Kristumiunik peqateqarneq qanoq pingaaruteqartigaa?
1 „Inuk kinaluunniit qeqertaanngilaq,“ 1600-kkunni taalliortoq oqarsimavoq, oqaasiilu Biibili najoqqutaralugu inuup peqateqarnissamik tunngaviusumik pisariaqartitsisarnera pillugu eqqoqqissaarput. (Uss. 18:1) Kristumioqatitsinnik peqateqartarnitta pisariaqartitsineq taamaattoq matussusertarpaa. Qanoq ilillluni?
2 Oqaluussinermi: Siullermeersumik oqaluussinitsinni qatanngutitta tapersersuinerat iluaqutigaarput. Jiisusip ajoqersukkani ajoqersuiartortittarpai „marlukkuutaarlugit“. (Mar. 6:7; Luk. 10:1) Najoqqutassiaq taamaattoq malikkutsigu oqaluussinermilu allat suleqatigalugit oqaatsit Oqaluussisartup oqaasii 4:9, 10-miittut ilumoornerat misigissavarput. Upperneq, naalanneq asanninnerlu ilagisatsinni takusinnaasatta sapiissuseqarnerulersippaatigut kajumissisinnerulerlutalu.
3 Inuttut ikiuineq: Uppeqatitta tatineqarnermi akiuunnissatsinnut ussernartunullu ingalassimanissatsinnut kaammattorsinnaavaatigut ikiorsinnaallutalu. Allassimaffinnik iluaqutigisinnaasatsinnik innersuussinnaavaatigut, allaat qinnussinnaavaatigut soorlu uagut qinnussinnaagivut. (2 Kor. 1:11) Kiisalu maligassiuinerat uagutsinnut nakussassaataavoq eqqortuliornissatsinnullu iluaqutaalluni. — 1 Pet. 5:9.
4 Ataatsimiinnerni: Ataatsimiigiartuaannarutta kristumiutut peqatigiissinnaanermi pilluaqqussutit misigissavavut. (Epr. 10:24, 25) Ataatsimiinnerni saqqummiunneqartut imaqarluarput anersaakkut siunnersuutitaqarlutik, kristumioqatitsinnullu qaninnerulissaagut. Oqaluttarfimmiit allalluunniit akissutaannit uppernerminnik takutitsisunik tusarnissatsinnik periarfissaqarpugut. (Rom. 1:12) Ataatsimiinnerit siorna kingornalu oqaloqatigiittarnerput ataasioqatigiinnitsinnut nakussassaataavoq uppernitsinnilu nakussassaatigisimasagut oqaluttuarisinnaallutigit. Jehovamut suliaanillu innuttaanullu asannittunik peqateqartarnerput inuttut uagutsinnut sunniuteqarluarpoq. — Fil. 2:1, 2.
5 Qatanngutivut pisariaqartippavut. Peqanngippata aqqusinikkut amitsukkut inuunermut ingerlasumut ingerlanerput ajornarnerussagaluarpoq. Asannittumilli tapersersuimmata Jehovap nunaanut nutaamut naapertuilluartumut siumukartuarsinnaavugut. — Mat. 7:14.