Utoqqaat illuanniittut puiornagit
1. Sooq utoqqaat angerlarsimaffianniittut pulaarneqarnissaat pingaaruteqarpa?
1 Amerlasuut utoqqalinertik ilutigalugu sanngiilliartornertik misigisarpaat. (Oqal 12:1-7) Utoqqaat ilaat angerlarsimaffianni najugaqarput, tamannalu pissutigalugu illumiit illumut oqaluussinikkut naapitassaasaratik. Allaat nunat ilaanni tamanna ajornakusoorsinnaasarpoq angajoqqaammi utoqqalisut meeqqaminnut ilaquttaminnulluunniit allanut nuuttarmata. Naak utoqqaat angerlarsimaffianni najugaqartut ilaasa pisinnaasaat eqqaamasaqarsinnaaneralluunniit killeqaraluartut Jehova pillugu ilikkagaqarsinnaallutillu taanna asalersinnaavaat. Qanoq ililluta nutaarsiassaq nuannersoq, ‘neriuuterput pilluarnartoq’, taakkununnga anngussinnaavarput? — Tit 2:13.
2. Illut susassaqartitsiviit pulaarneqarsinnaasut qanoq nassaarineqarsinnaappat?
2 Qanoq aallartittoqarsinnasoq. Utoqqarnut susassaqartitsiviit telefonbogen-ikkut internettikkulluunniit ujarlugit allattugaatigilerneqarsinnaapput. Angerlarsimaffiit soorlu “Utoqqaat najugaqarfii”, “Paaqqutarisat angerlarsimaffii” imaluunniit “Susassaqartitsiviit” immikkoortiterneqassapput. Kiffartornermik nakkutilliisoq oqaluussisartunik piukkunnaatilinnik assigiinngitsunut taakkununnga pulaartussanik aaqqissuussisinnaavoq. Aaqqissuussilluarnikkut Jehovamullu tatiginninnikkut ataatsimoortunik Biibilimik atuaqqissaaqatiginnilernissaq aallartinneqarsinnaasarpoq. — Uss 21:5; 1 Joh 5:14, 15.
3, 4. (a) Ataatsimut eqqartueqatigiinnissaq pillugu kimut saaffiginnissaagut? (b) Suleriaasissarput ilinniartitseriaasissarpullu pillugit qanoq nassuiaassissaagut?
3 Biibililersaarutinik eqqartueqatigiinnissamik isumaqatisiornissamut najugaqarfiup qanoq angitiginera apeqqutaavoq. Illuni amerlasuunik najugaqarfigineqartuni amerlasuunillu sulisulinni saaffiginnittarfimmut saaffiginninnikkut aqutsisoq oqaloqatigiumaneqarsinnaavoq. Utoqqaat angerlarsimaffianni ikittuinnarni najugaqarfigineqartuni aqutsisup oqaloqatiginissaanut siumoortumik isumaqatigiissuteqarfigalugu ajunnginnerussaaq.
4 Najugaqartut amerlagaluarpata ikikkaluarpataluunniit inuit atuarnermik Biibililersaarutinillu eqqartuinermik nuannarisaqartut kaammattorniarlugit kajumissutsinnik sulinerit oqaatigiuk. Ataatsimoorluni sapaatip akunneranut ataasiarluni minutsit 30-t missaani Biibilimut tunngasunik eqqartueqataarusuttoqarnersoq apeqqutigiuk. Biibililersaarutinik arlalinnik toqqagassaqarpoq, oqaluussisartulli paasisimavaat Biibilimik oqaluttuaatikka aamma Inuk inuit inuusimasut pingaarnerpaartaat atussallugit tulluartuusut. Susassaqartitsivimmi utoqqaallu illuanni sulisunut atuakkat takutissinnaavatit isumaqatigiissutigalusiullu ataatsimut eqqartueqatigiinnissaq qaqugu sumilu pissanersoq. Aaqqissuussat taama ittut nalinginnaasumik susassaqartitsisup qaammatisiutitaanut allanneqartarput. Jehovamut nalunaajaasuunerit oqaatigissallugu tunuarsimaaqinak. Erseqqissaruk naalagiartitsiniannginnavit Biibilimilli ilisimasaqarnerulernissaannik ikiorniaritit.
