Meeraaqqap tusaasani aalajangiuttarpaa

ULLUT ilaanni mikisunnguusunga Coeburnimi, USA-mi Virginiamiittumi, angerlarsimaffitsinnut angutit marluk pulaarpaatigut. Aappaata ataatannik oqaloqateqarnerani aappaata uanga sammivaanga. Nunarsuarmi paratiisimik oqaluttuuppaanga, tassanigooq inuulersinnaavunga uumasullu pinnguaqatigisinnaassallugit ajoquserneqarnanga. (Jesaja 11:6-9) Aamma nassuiaappaanga allaat toqunngisaannarsinnaasunga maanilu nunarsuarmi naassaanngitsumik inuulersinnaasunga. Ila nuannerunarpalungaarami! Nunarsuarmi inuunissaq pillugu angutip oqaasii puiunngisaannarpakka — Jesaja 25:8; sarĸúmersitat 21:3, 4.

Upperisaqarusussusera

Angajoqqaakka aappariittut ajornartorsiuterpassuaqartut tamatuma kingorna ukiut marlussuit qaangiuttut avipput, uangalu anaanaga najuinnarpara. Taanna upperisarsiornermik soqutigisaqanngilluinnarpoq. Taamaattumik nammineerlunga angerlarsimaffitsinnit ungasinngitsumi ilagiit suulluunniit sapaatikkut atuartitsinerinut orniguttarpunga. Sivitsunngitsoq anaanaga kateqqippoq, taavalu ataatassara Indianamut nooqatigaarput. Aasalli tamaasa Virginiamukartarpunga ataataga tikeraarlugu.

Ataataga avinnermik kingunitsianngua mormoninngorpoq, upperisartaaminillu ilinniartippaanga. 1960-imi aasaagaa arfineq-pingasunik ukioqartunga ataatama kuivaanga. Indianamulli uterama upperisarsiortut suulluunniit angerlarsimaffitsinnit ungasinngitsumi naalagiarnerinut orniguttarpunga. Tamakkunani tamani ajoqersuutigineqarpoq inuit ajunngitsut qilaliassasut, ajortullu anniarfimmut pissasut. Qilammiunngitsoq nunarsuarmili inuunissamik kissaateqarnera arlaannaannulluunniit oqaluttuarinngisaannarpara, paasineqarnissara ilimaginnginnakku.

Aqqanilinnik ukioqartunga ataataga Oregonimut nuuppoq. Tamanna aliasuutigeqalugulu kamaatigeqaara, Indianamit ungaseqimmat. Ataatassara upperisaqanngitsuuvoq imerajuttuullunilu, upperisaralu pillugu illaruaatigisarpaanga. ’Upperniannguamik’ taasarpaanga, qissaseraangamalu oqartarpoq: „Soormi Guutit ikioqqullutit qinnuiginianngiliuk?“ Angerlarsimaffitsinni Guuti soqutigineqanngilaq. Ukiuni tamakkunani inuuneq avaanngunaqaaq. Timikkut, oqaatsikkut kinguaassiuutitigullu atornerlunneqartarpunga. Guutimut qinusarnera tuppallersaatigisarpara, amerlaqisutigummi misigisarama taassuma kisimi soqutigigaanga.

Anaanama ataatassara qimammagu atornerlunneqartarunnaarpunga. Kisianni piitsooqaagut, anaanagalu uagutsinnik pilersuiniarnermini ilungersoqaaq. 13-inik ukioqarlunga Virginiamukarpugut ajaga tikeraarlugu. Ajaga arnaavoq pitsaasoq baptistinullu ilaasortaasoq. Asasorujussuuara. Naalagiaqatiserimmanga akuersivunga. Allaat anaanaga ilaavoq, eqqaamavaralu nuannaartorujussuullunga ilaquttakka ilagalugit naalagiarama. Tikeraarnerput naangajalermat uanga uternissara kajumiginngeqaara. Annilaanngatigaarami uteraluaruma kanngunartumik inuuneqalernissara. Taamaattumik ajaga ilungersorlunga qinnuigaara immini najugaqarnissannik akuerseqqullugu, anaanagalu aamma akuersivoq.

