Apriili — ’assoroorfissarput ilungersorfissarpullu’
1 Eqqaaniaalluni nalliuttorsiorfiup nalaani sapaatip-akunnerit Jehovap innuttaanut isumatusaarfissaapput. Jiisusip toqumigut naammassisai eqqarsaatigeqqissaarumavavut Guutillu Jiisusip aava kuisaq tunngavigalugu tunniussaa eqqarsaatigalugu. Siorna ulloq apriilip 19-a eqqaagukku suna eqqaamaneruviuk? Unnuk taanna inuit katersuussimasut? Eqqaaniaalluni nalliuttorsiornermi anersaaq immikkut ittoq? Oqalugiaat ilungersuusserpaluttoq qinnutillu itisuut? Immaqa Jehovap Jiisusillu asannittuliaanut qujamasunnerit ersersinnerujumallugu aalajangerputit. Tamanna inuuninnut arlaatigut sunniuteqarpa?
2 Jehovap innuttai oqaasiinnakkut qujamasunniartanngillat. (Kol. 3:15, 17) Siorna apriilimi Jehovap annaassissutissatut aaqqissuussaanut pingaartitsinerisa kristumiutut kiffartorlutik immikkut ittumik suliniuteqalersippaat. Nunani assigiinngitsuni ikiorti-pioneeriusimasut aatsaat taama amerlatigipput. Ilagiippassuarni kiffartornermi nalunaaqquttap akunneri atorneqartut, atuagassiat tunniunneqartut pulaaqqinerillu katillugit aatsaat taama amerlisimatigaat. Silarsuaq tamakkerlugu tusindilippassuit Biibilimik atuaqqissaaqatigineqartalersimapput, eqqaaniaallunilu nalliuttorsiornermi najuuttut aatsaat taama amerlatigalutik. Danmarkimi maanilu ilungersorluta uummammik tamakkiisumik kiffartoqataagatta angusanut malunnaatilinnut tamakkununnga taperseeqataavugut.
3 Qularnaatsumik neriuuteqarnitta iliuuseqartippaatigut. Soorlu apustili Paulusi allattoq: „Taamaattumik sulivugut tamaviaarluta neriuffigigatsigu Guuti uumasoq inuit tamarmik — pingaarnerpaamik uppertut — annaassisaat.“ — 1 Tim. 4:10.
4 Eqqaaniaalluni nalliuttorsiorneq eqqarsaatigalugu Jehovap inuunartumik aaqqissuussaanut uppernerit qanoq malunnartinniarpiuk? Siorna apriilimi oqaluussisartut 14.885-iupput, ukiumi kiffartuussiffiusumi amerlanerpaajullutik. Ukioq manna amerlanerusinnaappat? Ajornatoqanngilaq. Taamaattoqassappalli oqaluussisartut kuisimasut kuisimanngitsullu tamavimmik oqaluusseqataasariaqarput. Nutaarpassuit peqataanissaminnut immaqa aamma piukkunnarsarsinnaapput. Apriilimi assoruunnissannut ilungersornissannullu pilersaarusiuleruit eqqarsaatigikkittaaq allat, aamma nutaat misilittagaqanngitsullu, oqaluusseqatigalugit suleqatigiinnissassinnut qanoq kajumissaarsinnaagitit.
5 Ingerlalluanngitsunut unittooqqasunullu ikiuutissaq: Qaammammi ataatsimi marlunnilluunniit oqaluusseqataasimanngitsunik nalunngisaqaruit immaqa oqaluusseqataanissaannik kajumissaarsinnaavatit aperalugillu oqaluusseqatigiumaneraatit. Ilagiinni unittooqqasoqarpat pulaarumallugit utoqqaanertat immikkut iliuuseqassapput apriilimiit oqaluusseqataasaqqilernissaannut kajumissaarlugit.
6 Tamavitta Jehovap anersaavanit kiffartornitsinni qinusariaqarpugut nakussatseqqulluta. (Luk. 11:13) Anersaava piumallugu qanoq iliortariaqarpugut? Guutip oqaasia isumassarsiarititaasoq atuartariaqarparput. (2 Tim. 3:16, 17) Aammattaaq ’tusartigit Anersaap ilagiinnut oqaaserisai’ sapaatip akunnerani ataatsimiittarnerit tallimat najuuffiginerisigut. (Saq. 3:6) Maannakkut piffissaalluarpoq ingerlalluanngitsut unittooqqasullu atuaqqissaartaleqqinnissaannik aalajangersimasumillu ataatsimiigiartaleqqinissaannut ikiussallugit. Taamaaliornitsigut nammineq anersaakkut peqqissuserput eqqumaffigisariaqarparput. Sulili allanik eqqumaffigisassaqarpugut.
