Oqaluussineq qanoq nuannarinerulersin­naagit

1. Oqaluus­sinermi inunnut allanut saaffigin­ninnissaq ilaasa qanoq isumaqarfigaat? (Aamma asseq takuuk).

ATAATARPUT qilammiusoq asagatsigu inoqatigullu taassuminnga ilisarisiman­nilernis­saannik ikiorusuk­katsigit oqaluus­siffigisarpagut. Ilarpassuatta oqaluussineq nuannaarutigingaar­tarpaat. Ilaasali unamminiar­nartittarpaat. Sooq taamaappa? Ilaat ittuutupput, ilaallu misigisarput ilinniar­titsillaq­qissuunatik. Ilaasa qaaqquneqaratik kasuttornissaq nuannarineq ajorpaat. Imaassin­naavorlu itigartitaanissartik ernumagisaraat. Ilaat akerleriis­suteqarnerit ingalas­simanis­saannut perorsar­neqarsimapput. Jehova asangaaraluarlugu qatanngutit taakkua inunnut nalusaminnut oqaluus­sinissartik sapernar­tittarpaat. Taamaattorli suliap tamatuma pingaaruteqangaarnera nalunngin­namikku oqaluus­sisarput. Jehovap tamanna nuannaarutigingaar­tarsimassavaa!

2. Oqaluussineq nuannarival­laanngikkukku sooq nikallus­sanngilatit?

² Misigissutsit eqqartoriikkagut ilisarnarpat? Taamaappat nikalloqinak. Tunuarsimaarnerit maniguut­tuuninnut, malugeq­qusaarusun­nginninnut oqalliseqateqarusun­nginninnullu ersiutaasinnaavoq. Kialuunniimmi, pingaartumik allanut ajunngitsulior­niarnermi, itigartitaanissani nuannarineq ajorpaa. Ataatavit qilammiusup unamminiar­nartitatit ilisimavai, ikiorusup­paatillu. (Es 41:13) Misigissutsit nuanniitsut qaanger­nissaannut aamma oqaluus­sinerup nuannariler­nissaanut siunnersuutit tallimat allaaserisami matumani sammissavagut.

GUUTIP OQAASIA NAKUSSATSIS­SUTIGIUK

3. Pruffiitip Jeremiap allanut oqaluus­sinissaminut suna iluaqutigaa?

³ Itsarli Guutip kiffai unamminiar­nartitaminnik suliassin­neqaraangamik Guutip oqaasia nakussatsis­sutigisarsimavaat. Pruffiiti Jeremia assersuutigeriartigu. Jehovamit oqaluus­sinissamik suliassin­neqarami nangaagaluarpoq. Ima oqarpoq: “Inuusut­tuuvunga; oqalunneq naluvunga!” (Jer 1:6) Suna sapiissuseqalis­sutigaa? Jehovap oqaasii nakussatsis­sutigai. Ima oqarpoq: “Taava misigilersarpara soorlu ilunni innermik ikumasoqartoq, soorlu saanikka ikuallan­neqartut. Sapilerpunga, artulerpara!” (Jer 20:8, 9) Inuit akerlilersuil­lutillu tusarusun­ngikkaluartut Jeremiap oqariar­tuutissani oqaluus­sinissaminut nakussatsis­sutigaa.

4. Biibili atuaraangatsigu atuakkagullu eqqarsaatigeq­qissaaraangatsigit suna kingunerisarpaa? (Kolossimiut 1:9, 10)

⁴ Guutip oqaasiani oqariartuut nakussatsis­sutigisin­naavarput. Apustilip Paulusip uppeqatini Kolossimiut allaffigai Jehovap piumasaa pillugu ilinniar­neruneq iluaqutigisin­naagaat, ‘sutigummi tamatigut ajunngitsulior­tuarnissamut’ taamaalil­lutillu ‘Jehovap kiffaanut naleqquttumik inuunissamut’ kajumis­sissutigisin­naagamikku. (Kolossimiut 1:9, 10 atuakkit). Ajunngitsuliornerit ilagaat oqaluussineq. Biibili atuaraangatsigu atuakkagullu eqqarsaatigigaangatsigit Jehovamut uppernerput nakussatsin­neqartarpoq, Guutillu Kunngeqarfia pillugu oqaluus­sinerup pingaaruteqangaarnera paasilluar­neruler­tarparput.

