Ilaqutariit uannik asannilluartut

MEEQQAMUT ilaqutariinneq pingaaruteqartorujussuuvoq. Ilaqutariit isumassuingaartut asannittullu meeqqap timikkut misigissutsikkullu pisariaqartitai matussusertarpaat. Tamanna meeqqap ajoqersorneqarneranut, perorsarneqarneranut ineriartorneranullu aalajangiisuusorujussuuvoq. Meeraq ilaqutariinni taamaattuni toqqissisimatinneqassaaq. Taamaattumik nammineq ilaquttanit isumakkeerneqarneq misigalugu ajortorujussuuvoq, soorlu uanga taama pineqarsimasunga!

Nigeriap kangisissortaani ilaqutariissuarni inunngorpunga. Ataataga høvdingiuvoq (nunamut naalagaatitaavoq) arfineq-marlunnillu nuliaqarluni. Meeqqanut 30-nut ataataavoq; uangalu 29-eralunga.

Ullut ilaanni 1965-imi, qulinik ukioqarlunga atuarfimminngaanniit angerlartillunga ataataga aneersuartarfimmi issiasoq naapippara. Angutit marluk mappelisartut illut akornisigut aggersut takussaapput, qiimasumik ilassinneriarlutik imminnut ilisaritipput Jehovap nalunaajaasuunerarlutik. Ataataga tusarnaarluartorujussuuvoq. Atuagassianik marlunnik neroorfigimmanni, isigeriarlunga aperivaanga perusunnerikka. Akuersivunga, atuagassianillu pitsippaanga.

Oqaluussisartut pulaarnissaminnik neriorsuipput aggeqqikkumaarlutik, taamaaliorpullumi. Ukiuni marlunni tulliuttuni aggertarput Biibilimillu eqqartuiffigisarlunga. Pulaartarnerat akulikippallaanngilaq, tassami kilometerit qulit missaat pisullutik nunaqarfigisannut aggertariaqartarput.

Ilaquttannit isumakkeerneqarpunga

Aqqaneq-marlunnik ukioqartunga ataataga napparsimalerluni toquvoq. Ilisaaneraniit ullut arfineq-pingasut qaangiummata angajullersatta ilaqutariit tamaasa aggersarpai ataatsimooqatigiinnissatsinnik, ilaquttat 20-it missaat takkupput. Tamatta isumaqarsimagaluarpugut ilisaanermut aningaasartuutaasimasut pillugit oqaloqatiginiaraatigut. Tupaallaatigisannilli nassuiaavoq qatanngutigiinni angutini nukarleq pillugu qaaqqusimalluta — uanga! Oqaluppoq angalaarlunga aningaasamininnguanik ’qinnuuloortalissamaartunga’ — ilaqutariinni isumassorneqarnanga aningaasassaqartinneqanngitsutut. Nangippoq taamatut angalaarnera atuagassianillu tuniniaanera ilaqutariittut tusaamanerlugaalissutigissagipput. Qinigaqartariaqarpunga, oqarpoq, kikkunnut ilaarusunnersunga — Jehovap nalunaajaasuinut ilaquttannulluunniit.

Anaanaga toqoreersimavoq, arnassamali ilaata qialluni illersorlunga qinnuppaanga. Qinnuigai tamanna patsisitut atoqqunagu kingornussassat ilaannik pinnginnissara piinnarlugu. Arnalli isumaa soqutiginngilaat. Ilaqutariit angajullersarput isumaqatigaat, piumaffigalungalu aalajangernissannik.

Qinnuigaakka tamatuminnga eqqarsarfissaqarteqqullunga. Akuersipput piffissalerlungalu aqaguani unnukkuanut. Kiserngoruteriarama ineeqqanni qiassara nunusinnaajunnaarpara. Misigisimavunga nukissaaruttutut, ilaluarineqartutut annilaagallungalu. Qanormita pineqassaanga?

Tamatuma nalaani naalagaaffilersaartarfimmiissimanngilanga Jehovap nalunaajaasuiluunniit ilagalugit oqaluusseqataasimananga. Biibilillu ajoqersuutaanik annikitsuinnarmik ilimasaqarlunga, nunaqarfigisannilu oqaluussisartoqanngilaq oqaloqatigisinnaasannik.

