Imminut killilersimaaqinak — sapiunnerit qaangerniaruk
1. Sooq ilaat Biibilimik atuaqqissaaqateqalerniarlutik tunuarsimaartarpat?
1 Biibilimik atuaqqissaaqateqalernissannut tunuarsimaarpit isumaqaravit saperlutit? Kiffat aalajaatsut, soorlu Mosesi Jeremialu, suliassaminnut ilaatigut sapiuttarput. (2 Mos 3:10, 11; 4:10; Jer 1:4-6) Taamaattumik taamatut misigineq takornartaanngilaq. Qanoq qaangerneqarsinnaava?
2. Sooq illumiit illumut oqaluussineq naammagiinnassanngilarput Biibilimillu atuaqqissaaqatigisassat allanut tunniutiinnartarlugit?
2 Eqqaamassavarput Jehovap sapikkatsinnik piumaffiginngisaannaraatigut. (Tuss 103:14) Taamaattumik ‘ajoqersuganngortitsinissamik’ ‘ajoqersornissaannillu’ peqqussut naammassisinnaavarput. (Matt 28:19, 20) Piginnaatitaaffik tamanna Jehovap akornatsinni misilittagaliinnarnut pikkorissuinnarnullu tunniutinngilaa. (1 Kor 1:26, 27) Taamaattumik illumiit illumut oqaluussineq naammagiinnassanngilarput Biibilimillu atuaqqissaaqatigisassat allanut tunniutiinnartarlugit.
3. Jehovap qanoq Biibilimik atuaqqissaaqateqartarnissatsinnut piukkunnarsarsimavaatigut?
3 Jehovap piukkunnarsarpaatigut: Ajoqersuganngortitsinissamut piginnaasarput Jehovamit pivarput. (2 Kor 3:5) Silarsuarmi inuit ilinniagartuut ilisimasaqarfiginngisaannik peqatigiissortani aqqutigalugu Biibilimi sallusuissutsinik ilinniartippaatigut. (1 Kor 2:7, 8) Ajoqersueriaasia ilaarsinnaaniassagatsigu Jehovap ajoqersuisorsuup Jiisusip periaasia allatsissimavaa sulilu ilagiit aqqutigalugit ilinniartittarluta. Taamatuttaaq aamma Jehovap atuaqqissaaqateqartarnissamut pisariaqartitatsinnik tunisimavaatigut. Sallusuissut piviusorsiortumik paasiuminartumillu nassuiarneqarsinnaasunngorlugu atortussatsinnik, soorlu atuakkamik Biibilimi ajoqersuutigineqartut-mik, isumagisimavaatigut. Biibilimik atuaqqissaaqateqarneq immaqa ilimagisatsinnit ajornannginneruvoq.
4. Sooq tatigisinnaavarput Jehovap ikiorumaaraatigut?
4 Mosesip Jeremiallu suliatik Jehova ikiortigalugu naammassisimavaat. (2 Mos 4:11, 12; Jer 1:7, 8) Uaguttaaq ikioqqulluta Jehova qinnuigisinnaavarput. Ataatsimut oqaatigalugu Biibilimik atuaqqissaaqateqaraangatta, Guutimut iluarinartumik, Jehova pillugu sallusuissummik ilinniartitsisarpugut. (1 Joh 3:22) Taamaattumik Biibilimik atuaqqissaaqateqartarneq nuannersoq nalerisimaarnartorlu anguniagariuk.