Jehovamik erneranillu peqateqarnermi nuannaarneq
Ukioq manna pisussaq pingaarnerpaaq marsip 28-iani pissaaq
1 2002-mi marsip 28-iani seqernup tarrereernerata kingorna Nalakkap unnukkorsiortitsinerata nalliuttorsiutigineratigut Jehova Guutimik Jiisusi Kristusimillu peqatigiinnerput nuannaralugu takutissavarput. Pisumi tamatumani kristumiut tanitat sinneruttut naalagaaffimmik kingornusseqatissatik, Ataataq Ernerlu immikkut ’peqatigissallugit’ nuannaarutigissavaat. (1 Joh 1:3; Ef 1:11, 12) Savat allat millionillit, eqqarsaatimikkut uummatimikkullu Jehovamik erneranillu, Guutip suliareqqusaanik suliaqarnerminni, ataasiussuseqarsinnaallutik immikkut pisinnaatitaaffitsik eqqarsaatigilluassavaat. — Joh 10:16.
2 Qanimut suleqatigiinneq: Jehovap Jiisusillu peqatigiittarnitik nuannaarutigiuartarsimavaat. Inuit pinngortitaanngikkallarmatali qanimut attaveqatigiittuartarsimapput. (Mika 5:2) Taamaalillutik imminnut tunniussimaqatigiillualerput. Erneq angajulliliaq ilisimassutsitut kinaassusiligaasutut nunami inunngunngikkallarami oqarsinnaasimavoq: „Uanga ullut tamaasa nuannarisaraanga. Saani nuannaartuinnarpunga.“ (Ussatit 8:30 NV) Asanninnermut aallarniimik ukiuni kisissaanngitsuni qanimut najorteqarsimaneq Guutip erneranut sunniuteqangaarsimassaaq. — 1 Joh 4:8.
3 Inuiaat utertitsissummik pisariaqartitsinerat eqqarsaatigalugu Jehovap ernituani inunnik asanningaartoq uagutsinnullu neriuutissatuaasoq, utertitsisummik pilersitsisussatut toqqarpaa. (Ussatit 8:31) Soorlu Jehova ernilu ataatsimik siunertaqarlutik suleqatigiittut, taamatuttaaq uagut taakkua, nuannaarluta Guutip piumasaa suliaralugu asanninnermik nukittuumik ataasioqatigilissaavavut.
4 Pingaartitsinermik ersersitsineq: Eqqaaniaanermi najuunnitsigut, ataqqinninnitsigut tusarnaarluaqqissaarnitsigullu Jehovap asanninnera erneratalu pilliutaa pingaartillutigit takutissavarput. Jiisusip asanninnermik maligassiaanik, toqunissi tikillugu aalajaanneranik taamaalillunilu uagutsinnik utertitsilluni akiliussineranik, Guutip naalagaaffiani pilersinneqarsimasumi maannakkut kunngiuneranik aammalu Naalagaaffiup pilluaqqussutaasa inuiannut qanoq kinguneqarumaarneranik eqqaasinneqassaagut. Ilungersorluta Jehovap piumasaa naapertorlugu ’sallusuissutsip siammartinniarnerani suleqataanikkut’ uppernitta ersersittuartarnissaata pisariaqassusianik eqqaasinneqassaaguttaaq. — 3 Joh 8; Jak 2:17.
5 Allat peqataaqqullugit ikiukkit: Utoqqaanertaqatigiit immikkut ittumik suliniuteqartariaqarput Jehovap Nalunaajaasui unittooqqasut angalaarfigisartakkatsinniittut Jiisusip toquneranik eqqaaniaanermut peqqataaqqullugit. (Matt 18:12, 13) Minitaqannginniassagavit qaaqqussassatit tamaasa allattukkit qaaqqusissummik tunisinnaajumallugit.
6 Eqqaaniaanermut peqataajumasunik allanik nalunngisaqarpit? Nalliuttorsiornermut tamatumunnga pingaartitsinerulersinniarlugit iliuuseqarit. Inussiarnersumik qaaqqukkit tikilluaqqusaaneranillu misigitillugit. Biibilimik atuaqqissaaqatigisartakkavut soqutiginnittullu allat, ilaquttat allallu nalunngisat ukioq manna pisussamut pingaarnerpaamut qaaqquniarlugit ilungersorta. ’Kristusi-Jiisusimik ilisimanninneq annerungaartoq’ pillugu paasinnissimasut utertitsissut iluaqutigisinnaavaat. (Fil 3:8) Jiisusip pilliutaanik upperinnittut inuunermik naassaanngitsumik neriuut qularnaatsoq angusinnaavaat. — Joh 3:16.
7 Eqqaaniaalluni nalliuttorsiornerup inunnut eqqortuliorusuttunut sunniuteqarsinnaanera suusupaginngisaannassavarput. Ukiut marluk qaangiuttut Papua Ny Guinea-mi soqutiginnittut aqqanillit eqqaaniaanermut peqataajumallutik silarluttoq nalunaaquttap akunnerini 17-nini umiatsiaaqqamik angalasimapput. Soorooq? Oqarput: „Jiisusip toquneranik eqqaaniaanermi Jehovamik pallorfiginnittut allat ilagalugit nalliuttorsiorusukkatta, taamaattumik ilungersulussinnanngilagut.“ Soqutiginnittut taakku Jehovamik, erneranik kristumiunillu qatanngutigiissuarnik peqateqarnissaminnik ilungersuussingaarnermik pingaartitsingaarnermillu ersersitsipput.
8 Soqutiginnittut tamaasa Biibilimik atuaqqissaaqatiginissaannik neqeroorfigikkit. Ilagiit ataatsimiittarnerinut aalajangersimasumik peqataasarnissaannik ilikkakkaminnillu allanut oqaloqateqartarnissaannik kajumissaakkit. Biibilip najoqqutassiai malillugit ’qaamasumi sallusuissullu malillugu inuunissaannik’ ikiukkit. (1 Joh 1:6, 7) Jehovamut qanimut attaveqarnissaannik ilagiillu peqatigalugu Jehovap piumasaanik iliorsinnaatitaanermut pingaartitsinerat ineriartortittuaqqullugu kajumissaakkit.
9 Immikkut pisinnaatitaaffissuuvoq ’anersaaq ataaseq aalajangiussimallugu tarnimilu ataatsimi assorooqatigiilluta iivangkiiliumut upperneq pillugu’ ataasiussuseqarluni. (Fil 1:27, 28) Marsip 28-ani eqqaaniaalluni nalliuttorsiornermi najortigiinneq qiimmaallannartoq qilanaaralugu Jehovamut erneranullu qujamasuttuarta. — Luk 22:19.