Jehovamut qinuvunga, aatsaallu siullerpaamik aqqa atorlugu qinnuigalugu. Oqaluttuuppara ilikkarsimallugu Guutiusoq ilumoortoq, qamanngavillu qinnuigalugu eqqortumik, iluarisaanik aalajangiinissannik tapersersoqqullunga ikioqqullungalu. Aqaguani ilaqutariit katersuuteqqippugut aalajangerneralu tusarumavaat. Oqaatigaara ataataga, inuuninnik tunisisimasoq, oqaluussisartunik atuaqqissaaqateqartalerninnut pissutaasimasoq, atuakkanillu atuagassianillu pitsittarsimagaanga. Paasisinnaanngilara qatanngutitsinni angajulliup uannut akerliuniarluni tamanna patsisitut atormagu, ataataga misigisimanngippat oqaluussisartunik atuaqqissaaqateqartarnera akornutissaqartinnagu. Oqarpunga qanorluunnit iliorfigisinnaagaannga, kisianni uanga Jehova kiffartuuttariaqarlugu.

Oqaaserisakka nuannaajallatsitsinngillat. Ilaat oqarpoq: „Kinaana teriarsuaarakasik uagutsinnut taama oqaluttoq?“ Qatanngutiga erniinnaq aalajangersimarpaluttunik allortarluni ininnukarpoq, atisakka tigoriarlugit atuakkakkalu kufferteeraralu tamaasa silammut nunaannarmut igippai.

Atuaqatima ilaanut nunaqarfeeqqamiittumi inissarsivunga, qaammatinilu tallimani ilaqutaani najugaqarlunga. Angaara Lagosimi najugaqartoq allaffigisarpara. Aggersarpaanga immini najugaqarsinnaanerarlunga.

Qaammatialunni palmit inerittussaannik katersillunga tuniniartarlugillu aningaasarsiorpunga. Arnassama uannik qinnussisimasup, aningaasaminernik tunivaanga, katersakkalu naammalereermata Lagosiliaatigaakka. Aqqutip ilaani biilip sioqqanik usisup usisaataani issiavunga.

Aappassaanik anisinneqarpunga

Lagosimut tikikkama tulluuteqaanga paasilerakku angaara Jehovap nalunaajaasuinik atuaqatigineqartartoq. Erniinnaq naalagaaffilersaartarfimmi ataatsimiittalerpunga. Angaarma Jehovamik kiffartuusserusunnera erniinnaq peeruppoq qatanngutima angajulliit ilaata pulaareernerata kingornatigut. Angaannut oqarpoq suli Jehovap nalunaajaasui ilagisarakkit ilaqutariit aalajangersimasut aningaasatigut ikiorserniarnanga atuarfimmiluunniit atuarnissara akuersissutiginiarnagu. Angaara sioorasaareerlugulu angerlaqqippoq.

Qatanngutima aallareernerata kingorna sapaatip akunnera ataaseq qaangiummat unnuami angaannit itersarneqarpunga. Allagaq tunginnut miloriuppaa. Allaammik isaatsitsivigaaga ataatigullu atsioqqullunga. Qissimilluni isiginninninnera takulerakku paasivara pingaaruteqartuusoq. Aperivara: „Angaa, atsiornissara sooq aqagumut utaqqisissinnaanngila?“

Oqarpoq angaaminik taaqqissanngikkiga, erniinnarluinnarli pappiaqqamut atsioqquaanga. Akivara toqutsisimasorluunniit sumut unnerluutigineqarnini pillugu paasiniaasinnaappat, uanga aamma atuaqqaalaarsinnaavara ataatigut atsiortinnanga.

Atuaqqaarnissara uumitsaatigigaluarlugu akuersivoq. Oqaasertai imatut allanneqarput: „Uanga, U. U. Udoh, uppernarsaavunga Jehovap nalunaajaasunngunngisaannassallunga. Mappera atuakkakkalu ikuallakkumavakka neriorsuillungalu Jehovap nalunaajaasui susassariunnaassallugit . . .“ Allannerit siulliit atuareerlugillu illalerpunga. Erniinnaq nassuiaappara soqqusaatsuliorfiginissaa eqqarsaatiginngikkinga, kisianni allakkat taamaattut atsiorsinnaanngilluinnarikka.

Angaara kamattorujussuanngorpoq oqarfigalungalu massakkorluinnaq qimaguteqqullunga. Tuaviinnaq atisakka atuakkakkalu kuffertinnut immiutipallappakka, inaalu qimallugu isaarissallu natiani sininnialerlunga. Angaarma takoriaraminga taqqamaniittunga, oqarpoq isaariaq ineqarfianut aamma ilaasoq taamaattumik inissiaq qimattariaqariga.

Ussernartumik neqeroorfigineqarneq

Sapaatip-akunnerinnaa Lagosimiissimagama sumunnassallunga naluara. Qatanngut naalagaaffilersaartarfimmut ataatsimiigialeraangama aallertartoq sumi najugaqarnersoq naluara. Ullaanngormat sumut tamanut angalaaqattaalerpunga, Jehovamut qinuutigalunga ikioqqullunga.

