Upperisarsiornikkut salloqittagaanermit aniguivunga

„TUPINNARTULIORNEQ“ najuuffigisara siulleq suli eqqaamavara. Taamani arfinilinnik affarmillu ukioqarpunga, ukiuugaalu piinsisiortut ataatsimiinneranni anaanaga ilagaara. Oqaluussisoq erinarsortilluni anersaamit tikinneqarpoq, soorluttaaq piinsisiortoqatitta erinarsorneranni taama pisoqartartoq. Inip qeqqaniippoq kissarsuussuaq ulamertoq oqaluussisup assamminik mangussiffigisagaa. Assamminik illuttut aamarsuaq aamaartuinnaq tiguaa, qummut isaallugu tigummillugulu inimi angallallugu. Erinarsortuarpoq ajugaasimaarpaluttumillu nilliummertarluni, taamaaliorneranilu najuuttut allat erinarsuutigalutik nilliaatigalutillu taanna ilullugu qitipput. Ataatsimiinnerup kingorna assai uutiterneqarsoralugit tamanit misissoqqissaarneqarput. Takussaasoqanngilluinnarporli!

Piinsisiortut oqaluffianni Kentuckymiittumi annaanama ornittagaani tupinnartuliaasartorpassuit tamanna ilaannaraat. Mákorse kapitali 16-imi, versi 17-iminngaanniit allassimasut, tassa ajoqersukkat oqaatsinik nutaanik, imaluunniit allanertanik, oqalussasut, napparsimasunik ajorunnaarsitsissasut, pulateriaarsunnik tigusissasut aammalu toqunartumik imissasut, tassani ilaasortaasunit pingaartinneqartorujussuupput. (Versit taakku qularnanngitsumik eqqunngitsuupput, Bibelimik allatani qanganisaanerpaatut ilisimaneqartuni ilaannginnamik.) Piinsisiortut ilagiivi tamakkeratik tamakkuninnga pingaartitsisuupput; isumaqarluinnarpulli ilagiit ajoqutissarsinatik tupinnartuliortartunik ilaasortaqartut pinngitsooratik Guutimit siulersorneqartuusimassasut.

Indianamut nuuppugut, 1953-imilu aqqaneq-marlunnik ukioqarlunga kuisippunga. Guitarerneq ilinniarpara ataatsimiinnernilu erinarsoqatigiit ingiortalerlugit. Guutimut kiffartorninnut ilaasutut tamanna isigaara — tassami erinarsornerni taama ittuni piinsisiortoqatitsinnut anersaaq orniguttarpoq. Anersaap tikikkaanganga oqaatsinillu allanertanik oqaluleraangama nalusarpara qanoq oqalunnerlunga, nuannersumilli misigisimasarpunga.

Uanga nammineq pulateriaarsummik tigusinngisaannarsimavunga, piinsisiortulli tamakkulerisarnerat eqqaamasaqarfigaara. Tamanna pivoq sapaatip-akunnerata naanerani ilagiinnut Kentuckymiittunut ilaaffigisimasannut tikeraarninni. Oqaluussisoq tikeraartuusoq anersaamit tikinneqarpoq, nassataminillu karsimit pulateriaarsunnut inigitinneqartartumit pulateriaarsuk makkulaartulik ammuppaa. Nillerujussuaqattaajutigaluni pulateriaarsuk assamminut immuppaa. Erinarsortut ilagalugit taassuma tunuaniippunga, eqqaamavaralu qanoq inuaasa akornisigut aak kuulersoq. Taava oqaluussisoq, ukiut arlalialuit tamatuma siorna aamarsuarmik aamaartumik tigummisoq takusimasara, anersaamit tikinneqarpoq; taanna sassarpoq, pulateriaarsullu oqaluussisup tikeraartuusup assaanit tiguaa karsimullu ilillugu. Angutip kiitinnini ajoqutissarsiffiginngilaaluunniit. Nalunngilakkali pingasut pulateriaarsummik kiitinnertik toqussutigisimagaat, ilaatigut sakera angut.

