Eqqaaniaalluni nalliuttorsiornissamut uummammit nuannaarluni piareersarneq
1. Eqqaaniaalluni nalliuttorsiornissap nalaa qanoq immikkut periarfissiiva?
1 Guutip annaanniarluta iliuuserisimasaa nuannaarutigissallugu marlunngornermi marsip 26-anni eqqaaniaalluni nalliuttorsiornissaq immikkut periarfissiivoq. (Es 61:10) Taamatuttaaq nalliuttorsiornissaq sioqqullugu nuannaarneq piareersarluarnissatsinnut iluaqutigissavarput. Qanoq?
2. Eqqaaniaalluni nalliuttorsiornissamut piareersarnissatsinnut suna kajumississutigissavarput?
2 Nalliuttorsiornissamut piareersarneq: Naalakkap unnukkorsiortitsinera pilimanianngitsuuvoq pingaaruteqarlunili. Taamaattorli annikitsualuttaanik minitaqassanngikkutta piareersarluarnissaq pingaaruteqarpoq. (Uss 21:5) Qassinut pinissaa katersuuffissarlu tulluartoq toqqarneqartariaqarput. Assersuutit eqqortut pissarsiarineqartariaqarput. Katersuuffissaq eqqiarneqassaaq piareersarneqassallunilu. Oqalugiartussatut toqqarneqarsimasoq piareersarluaqqissaartariaqarpoq, ikiuuttussat nakkutilliisussallu aaqqissugaalluarsimasariaqarput. Qularnanngitsumik tamakkua annerpaartaat isumagineqareersimapput. Utertitsissummut annassutaasumut qujamasuutiginninnitta pisussamut illernartumut piareersarluarnissatsinnik killippaatigut. — 1 Petr 1:8, 9.
3. Naalakkap unnukkorsiortitsinissaanut uummaterput qanoq piareersarsinnaavarput?
3 Uummammi piareersarneq: Aamma eqqaaniaalluni nalliuttorsiornissap isumaa uummatitsinni piareersarnissaa pisariaqarpoq. (Ezra 7:10) Taamaaliornissatsinnut eqqaaniaalluni nalliuttorsiornissap tungaanut Biibilimi atuagassat atuaqatigiissutiginissaannut Jiisusillu nunarsuarmi inuunerata ullui kingulliit eqqarsaatigeqqissaarnissaannut piffissaqartariaqarpugut. Jiisusip imminut pilliutigeriaannaaneranik eqqarsaatiginneqqissaarnikkut taassumatut iliuuseqarnissatsinnik killissavaatigut. — Gal 2:20.
4. Utertitsissutip iluaqutissartaata sorliup nuannaarnerulersippaatit?
4 Kristusip toqunerata Jehovap kisimi oqartussaanera akitsisippaa. Toqumik ajortimillu aniguisippaatigut. (1 Joh 2:2) Guutimik eqqissiveqateqarnissamik naassaanngitsumillu inuunissamik periarfissaqalersitsivoq. (Kol 1:21, 22) Jehovamut tunniulluinnarsimanitsinnik aalajangiussisimanerput nukittorsassavaa Kristusillu ajoqersugaasut aalajaattuartissalluta. (Matt 16:24) Qanortoq eqqaaniaalluni nalliuttorsiornissamut piareersarninni najuunninnilu nuannaarnerit alligili!