Ualeq naajartulersoq orsussaarniarfiup eqqaaniippunga. Piginnittuanut saaffiginnippunga kuffertera allaffianut paarnaaqqasumut unnuk ataaseq qimassinnaaneriga, tillinnianut isumannaatsumiinniassammat. Apeqqutima alapernaalersippaa, aperimmammi sooq angerlaannarniannginnersunga. Oqaluttuuppara taava qanoq pineqarsimaninnik.

Angut paasinnilluarpoq neqeroorfigalungalu kiffamisut tigusinnaallunga. Allaat atuarnissara isumagiumavaa angerlarsimaffiani ikiuutissaguma. Neqeroorut tamanna pilerinaraluaqaaq, kisianni nalunngilara kiffanngussangaanni ullaaralaamiit unnussuarmut sulisariaqartoq. Kiffat aamma illoqatiginngisaminnik allanik ilaqartannginnissaat piumasarineqartarpoq, annilaanngatigineqarmat tillinnianik suleqateqaratarnissaq tillinniaqataalerluni. Qaammammut ataasiarlunga sapaammi sulinngiffeqarnissara ajunngitsorsiassarissavara. Neqeroorutaa itigartippara, qujassutigaluguli ilumoorluni isumassuerusunnera. Nassuiaappara kiffatut suliffeqassaguma naalagaaffilersaartarfimmut ataatsimiigiarnissannut ajornakusuussaqisoq.

Angut oqarpoq: „Qanoq ilillutit ataatsimiinnerit eqqartorsinnaavigit sumiiffissaqarnissalluunniit nalullugu?“ Akivara ataatsimiittarnissakka pinngitsoorumagukkit ataatama angerlarsimaffianiiginnarsinnaagaluarlunga, upperisara pissutigalugu ilaquttama qimagutitissimammannga. Taamaallaat tassannga kissaatigisatuaraara kuffertima arlaanut inissinnissaa. Taamatullu oqareersunga paarinissaanik akuersivoq.

Ilaquttanik allanik nassaarneq

Ulluni pingasuni orsussaarniarfiup silataani sinittarpunga. Aningaasaateqanngilanga nerisassarsiutigisinnaasannik, taamaattumillu ulluni taakkunani nerisaqanngivillunga. Ullut sisamaanni angalaarujoortillunga takulerpara angut inuusuttoq atuagassianik Napasuliaq alapernaarsuiffik-mik Iteritsi!-millu aqqusinermi saneqquttunut neqeroorutiginnittoq. Nuannaajallangaarama arpallunga apeqqutigiartorpara qatanngut Godwin Ideh nalunnginneraa. Paaserusuppaa sooq apeqqutigineriga, taava oqaluttuutilerpara qanoq pineqarsimaninnik tamanik.

Oqaluttuutereerinni erniinnaq atuagassiaatini atuagaasivimminut ilivai oqarlunilu: „Sooq taama annikilliussavit Lagosimi Jehovap nalunaajaasoqartigisoq?“ Taxamik pissarsivoq, orsussaarniarfimmullu ingerlavugut kuffertera aaniarlugu. Kingorna angerlarsimaffianut ilagivara, nerisereeraminga qatanngut Ideh qanittumi najugaqartoq arpaartippaa.

Qatanngut Ideh takkummat oqallisigilerpaat kikkunni najugaqassanersunga. Tamarmik inisimasorerusuppaannga! Naggataatigut isumaqatigiipput paarlakaallutik inisimasoriniarlunga — piffissap ilaani aappaani najugaqartassallunga taamatullu aappaani.

Sivitsunngitsoq suliffittaarpunga taasakuluttut. Aningaasarseqqaarama qatanngutit taakku marluk aperivakka qanoq annertutigisumik nerisaqarninnut ineqarninnullu akiliissanersunga. Illaannarput, oqarlutillu akiliissanngilluinnartunga.

Sivitsunngitsoq unnukkut atuartalernissannik nalunaarpunga, saniatigullu immikkut atuartinneqartarnissamik pissarsillunga, kiisamilu tunngaviusumik ilinniarnissara naammassisinnaanngorpara. Allatsitullu ajunnginnerusumik suliffeqalernera pissutigalugu aningaasaqarniarnera ajunnginnerulerpoq, kingornalu namminerisannik angerlarsimaffeqalerpunga.

1972-mi apriilimi 17-inik ukioqarlunga kuisippunga. Jehovap uannut iliuuserisimasarpassui pillugit pingaartitsinera taassumunnga takutikkusuppara, ingammik ulluni annikilliuleruttorfinni, taamaattumik piffissara tamaat atorlugu oqaluussisartunngorpunga. Periarfissat takkukkaangata ikiorti pioneeriusarlunga, ukiorpaaluilli qaangiummata aatsaat aalajangersimasuutilerlugu. 1983-mi kiisami nalinginnaasumik pioneerisut aallartippunga.