5. Biibilimik atuartarnerput misissuinerpullu qanoq ililluta pissarsif­figilluarsin­naavarput?

⁵ Guutip oqaasia sapinngisamik pissarsif­figissagutsigu atuarnerup misissuinerullu piffissaqarfigil­luarnissaat pingaaruteqarpoq. Ilikkakkavit eqqarsaatiginis­saannut piffissaqarluartarit. Allassimaffimmik paasiuminaatsitannik atuaruit unillatsiariarlutit misissuigit. Jehovap Nalunaajaasuisa ujarliutaat imaluunniit Register til Vagttårnets publikationer atorlugit allassimaffimmik pineqartumik nassuiaatit misissukkit. Piffissaqarluarlutit misissuisaruit Guutip oqaasiata ilumoornera upperinerulissavat. (Tes 1. 5:21) Ilumoortorlu qularin­ngilluin­narukku ilikkakkannik avitseqateqar­nissamut kajumin­nerulissaatit.

PIAREERSARLUARTARIT

6. Sooq oqaluus­sinermut piareersarluassaagut?

⁶ Oqaluus­sinissamut piareersarluaruit allanik oqaloqateqarninni ernuman­nginnerussaatit. Jiisusip ilinniartitami oqaluus­siartor­tinnginnerini piareersar­nissaannut ikiorpai. (Luk 10:1-11) Taakkualu Jiisusip siunnersuutai maleruaramikkit oqaluus­sinermi nuannaarutigisaminnik ajunngitsuliungaarsin­naapput. – Luk 10:17.

7. Qanoq oqaluus­sinermut piareersarsin­naavugut? (Aamma asseq takuuk).

⁷ Qanoq oqaluus­sinermut piareersarsin­naavugut? Eqqarsaatigis­savarput suna eqqartorusun­nerlugu qanorlu nammineq oqaatsigut atorlugit oqaatigisin­naaneripput. Aamma iluaqutaasinnaavoq eqqarsaatigigutsigu inuit oqaluus­siffigisagut qanoq assigiin­ngitsutigut qisuariarsin­naanersut qanorlu naleqqus­sarsinnaanerluta. Taavalu inuit oqaloqatigilerutsigit eqqissisimaniarsarissaagut, qungujulallutalu inussiar­nisaassaagut.

8. Sooq Paulusip Jehovamut kiffartortut immersakkanut marraasunut assersuuppai?

⁸ Apustilip Paulusip uppeqatini ima allaffigai: “Erlinnartuut taanna immersakkani marraasuniittoq pigaarput.” (Kor 2. 4:7) Erlinnartuut suna pineqarpa? Guutip kunngeqarfia pillugu annaassiniarluni oqaluussineq. (Kor 2. 4:1) Immersakkat marraasut suuppat? Guutip kiffaanut nutaarsiassanik nuannersunik ‘nassarlutik’ oqaluus­sisartunut assersuutaapput. Paulusip nalaani niuertut aningaasanik nioqqutis­sanillu nalilinnik, soorlu nerisassanik viinninillu, angallas­sinermi immersakkat marraasut atortarpaat. Taamatuttaaq Jehovap oqariar­tuutini naleqangaartoq allanut ingerlateq­qinniarlugu atortarpaatigut. Jehovallu ikiuineratigut nangaanata oqaluus­sinissamut nakussatsis­sinnaavugut.

SAPIITSUUNISSAQ QINNUTIGISARUK

9. Qanoq inunnut qunujun­naarsin­naavugut? (Aamma asseq takuuk).

⁹ Ilaannikkut inunnut qunullutaluunniit allanit itigartitaanissaq ernumagisarsin­naavarput. Taava qanoq iliorsin­naavugut? Apustilit oqaluus­siunnaaq­quneqaramik iliuusii ilinniarfigil­luarsin­naavagut. Siooraleratik Jehovamut ikioqqupput. Ima qinupput: ‘Inussiaatitit sapiissuseqangaarlutik illit oqaatsit pillugu oqaluus­siniassammata ikiukkit.’ Qinnutaallu Jehovap ingerlaannaq akivaa. (ApS 4:18, 29, 31) Inunnut qununeq pissutigalugu oqaluus­sinissaq sapernar­tittarutsigu uaguttaaq Jehovamut ikioqqusassaagut. Inunnut qununerit akiorsin­naanias­sagakku inunnik asanninnerit nakussatseq­qullugu ikioqqullutit Jehova qinnuigisaruk.