7 Apustili Petrusi oqarpoq Guutip anersaani illernartoq ’naalatsiminut tunniuttaraa’. (Aps. 5:32) ’Inunnut oqaluussissutigeqqussutsimut nalunaajaatigeqqussutsimullu’ ilassinninneq naalannerup ilagaa. (Aps 1:8; 10:42) Ilumoorpoq Guutip anersaava illernartoq oqaluussinissatsinnut nakussatseqqulluta pisariaqartikkipput, takutikkutsiguttaaq Jehovap piumasaanik iliorumallutta malugilissaagut pisariaqartitatsinnik tamanik ikioraatigut.
8 Inuusuttunut ikiuutissaq: Angajoqqaat ilissi meeqqasi takusinnaavisigit allanut sallusuissut oqaluttuariumagaat? Akuttoqatigiimmik oqaluussisusi ilagisarpaasi? Ileqqorissaartuuppat? Sunami utaqqivisiuk? Ilagiinni kiffartornermut ataatsimiititaliami utoqqaanertaq saaffigisiuk, meerarsi apriilimiit oqaluussisartunngornissaanut piukkunnaateqarnersoq oqaloqatigiissutigalugu. (Takuuk ’Organisationsbogimi’ quppernerit 96-97.) Meeqqasi eqqaaniaalluni nalliuttorsiornerup nalaani Jehovap unnersiutigineqarneranut ajunngilluinnartumik peqataalluarsinnaapput. — Matt. 21:15, 16.
9 Qatanngutip arnap USA-mi Georgiameersup, panini Jehova pillugu allanut oqaluttuarisarnissaanut kajumissaartuarsimavaa. Paniata siorna anaanani oqaluusseqatigalugu atuagassiaaraq Guutip sumik piumaffigaatigut? angummut tunniuppaa imarisaalu takutillugit. Angutip aperaa: „Qassinik ukioqarpit?“ Akivoq: „Arfineq-marluk.“ Angutip tupigusuutigisimavaa taama takutitsilluarluni nalunaajaaffigisinnaammani. Sunaaffa angut sallusuissummi alliartorsimavoq, inuunerissalluguli ilungersuussimanagu iliuuseqarsimananilu. Ingerlaannaq angut nulialu panialu Biibilimik atuaqqissaaqatigineqartalerput.
10 Inuusuttorpassuit oqaluussisartooreerput, nuannaarutigaarpullu oqaluussinermi suleqatigigatsigit. Inuusuttut taakkua inuusuttoqatitik iliuuseqalersillugillu kajumissaarsinnaavai. Apriilimili aamma ilaqutariinni ataqatigiinneq anersaallu nakussatsinneqarnissaanut periarfissaavoq illernartumik kiffartoqatigiinnermikkut. Ilaqutariinni ittuusoq suliamik tamatuminnga siuttuusussaavoq. — Uss. 24:27.
11 Oqaluussisartunngorlaanut ikiuutissaq: Atuaqqissaaqatigisartakkatimmi? Apriilimi immikkut suliniuteqarnermi peqataatinneqarsinnaappat? ’Ilisarsinermi’ kapitali 2, immikkoortoq 22, imaluunniit kapitali 11 immikkoortoq 14 atuaqqissaaqatigiissutigigassiuk ilikkakkatik allanut oqaluttuariumallugit immaqa oqaaseqarput. Atuagaq naammassingajalersimagussiuk kapitali 18-imi, immikkoortoq 8-mi tamanna pillugu oqaluusereqqinnissaanut piareersarit, tassani allassimammat: „Qularnanngitsumik qanigisatit, ikinngutitit allallu ilikkakkannik pilereqalutit oqaluttuunniartarpatit. Immaqa taamaalillutit Jesusip sumiikkaluaraangamiluunniit pisarsimaneratut oqaluussisalereerputit. (Lúkarse 10:38; 39; Juánase 4:6-15) Immaqalu maanna iliuuseqarnerulernissat kissaatigaat.“ Atuaqqissaqatit taama kissaateqarpa?