Aatsaat paasillualerpakka anersaakkut ilaquttat qanoq naleqartiginerat. Jesusip oqaasii ilumoorluartut pissutsini atukkanni naleqqulluarput: ’Ilumut oqarfigaassi, inuup kinaasulluunniit illuniluunniit angajoqqaaniluunniit qatanngutiniluunniit nuliiluunniit qitornaniluunniit Guutip naalagaaffia pillugit qimakkunigit, qasseeriarlugit matumani kingumut pissavai, silamilu piumaartussami inuuneq naassaanngitsoq pissavaa.’ — Lúkarse 18:29, 30.

Oqaluussisartut asanninneq ilumoortoq takutissimavaat isumassorsimallungalu. Inissaqartippaannga taamani aningaasaateqanngitsunga. Taakku Ataatarpullu qilammiusoq ikiortigalugit, anersaakkut siumukarnera misigisimavakka. Ilinniagaqarnissaannaraanngitsoq, Jehovap aqqutigeqqusai aamma ilinniarsimavakka.

Taakkuupput timikkut ilaquttama ingalassimaqqusaralui. Itigartikkatsillu, alarpaannga. Anersaakkut qatanngutima maanna kaammattorpaannga timikkut ilaquttakka alaqqullugit? Naamerluinnaq. Biibilip ajoqersorpaatigut: ’Qanorlu inunnut iliorfigeqqugussi ilississaaq taamatut iliorfigisigit.’ — Lúkarse 6:31.

Uannik ilaluarinnissimasunut ikiuineq

Angerlarsimaffinniit aallarsimatsiaannartunga Nigeriami naggueqatigiit sorsuunnerat aallartissimavoq. Nunaqarfik aserorluinnarneqarsimavoq. Ikinngutima amerlanersaat ilaquttamalu inuunertik annaavaat, ilaatigut arnassara uannik qinnussisimasoq. Aningaasaqarniarneq piuneerulluinnarpoq.

Sorsunneq unimmat angerlamut aallarpunga qatanngutiga nukappiaraagallarama uannik anisitseqataasimasoq pulaarniarlugu. Nulia niviarsiaraataalu marluk napparsimapput napparsimmavimmullu unitsinneqarsimallutik. Nalligisorujussuuara aperalugulu arlaannik ikiorsinnaanerlugu.

Oqarpoq, immaqa aamma ilerasuuteqarnini pissutigalugu, ikiortariaqannginnerarluni. Nassuiaappara isumaqassanngitsoq ilaquttannut akiniaaniarlunga taamaaliortunga, nalunngikkigalu nalusaminnik iliuuseqarsimasut. Ilumoorluinnarlungaliuna kissaatigigiga ikiorusullugu.

Qialerpoq aningaasaateqannginninilu oqaatigalugu, meerannguanilu napparsimanerarlugit. Aningaasat 1600 koruunit naligi tunniuppakka, aperalugulu Lagosimi suliffissarsiorusunnginnersoq. Lagosimut utereersimalerama suliffissarsivara qaaqqullugulu uanni najugaqarsinnaasoq. Ukiuni marlunni najugaqarpoq, aningaasarsianilu nuliaminut qitornaminullu nassiuttarpai. Piffissami tamatumani nuannaarlunga akeqanngitsumik inisimatippara nerisaqartillugulu.

Oqarpoq nalunngikkini Jehovap nalunaajaasuisa upperisaq ilumoortoq ingerlakkaat. Kisiannili nammineq silamiut suliassaannik suliassarpassuaqartarami Jehovap nalunaajaasunngorsinnaanani. Neriorsuivorli nuliami qitornamilu atuaqqissaartalernissaat kaammattuutigiumaarlugu.

1987-imi ilageeqatigiinnut kiffartuuteqarnissannik qaaqquneqarpunga. Apriilimi 1991-imi Sarah Ukpong katippara, taavalu 1993-imi aperineqarpugut ilageeqatigiinnik kiffartuuteqarnera unitsillugu Nigeriami immikkoortortaqarfiup allaffiani kiffartorluta aallartikkusunnginnersugut. Akuersaarpugut, tassanilu kiffartorpugut nuliama naartulernera tikillugu.

Suli nukangasunga ilaquttama anisissimavaannga, asannittunilli anersaakkut ilaquttannik isumassorneqarsimavunga — angajoqqaanit, qatanngutinit, meeqqanillu. Nuanneqaaq nunarsuaq tamakkerlugu ilaqutariissuulluni. Ilaqutariissuit taakku asavakka taakkualumi asavaannga! — Oqaluttuartoq Udom Udoh. (gD 22/7 95)

[Qupp. 15-mi assiliartaq]

Udom aamma Sarah Udoh