Qaarsuujunnaarlungalu qeqertaajunnaarpunga

Erinarsuutip taallaa 60-ikkunneersoq imaappoq: ’Qaarsuuvunga/Qeqertaavunga/Qaarsoq anniarsinnaanngilaq/Qeqertaq qiasinnaanngilaq.’ (’I am a rock, I am an island . . .’) Erinarsuutinnaarisimavara, taamaattuusimavungami. Misigissutsit — asanninneq, naakkinninneq misiginneqataanerlu — allat misiginerartagaat misigisimanerlugit eqqaamanngilara. Misigissutsit taamaattut pigisuusaartarpakka, allallu taamaassoraakka. Eqqaamanngilara inersimasutut qiasimanerlunga. Maannalu angerlasimaffinni, 50-inik ukioqarlunga, ilagiinni kristumiuni utoqqaanertaallunga atuagaq atuagara pissutigalugu qiarsuataarpunga. „Qaarsumut“, „qeqertamut“ tamanna qanoq pisinnaava?

1936-mi Bostonip ilaani avalliusumi inunngorpunga, meeqqat arfineq-pingasut sisamaattut. Angajoqqaakka marluullutik imerajuttuupput. Misigissutsit pillugit oqaloqatigiissimanerluta, immitsinnut pakkussimanerluta asanninnermilluunniit nittaavigisimanerluta eqqaamanngilara. Arfinilinnik qaammateqartunga uffarfimmut ikineqarsimavunga, kuuffialu simeriarlugu imerlu ammariarlugu qimanneqarsimallunga. Illumi ikiortaasup nassaarisimavaanga annaallungalu. Meeraaninnit eqqaamasatuaraakka ersineq, amiilaarneq, kamanneq timikkullu anniarneq.

Ataataga kamarujussuartarpoq kamanninilu uannuinnangajak tutsittarpaa isimmissartarlunga unatartarlungalu. Allaat maannakkumut ukiorpassuit qaangiutereeraluartut kiinaa eqqaagaangakku amiilaammertarpunga. Peroriartorninni isumaqarsimagaluarpunga naalanngitsuunera pissutigalugu unatarneqartarlunga, maannakkulli nalunngilara kamattarneri naalattuunninnut naalanngitsuunninnulluunniit tunngassuteqanngitsut.

Tallimaniit arfinilinnut ukioqalernissara tikillugu ilaqutariit nakorsaannit kinguaassiuutitigut atornerlunneqartarsimavunga. Atualerama illoqarfimmi 250.000-inik qaqortumik amilinnik naaggaartunik angelsaksiskiusunik (WASP) inulimmi najugaqarpugut, atuaqatimalu naalliutsittarpaannga erloqisillungalu, uanga juutiarakasik. Nukappiaqqat qulit aqqanillit iluatsitsillutik tigusarigaangaminnga atisakka nutsullugit atisaajartarpaannga, unatarlunga atisakkalu orpimmut miloriullugit. Tamataqarnanga orpimmut qallortariaqartarpunga atisakka aallugit.

18-iliinissannut qaammat ataasinngortoq uagutsinnit qimagukkusullunga sakkutuunngorniarlunga qinnuteqarpunga. Taamanikkut imigassamik ussiinikuunngisaannarpunga, ingerlaannaq imertalerpunga ingerlaannangajallu pinngitsoorsinnaajunnaarlugu. Ukiut 20-t sakkutuujuvunga aningaasanillu qinnuuloorsinnaanerit, atorsinnaanerit tillissinnaanerilluunniit tamaasa aalakoortarpunga. 24-nik ukioqarlunga katippunga ernertaarlutalu, nuliarali erneralu angerlarsimaffimmi imerajuttumit — uannit — naalagarsiortitaallutik nakkutigineqarlutillu inuupput. Nanertuisutut pisariaqanngitsumillu akissaajaatitut isigaakka.

1974-imi sakkutuujujunnaarpunga sivikitsumillu niuverneq misilillugu. Imerunnaarsimavunga timimami imigassaq sapilersimavaa. Immiaaraq ataasiinnaq marlulluunniit imeraangakkit timera anillattarpoq. Maannakkut ikiaroornartut pinngitsoorsinnaajunnaarsimavakka — ingammik marihuana, pissarsiarisinnaasakkali tamaasa atortarpakka. Taamaattumik suliffeqarsinnaanngilanga, angerlarsimaannarpunga illulerisarlungalu nuliara, Donna, sulitillugu.