12 Atuaqqissaaqativit Guutip oqaasia upperaa? Biibilimi najoqqutareqqusat malippai? Guutip malittareqqusaanut naapertuuttumik inuunini allanngortippaa? Ilagiinni ataatsimiittarnerit najuuffigisalerpai? Jehova Guuti kiffartorfigerusuppaa? Taamaappat utoqqaanertamik oqaloqateqaqqullugu kajumissaaruk, kuisimanngitsutut oqaluussisartunngornissaanut piukkunnaateqarnersoq aalajangersinnaaniassammassuk apriilimiilu oqaluusseqataasalerluni. (Takuuk ’Organisationsbogi’-mi quppernerit 94-96.) Taamaalioruni nammineq paasilissavaa Jehovamut kiffartulernermini Jehovap peqatigiissortaanit qanoq taperserneqarluni.
13 Ilumoorpoq atuaqatigineqartartut ilai allanit siumukajaarnerusarmata. Taammaattumik amerlasuut Guutip Naalagaaffianut Kiffartorneq-mi juuni 2000-moortumi quppernermi 4-mi, immikkoortuni 5-6-mi ilitsersuut tunngavigalugu oqaluussisartunngornissaannut ikioqqittariallit atuakkamik allamik atuaqatigineqaqqittarput. Eqqortumik isumallit Kristusimut ilumoorlutik ajoqersuganngornissaannut ’taamaaleqqajassagaluarpata taamaaleqqajassanngikkaluarpataluunniit’ neriuutigiunnaarnavianngilagut. (Aps. 26:29) ’Taamaaleqqajarsimanngitsunik’ sivisuumik atuaqqissaaqateqarsimaguit taakkununnga patsisissaalluassaaq ukioq manna eqqaaniaalluni nalliuttorsiorfik Kristusip pilliutaa qanoq pingaartitsiginerlugu ersersitsilernissaannut.
14 Qanoq ikiuisoqarsinnaasoq: Jiisusip allat qanoq ikiorai misissorutsigu oqaluussisalernissamut piukkunnaatillit qanoq ikiorneqassasut ilikkassavarput. Inunnik katersueriarluni apustilini oqarfigiinnanngilai taakkua oqaluffigilissagai. Siullermik oqaluussinissap pisariaqarssusia erseqqissarpaa, maniguunnissaannik ilinniartillugit taavalu aallarniutissaannik pingasunik tunillugit: oqaluusseqatissaq, oqaluussiffissaq tusarliussassarlu. (Matt. 9:35-38; 10:5-7; Mark. 6:7; Luk. 9:2, 6) Illittaaq taamaaliorsinnaavutit. Meeqqat, oqaluussisalerlaaq imaluunniit oqaluussikulanngitsoq ikiorniarukku siunertaqarluassaaq tulliuttut anguniarlugit ilungersuutigigukkit:
15 Pisariaqassusia ersersiguk: Oqaluussinerup pingaaruteqassusianik paasitiguk. Oqaluussineq pillugu isumalluarnartumik oqalugit. Ilagiit oqaluussinikkut naammassisaanik takussutissaqartumik misigisalikkersaarit. Matthæusi 9:36-38-mi Jiisusip iliuuserisimasaattut iliortaritsi. Oqaluussisalerlaaq unittooqqasorluunniit oqaluussinissamut Guutip anersaavanik nakussatsinneqaqqugu qinusarnissaanut kajumissaaruk. Aammattaaq ilinniartiguk silarsuarmi oqaluussineq qinnuttaqqullugu.
16 Oqaluussinissamut periarfissarpassuit eqqaakkit: Eqqaajuk ilagiinni atuakkamik atuaqqissaaqatigisartakkani illumiit-illumut angalaaqatigisinnaagai, ilaquttat, nalunngisat, suleqatit atuaqatilluunniit ulloqqeqqarsioqatigiinnermi oqaloqatigisinnaagai. Eqqaajuttaaq inoqatitsinut soqutiginninnermik takutitsilluta oqaloqatigiinneq qanoq aallarnerneqarsinnaasoq, assersuutigalugu busseqatinut. Siulliulluta saaffiginnikkutta nalunaajaalluarnissatsinnut periarfissaqalissaagut. Aap, neriuuterput pillugu „ullut tamaasa“ oqaloqatigissutigissallugu periarfissarpassuaqarpoq. — Tus. 96:2, 3.