19-inik ukioqarlunga angummut inuusuttumut annatsitaasimasutut isigineqartumut katippunga. Uppernermigulli nukittuallaanngilaq, naak ataasiarluni pulateriaarsunnik tigumiartoq takusimagaluariga. Taassuma anersaava uanga anersaannut naleqqutinngilaq. Piinsisiortuni sivisunngitsumik suliniuteqarluni ingerlavoq, taavali tamanna unitsippaa, pujortartalerluni allanillu piinsisiortut sammineq ajugaannik sammisaqartalerluni. Anersaalli pissusilersuutigisartagaat eqqissisimanngissutigaara. Piinsisiortoqatikka sianiunnaaraangamik anersaanit assigiinngitsunit sunnerneqartarput. Anersaat ilaat ilaminnit nukittunerusarput, ilaat isumaqatigiissinnaaneq ajorput, ilaallu allaat akersuuttarput.

Tamanna paasisinnaanngilluinnarpara. Tamatuma eqqarsalersippaanga sooq taama amerlatigisunik assigiinngitsunik anersaaqarnersoq. Eqqaamavara piinsisiortunut ilaasortaanera tamaat ima qinusarlunga: „Asasara Guuti! Ilisimasakka naapertorlugit upperisarsiorneq manna kisimi eqqortuuvoq. Illilli iluarisannik kiffartuutinngikkukkit, Guuti, taava tamanna paaserusuppara. Upperisarsiorneq manna eqqortuunngippat taava paasitinnga sorleq eqqortuunersoq.“ Arlaleriaqalunga taama qinusarpunga.

Uima siulliup inooqatiginerata nalaani atuagassiat Napasuliaq Alapernaarsuiffik aamma Vågn op! ilisimaleqqaarpakka. 1962-imi Cincinnatimut nuuppugut, Jehovap Nalunaajaasuinillu kasuttorfigineqartalerpugut. Oqaloqatigissallugit uima nuannareqaa, uangali oqaloqatigerusunneq ajorpakka. Takkukkaangata igaffimmiiginnartarpunga. Uima atuagassiat pisartagarilerpai, atuanngisaannarlugilli; akerlianilli uanga atuartarpakka. Taamaaliortarnerma ilerasutsilersippaanga, misigivunga iliuuserisassarinngisaraluannik iliorlunga, atuagassialli atuanngitsoorsinnaanngilakka. Allaat eqqaavimmut igissinnaasarpakka, kingornagulli assallugu tigoqqittarlugit atuaqqilersarlugillu!

Napasuliaq Alapernaarsuiffik aamma Vågn op! ikiortigalugit paasivara nunarsuaq naassaanngitsumik atasussaasoq, aammalu nunarsuaq paratiisinngortinneqarumaartoq inunnik naapertuilluassutsimik nuannarisaqartunik ulikkaarluni. Aatsaat taama nuannertigisumik tusarpunga! Tamanna killitsissutigeqaara, tassami piinsisiortoqatima upperisarinngimmassuk nunarsuup taama siunissaqarnera. Eqqaamavara nunarsuarmut paratiisiusumut naassaanngitsumik atasussamut tunngasoq atuarakku ima eqqarsarlunga: ’Taamaassinnaanngilaq!’ Atuagarali nuannareqaara. Kisianni misigisimavunga soorluli tassa ilunni akiuunnersuaqartoq, tamannalu qinnutinni eqqaasarpara. Naggataatigut uiga qinnuigaara atuagassiat pisarunnaaqqullugit, taamaaliorporlu.

Uiga allasiortarpoq, ukiullu arfineq-marluk aappareereerluta avippugut. Uanga ernikkalu marluk Olenemut, inuusuttuullungali ikinngutinnut, akkannut katissimasumut aammalu oqaluussisup aamarsuarnik aamaartunik tigummisimasup panianut, nuuppugut. Taanna erinarsullaqqeqaaq, piinsisiortullu ataatsimiinnerinukaqatigiittarpugut ilagiinnilu assigiinngitsuni erinarsortarluta.