Ajama biibilimik King James-nutsikkamik pitsippaanga. Tulluusimaarutigisorujussuuara, unnuillu tamaasa atuartarpara. Biibilimi kapitalit kingullersaanni atuarpara allassimasoq ’tamakkununnga ilaliussisoqarpat, taava Guutip perluutit mappersakkani makkunani allassimasut taassumunnga tutsikkumaarai’. (sarĸúmersitat 22:18, 19) Taava ima eqqarsarpunga: ’Sooq taava upperissavara Mormonit Allagaataat Allakkanut Illernartunut ilaasut?’ Taamaattumik aalajangerpunga baptistinngorniarlunga.

Ilimagigaluarpara aalajangernera tamanna pillugu allaffigiganni ataataga ajuallassasoq, kisianni oqaannarpoq naalagiartarnera nuannaarutigalugu. ’Anersaakkut eqeersaalluta’ ataatsimiittarnitsinnut qaaqqusilluni palaserput inuit angerlarsimaffiinut pulaaqattaartoq ilagigajuppara. Misigisarpunga Jesusip iliortarsimaneratut inunnut pulaaqattaartarnikkut oqaloqateqartarnikkullu Guutip piumasaanik iliorlunga.

Taamaakkaluartorli qilammiunngitsoq nunarsuarmili paratiisiusumi inoorusussuseq pigiuarpara. Isumallualerpungalu Biibilimi allassimasoq manna atuarakku: ’Qinugitsi, tunineqassaasi taava; ujarleritsi, nanisissaasi taava; kasuttoritsi, mappiunneqassaasi taava. Qinusormi kinaluunniit pisaraaq, ujarlersorlu nanisisaraaq, kasuttortorlu mappiunneqararaaq.’ — Matîuse 7:7, 8.

Katippunga ilaqutaqalerlungalu

Aappaaguani Indianamut uterpunga anaanannilu najugaqalerlunga. 15-iinnarnik ukioqarlunga katippunga naartulerlungalu, taamaalineranilu busserluta Californiap kujataanukarpugut. Uima ilaqutai ilisarisimavallaanngilakka, taakkunanngali akuerisaanissara kissaatigaara. Taakkua piinsisiortuupput, uimalu aleqaata oqqanik oqaluttarnermik tunissutisiaq pillugu oqaluttuuppaanga. Unnuit ilaanni qinoqatigiittunukariartortut ilagitillugit Guutimut qinuvunga oqqanik oqalussinnaatitaaleqqullunga.

Qinoqatigiinnermi tassanngaannaq eqqumiitsumik misigilerpunga. Tamarma sajulerpunga aqussinnaanngisannillu oqalorussalerlunga. Palasi suaarpoq oqarluni anersaap qulangersimagaanga, tunukkullu pattalaalerlunga. Kingornatigut tamarmik ornillunga eqitaarpaannga oqarlutillu Guutip uannik taamatut atuinera nuannaarutigeqalugu. Uangali paatsiveerusimaarpunga ersillungalu. Nalulluinnarparami qanoq oqalussimanerlunga.

Tamatuma kinguninnguatigut meeqqatsinnik siullermik ernisunninni ernininnilu ajornakusoortunik atugaqarpunga. Ilagiinni palasi uinnut oqarsimavoq Guutip ernininni anniaatikka annertusisissimagai uiga kristumiuunngimmat. Uima isini imerlaarsisut ornippaanga oqarfigalungalu isumaqaruma iluaqutaassasoq kuisinniarluni. Oqarfigaara qularinngilluinnarlugu Guutip inuit imminut kiffartoqqullugit pinngitsaalinavianngikkai.

