Oqaluussisartoqatigiit qanoq iluaqutigisinnaagitit
1. Ilagiit atuakkamik atuaqqissaaqatigiittarneranni pissutsit atugaasimasut suut oqaluussisartoqatigiinni suli atoriaannaappat?
1 Ilagiit atuakkamik atuaqqissaaqatigiittarnerat maqaasiviuk? Atuakkamik atuaqqissaaqatigiinnermi eqimattat ikittunnguusarput eqqissisimanartarlunilu. Ikinngutitaarnissaq ajornannginnerusarpoq anersaakkullu ineriartornartuusarluni. (Uss 18:24) Atuakkamik atuaqqissaaqatigiinnermik nakkutilliisup inuttut atukkavut ilikkartarpai ataasiakkaatullu qiimmassarsinnaalluta. (Uss 27:23; 1 Petr 5:2, 3) Pissutsilli taakku oqaluussisartoqatigiinni aamma atoriaannaapput.
2. Oqaluussisartoqatigiinni ikinngutitaarniarnermi anersaakkut ineriartuutaasumik qanoq ililluta siulliulluta iliuuseqarniarsinnaavugut?
2 Siulliullutit iliuuseqarit: Oqaluussisartoqatigiit ilagiit atuakkamik atuaqqissaaqatigiittartut amerlaqatigiinnangajappaat. Oqaluussinermi ‘assorooqatigiinnikkut’ qanimut ikinngutigiilertoqarsinnaavoq. (Fil 1:27) Oqaluussisartoqatigiinni illit qassit angalaaqatiginikuuigit? Tamatumani ‘ammarsinnaavit’? (2 Kor 6:13) Aamma ilaatigooriarluta oqaluussisartoqatigiinniittut ilaat ilaqutariittut atuaqqissaaqatigiinnermut peqataanissamut imaluunniit nereqatigiinnermut qaaqqusarsinnaavavut. Ilagiit ilaanni oqalugiartoq paarlakaallutik qaaqqusarpaat. Sapaatip akunnerani oqaluussisartoqatigiit tullinnguunneranni oqalugiartoq peqataanngikkaluarpalluunniit nereqatigiinnermut katersuuttarput qiimmassaqatigiittarlutillu.
3. Oqaluussisartoqatigiit paarsisumit isumassorneqarnerminni qanoq periarfissaqarpat?
3 Naak ilagiinni sapaatip akunnerani ataatsimiittarnerit ataatsimik ikiligaluartut, isumaqanngilaq oqaluussisartut paarsisunit isumassorneqannginnerulissasut. Oqaluussisartoqatigiit tamarmik nakkutilliisoqarput ataasiakkaanik oqaluussinermik ilinniartitsillutillu qiimmassaasussanik. Oqaluussisartoqatigiinni nakkutilliisup oqaluussinermi angalaaqatigisimanngippatit soormi angalaaqatiginiarlugu isumaqatigiissuteqarfiginianngiliuk? Kiffartornermi nakkutilliisup qaammammut ataasiarluni sapaatip akunnerata naanerani oqaluussisartoqatigiit assigiinngitsut pulaartarpai. Ilagiinni ikinnerusunik oqaluussisartoqatigiilinni eqimattat immikkut tamarmik ukiumut marloriarluni pulaarsinnaavai. Oqaluussisartoqatigiinnut ilaaffigisannut pulaaraangat oqaluusseqataaniarlutit pilersaarutigisarpiuk?
4. (a) Angalaarnissamut katersuunnerit qanoq aaqqissuunneqassappat? (b) Ilissinni katersuuttoqarsinnaanersoq sooq eqqarsaatigisariaqarpiuk?
4 Oqaluussisartoqatigiit sapaatip akunnerata naanerani immikkoorlutik naapittarnerat ajunnginnerusarpoq. Oqaluussisartoqatigiit ataatsikkungajak assigiinngitsuni katersuuttaraluarpata oqaluussisartunut katersuuffiusumukarnissaq angalaarfigisartakkamukarnissarlu ajornannginnerussagaluarpoq. Oqaluussisartut aaqqissuunneqarnerat sukkanerussagaluarpoq angalaarfigisartakkamullu apuutipallassinnaallutik. Aamma nakkutilliisumut oqaluussisartoqatigiinnik isumaginninneq oqinnerussagaluarpoq. Ilaatigooriarlunili pissutsit pissutigalugit oqaluussisartoqatigiit marluk amerlanerusulluunniit suleqatigiinnissaat kajumissaarutigineqarsinnaavoq. Qaammammi arfininngornermi siullermi imaluunniit Napasuliaq Alapernaarsuiffik-mik sammisaqareernerup kingornatigut ilagiit tamakkerlutik katersuunnermut naapinnerminni oqaluussisartoqatigiit ataatsimoorlutik issiaqatigiissinnaapput, qinunermik naggasiinnginnermi, minutsit arlaqanngitsut nakkutilliisoq aaqqissuussipallassinnaaniassammat. — Ungalusaq takuuk “Ilissinni katersuuttoqartarsinnaava?”
5. Ilagiit atuakkamik atuaqqissaaqatigiittarnerannut naapittarunnaaraluarluta suna qularutigissanngilarput?
5 Ilagiit atuakkamik atuaqqissaaqatigiinnerannut naapittarunnaaraluarluta, Jehovap piumasaanik iliuuseqarnissatsinnut pisariaqartitatsinnik tuniumaarpaatigut. (Hebr 13:20, 21) Jehovamit isumagineqartilluta amigaateqarnavianngilagut. (Tuss 23:1) Oqaluussisartoqatigiittut aaqqissuussaaneq aqqutigalugu pilluaqqussutissarpassuaqarpoq. Siulliulluta iliuuseqarutta ‘naammangaartunillu siaruarterigutta aamma naammangaartunik katersuiumaarpugut’. — 2 Kor 9:6.
[Qupp. 6-mi ungalusaq]
Ilissinni katersuuttoqartarsinnaava?
Katersuunnissamut angerlarsimaffiit ammaanneqarsimasut amigaatigineqarmata ilagiit ilaanni sapaatip akunnerata naanerani oqaluussisartoqatigiit arlallit ataatsimut naapeqatigiittarput. Katersuunnerit ilagiit aaqqissuussaanut ilaapput, taamaattumik angerlarsimaffimmi katersuuttarneq pisinnaatitaaffiuvoq. Ilissinni katersuuttoqartarsinnaava? Angerlarsimaffiit ajukkullugu tunuarsimaassanngilatit. Taamani ilagiit atuakkamik atuaqqissaaqatigiittarnerattulli katersuuffissanik toqqaaniarnerminni sumi najugaqarnerit assigisaaluunniit utoqqaanertat eqqarsaatigissavaat. Katersuunneq ilissinniisinnaappat oqaluussisartoqatigiinni nakkutilliisoq ilisimatissinnaavat.