Assannik attorneqarnikkut marloriarlunga „ajorunnaarsinneqarsimavunga“. Siullermik ajorunnaarsinneqarpunga naartunnik katatsereernerma kingorna aaqarujussuaqattaarninni. Naak aaqarujussuaraluarlunga piinsisiortut ataatsimiinnerannukarpunga, nukillaangangaaramali angerlarnialeraluarpunga. Taava tusaalerpara Olene ataatanilu erinarsorpalulersut, anersaamillu tikinneqarput. Tuimikkut imminnut tigullutik ornippaannga assamminnillu attorlunga. Ingerlaannaq ilisimajunnaarpunga. Ilisimmarpunga ajorunnaarsimallunga. Aaqarunnaarsimallunga!

Aappassaanik ajorunnaarsinneqarpunga qaninni anniarisaqarninni. 15-inilli ukioqarlunga kigutaasaqalersimavunga, maannalu qilaara pullalersimavoq. Qaammatit pingasut missaanni kigutaasaqanngittariaqarsimavunga imerpalasuinnarnillu nerisaqartariaqarsimallunga. Naggataatigut taamaannera qatsuppara nakorsiarlungalu qanera takutikkiartorlugu. „Uanga atorfissaqartinngilarma; alleqqunik pilattaasartoq atorfissaqartippat,“ oqarpoq. Nalunaarfigaanga nappaatiga taaguuteqartoq papillomatosis, kigutit nakorsaannullu innersuuppaanga.

Kigutit nakorsaannukanngilangali. Tassami Olenelu oqaluffimmut Kentuckymiittumukarpugut, unnullu tamanna kingusinnerusukkut erinarsortillunga anersaamit sunnerneqartorujussuanngorpunga. Olenep assamminik attorpaanga, ilisimajunnaarpunga natermullu aqullaarlunga. Ilisimmaqqikkama neqiminertut tamuanikutut panertutut ittut oriarpakka. Angerlarama kigutaasakka atoqqissinnaalerpakka, kingornalu qaninni anniarisaqaqqinngilanga.

Olene Bibelimik atuartorujussuusarpoq. Nuuffiginerata kingunitsianngua inimit atuarfigisaminit qaaqquaanga apeqqutissaqarnerarluni. akugdlîssup oĸausê 1:4 atuarpaa: ’Eqqarleriit arlaat peersut arlaat nalliuttarput, nunalu naassaanngitsumik taamaaginnarpoq,’ oqarlunilu: „Allassimaffimmik taassuminnga nassuiaatilaannga. Tassani allassimasoq upperisarinngilarput. Qanoq-una isumaqartoq?“ Paatsiveerulluinnarpunga.

„Sooq allassimaffik taanna pissutigiinnarlugu paatsiveerutissavit?“ paaserusuppaa. „Taanna Bibelimi allassimavoq, qanorlu isumaqarnerata paasinissaa pisariaqartipparput!“ Nassuiaappara: „Tamatumunnga tunngasoq Napasuliaq Alapernaarsuiffik-mi Vågn op!-imilu atuarsimavara, kissaatigisimanngilaralu atuagassianik taakkuninnga Jehovap Nalunaajaasuisa saqqummersittagaannik atuarsimanera paasissagit.“ Jehovap Nalunaajaasui attaveqarfiginasuarusulerpai.

„Tamanna eqqarsaatigissanngilat,“ oqarfigaara. „Maani najugaqaannarutta kasuttorfigissaqqaarpaatigut. Inunnut orniguttuaannartuupput.“ Sapaatit-akunneri marluk qaangiuttut sulereerlunga angerlamut apuukkama takuara matumi utaqqigaanga qungujulaqaluni. „Eqqoriarsinnaaviuk ullumi kikkut maaniissimanersut?“ Eqqoriarsinnaanngilara. „Jehovap Nalunaajaasui! Isumaqatigiissuteqarfigaakka illit uangalu Bibelimik atuaqqissaaqatigineqartalernissatsinnik!“ Tamanna tupaallaatigisorujussuuara. Jehovap Nalunaajaasui ersigaakka atuaqqissaaqatigerusunnagillu.