Ilagiit qimappakka

Sapaatit ilaanni palasip oqalugiareerami ilagiit qinnuigai aningaasanik tunissuteqaqqullugit, qanittukkut nunap sajunnerani aseruatitersimasut pissutigalugit oqaluffik iluarsaanneqartariaqarmat. Puugutaasaq aningaasanik katersuiffik uannut anngummat aningaasaatikka tamaasa tassunga ilivakka. Palasip aningaasat kisereeramigit ilagiit qutsavigeqqaannguarnagit ilungersortumik oqaluutilerpai kaasarfitik uummatitillu siunertamut pitsaasumut tassunga ammaqqullugit. Taava puugutaasaq ingerlaarteqqippaa. Uanga allanik aningaasaateqanngilanga, taamaammat peqqusiileqeqalunga puugutaasaq ingerlateqqipallappara. Palasip aningaasat kiseqqipallappai, qujanngivilluniluaasiit oqarluni naammanngilluinnartut. „Aningaasat Naalakkap suliaanik naammassinninnissamut pisariaqartut pissarsiarineqartinnagit anerusuttoqarnavianngilaq,“ palasi oqarpoq.

Uima oqaluffiup silataani utaqqivaanga, nalunngilaralu utaqqinini naammagiinnarunnaaraa. Aammali uanga palasip qujasuissusia naammagiinnarunnaarpara. Taamaattumik naalungiarsuutiga kissumissiuteriarlugu qulliikka kuuttut oqaluffimmit aniartorpunga kikkut tamarmik isikkukkaannga. Taamanernit aalajangerpunga upperisarsiortunut sunulluunniit ilaaqqinngisaannassallunga. Naalagiartarunnaaraluaramali Guutimut upperunnaanngilanga. Biibiliga suli atuartarpara nuliaalluarniarlungalu.

Biibilimi sallusuissut ilikkarpara

Meeqqatta aappaanik ernereernerma kingorna ikinngutitta Texasimut nuunniartut illumik attartorfitsik akuersitippaat illup uagutsinnut attartortilernissaanut. Ikinngutima Patip aallalerami oqarfigaanga arnap aningaasanik atorsimasup taartissani uannut aggiukkumaarai. Qinnuigaanga Texasimi najugartaaminnut nassiutissagikka. Ullualuit qaangiummata arnat marluk matutsigut kasuttorput. Ilimagigakku tassaasut aningaasanik aatsisut, ingerlaannaq iseqquakka. Nassuiaappakka Pat nuussimasoq oqarfigisimagaanngalu taakkua aggerumaartut. „Aa, qujanarmi,“ Charlene Perrin, arnap aappaa, oqarpoq, „atuaqatigisaratsigu nuanneraluaannarpoq.“

„Qanoq?“, aperivunga. „Atuaqatigisarassiuk? Immaqa kukkuvusi.“ Charlene nassuiaavoq Pat Biibilimik atuaqqissaaqatigisalersimagaluaritsik. Paasigamiuk Pat nuussimasoq Charlenep aperaanga uanga Biibili atuaqqissaartalerusunnginneriga. „Soorunami,“ aalajangersimarpalullunga akivunga. „Paaserusutassinnik tamanik oqaluttuutissavassi.“ Biibilimik atuartarsimanera tulluusimaarutigaara, isumaqarpungalu nuannaajallaatigisassaannik oqaluttuussinnaallugit.

Charlenep atuagaq sagdlusuíssut inûnigssamut nâgssáungitsumut sangmissoĸ-mik taaguutilik takutippaa, taavalu Tussiaat 37:9 atuarparput: „Ajortummi piiagaasussaapput, [Jehovamulli] neriuttut nuna kingornutissavaat.“ Tupattorujussuuvunga. Nammineq biibilinni allassimavoq nuna inuit kingornutissagaat. Apeqqutissarpassuakka qaffakaalerput. Charlene qungujuutigaluni pilerpoq: „Aap, aap, utaqqilaariarit! Ataasiakkaarlugit sammissavavut.“ Nassuiaappaanga aalajangersimasumik Biibilimik atuaqqissaartarnissaq pisariaqartoq. Naalagaaffilersaartarfimmilu, tassa Jehovap nalunaajaasuisa ataatsimiittarfianni, ataatsimiinnermut ingerlaannaq qaaqquaanga.