5. Siunnersuutit atoriaannaasut suut atuaqqissaarneq soqutiginartunngortillugulu nuannersunngortissinnaavaat?
5 Qanoq ingerlanneqassasoq. Atuaqqissaaqatigiinneq qanoq ingerlanniarnerit najugaqarfimmi pissutsit atukkallu apeqqutaapput, taamaattumik allanngueriaannaaneq naliliisinnaassuserlu pingaaruteqarput. Atuaqqissaaqatigiinnermi aqutsisussaq atuaqqissaaqatigiissutissamik arlaqartunik nassataqassaaq atuaqqissaaqatigeereernermilu katersoqqinneqassallutik. Quppernerit sammineqartussat assilineqarnerisa allanneri angisuujusariaqassapput. Pisarnitsitut immikkoortut apeqqutillu atuarneqartarsinnaapput eqqartorneqarlutillu. Piumasut pisinnaasullu immikkoortut allassimaffiilluunniit atuartarsinnaavaat. Uummaarissuugit, isumalluartuugit inussiarnersuullutillu. Aqutsisut akuersineratigut filmiutitta ilaat, Biibilimik upperinninnissamik nakussatsitsissutaasut immaqaluunniit oqaluttuaq Biibilimik tunngavilik, ilaatigut takutittarsinnaavatit. Immaqa qinnummik naatsumik paasiuminartumillu aallarniinissaq naggasiinissarlu ajornassanngilaq. Oqaluussisartut ilaasa allaat erinarsuutit naalagaaffilersaarutit atortarsimavaat.
6. Akerliliisoqarpat qanoq iliussaagut?
6 Taavami sammisaqarnerup nalaani akerliliisoqarpat? Akinialeruit eqqarsaqqaarit. (Kol 4:6) Immaqa apeqqutaanut allassimaffimmik tulluartumik takutitsivigisinnaavat. Tamanna ajornarpat oqaaserisaanut paasinninnerit ersersiguk ataatsimoortumillu sammisaqareernerup kingorna tamanna uterfigeqqikkumallugu.
7. Najugaqartoq apeqquteqarpat soqutiginnippallu qanoq iliorsinnaavit?
7 Ilaannikkut najugaqartut apeqquteqarsinnaasarput ilikkagaqarnerorusullutillu. Qatanngutip arnap periuseq una atortarpaa: “Apeqqutit soqutiginangaarami. Naammassigutta uterfigeqqissinnaavarput, taava marluulluta sammilaassavarput”. Ilaannikkut piffissami sumiiffimmilu allami soqutiginnittoq Biibilimik atuaqqissaaqatigineqalersinnaasarpoq.
8. Ataatsimut eqqartueqatiginninneq immikkullu Biibilimik atuaqqissaaqatiginninneq qanoq nalunaarsorneqartassappat?
8 Ataatsimut sammisaqaqatigiinnermi aqutsisuusoq taanna tamatigut aqutsisarpat ajunnginnerussaaq. Oqaluussisartut peqataasut piffissaq atorneqartoq nalunaarsorsinnaavaat. Atuaqqissaaqatiginnittarneq aalajangersimasumik aallartippat aqutsisup atuaqqissaaqatiginnineq qaammammut ataatsitut aamma pulaaqqiinerit tamaasa qaammammut katillugit nalunaarsortassavai. Immikkut Biibilimik atuaqqissaaqatigineqalersut ilikkagaqarsinnaallutillu paasinnissinnaasut pisarnitsitut nalunaarsorneqartassapput.
9, 10. Suliami matumani suut eqqumaffigissavavut? Nassuiaruk.
9 Atuaqqissaaqatigiittarneq qanoq ingerlatiinnarneqarsinnaasoq. Ataatsimut eqqartueqatigiinnissamut ulloq nalunaaqutarlu aalajangersimasuusarpata pitsaanerussaaq. Akuttoqatigiimmik atuaqqissaaqatigiittarnissaq isumaqatigiissullu naapertorlugu piffissaq eqqorlugu aallartittarnissaq naammassisarnissarlu najugaqartut sulisullu naatsorsuutigisarpaat. (Matt 5:37) Taamaattumik pimoorussisuuneq, eqiasuitsuuneq aaqqissuussilluarsinnaanerlu piumasaqaataapput. Misilittakkat takutippaat ataatsimut atuaqqissaaqateqarnermut oqaluussissartut piukkunnaatillit marluugaangata ajunnginnerusartoq. (Oqal 4:9, 10) Utoqqaat illuat angisuujuppat oqaluussisartut amerlanerit pisariaqartinneqarsinnaapput.