Taamaakkaluartorli taamaaliorpugut. Ataatsimiittarnerminnut najuuttarnissatsinnik ilaatigut kajumissaarpaatigut. Olene piumanngilaq, uangali piumavunga. Ernera, taamani pingasut missaanni ukioqartoq, ilagalugu rigssaliliarpunga. Atuagaq ’Sallusuissut’ naallugu atuaqqissaaqatigineqartareerlutalu Olene uangalu qulariunnaarparput piinsisiortut ajoqersuutaat eqqunngitsuusoq. Olenelli atuaqqissaaqatigineqartarnini taamaatippaa, taamaattumillu uanga aammattaaq taamaaliorpunga.

Tamanna 1972-imi pisimavoq. 1974-imi Olenep sianerfigaanga, taamani najugaqatigiikkunnaareerluta. Qinnuigaanga ataatani — angut arfinilinnik affarmillu ukioqarlunga aamarsuarmik aamaartumik tigummisoq takusimasara — katissagiga. Taamani uinnit siullermit avinninnit ukiut arfineq-marluk qaangiussimapput, 1975-imilu januariugaa Olenep ataataalu katippugut.

Taanna Kentuckymi najugaqarpoq, piinsisiortut oqaluffiata meeraallunga ornittarsimasama eqqannguani. Katikkakku oqarfigaara piinsisiortunut ilannguteqqinngisaannassallunga, upperisarsiortunullu ilannguteqqissagaluaruma Jehovap Nalunaajaasuinut ilanngukkumaarlunga. Tamatumunnga akuersivoq; qaammatialunnguilli katinnitsinnit qaangiutiinnartut qinnuigaanga piinsisiortut ataatsimiinnerannut ilageqqulluni. Ataasiarlunga ilagaara, ataatsimiinnerli naallugu issiaannarnissara sapersimavara, anersaapiluit najuunnerata malunnarpallaarnera pissutigalugu!

Maanna paasereersimalerpara Satan, taassuma inngilipilui aammalu nunami kiffai nalunaaqqutiliorsinnaallutillu tupinnartuliorsinnaasut, aammalu qilammi anersaapilunnut pissaanilissuarnut kristumiut akiugassaqartut. (2 Môrsase 7:11, 22; 8:7, 18, 19; 2 Korintumiut 11:13-15; Evfisumiut 6:11, 12) Aammattaaq paasivara kristumiut ukiuni hundredelinni siullerni tupinnartuliorsinnaatitaanerata siunertarigaa ilagiit aallarterlaajusut aalajaatsumik tunngavilernissaat, aammalu tupinnartuliorsinnaanerit tamakku apustilit toquneranni atorunnaarsimasut. Assersuutigalugu, oqaatsinik allanertanik oqalussinnaatitaanerit pillugit ima allassimasoqarpoq: ’Soraassapput.’ Asanninneq, upperneq neriunnerlu maanna kristumiut ilagiivini inerilluarsimasuni tunngaviupput. — 1 Korintumiut 13:8-13.

Piinsisiortut oqaluffianni erinarsoqatigalunilu guitareqatiginiassaganni uima ilasereqqikkaluarpaanga. Tamatumunngali taarsiullugu rigssaliliaqqittalerpunga. Sapaatip-akunnerata naanerani piinsisiortut oqaluffiini oqaluussereerluni angerlaraangami aningaasivini, aningaasanik imminut katersorneqarsimasunik ulikkaartoq, tulluusimaaqaluni nittartertarpaa. Quiasuutigisarpaa nammineq qanoq iliuuseqarani aningaasanik taama amerlatigisunik inunnit tunisittarnini.