17 Pitsaassaaq piaarnerpaamik oqaluussisartunngorlaarlu illumiit-illumut oqaluusseqatigiillusi ingiaqatigiikkussi. Apriilimi oqaluussinerujumallutit anguniagaqaruit oqaluussiffissaqarnissat isumagisariaqarpat. Oqaluussisarfissat peqqissaartumik angalaarfigiuk. Imaassinnaavoq angalaareersimallutit ataatsimiigialertillutilluunniit naammattooruminaatitat imaluunniit oqaloqatigilluareersimasat angerlasimasoq takusinnaagit. Naleqqulluarpat piffissaqaruillu alakkatsiaruk. Nuannaarlutillu toqqissisimassutigissavat kiffartuussinerillu naammassilluarsimallugu misigalutit.
18 Tusarliunniakkat kajumissinartunngorlugu piareersaruk: Guutip Naalagaaffia pillugu allanut oqaluttuarerusunnartarpoq, allaavorli nutaajulluni imaluunnit sivisuumik oqaluussisimanani taamaaliornissamut annilaangateqannginnissaq. Oqaluussilerlaat unittooqqasullu oqaluusseqataanissamut piareersaqatiginissaat iluaqutaassaqaaq. Oqaluussinermut tunngasumik ataatsimiinnermi oqaluussinissamullu katersuunnermi iluaqutaasunik siunnersuuteqartarpoq, namminerli piareersarnermit pitsaanerusoqanngilaq.
19 Nutaat piareersarnissaannut qanoq ikiorneqarsinnaappat? Atuagassiamik naatsunnguamik piuminartumillu aallarniuteqarlik. Aperikkit oqaluussilluni atorsinnaasaminnik nutaarsiassanik eqqaasaqarsinnaanersut, taavalu tamatumunnga attuumassuteqarsinnaasumik atuagassiani ujaasigitsi. Saqqummiunneqarnissaanut sungiusaqatigiigitsi, ingerlaannarlu oqaluussinermi atorsiuk.
20 Siuariartornissamut tunngavik: Siorna eqqaaniaalluni nalliuttorsiornermi silarsuaq tamakkerlugu najuuttut 14,8 millionit sinnerpai. Oqaluussisartut taamaallaat 6 millionit sinnilaarpaat. Tassa imaappoq 8,8 millionit sinneqartut soqutiginninnertik ersersissimavaat immikkut ittumik ataatsimeeqataanermikkut Biibilillu tunngaviusumik ajoqersuutaanik pingaarnerpaanik nassuiaaffigineqarlutik. Arlavut ilisarisimalerpaat, qularnanngitsumillu kikkuusugut paasillugu ilalernartissimavaatigut. Ilarpassuisa unnersiuutigisarpaatigut, silarsuarmi tamani oqaluussisoqarnera tapersersortarlugu allanullu illersortarluta. Katersarpassuit taakku siuariartornissamut tunngaviupput. Siuariaqqinnissaannut ikiorniarlugit qanoq iliorsinnaavugut?
21 Eqqaaniaalluni nalliuttorsiornermi peqataasut amerlanersaat tassaapput nammineq qaaqqusat. Tassa imaappoq arlatsinnik ilisarisimasaqareersimapput. Qaaqqusimasatsinnit takkuttoqarpat tikkilluaqqusaalluni misigitinnissaa akisussaaffigaarput ataatsimiinnermilu pissarsiaqarluarnissaanik ikiorlugu. Issiavissarsioqatigiuk, qularnanngitsumik inuppassuaqassammat. Biibilimik atukkeruk, erinarsuutinnillu erinarsoqatigalugu. Apeqquteqarpallu akiuk. Illit soqutiginninerit malugiguniuk soqutiginninnerulissutigissavaa. Soorunami tamatta nutaat tikilluaqqunissaannut oqaloqatigitsiarnissaannullu akisussaaffeqarpugut, sungiunniassammatigut.
