Naqitaaqqat nutaat soqutiginartumik ilusillit!
1. Suut nutaamik iluseqalerpat?
1 2013-imi ataatsimeersuarnermi “Guutip oqaasia sallusuissutaavoq”-mi naqitaaqqat nutaat tallimat saqqummersinneqarput. Kingusinnerusukkut Naalagaaffimmik Nutaarsiassat nr. 38 “Toqusimasut uummaqqissinnaasoraagit?”-mik qulequtalik naqitaaqqanut taakkununnga ilanngutitinneqarpoq. Naqitaaqqat arfinillit tamarmik nutaamik soqutiginartumik iluseqarput. Sooq nutaamik iluseqalerpat, oqaluussinitsinnilu qanoq pitsaanerpaamik atorsinnaavavut?
2. Naqitaaqqat nutaamik iluseqalernerannut suna siunertaava?
2 Sooq nutaamik iluseqalerpat? Sunniuteqarluartumik aallarniuteqarnermi immikkoortut iliuuserineqartussat amerlanertigut sisamaasarput: (1) Eqqarsalersitsisumik apeqquteqarit. (2) Allassimaffik oqaluuserisiuk. (3) Biibililersaarummik neqerooruteqarit. (4) Apeqqut tulliani akiniakkat oqaatigiuk aggeqqinnissallu isumaqatigiissutigisiuk. Iliuuserineqartussat sisamat taakku tunngavigalugit naqitaaqqat nutaat suliarineqarsimapput.
3. Naqitaaqqat nutaat oqaluussinermi qanoq atorsinnaavavut?
3 Qanoq atorneqassasut. (1) Imminut ilisaritereeruit saqqaa apeqqullu assigiinngitsunik akineqarsinnaasoq takutikkit. Pulaagaq qanoq isumaqarnersoq aperiuk. (2) Naqitaaraq qupperuk “Akissut Biibilimeersoq” eqqartorniarlugu. Ajornanngippat allassimaffik Biibilimit atuaruk. Pulaagaq piffissaqarpat “Tamanna qanoq iluaqutigisinnaagit” eqqartorsinnaavarsi. (3) Naqitaaraq neqeroorutigiuk pulaagarlu naqitaaqqap sinnerata atuarnissaanut kajumissaarlugu. (4) Naggataatigut naqitaaqqap tunuani “Eqqarsaatissiissut”-ip ataani apeqqut takutiguk tullianilu akissutip Biibilimeersup eqqartornissaanut isumaqatigiillusi.
4. Pulaaqqiigaangatta qanoq oqarsinnaavugut?
4 Pulaaqqiineq aamma ajornaatsuuvoq! Naqitaaqqap tunuani allassimaffiit innersuussutigineqartut atorlugit kingullermik apeqqut takutitat akiuk. Ingerlaqqinnginnini quppersakkap Tusagassat Guutimeersut-p assiliartaa takutissinnaavat. Quppersagaq ilinniagassarlu innersuussutigineqartoq, eqqartugarsi pillugu paasissutissanik amerlanerusunik imalik, pulaakkamut takutikkit. Quppersagaq perusuppagu aggeqqikkuit ilinniagassap samminissaa isumaqatigiissutigisinnaavarsi. Maanna Biibilimik atuaqqissaaqatigisartagaqalerputit! Aamma quppersagaq neqeroorutiginagu naqitaaraq alla neqeroorutigisinnaavat tullianilu eqqartornissaa isumaqatigiissutigalugu.
5. Sooq naqitaaqqat oqaluussinitsinni atortarpavut?
5 Ukiut 130-t sinnerlugit naqitaaqqat oqaluussinitsinni atortarsimavavut. Angissusaat ilusaallu allanngorartarsimagaluartut oqaluussinitsinni sunniuteqarluartumik atorneqartuaannarsinnaasimapput. Qanortoq ilisimassut Biibilimeersoq siaruartertuarniarlugu naqitaaqqat nutaat atortarisigit. — Uss 15:7a.