Oqaluffimmi aningaasanik katersuiniartitsisimaneq pillugu Charlene oqaluttuuppara, oqarfigalugulu naalagiaqqikkusunnanga. Matîuse 10:8 atuartippaa, ima allassimasoq: ’Akeqartinnagu pigassiuk akeqartinnaguttaaq tunniussiuk.’ Taava nassuiaappaanga Jehovap nalunaajaasuisa ataatsimiinnerini nakkaatitsivimmik ingerlaartitsilluni aningaasanik katersuiniartitsisoqarneq ajortoq, tunissutillu tamarmik nammineq kajumissutsimit tunissutaasartut. Oqarportaaq ataatsimiittarfimmi tunissutinut nakkaatitsiveqartoq inuillu piumasut tassunga tunissutiminnik nakkartitsisinnaasut. Aalajangerpunga upperisarsiorneq periarfisseqqinniarlugu.

Biibilimik atuaqqissaarninni paasivara taamani piinsisiortut naalagiarneranni oqqanik oqalukkama sooq taama nuanniilliortigisimallunga. Guutip kristumiut siulliit anersaaminik illernartumik pigisaqarnerat uppernarsaatissaqartikkumallugu oqaatsinik assigiinngitsunik oqalussinnaalersissimavai. Aammattaaq allamiut ukiumi 33-mi piinsip ulluani katersuussimasut sallusuissutinik Biibilimiittunik paasitinnissaannut tupinnartuliakkut oqqanik oqalussinnaanertik kristumiut iluaqutigisimavaat. (apustilit suliait 2:5-11) Biibilimili oqaatigineqarportaaq Guutip oqqanik oqalussinnaatitsinera atorunnaarumaartoq, apustilillu toqoreerneratigut nalunanngitsumik taamatut pisoqarpoq. (1 Korintumiut 13:8) Satanili inngilipiluilu inuit isumaat tappiillisikkumallugit paasissaanngitsunik oqalutsitsisarput, inuppassuit uppertillugit tamanna isumaqartoq Guutip anersaavanik illernartumik pigisaqarlutik. — 2 Korintumiut 4:4.

Ilaquttanit akerlilersorneqarneq

Sivitsunngitsoq Guutip nunarsuarmut siunertaa paasilerpara, paasillugulu silarsuarmut ajortumut ilaasussaananga. (Juánase 17:16; 18:36) Aammattaaq paasivara Babylon Angisooq (silarsuarmi upperisarsiornerit ilumuunngitsut ataatsimut Biibilimi taama taaneqaramik) attaveqarfigiunnaarluinnartariaqarlugu. (sarĸúmersitat 18:2, 4) Tamatumuunakkut Jehovap nalunaajaasuisa ilaattut kuisissamaarninnik ataataga oqaluttuukkanni aliatsattorujussuuvoq. Ilungersorluni qinnuigaanga taamaalioqqunanga. Inuulillaramali aatsaat ataataga qiatillugu takuara. Qiaqatigaara, aliasutsikkusunngikkaluaqigakkumi. Nalunngilarali sallusuissut nanisimallugu Jehovalu tununngisaannassallugu.

Ilaquttakka tamarmik Jehovamut nalunaajaasunngorniarninnut akerliusorujussuupput, ataatsimiigiartarunnaarallarpungalu. Ilaquttama akerlilersuinerat uniimivoq, uangali qamuuna aliasoqaanga. Nalunngilara Jehovap piumasaanik iliulinngikkuma eqqissinaviarnanga. Ullut ilaanni ullup-qeqqarninni Charlene angerlarsimaffianut ornippara oqarfigalugulu kuisittariaqarlunga. „Pitsaanerussasorinngiliuk ataatsimiigiartaleqqeqqaaruit?“ aperivaanga. Oqarfigaara tamatumuuna aalajangersimallunga Jehovamut attaveqarninnut sunaluunniit akornuseeqqissanngitsoq. Septembarip 19-ani 1973-imi kuisippunga.