22 Eqqaaniaalluni nalliuttorsioqataaneq najuuttumut sunniuteqarluarsinnaaqaaq. Ataatsimiigiaqataanera isumaqarsinnaavoq ujakkani allani nassaarisimanngikkaa, misigalunilu peqartugut misissornerusariaqakkaminik. Jehovap killeqanngitsumik asanninneranik ilisimasaqanngitsunut utertitsissutip akiliutaanik paasisaqalerneq nutaasorujussuusaaq. Allaanerunerput — ilumoornerput, inussiarnersuunerput, asannittuunerput ataqqinnittuunerpullu — ingerlaannaq takusinnaassavai. Naalagaaffilersaarfipput oqaluffinnit sungiussimasaminit, upperisarsiorpalaartunik assilialinnit siunertaqanngitsunillu ileqqulersuutilinnit, allaaneruvoq. Nutaat qularnanngitsumik malugissavaat naalagaaffilersaarfimmiittut innuttaasunit tamanit assigiingitsuneersuusut, aningaasanillu katersuisitsoqaanngitsoq. Misigisat tamakkua aggeqqinnissaminnut kajumississutigissaqaat.
23 Eqqaaniaalluni nalliuttorsiorneq qaangiuppat takkuttut nutaat tamarmik soqutiginninnerat siuarsarniarlugu neqeroorfiginissaannut piareersimasariaqarpoq. Qaaqqusaqarsimaguit immikkut ittumik akisussaaffeqarputit. Angerlaqqinnginneranni naalagaaffilersaarfimmi ataatsimiittarnivut allat paasisariaqarpaat. Tamanut ammasumik ataatsimiinnissami tulliuttumi oqalugiaatissap qulequtaa eqqaajuk. Paasitissigit ilagiit atuakkamik atuaqqissaarnerat qaninneq sumiinnersoq, qassinullu ataatsimiittoqartartoq. Kingornagut atuakkamik ’Skaberbogi’-mik (kalaallisuunngortitaanngilaq) tuniuk, oqaluttuaralugulu sapaatip-akunnerani 30. apriilimiit aallartittumi kapitali 7, „Hvad kan en bog lære os om Skaberen?“ oqaloqatigissutigiissutigineqassasoq. (Atuakkamik atuaqqissaaqatigiinnermi kalaallisut ingerlanneqartumi atuagaq Ilaqutariittut Pilluarneq isertugaateqarpoq atuaqqissaaqatigissutigineqarpoq.) Aammattaaq ilagiit ungasinngitsukkut ataatsimeersuarnissaat eqqaajuk, qanorlu ingerlasartoq oqaluttuaralugu.
24 Angerlarsimaffiannut pulaaqqikkumallugit isumaqatigiissuteqarfigisigit. Atuagassiaaraq Guutip sumik piumaffigaatigut? ’Ilisarsineq’-lu piginerai qulakkeeruk, taakkunatigut Biibilimi ajoqersuutit tunngaviusut ilikkarsinnaammatigit. Atuaqqissaaqatigineqariinngippata Biibilimik atuaqqissaaqatigiumallugit neqeroorfigisigit. Siunnersukkit atuagassiaaraq Jehovap Nalunaajaasui — Ataatsiussuseqarlutik Guutip peqqusaanik silarsuarmi tamarmi naammassinnittut atuaqqullugu, tassani peqatigiissortatta ingerlariaasia erseqqinnerusumik paasisaqarfiginiassavaat. Peqatigiiffik pillugu videofilmi takoqqullugit kajumissaarsigit. Ilagiinniittuni allat ilisarisimalernissaat isumagisiuk. Qaammatini tulliuttuni nutaat attavigiuartariaqarpatit, ilagiinni nakkutilliisup angalasartup tikeraarnerani ataatsimiinnissamut imaluunnit immikkut ittumik ataatsimeersuaararnissamut qaaqqusigit. Tamaasa periarfississigit paasitinniarlugit ’inuunermik naassaanngitsumik eqqortumik isumaqarfiginnillutik’ takutitsinissaannut. — Aps. 13:48, NV.
25 Utoqqaanertat qanoq iliorsinnaasut: Apriilimi suliniuteqarnermi immikkut iliuuseqartoqarnerani angusassanut utoqqaanertat apeqqutaalluinnarput. Atuakkamik atuaqqissaaqatigiinnermi aqutsisut allattuisariaqarput suut iliuuserisariaqarlugit atuaqqissaaqatigiinnerminni ataatsimiittartut tamarmik suliniummi tamatuminnga peqataanissaannut iluaqutaasussamik. Atuaqqissaaqatigiiffissinni inuusuttunik, nutaanik, oqaluussikulanngitsunik imaluunniit unittooqqasunik ilaqarpisi? Paasiniaagitsi angajoqqaanit, pioneerinit imaluunniit oqaluussisartut allanit ikiorniarneqarnersut. Illit nammineq ikiuiniarlutit sapinngisannik iliuuseqarit. Qatanngut arnaq ukiuni marlunni oqaluusseqataasimanngitsoq siorna apriilimi oqaluusseqataalluni akunnerit 50-t atorsimavai. Suumuna piumassuseqalersikkaa? Oqarpoq utoqqaanertanit ’savanik paarsisutut’ ineriartornartumik pulaarneqarsimagami.