Jehovap nalunaajaasui pulaarput

Ullut ilaanni Donna suliartulersoq nalunaaqutaq arfineq-pingasunut qiteqquttoq ikiaruulereersimavunga. Tamannalu kamaatigaa, aniliitigalunilu allagartaq tunginnut miloriuppaa suaarlunilu: „Qanortoq toqumut erloqisikkilitsit.“ Allagartaq igalaamiitittarpaa, naqinnernillu angisuunik allassimalluni: „JEHOVAP NALUNAAJAASUI — NAAMIK!“ Allagartaq eqqaavimmut igippara. Aqaguani ullaap tungaa arnat marluk matunnut kasuttorput. Tassaaku Jehovap nalunaajaasui.

Tamatuma nalaani buddhistiuvunga. Angajoqqaama juutiusut katuuliusullu ilumoortuusaarnerat pissutigalugu qangali Biibili ajattulersimavara. Guuti ujartorsimagaluarpara paasisorisimallugulu Guuteqanngitsoq. Pinngoriartuaarsimaneq upperaara isumaqarlungalu Guuteqannginnera uppernarsisimallugu. Anorersuartumimi silamut aneriarlunga qilammut saallunga Guuti ajortunik tamanik eqqaasinnaasannik taagorsimavara, oqarlungalu: „Piuguvit kallermit eqqorneqartinnga.“ Guutiugaluaruma taamaaliorsimassagaluarpunga. Taamaaliunngimmalli eqqarsarpunga piunngitsoq. Isumaqarpunga inuit nunarsuarmik aserorterinerat pissutigalugu nunarsuaq aserorumaartoq, neriuutigalugulu suut tamarmik ajortumeerpata ikiaruujutigalunga tv-kkut isiginnaarumaarlugit.

Kisianni tassa aqaguani ullaakkut arnat taakku marluk pulaarpaannga. Malugisimaarpunga, aliikkutassaaleqillungalu. Minuttit 20-t isumaqanngitsumik oqaloqatigiippugut, naggataagullu atuagaaraq tungujortoq 25 centilerlugu neqeroorutigaat. Minuttini 20-ni aliikkusersorneqarneq 25 centinik naleqarsorigakku, atuagaq tiguara soqutiginagulu nerrivimmut miloriullugu.

Aqaguani atuagassarsiorpunga, marihuanamik pujortarnissara siulleq kinguartilaarniarlugu. Atuagaaraq tungujortoq takuara neriullungalu akunneq ataaseq aliikkutarisinnaallugu. Akunnerit sisamat qaangiuttut atuagaq tamaat atuareersimavara qulariunnaarlugulu atuakkap qulequtamisut imarigaa sagdlusuissut inûnigssamut nâgssáungitsumut sangmissoĸ. Nalunngilara atuagaq iligukku ikiaroornartut illup iluaniittut tamaasa ikiaroorutigissallugit atuarsimasakkalu tamaasa puiussallugit. Quppernermi kingullermi biibili dollarimik ataatsimik akilik neqeroorutigineqarpoq, taamaattumik dollari ataaseq allakkap puuanut ikillugu nassiuppara Guutimullu, siornatigut qinnuigisimanngisaannakkannut, oqarlunga: „Guuti, tassa iliuuserisinnaasakka tamarmik, sinneri illit isumaginiakkit.“ Taava ikiaroornartutorpunga aatsaannguummallu killitsissutigisimasakka tamaasa puiorlugit.

Biibilimik nassinneqarpunga, toqquinnarparali. Sivitsunngitsoq nalunaajaasut marluk takkupput Biibilimillu atuaqqisaaqatigisarnissara nereroorutigalugu, akuersivungalu. Atuaqqissaartarnerput nuanneqaaq, siumukanngilangali isumaliutersuutinik ilisimasannik kakkanniakujuffigiuaannangajakkakkit. Aamma aniniariartut ikiaroortarpunga, ullormilu tassani siumukariarsinnaanerigaluakka tamaasa akornusertarlugit.