10. Jehovap imminik nalunaajaanissamut qanoq ikiortarpaatigut? (Esaja 43:10-12)

¹⁰ Jehovap ilisiman­nittumisut, tassa nalunaajaasumisut, suliassip­paatigut. Sapiissuseqar­nissamullu ikiorumaarluta neriorsuisimavoq. (Esaja 43:10-12 atuakkit). Assigiin­ngitsorpas­suartigut ikiortarpaatigut, ilaatigut ukunatigut: Siullertut, oqaluus­sigaangatta Jiisusip najortarpaatigut tapersersorlutalu. (Mat 28:18-20) Aappaattut, Jehovap inngilit ilaat uagutsinnut ikiortissatut suliassippai. (Saqq 14:6) Pingajuattut, Jehovap anersaamik illernartumik tunivaatigut, tamatumalu ilikkak­katsinnik eqqaasis­sinnaavaatigut. (Joh 14:25, 26) Sisamaattut, Jehovap uppeqatinik oqaluus­seqatigisin­naasatsinnik tunivaatigut. Jehova annertoq­qutigalugu uppeqatittalu asannittut tapersersuinerisigut sapiilluta oqaluus­siuarnis­satsinnut amigaateqan­ngilagut.

NALEQQUS­SARTARIT ISUMALLUARLUTILLU

11. Oqaluus­sitillutit qanoq naapitaqar­nerusinnaavit? (Aamma asseq takuuk).

¹¹ Illumiit illumut oqaluus­sitillutit naapitaqarpian­ngikkaangavit nikallor­nalaartarpa? Taava una eqqarsaatigiuk: ‘Inuit maanna angerlarsiman­ngikkunik sumiissimassappat?’ (ApS 16:13) ‘Sulippat imaluunniit pisiniarfin­niippat?’ Taamaappat aqqusinermi oqaluussiguit amerlanerusunik oqaloqateqalersinnaavit? Qatanngut Joshuamik atilik ima oqarpoq: “Pisiniarfissuarni biilinullu inissiisarfinni pisullunga oqaloqateqar­niartarpunga oqaluus­sinissamullu periarfis­sarsior­tarlunga.” Nulianilu, Bridgetip, paasivaat unnulaan­nguakkut sapaatikkullu ualikkut oqaluus­sinermi amerlanerusunik angerlarsimasoqartartoq. – Ef 5:15, 16.

12. Qanoq paasisin­naavarput naapitarput qanoq upperisaqarnersoq arlaannil­luunniit soqutigisaqarnersoq?

¹² Naapitat soqutigin­nippasin­ngippat paasiniaruk qanoq upperisaqarnersoq arlaannil­luunniit soqutigisaqarnersoq. Joshuap Bridgetillu apeqqutit naqitaaqqat saqqaan­niittut atorlugit oqaloqateqar­niarneq nuannaraat. Assersuutigalugu naqitaaraq Biibili qanoq isumaqarfigaajuk? atoraangamikku ima oqartarput: “Ilaat isumaqarput Biibili Guutip oqaaserigaa, allallu isumaqataan­ngillat. Illimmi, qanoq isumaqarpit?” Taamaalillutik oqaloqateqarluarsin­naasarput.

13. Inuit tusarnaaruman­ngippataluunniit sooq oqaluus­sinerput iluatsitsil­luartutut isigisin­naavarput? (Ussatit 27:11)

¹³ Inuit tusarnaaruman­ngippataluunniit oqaluus­sinerput iluatsitsil­luartutut isigisin­naavarput. Sooq? Oqaluus­siartoraangattami Jehovap Jiisusillu peqqussutigisaattut iliortaratta – ilisiman­nittutut nalunaajaavugut. (ApS 10:42) Allaat oqaloqatigisatsinnik naapitaqan­nginnermi imaluunniit itigartin­neqarnermi nuannaarsin­naavugut nalunngin­natsigumi Jehova nuannaar­tillugu. – Ussatit 27:11 atuaruk.