Ernerma nukarliup ataatsimiigiaraangama ilagisalerpaanga, kingornalu oqaluussisartunngorpoq. Ataatsimiinnerup kingorna kingusinaarlunga angerlaraangama uiga kamattaqaaq. Unnuit ilaanni ataatsimeereerluta qulit eqqaanni angerlamut apuukkatta paasivarput uima parnaarussimagaatigut, taamaattumik erneralu biilimi sinittariaqarsimavugut. Arlaleriarluni taama pisarpoq. Uiga biiliminiititaminik aallaaseqarpoq, atuartungalu imaluunniit atuaqqissaartunga naammattooraangaminga aasarpaa sisamarianngikkaangamilu tallimariarluni issiavimma ataanut natermut igittarluni. Imeruersaatinik nassarlunga silatitsinni naatsiivimmukaraangama puiaasat tigumiakka aallaasarpai. Taamaaliornermigut toqunnianngilaanga, silaatsunngortinniarsaraangali. Jehovamut qinusarpunga tatitussuseralu pigiinnarlugu, taamaalilluni uangaanngitsoq uigali nammineq kamakkaluttuinnarpoq.

Ullut ilaanni ataatsimiigiarnissannut piareersartunga aperilerpaanga: „Jehovap Nalunaajaasuinut ilumut ilaalerusuppit? Ilumut matumiit matumut angalaaqattaarlutit oqaluussisalerusuppit?“ Akivara: „Aap, taamaaliortalerusuppunga.“ Oqaasia tulleq imaappoq: „Ullut 14-it ingerlaneranni illumiit anereersimassaatit.“ Taamaattumik illuaqqamut ukiorpassuarni inigineqarsimanngitsumut erneralu nuuppugut. Kuuinnartumik imeqanngilaq, immannguaannaq pisataqarpoq, uagullu aningaasaateqanngilagut.

Taamaattoq nuannersumik misigisimanarpoq akornuteqarani ataatsimiigiarsinnaalerluni, angerlaraanni parnaarussaanissaq imaluunniit aallaarsaritinnissaq isumakuluutigissanagit. Aammalu matumiit matumut angalaarluni oqaluussilluni Jehovamut kiffartorneq nuanneqaaq. (apustilit suliáinik agdlagkat 20:20) Oqaluussitillunga piinsisiortut naapikkaangakkit anersaapiluit najuunnerat malunnartaqaaq; Jehovalli ikiortuaannarpaanga ima qinnuigigaanganni: „Jehova, nalunngilara anersaapilunnit nukittunerusutit. Nalunngilara uannik ikiuinissannut pissaaneqartutit, ilinnillu ikiorneqarnissara pisariaqartippara. Matuma anigornissaanut anersaat iluartoq atorfissaqartippara.“

1976-imi septemberiugaa uanga, 1977-imilu juliugaa ernera, kuisippugut. Qatanngutiga arnaq maanna tunniulluinnarsimalluni oqaluussisartuuvoq. Anaanaga atuaqqissaaqatigineqartalersimavoq illumiillu illumut oqaluussisalersimalluni. Taamaalillutik ilaquttakka uannut qiimmassaataasimaqaat, tamannalu ilutigalugu Jehovamit innuttaanillu ikiorneqarsimaqaanga. Jehovap kamagittarfigisimaqaanga. Qanortoq aammattaaq inuit allat millionilippassuit ’Guutip avaaginninnerata allamik isumataarsarniagai’ kamagittarfigigiligit. (Rûmamiut 2:4) — Oqaluttuartoq: Ireta Clemons. (gD 22/3 88)

[Qupp. 29-mi issuagaq]

Nalunngilakka pingasut pulateriaarsummik kiitinnertik toqussutigisimagaat

[Qupp. 30-mi issuagaq]

Maanna paasereersimalerpara Satan, taassuma inngilipilui nunamilu kiffai nalunaaqqutilior- sinnaallutillu tupinnartuliorsinnaasut

[Qupp. 28-mi assiliartaq]

Ireta Clemons, maanna Jehovamut Nalunaajaasuusoq