26 Utoqqaanertat ilagiinnilu kiffartortut suleqatigiillutik qaammatini taakkunani suliniuteqarfinni naammattunik oqaluussiffissaqarnissaq, atuagassiaateqarnissaq atuagaateqarnissarlu qulakkeertariaqarpaat. Oqaluussinissamut katersuuffissat amerlanerusinnaappat? Taamaassappat nalunaarutigineqartariaqarpoq. Pingaarnerpaavorli ataatsimiinnerni namminerlu qinugaangatta Guutip naalagaaffia pillugu apriilimi suliniuteqarnerput immikkut ittoq Jehovamit pilluaqquneqarnissaa qinnutigisallugu. — Rom. 15:30, 31; 2 Thess. 3:1.
27 Siorna apriilimi ilagiit ilaanni utoqqaanertat oqaluussinerunissamut iliuuseqarsimapput. Oqaluussinermut tunngasumik ataatsimiinnerit tamaasa kajumissaarisarput oqaluussisartut ikiorti-pioneeriusinnaanissaat qinunikkut isumaliutigisaqqullugu. Ilagiinni utoqqaanertat tamarmik periarfissat tamaasa atorluarsimavaat apriili qaammatini tamanik suliniuteqarluarnerpaaaffissatut oqaluuserilluartarlugu. Tamatuma kinguneranik oqaluussisartut utoqqaanertallu katillugit 58 procentii qaammammi tassani pioneeritut kiffartoqataasimapput.
28 Immikkut iliuuseqarnerup nuannersortaa: Kiffartornermi ’tamaviaarluta sulinerput’ pilluaqqussutinik sunik nassataqarpa? (1 Tim. 4:10) Utoqqaanertat taaneqartumi ilagiinniittut allapput: „Qatanngutit angutit arnallu eqqartukulavaat oqaluussineruleramik asanninnertik attaveqatigiinnertillu nakussatinneqarsimasoq.“
29 Qatanngut angut inuusuttoq timikkut innarluutilik siorna apriilimi iliuuseqarnerujumalluni kissaateqarsimavoq. Pilersaarusiorluaanermigut aamma anaanaminik anersaakkullu qatanngutinik ikiorneqarnermigut ikiorti-pioneeritut kiffartornerusinnaanini nuannaarutigeqaa. Nammineq tamanna qanoq pissarsiaqaatigaa? Oqarpoq: „Aatsaat taama inuuninni siullerpaamik peqqitsigalunga misigaanga.“
30 Qularutissaanngilaq Jehovap naalagaaffini pillugu oqaluussinermik immikkut pisinnaatitaaffimmik pingaartitsisut pilluaqqusarmagit. (Tus. 145:11, 12) Naalakkap toquneranik eqqaaniaanitsinni siunissami Guutimut tunniussimanerup pilluaqqussutissartai annerungaartut eqqarsaatigisinnaavavut. Apustili Paulusip inuunermik naassaanngitsumik akissarsiassaq qilanaarisimavaa. Nalunngilluinnarpaali ingiinnarluni utaqqiinnarsinnaanani kissaatigiinnarlugulu. Allappoq: „Taannaavorlumi assoroorutigalugulu ilungersuutigisara taassuma nukinga uanni sunniuteqangaartoq nakuussutigalugu.“ (Kol. 1:29) Jiisusi aqqutigalugu Jehovap Paulusi pissatsissimavaa inuunartumik oqaluussinermi aalajaaqqullugu, aamma ullumikkut taamaaliorfigisinnaavaatigut. Tamanna apriilimi misigerusuppiuk?
[Qupp. 3-mi ungalusaq]
Illit kina oqaluussinissamut kajumissaarsinnaaviuk
Meeqqat?
Atuaqqissaaqatit?
Unittooqqasoq?