14. Sooq uppeqaterput soqutigin­nittumik naapitaqaraangat nuannaarsin­naavugut?

¹⁴ Uppeqaterput oqaluus­siffigisar­takkatsinni soqutigin­nittumik nanisigaangat qiimmaal­lannartarpoq. Oqaluus­sinerput ujaasisoqatigiit meeqqamik tammarsimasumik ujaasiar­tornerannut Napasuliaq Alapernaarsuiffimmi assersuun­neqarsimavoq. Inuppassuit ujaaseqataapput, sumiiffip­passuillu ujarlerfigeq­qissaar­tarpaat. Meeqqap nanineqarnerani ujaaseqataasut tamarmik – meeqqamik nanisisuin­naanngitsoq – nuannaaqaat. Taamatuttaaq Jehovamik ilisarisiman­nilerusuttunik ujaasinermi ikiuinermilu suleqatigiit­tarpugut. Sumiiffinni oqaluus­siffigisar­takkatsinni ujaaseq­qissaar­nissamut tamatta pisariaqar­tinneqarpugut, soqutigin­nittorlu ataatsimiigiar­taleraangat ilagiin­niittut tamarmik nuannaarutigisarpaat.

JEHOVAMIK INOQATINNILLU ASANNINNERIT KAJUMIS­SISSUTIGISARUK

15. Qanoq oqaluussineq nuannaarutiginerulersin­naavarput? (Matiusi 22:37-39) (Aamma asseq takuuk).

¹⁵ Jehovamik inoqatitsinnillu asanninnerput eqqarsaatigigaangatsigu oqaluus­sinissaq kajumigineruler­tarparput. (Matiusi 22:37-39 atuakkit). Assersuutigalugu takorlooriaruk Jehovap oqaluus­sisugut isigigaangamisigut nuannaar­tarnera. Eqqarsaatigiullu inuit ilumoortut Biibilimeersut ilinnialerunikkit qanoq nuannaar­tigissanersut. Aamma tusarliussamut tusarnaartut Jehovamullu kiffartor­niarlutik aalajangertut naassaan­ngitsumik inuuneqarsin­naanerat eqqarsaatigis­sallugu kajumis­saataaqaaq. – Joh 6:40; Tim 1. 4:16.

16. Angerlarsimaffipput qimariaan­naanngik­kutsigu qanoq oqaluussineq nuannaarutigisin­naavarput? Assersuuteqarit.

¹⁶ Arlaannik pissuteqarlutit angerlarsimaffiit qimariaan­naanngiliuk? Taamaappat Jehova inoqatitillu asallugit ersersin­niarlugu iliuuserisin­naasatit eqqarsaatigikkit. COVID-19-imik nappaalanersuaqarmat aappariit Samuel Daniellalua angerlarsimaan­nartariaqarput. Tamanna oqitsuin­naanngilaq, kisianni oqarasuaatikkut oqaluus­sisarnikkut, allakkanik allattarnikkut aamma Zoom-ikkut Biibilimik misissueqateqar­tarnikkut sapinngisaminnik iliortarput. Samuel kræfterami napparsim­mavimmut katsorsar­tikkiar­tortarpoq, tassanilu naapitani oqaluus­siffigisarpai. Ima oqarpoq: “Ajornar­torsiutit misigis­sutsikkut, timikkut anersaakkullu nakkarsaatigisinaavagut. Taamaattumik Jehovamut kiffartornitta nuannaarutiginissaa pingaaruteqarpoq.” Taama atugaqarnermik saniatigut Daniella orlulluni aqqunarujus­suarami qaammatini pingasuni innangaan­nartariaqalerpoq. Tamatumalu kingorna ukiup affaa rullestoleqar­nissani pisariaqartippaa. Daniella ima oqarpoq: “Pissutsit atukkakka naapertorlugit sapinngisara tamaat iliuuseqarpunga. Peqqissaasup uannik ikiuisartup oqaluus­siffiginissaanut periarfis­saqartarpunga, pisiatsinnillu pajuttut aamma oqaloqatigisarpakka. Oqarasuaatikkullu peqqinnis­saqarfimmi atortunik tuniniaasartutut sulisoq oqaloqatigigaangakku nuannersumik misigisaqar­tarpunga.” Samuel Daniellalu siornatigutulli iliuuseqarsin­naanngik­kaluarlutik periarfissatik atorluar­tarpaat, tamannalu nuannaarutigaat.

17. Allaaserisami siunnersuutit qanoq iluaqutigil­luarsin­naavigit?

¹⁷ Siunnersuutit allaaserisami sammeriikkagut tamaasa maleruar­niartakkit. Siunnersuutit nerisas­siornermut ilitsersuummi akussat assigaat. Akussai tamarmik atorneqarpata nerisat mamartuussapput. Aamma illit siunnersuutit eqqartoriikkagut tamaasa maleruarukkit ajunngitsumik kinguneqassaaq – misigissutsit nuanniitsut qaangersin­naavatit oqaluus­sinerlu nuannarinerulerlugu.