Niuertarfinni sapiillutit oqaluussigit
1. Sooq niuertarfinni oqaluussinissamut annilaangagutta nikallussanngilagut?
1 Niuertarfinni oqaluussinissat annilaangagaajuk? Taamaappat nikalloqinak, allaammi Paulusi oqaluussisartoq sapiitsoq ersisuitsorlu oqaluussinissaminut ‘sapiillisaartariaqarsimavoq’. (1 Th 2:2, NV)Maannakkut unamminiarnartut nalinginnaasut siunnersuutillu atoriaannaasut tulliuttut sammissavavut.
2. Sooq sulisut akornusertoornissaat eqqarsaatigivallaassanngilarput?
2 Sulisut akornuserneqarnertik uumisuutigissavaat? Niuertarfinni amerlasuuni sulisut niuernianik kiffartuussisussaagamik akornuserneqarnissaminnut ilimasupput. Pisiniartutut isigigamitsit inussiarnisaartussaapput. Atisatigut peqqissaaruit inussiarnisaarlutillu ataqqinnittumik pissusilersorfigissavaatsit.
3. Pisinianut qanoq akornutaanaveersaarsinnaavugut?
3 Pisiniartorpassuit akornanni saqqummiissaanga? Ajornanngippat pisiniarfimmi ulapputtoqarpallaartinnagu aggerit, soorlu ammaqqammernerani. Aqutsisoq pisiniartitsisulluunniit kisimiilernissaat utaqqiuk. Naatsunnguamik saqqummiigit.
4. Niuertarfinni oqaluussinermi qanoq oqarsinnaavugut?
4 Qanoq oqarsinnaavunga? Arlalinnik sulisoqarpat, aqutsisoq oqaloqatigiuk. Oqarsinnaavutit: “Pisiniarfimmi sulisut angerlarsimatillugit naapikkuminaattarmata, suliffinnut pulaarpatsigit. Nalunngilara sulisutit, taamaattumik tuaviussaanga.” Tuniniaasunut paarlaateqqunata, nammineerlutik aperinngippata, pitsaanerussaaq aningaasatigut qanoq ingerlanersugut eqqaanngikkaanni. Niuertarfik apeqqutaatillugu, aqutsisoq aperisinnaavat sulisut oqaloqatigilaarsinnaanerlugit. Oqaatigeriikkatit sulisunut uteqqikkit. Sulisoq ulapippasippat naatsumik oqaaseqarit atuagassiamillu naqitaaqqamilluunniit tunillugu. Sulisut oqaloqatigisinnaanngikkukkit immaqa nerisarfiannut imaluunniit isersimaartarfiannut Biibililersaarutinik ilisiumasinnaavutit.
5. Niuertarfinni oqaluussinissatsinnut sumik pissutissaqarpugut?
5 Jiisusi Paulusilu sapiillutik inuit suliffiini oqaloqatigisarpaat, illittaaq taamaaliorsinnaavutit. (Matt 4:18-21; 9:9; ApS 17:17) Eqqissisimanissannik sapiissusermillu Jehova qinnuigiuk. (ApS 4:29) Niuertarfinni inoqartuaannarpoq, soormi taava oqaluusseriaaseq angusaqarfiulluartartoq taanna misilikkukku?