Ilikkakkatit allanut ingerlateq­qissinnaaq­qullugit misissuigit

Biibilimik misissuineq uagutsinnut ineriar­tuutaavoq. Sulili iluaqutiginerusin­naavarput ilikkakkatta allanut avitseqatiginerisigut. Ussatit 11:25-mi tamanna assersuutaasumik allaatigineqarpoq: “Allanik imeruersaasoq nammineq imeruersar­neqarumaarpoq.”

Ilikkakkagut allanut ingerlateq­qikkaangatsigit eqqaamanerusarpagut paasilluar­neruler­tarlugillu. Erlinnar­tuutillu Biibilimeersut taakku inuit allat iluaqutigisin­naammatigit ingerlateq­qikkaangatsigit nuannaar­neruler­tarpugut. – ApS 20:35.

Una misiliguk: Sapaatip-akunnerata tulliuttup ingerlanerani ilikkakkannik avitseqateqar­nissannut periarfis­sarsiortarit. Ilaquttannut, uppeqatinnut, suleqatinnut, atuaqatinnut, eqqaamiunnut oqaluus­sinermiluunniit naapitannut taamaaliorsin­naavutit. Nammineq oqaatsitit atorlugit paasiuminartumik ingerlatitsisarit.

Una eqqaamajuk: Takoqqusaar­niarnak qiimmas­saaniarlutilli avitseqateqartarit. – Kor 1. 8:1.