Ukioq ataaseq qaangiuttoq nalunaajaasup aappaa, Jim, takkuppoq, Hesekiel 33:9-lu atuaqqullugu: „Illilli guutiitsoq mianersoqqugukku oqarfigalugulu ileqquni ajortoq qimaqqullugu, taannalu taamaaliunngikkuni, taava ajortuliani pillugu toqussaaq, kisianni illit inuunerit annaassimassavat.“ Taava aperaanga allassimaffik qanoq isumaqarfigineriga. Akivunga: „Isumaqarpoq aggeqqissanngitsutit uangalu toqussasunga.“ „Ilumoorputit,“ akivaanga anillunilu.

Nalunaajaasoq uterpoq

Qujanartumillu paasilerpara suli ilerasussinnaallunga, taamaassorinngikkaluaramami. Siunissaq Biibilimi atuarsimasara kipisagaara, ikiaroortarunnaarniarsarilerpungalu. Sapaatit-akunnerpassui nammineerlunga misilikkaluarpara, iluatsinnangali. Unnuit ilaanni nuliama siunnersorpaanga „ikinngummut“, tassa oqaluussisartumut Jimimik atilimmut, sianissasunga. Akivungali aggeqqikkumanani oqarsimasoq, telefoniatalu normua nalunerarlugu. Neriuuteqanngivissutut misigivunga.

Aqaguani Napasuliaq alapernaarsuiffik matup ataatigut kaaminneqarsimavoq, atuagassiamilu Jimip telefoniata normua allassimalluni. Nuliaana „pissutissaqarpiarani“ taamaaliorsimasoq. Jimimut sianerpunga ikiaroornartunillu imigassamillu ajornartorsiutinnik oqaluttuullugu, ikiorsinnaaneraangalu aperivara. Oqarpoq ikiaroortarunnaartuuguma ullut tamaasa atuaqqisaaqatigisalerumallunga.

Taamaalillunga ullukka unnuakkalu naallugit tamaviaarlunga atuaqqissaartarnera aallartinneqarpoq. Ullut tamaasa atuaqqissaaqatigiinnartanngilaanga aammali atuakkanik napasuliamilu ilanngutassianik Biibililersaarutinik pilersorpaanga. Unnuakkut akunnerit sisamaannaat sinissinnaasarpunga — imerajuttut akornanni ajornartorsiut tamanna nalunngilluarneqarpoq — piffissap sinnera Biibilimik atuaqqissaarnermut atortarpara. Ikiaroornartut asoorukkakkit, ukioq kingulleq ilinniarsimasakka, ullormullu nalunaaquttap-akunnerini 18-iniit 20-ni atuartakkakka ilanngullugit, paasileriataarpakka.

Saniatigullu Jehovap nalunaajaasuisa ataatsimiittarneri najuuffigisalerpakka. Sapaatip-akunnerisa marluk ingerlaneranni inuuninni siullerpaamik iluamik qinusinnaalersimavunga, tamannalu tunniulluinnarninnut aamma qinunerusimavoq. Illumiit illumut angarlaartalerpunga nalunngisakkalu tamaasa oqaluussiffigisarlugit. Biibilimik atuaqqisaaqatiginninnerit arfineq-marluk aallartinneqarput, taakkunanngalu tallimat kuisinnissamut siumukarsimapput, ilaatigut nuliara erneralu. Ataatsimeersuarnermi maajip 23-ani 1976-imi kuisippunga, „ikinngutip“ sianerfigineraniit qaammatit pingasuinnaat qaangiuttut. Pioneerinngorpunga (piffissaq tamaat atorlugu oqaluussisartoq) ukiullu 13-it taamatut ingerlavunga.

Tamatuma oqaluttuap allaqqaataanut utertippaanga, 50-inik ukioqarlunga kisimiillunga atuagaq pillugu qianinnut. 1980-ikkunni atuakkat imminut ineriartortinnissamut tunngasut saqqumilaartorujussuupput, ilaallu ataaseq atuarpara. Immikkoortup imminut ineriartortinnissamut tunngasup iluaqusinngilaanga, eqqarsaatimmi silamiorpaluttut tassani atorneqartut akuerisinnaanngilakka. Inuuninnili siullerpaamik atuakkap paasitippaanga ukiut meeraaffimma naakkittaatsut asanninnermillu amigaateqartut misigissutsikkut ’iloqianngortissimagaannga’. Nuannaarnermik qullilivunga, maannakkummi paasivara sooq misigissuseqarsinnaaneq amigaatigisimanerlugu, aammali annaasimasara annertooq pissutigalugu aliasunnermik qiavunga. Ukiuni 50-ini inuttut misigissusilittut misigissutsikkulli qisuariarsinnaananga inuusimavunga. Sooq taama nikallungaffeqartarsimatiginersunga paasitippaanga.

