummiussanik immiussamik tusarnaarnissaannut piffisaqarneq ajorlutik. Aamma malugiuk Peqatigiiffiup atortuinut sumilluunniit ikkussisoqaqqusaanngimmat torsuusallu asserneqaqqusaanatik. Aamma allat assersorneqassanngillat.

²⁰ Ikiueqqaarneq: Immikkoortortaq taanna ikiueqqaarnerinnarmik suliaqarpoq. Katsorsarneqarsinnaanngitsunik nappaatilinnik passussineq ajorpoq. Taamaattumik nammineq ilaqutaasullu peqqissutsikkut pisariaqartitaat siumut eqqarsaatigineqartariaqarput. Mattutissat, nalequttat, akkittartut, nipaallisaatit nakorsaatillu allat atukulasat nassarnissaat isumagiuk. Nappaatillit tamarmik, soorlu noqartartut, sukkortut uummalluttulluunniit sapinngisartik naapertorlugu pisariaqartitatik siumut nalilertariaqarpaat. Nakorsaatit pisariaqartut nassartariaqarpaat, qanigisaatalu ilageeqataataluunniit pissutsinik atugaanik ilisimannittup ilagiuaannartariaqarpaa pisariaqartumik ikiorsersinnaajumallugu. Katsorsarneqarsinnaanngitsumik nappaatillit imminiiginnarneqaraangata ataatsimeersuarnerullu nalaani ajortikkaangata ajornartorsiutaasarsimavoq. Katsorsarneqarsinnaanngitsumik nappaatilimmik ilaqutaqartut tamarmik qulakkeertariaqarpaat nakkutigineqartuaannarnissaat. Peqqiilliortut ilaqutaqanngippata ilagiinni utoqqaanertat tamanna eqqumaffigisariaqarpaat ikiuinerlu pisariaqartoq isumagalugu.

²¹ Ataatsimeersuarnerup nalaani nerisassat imigassallu: Ataatsimeersuarnerup nalaani nammineerluta nerisassanik imigassanillu nassartarneq sungiussimagunarparput. Aaqqissuussineruvoq pitsaasoq ataasiakkaanut suliaqarnerutitsisoq saqqummiussalli nalaanni suliassarpassuugaluanik peersitsisoq. Maanna tamarmik anersaakkut nerisassat tusarnaarluarsinnaavaat. Aammattaaq nammineq ilaquttamillu pisariaqartitaannik pisariitsumik isumaginninneq amerlanersaasa ilikkarsimagunarpaat taamaalillutik unillatsiarnerni allat ilassinissaat utoqqallu allallu immikkut pisariaqartitallit ikiornissaat piffissaqarfigilerlugu. Asanninneq ikiuiumatunerlu taamaattoq takullugu nersortariaavoq. Eqqaasitsissutigissavarpulli saqqummiussat nalaanni nerineq imernerluunniit eqqortuliornerussanngimmat. Ataqqinninnginnermik ersersitsinerussaaq.

²² Silkeborgimi ataatsimeersuartarfimmi qulineqanngitsortalimmi unillatsiarnerni tuperni nerisarfinni inersuarmilluunniit oqalugiartarfimmi nerisassanik nammineq nassatanik nerisoqarsinnaavoq, ataatsimeersuartarfinnili inersuarni nerisarfinniinnaq nerisoqarsinnaavoq. Ataatsimeersuartarfimmi imigassat aalakoornartortallit inerteqqutaapput, aamma unnuisarfinni. Malugiuk: Pooqattat nillataartitsiviit, nillornaveeqqutit il. il. atsiukkit adressillu immaqa aamma ilagiit ilaaffigisatit allaguk.

²³ Anersaakkut nerersuarnerput ulloqeqqasiornermilu qasukkarsimasumik eqqissisimasumillu ataqatigiittutut misigineq pingaarteqaarput. Aaqqissuussinerup siunertaa tamanna naapertorlugu illoqarfimmut neriartunnginnissaq kajumissaarutigaarput. Nerisassanik nassarneq pitsaaneruvoq. Qatanngutitta katerisimaaqatiginissaannut piffissaqarnerussaagut.

