Pallorfiginninnitsinni erinarsuutit nutaat!
1 Oktobarip sisamaanni 2014-imi peqatigiiffiup Watch Tower Bible and Tract Society of Pennsylvania-p ukiumoortumik ataatsimiinnerani kingullermi erinarsuutitta nutarsarneqarnissaanut pilersaarut nalunaarutigineqarpoq. Nutaarsiassatsialak pissanganartoq! Erinarsuutitta pallorfiginninnitsinni pingaaruteqassusianik najuuttut tamarmik eqqaasinneqarput. — Tuss 96:2.
2 Immaqa eqqarsarputit: ‘Sooruna erinarsuutitta nutarterneqarnissaat pisariaqartoq?’ Tamanna arlalinnik pissuteqarpoq. Siullermik, allassimaffiit paasilluarnerujartortarpavut, tamannalu erinarsuutitsinni taallanut sunniuteqarsinnaasarpoq. (Uss 4:18) Erinarsuutitsinnik nutarterinissamut pissutaasoq alla unaavoq: Erinarsuutini tuluttuuni oqaatsit oqariartaatsillu atorneqartut New World Translation nutaannginnerusoq naapertorlugu taalliaammata. Taamaammat taallat taakku New World Translation-imi nutartikkami oqaatsinut naapertuuttunngorlugit iluarsartuuttariaqalerput. Taallat nutarterneqarnissaat suliaangaatsiarmat nutarterinermut atatillugu aalajangerneqarpoq erinarsuutit nutaat ilanngunneqassasut.
3 Atuagaq erinarsuutinik imalik nutaaq naqiterneqareerpat aatsaat erinarsuutit nutaat atortalissavavut? Naagga. Nuannaarutigalugu nalunaarutigisinnaavarput qaammatit tulliuttut ingerlaneranni erinarsuutit nutaat arlallit nittartakkatsigut jw.org-ikkut saqqummersinneqassammata. Erinarsuut nutaaq saqqummersinneqareerpat oqaluussinermut tunngasumik ataatsimiinnermi pilersaarusiami allassimassaaq “erinarsuut nutaaq” naggasiullugu atorneqassasoq.
4 Erinarsuutit nutaat qanoq ilinniarneqassasut: Erinarsuummik nutaamik ilikkarniarneq unamminiarnartuusinnaavoq. Taamaakkaluartoq tussiaasiortoq assigalugu ilagiinni ataatsimiinnerni ‘nipangissanata’ erinarsoqataarusuppugut. (Tuss 30:13, 1900) Erinarsuut nutaaq ilikkarniarlugu uku tulliuttut iliuuserisinnaavatit:
Erinarsuut pattagiamik ingiorneqartoq nittartakkatsinniittoq uteqattaarlugu tusarnaaruk. Erinniaq uteqattaarukku eqqaamajuminartinnerussavat.
Taallaq paasiniaruk alanngaarsinnaanngorniarsaralugulu.
Taallartaa erinalerlugu ilikkarnissaata tungaanut uteqattaaruk.
Ilaqutariittut atuaqqissaaqatigiinnissinni erinarsuutit nutaat sungiunnissaata tungaanut uteqattaartarsigit.
5 Oqaluussinermut tunngasumik ataatsimiinnermi pilersaarusiami erinarsuut nutaaq allassimagaangat ilagiit pattagiamik ingiorneqartumut versimut siullermut sungiusarlutik tusarnaaqqaartassapput. Taavalu nipilersuut naallugu atorneqassaaq, tamatumanilu ilagiit erinarsoqataassapput.
6 Ataatsimiinnitsinni erinarsoraangatta nipitsinnik ataasiussusilimmik Jehovamik unnersiutiginninnerput nuannaarutigisarparput. Taamaattumik kristumiutut ataatsimiinnitsinni erinarsuut aallartikkaangat allamik peqquteqavinngikkaangatta inissatsinneereersimasassaagut.
7 Aamma allatut erinarsuutitsinnik tusarnersunik pingaartitsinerput ersersissinnaavarput. Ataatsimeersuarnitta aallartinngilaattaani unillatsiarnernilu nipilersuut aallartinneqartarpoq. Ukiumut marloriarlutik qatanngutit arnat angutillu nunanit assigiinngitsuneersut namminneq akilikkaminnik Pattersonimut New Yorkimiittumut angalasarput nipilersuutinik tusarnersunik pallorfiginninnermut atortakkatsinnik immiussiartorlutik. Taamaattumik ataatsimeersuarnermi aqutsisup ingilluta nipilersuummik tusarnaaqquppatigut naalattariaqarparput. Taamaaliornitsigut ilinniartitsissutissanut saqqummiunneqartussanut uummaterput piareersassavarput. — Ezra 7:10.
8 Ullumi ataatsimiinnitsinni erinarsuut nutaaq ima qulequtalik “Guutip naalagaaffia nunamut tikiulli!” naggasiutigissavarput. Erinarsuut taanna ukiumoortumik ataatsimiinnermi kingullermi ilisaritinneqartoq Guutip naalagaaffiata aallartinneraniit ukiut hundredinngortorsiorneranut atatillugu immikkorluinnaq erinniugaavoq.
9 Erinarsuutit nutaat Jehovaminngaanneersuupput ‘ajunngilluinnartut’. (Matt 12:35a) Erinarsuutit taakku ilinniarnissaat anguniagarisigu uummatitsinnillu iluunngarluta erinarsortarlutigit! Taamaalilluta Guuterput unnersiutigalugulu ataqqinaatississavarput. — Tuss 147:1.