Nuannaarlutit suliassamik naammassinnittuugit
1 Jesusip najuunnissani Noap ulluinut, amerlanersaasa qisuariarfiginngisaannut, assersuuppaa. (Mat. 24:37-39) Taamaattumik amerlasuunit Guutip naalagaaffia pillugu nutaarsiassap nuannersup tusarumaneqannginnissaa piareersimaffigaarput. Taamaakkaluartoq kiffartornermi qanoq nuannaaginnarsinnavugut? — Tus. 100:2.
2 Eqqaamasariaqarparput tusarliussarput oqaluusseqqusissullu Guutiminngaaneersuummata. Sapinngisarput tamaat iliuuseqaraluarluta oqaluussiffigisavut itigartitsigaangata Jehova itigartittarpaat. Eqqaamasariaqarparput oqaluussinitsinni ilumoornerput Jehovap iluarimmagu. Tamanna suliassamik naammassinnittutut nuannaartuaannarnissatsinnut qamanngalu pilluaannarnissatsinnut iluaqutigaarput. — Jâko 1:25.
3 Jehovap annannissamik aaqqissuusaanut suli ilassinnittussaqarpoq. Naak amerlanerit soqutiginninngikkaluartut, naggatissaq taama qanitsigileraluarlugu, suli savanik assersuutaasunik katersugassaqarpoq. ’Illorpalimmi nunaqarfimmiluunniit [tamani]’ ’qinngaqqunnanngitsumik siunersiuilluta’ oqaluussiuaannartariaqarpugut. — Mat. 10:11-13.
4 Isumalluartuujuarit: Upperisarsiornerup eqqunngitsup tusaamanerlugaanerata amerlasuut paatsiveerutsissimavai. Aaqqissuussaanerullu tamatuma allat ’paarinerluganngortippai isumakkiiganngortillugillu’. (Matîuse 9:36) Amerlasuut suliffissaarunneq, peqqiilliorneq toqqissisimannginnerlu ilungersuutigaat. Tamatuminnga paasinnissinnaanitta kiffartornitsigut aalajaattuartissinnaassavaatigut. Inuit angalaarfigisartakkatsinniittut soqutiginerusaannik aammalu Guutip naalagaaffiata ajornartorsiutinik kisimi aaqqiissinnaaneranik oqaloqatigiumallugit ilungersortariaqarpugut. Nutaarsiassamik nuannersumik uummataat anguniarlugit Biibili atuagassianilu aalajangersimasut atortakkit. — Epr. 4:12.
5 Suliassamik naammaassinnittutut pilluartutut eqqaamajuassavarput ’Jehovami nuannaarneq uagut nakuussutigigatsigu’. (Neh. 8:10) Nuannaarunnaarnissatsinnut pissutissaqanngilagut. ’Illullu taassuma inui qinnaqqunnanngippata, eqqisseqqussutissi pissavai; qinngaqqunnarpatali, eqqisseqqussutissi uterfigissavaasi.’ (Mat. 10:13) Jehovamut kiffartornitsinni erinitsajuikkutta nuannaarnerulersissavaatigut nakussatsillutalu, aalajaassuserpullu pillugu pilluaqqujumaarpaatigut.