²⁴ Kuisinneq: Kuisittussat qinnuigineqarput ullup aappaani ullaap tungaani saqqummiussassat aallartitsinnagit oqaluttarfiup saavanut ingereeqqullugit. Nalunnguffasit pilimanianngitsut kusanartullu qinikkit. Tamanna utoqqaanertat apeqqutit ’Organisationsbogimiittut’ kuisittussat peqatigalugit sammigunikkik erseqqissassavaat. Kuisittussat namminneerlutik nalunnguffasinik allarummillu nassassapput. Silkeborgimi ataatsimeersuartarfimmi qulineqanngitsortalimmi kuisittussanut aamma kajumissaarutigineqarpoq makiaarummik nassaqqullugit.

²⁵ Kinaassutsimut allagartat ataatsimeersuarnermik kinaassutsitsimillu nalunaartuupput. Ataatsimeersuariarluta ataatsimeersuareerlutalu angalanitta saniatigut ataatsimeersuarfimmi unnuisarfimmilu atortariaqarpavut. Pisariaqarpat nakkutilliisut qatanngutinik tamatuminnga eqqaasitsittarumaarput. Kinaassutsimut allagartat unnuisarfimmi ineqartussanut ataatsimeersuarnernullu najuuttussanut tamanut siumoortumik tunniunneqarsinnaapput. Najuuttussat inuunerminnik Biibilip najoqqutassiai naapertorlugit suli aaqqiisimanngitsut allagartamik atuinerup akisussaaffeqarnera paasisariaqarpaat akueralugulu.

²⁶ Nammineq kajumissutsimik kiffartorneq: Nammineq kajumillutik sulerusuttut amerlasuut atorfissaqartinneqarput. Ataatsimeersuarneq sioqqullugu immikkoortortat arlaanni ikiuiniarlutik isumaqatigiissuteqarsimanngikkuit kajumissaarpatsigit ataatsimeersuarfissamut apuukkuit nammineq kajumissutsimik kiffartortut allaffianut nalunaaqqullutit.

²⁷ Allaaserisap matuma qallunaatuuani Danmarkimi ataatsimeersuarnerit pillugit amerlarnerusunik paasissutissaqarpoq.

²⁸ Katatat qimatallu: Nassaat KATATAT QIMATALLU-mut tunniunneqassapput, pigisaminnillu tammaasaqarsimasut qinnuigineqarput ataatsimeersuartarfik qimatsinnagu tassunga saaffiginneqqullugit. Nassaat ataatsimeersuarnerit kingorna ataatsimeersuartarfinnit piniarneqarsinnaapput. Tamarmik pigisaminnik, aamma biibiliutiminnik erinarsuutiminnillu, paarinnilluarpata iluaqutaangaassaaq. (Atuagaativit atsiornissaat adressivillu allannissaa eqqaamajuk.) Oqarasuaatit: Nuuk 32 43 43; Herlufmagle: 53 75 15 50; Silkeborg: 86 81 33 66.

²⁹ Atuagaasivik: Atuagaasivinni nutaanik saqqummersoqarpat tamakku kisimik pineqarsinnaapput. Kinaassutsimut allagartannguit atuagaasivinni pineqarsinnaanngillat, siumoortumilli ilagiinni inniminnerneqassapput aaneqassallutillu.

³⁰ Ataatsimiinnerit immikkut ittut: Pioneerit 20-t 40-llu akornanni ukiullit Gileadimik ajoqersuiartortitaanermillu soqutiginnittut ataatsimeersuarnerup ulluisa siullianni nalunaaqutaq 12.30 qaaqquneqarput. Ataatsimeersuarnerup ulluisa aappaanni nalunaaqutaq 12.30 oqaluussisartut kuisimasut 19-init 35-llu akornanni ukiullit Betelimi kiffartornissamut soqutiginnittut ataatsimiitinneqassapput. Ataatsimiinnerit sumi pissanersut ataatsimeersuarnermi nalunaarutigineqassaaq.

³¹ Ataatsimeersuarneq „Guutip inuunermut aqqutigeqqusaa“ najuuffigissallugu qilanaarpugut. Saqqummiussat tamaasa tusarnaarnissaat piareersimaffigilluarnerlugu qulakkeertariaqarparput Jehovap peqatigiissortani aqqutigalugit anersaakkut nerersuartitsinissaa tamakkiisumik iluaqutiginiarlugu. Taamaalilluta piffissami aggersumi ’ajunngitsuliornernut tamanut piginnaanngorsagaassaagut’. — 2 Tim. 3:17.