Maanna ukiut 23-t qaangiussimapput. Qujanartumik ullumikkut ilaquttama aalajangernera ataqqilersimavaat, arlaannaataluunniillu sallusuissummik tunussitinniarsarinngilaanga, tamannalu assut qujamasuutigaara. Panigali angajulleq, Kim, kisimi maannamut Jehovamut nalunaajaasunngorsimavoq. Taassuma aalajaalluni Jehovamut kiffartornera ukiut ingerlaneranni assorsuaq qiimmassaatigisarsimavara.

Naapeqqinneq puiunaatsoq

1990-imi Coeburnimi Virginiamiittumi tikeraartillunga anaanaga qinnuigaara naalagaaffilersaartarfiup silataanut unilaaqqullugu sapaammi qassinut ataatsimiittoqassanersoq takuniarakku. Aqqusinikkut biilimik ilummukalerlutalu anaanaga pilerpoq naalagaaffilersaartarfiup tununnguani, qimuttuitsut aqqutaasa akianni, illoqarsimagaluartugut. Illu qangarsuarli ikuallalluni nungussimavoq, pujoorfiullu qarmakui kisimik amiakkuupput. „Taamani mikisuararsuuvutit,“ anaanaga oqarpoq, „immaqa pingasunik sisamanilluunniit ukioqarlutit.“

Sapaammi ataatsimiigiarama tikilluaqquneqaqaanga. Stafford Jordan oqaloqatigitillugu naalagaaffilersaartarfiup tunuani illoqarnikuunerput nalaatsornerinnakkut eqqaavara. Taava nakkuserpaanga. „Eqqaamavakkit!“ nillerpoq. „Taamani qaamasunik nujaqarputit imalu mikitigalutit [ussersorluni]. Tamaani oqaluussiartortilluta oqaluussiartoqatima ataatat oqaloqatigigaa, uanga illit sammivakkit Paratiisimillu oqaluttuullutit.“

Uissuummisorujussuuvunga. Qiassamik tupillunga oqaluttuuppara sallusuissummik Biibilimiittumik ujaarlersimaninnik. „Mikisunnguusunga sallusuissutip naatsiiassartaa uummateeqqannut ikkussimavat!“ oqarpunga. Taava oqaluttuuppaanga aatannik eqqarleqartunga Stephen Dingusimik atilimmik, aalajaalluni nalunaajaasuusumik. Ilaqutaasa eqqartunngisaannarpaat, upperisaanut akerliusorujussuugamik. „Tulluussutigisorujussuussavaatit!“ qatanngut Jordan oqarpoq.

Ukiut Jehovap peqatigiissortaaniiffikka kingumut eqqarsaatigileraangakkit asannittuliorfigineqarsimanikka ajunngitsuliorfigineqarsimanikkalu qujamasuutigisaqaakka. Ilaannikkulli aliatsalaartarpunga naalagaaffilersaartarfimmi takugaangakkit ilaqutariit Jehovamut kiffartoqatigiittut, amerlasuutigummi kisima ataatsimiigiartariaqartarama. Erniinnarli eqqaasarpara Jehovap najoraanga. Taassuma isigiuaannarsimavaanga, sallusuissullu ukiorpassuit matuma siorna mikisunnguutillunga uannut tusarliunneqarsimasoq uummatinnit ilassineqarsinnaalermat naalersillugulu sikkersippaa.

„Qujanaq, qatanngut Jordan,“ oqarpunga, „niviarsiaraq naalanngitsuaraq Paratiisimik oqaluttuunnissaanut piffissaqarfigisimagakku!“ — Oqaluttuarpoq: Louise Lawson. (wE 8/6 97)

[Qupp. 13-mi assiliartaq]

Stafford Jordanilu, 1990-imi naapeqqikkatta