Angajoqqaat ilissi — meeqqasi ajunngitsunik ileqqoqalersissigit
1 Isumaannarmik nalaatsornikkuulluunniit ajunngitsunik ileqqoqalertoqarsinnaanngilaq. Arriitsumik ilinniagassaavoq. Taamaattumik paasinarpoq meeqqat ajunngitsunik ileqqoqalersinniarlugit piffissaq annertooq atortariaqartoq. Tamanna aamma isumaqarpoq angajoqqaat meeqqatik ’perorsarlugit inertertarnissaannut [Jehovamit]’ aalajangersimaqqissaartariaqartut. — Evf. 6:4.
2 Mikineranni aallartigit: Meeraaqqat nutaanik ilinniagaqarusussusii nutaaliorumatussusiilu maluginiarnartorujussuupput. Allamiut oqaasii ilinniarnissaat inersimasut ajornakusoortissinnaavaat, meeqqalli suli atualeratik oqaatsit assigiinngitsut marluk pingasulluunniit ataatsikkut ilinniarsinnaavaat. Isumaqarniaqinak illit meeqqat ajunngitsunik ileqqoqalersinniarnissaminut mikivallaartoq. Sallusuissummik Biibilimeersumik siusissukkut ilinniartinneqaruni ilinniartitsinerlu ingerlatiinnarneqarpat meeraq ilisimassuseqalissaaq, tassunga ’annattussanngorneranik ilisimalersitsisumik’. — 2 Tim. 3:15.
3 Oqaluussineq ileqquliulluaruk: Meeqqap inuttut pissutsimigut ineriartorfiani Guutip naalagaaffia pillugu aalajangersimasumik oqaluusseqataasarnermigut ileqqorileriartorsinnaavaa. Angajoqqaarpassuit meeqqatik mikineranniilli illumiit illumut oqaluussigaangamik ilagisarpaat. Angajoqqaat akuttoqatigiimmik oqaluussisarnerat meeqqat kiffartornermik pingaartitsilernissaannut ilungersuussilernissaannullu iluaqutaavoq. Aamma pingaaruteqarpoq angajoqqaat kiffartuusseriaatsit assigiingitsut qanoq peqataaffigineqartarneri meeqqaminnut takutissallugit.
4 Meeqqanuttaaq iluaqutaassaaq Teokratiimik Atuarfimmut ilaagunik. Tamatuma atuartarnissamut atuaqqissaartarnissamullu ajunngitsunik ileqqoqalersissavai. Biibilip oqaluuserinissaa, pulaaqqiinissaq Biibilimillu atuaqqissaaqateqarnissaq ilinniassavaat. Taamatut ilinniartinneqarunik pioneeriunissaminnut immikkulluunniit ittunik pisinnaatitaaffeqalernissaminnut piumassuseqalissapput. Betelimi kiffartortorpassuit ajoqersuiartortitarpassuillu meeraagallaramik Teokratiimik Atuarfimmi peqataasarsimanertik nuannersumik eqqaamavaat, tamannalu ajunngitsunik ileqqoqalernissamut ineriartortitsisutut isigalugu.
5 Marriortorsuatta Jehovap assani tamatta marrartut ippugut. (Jes. 64:8) Marraq nutaajutillugu sanajuminarnerusarpoq. Paneriartortillugu manngertikkiartornerusarpoq. Inuittaaq taamaapput. Inuusunnerutillugit allanngortikkuminarnerusarput. Meeraanerutillugit suli piuminarnerusarput. Meeraatillugit pissutsimigut ineriartortillugit ajunngitsumik ajortumilluunnit sunnerneqarsinnaapput. Angajoqqaat meeqqaminnik isumassuisut kristumiutut kiffartornermi ajunngitsunik ileqqoqalersinniarlugit sapinngisamik siusissukkut aallartittarput.