10 Inussiarnersuuneq inuttullu soqutiginnittuuneq pingaaruteqartupilussuupput. (Fil 2:4) Pulaarnermi siullermi ataatsimut atuaqqissaaqataaniartut tamaasa ilassinissaannut piffissaqarit. Qanoq ateqarneri maluginiakkit tullissaanullu eqqaamallugit. Naammagittarnerup misiginneqataanerullu tamaasa tikilluaqqusaasutut pingaartinneqartutullu misigitissavaat.
11. Atuaqqissaaqatigiinnermi aqutsisuusut sulisunut ilaqutaasunullu ataqqinninnertik qanoq ersersissinnaavaat?
11 Sulisunut najugaqartullu ilaqutaannut inussiarnisaarnissaq pingaaruteqartorujussuuvoq. Atuaqqissaaqatigiinnissamut aalajangersakkat iluarsineqareerpata najugaqarfimmi aqutsisoq oqaloqatigeqqaartinnagu allannguisoqannginnissaa pingaaruteqarpoq. Ilaatigooriarlutit susassaqartitsivimmi sulisoq isumasiorsinnaavat qanoq ingerlanersusi. Atuaqqissaaqatigiinnerup nalaani ilaquttaasut pulaartut ilassinissaannut piffissaqartarit atuaqqissaarnerullu siunertaanik nassuiaallugillu najuunnissaannik neqeroorfigalugit. Ilaqutaasut qularunnaarsikkit najugaqartut soqutigivikkitit.
12, 13. Utoqqaat illuini oqaluussisarneq qanoq iluaqutaatigisarsimasoq oqaluttuarineqarli.
12 Inernerit. Nakkutilliisut angalasartut ilagiillu kiffartornermi taama ittumi angusaqarluartarlutik nalunaaruteqarsimapput. Pisumi ataatsimi siullerpaamik eqqartueqatigiinnermi najugaqartut 20-t missaat najuussimapput. Tamatuma kingunerisaanik najugaqartut arfinillit immikkut atuaqqissaaqatigineqartalerput kingusinnerusukkullu ataaseq kuisilluni. Utoqqaat illuanni allami arnaq 85-inik ukiulik illoqarfigisamini ilagiinnut orniguttalersimavoq maannakkullu kuisikkusulersimalluni. Utoqqaat illuanni susassaqartitsinermut tunngatillugu annikillisaasoqalermat — Jehovap nalunaajaasuinik atuaqqissaaqatiginnittarneq ilanngullugu eqqugaammat — najugaqartut aqutsisumut naammagittaalliuuteqarput. Atuaqqissaaqatigiittarneq piffissap ingerlanerani aallarteqqinneqarpoq inunnillu 25-30-t missaannit peqataaffigineqartalerluni.
13 Asannittuliornerput utoqqaat illuanni najugaqartuinnarnit tupigusuutigineqanngilaq. Assersuutigalugu sulisut atuaqqissaaqatigiinnermut najuuttarnerat allaallu peqataasarnerat nalinginnaasuuvoq. Utoqqaat illuanni najugalinnut inuttut soqutiginnivinnitsinnik ersersitsinerput illoqarfimmiunit aamma maluginiarneqarsimavoq. (1 Petr 2:12) Utoqqaat illuanni aqutsisoq siunertamik oqaluttuunneqarami ima oqarpoq: “Sooq aatsaat takkuppisi? Qaqugu aallartissinnaavisi?” Aqutsisoq alla ima allappoq: “Ataatsimut eqqartueqatigiittarnerit illoqarfimmi utoqqaat illuinut tamanut innersuutigisinnaavakka. Illoqarfitsinni Jehovap Nalunaajaasui akeqanngitsumik kajumissutsiminnik upperisaminnut atatillugu tamanna suliniutigisarpaat.” Hawaii-mi utoqqaat illuisa ilaannit Jehovap Nalunaajaasui kajumissutsiminnik suliaminnut, “erlinnartuutitut akisunerpaatut” assersuunneqartumut, atatillugu nersornaaserneqarsimapput.
14. Sooq utoqqaat illuini najugaqartut attaveqarfigerusuppavut?
14 Jehovap utoqqaat, aamma utoqqaat illuini najugaqartut, aterminik unnersiutiginneqataaqquai. (Tuss 148:12, 13) Illit illoqarfigisanni utoqqaat illuini najugaqartunik nutaarsiassamik nuannersumik tusarusuttoqarnerluni? Ilagiinni utoqqaanertat utoqqaallu illuini aqutsisut ikiorsiullugit utoqqaat illuini najugaqartut oqaluussiffigisinnaavavut. Utoqqalisut eqqaamasarutsigit Jehova ilaassavarput. — Tuss 71:9, 18.