Piffissap ingerlanerani Jehova asanninneralu pillugit Biibilimi atuaraangakkit misigissuseqartalerpunga, taamaanngisaannarsimallunga. Nuliara, ernera, ilagiinni qatanngutit inuillu oqaluusiffigisartakkakka Jehovap asavai, silarsuarmi nutaami neriorsuutigisimasamini naassaanngitsumik inuunissamik periarfissaqarniassammata.

Asannittussatut asaneqartussatullu pinngortitaq

Asanittussatut asaneqartussatullu pinngortitaavugut. Meeqqap inoorlaap asanninneq taamaattoq akuerineqarnissarlu pisariaqartippai. Meeraq akuerineqanngikkuni angajoqqaaminillu asaneqanngikkuni imminut ataqqinera mikisuararsuussaaq asaneqartussaanngitsutullu misigissalluni. Mikisuullunga tigoqqusaartarpunga pakkuteqqusaartarlungalu. Ullumikkullu suli eqqaamavara pulaartoqaraangat paarmorfinnullu alakkartoqaraangat neriuutigisarsimallugu tigussagaannga. Taamaaliunngisaannarpulli, taamaattumillu qissasertarpunga.

Meeraaninni misigisimasartakkakka ilaqutariinnut ittuuninnut ajoqutaasimapput. Aamma isumaqartissimagaluarpaannga Jehovap, Ataatatta qilammiusup, asanngikkaanga. Jehova pillugu sallusuissutip allanngortikkiartuaarsimavaanga, maannakkut isumakkuinnaanngitsoq, aammali uummatikkut paasisinnaalersimavara Jehovap ilaannarsiunngitsumik asagaanga. Nalunngilarattaaq asanninnerup tamatuma pissarsiarinissaata nalinganik iliuuseqarsinnaanata. Asanninneq Jehovap, asanninnerup Guutiata, ajunngissusianut pisassarinngisaraluatsinnut ersiutaavoq.

Jehovap pilluaqqusineratigut maannakkut nuliaralu ajunngitsumik inuusinnaalersimavugut. Maannakkut oqaluussisartunik pisariaqartitsiffiusumi, ilagiit asannittut ilagalugit illoqarfeerannguami alianaatsumi Arizonap qaqqarsuiniittuni, kiffartorpugut. Nuannaarutigisannik ilagiinni nakkutilliisuuvunga siulittaasoq, atuakkamillu atuaqqissaaqatigiittarnermik teokratiimillu atuarfimmik aqutsisuuvunga. Pensionima saniatigut igalaanik qillersaasarneq tapertaraarput, taamaalillutalu nunap piinik pisariaqartitatsinnik amigaateqarnata, oqaluussisarnermullu allanullu Ataatatsinnut qilammiusumut asanittumut kiffartornermut tunngasunut piffisaqarsinnaalluta.

Ullaaq nuliama allagartamik „JEHOVAP NALUNAAJAASUI — NAAMIK“-mik allassimasumik miloriussinera eqqaagaangakku, Ataatatsinnut qilammiusumut uannut iliuuserisimasai pillugit qujamasunnermik uummatiga ulikkaartarpoq. Ikiaroorajuttuusimasutut imerajuttuusimasutullu suliffeqarsinnaanngitsutut, nammineq allallu toqu kisiat siunissarisimagaluarlugu, maannakkut Jehovap nunami peqatigiissortaanut ilaalersimavunga. Guutip naalagaaffianik nutaarsiassamik nuannersumik, silarsuup neriuutissatuaanik, tusaajumasunut tamanut oqaluussisussatut tunniulluinnarsimavunga. Jehovap tunisimavaanga inunnik amigaatigiuarsimasannik tunisisinnaasunik: asanninnermik, tatiginninnermik akuerineqarnermillu.

„Qaarsuujunnaarsimavunga“ anniarsinnaanngitsoq „qeqertaajunnaarlungaluunniit“ qiasinnaanngitsoq. — Oqaluttuartoq: Larry Rubin.

[Qupp. 22-mi assiliartaq]

Larry Rubin nulianilu, Donna