Inuusuttut aperipput

Naartuersinneq aaqqiissutissaava?

„Misissortinninni paasinarsimmat naartusunga,“ Judy oqaluttuarpoq, „peeqqama ingerlaannaq naartuerseqquaanga. Allaat naartuersinnissannut akiliutissannik tunivaanga.“ Judy taamanikkut 17-inik ukioqarpoq.a

MARTAP 15-inik ukiullip paasigamiuk naartulluni naartuersittarfimmi siunnersorti oqaloqatigaa. „Sunik tamanik nassuiaappaanga,“ Marta oqaluttuarpoq. „Oqarfigaanga naartuersissinnaasunga, aammali kissaatigigukku angajoqqaarsiassaanik ujarliussinnaallunga imaluunniit anaanat illuannut inissarsiuussinnaallunga.“

USA-ginnarmi niviarsiaqqat inuusuttuaqqat millioninit ataatsinit amerlanerusut ukiut tamaasa naartulertarput. Taakku akornanniipput inuusuttut naak kristumiutut perorsarneqarsimagaluarlutik ’uersaaneq nigoqqullugu’, imaluunniit katissimanani atoqateqannginnissamik, Guutip peqqussutaanut naalanngissimasut. (1 Tásalûníkamiut 4:3) Taamatut kanngunartuliorneq erloqissutinik pisariaqanngikkaluanik kinguneqartarpoq. Inuusuttulli tamakkua ilarpassuisa iliuuserisimasartik peqqissimissutigisimavaat eqqortumillu inooriaaseqaqqilerusullutik. Aappaqaratilli meerartaarnissartik merseralugu ilaat immaqa eqqarsartarput naartuersinneq ajornartorsiutiminnut aaqqiipallassutissaasoq. Ilami USA-mi ukiut tamaasa niviarsissat naartusut millionit affaat naartuersinnissartik qinertarpaat. Tamanna kissaatiginagu naartulersoornermut ilumut aaqqiissutissaava pitsaanerpaaq?

Sooq ilaat naartuersittartut

Soorunami misigissutsit sakkortuut akioriittullu sunniuteqaqataanngitsoortanngillat. Arnap inuusuttup ilumiuni pissusissamisoortumik misigissuseqarfigigaluarlugu pissutissaqarluartumik isumakuluuteqarsinnaavoq.

Assersuutigalugu Vicky 18-inik ukiulik „kissaateqarsimavoq ilinniagaqarnissaminik, immaqa allaat qutsissumik ilinniagaqarnissaminik“. Meerartaassagaluaruni pilersaarutai tamarmik qatangiinnassapput. (Atuagassiaq ’Teen, marsi 1992) Aamma Marta ima oqarpoq: „Anaananngoruit meeqqat angerlarsimaqatigisariaqarpat atuarunnaartariaqarputillu. Uanga tamatumunnga piareersimasimanngilanga.“ Misissuinermi ataatsimi erserpoq inuusuttuaqqat naartuersittut 87 procentiisa ersissutigisimagaat meerartaaraluarunik inuunermik akuerissallugu piareersimaffiginngisaminnik allanngorpallaarnissaa.

Aningaasatigut ajornartorsiulernissamik kisimiillunilu angajoqqaatut pisussaaffinnik nammassinnissinnaannginnermik annilaanngatiginninneq amerlasuut naartuersinnerminnut pissutigigajuppaat. Vicky ima nassuiaavoq: „Angajoqqaakka avinnikuupput, anaanamalu meeqqani pingasut kisimiilluni perorsarsimavai. Ilungersuasoq isigisarsimavara . . . Anaanattut kisimiillunga angajoqqaanngortoornissara annilaangassutigisarsimavara.“

Aamma allanit, ingammik peeqqamit, tatineqarneq pissutigalugu naartuersittoqartarpoq. Judy peeqqaminit ima qinigassinneqarsimavoq: „Naartuersinnianngikkuit takoqqikkusunngilakkit.“ Niviarsiaq alla Nancy anaanaminit qanigisaminillu allanit tatineqarluni naartuersissimavoq.

Aamma naartup peerneqartarnerata meeraaqqamik toqutsinertut isigineqannginnera pisooqataavoq. Vicky oqarpoq: „Meeraaqqatut eqqarsaatigisinnaasimanngilara. . . . Atuarsimavara naartoq sapaatit-akunnerisa tallimat iluanni eqeqqup kukianit minnerusartoq. Tamatumunngalu isumaqataalluinnarsimavunga. Imminut oqarfigaanga eqeqqup kukiatut atsigiinnarami naalungiarsuiusinnaanngitsoq. Naartuersinnissannut sapiissuseqarniassagama ilumiora suunngitsutut isiginiarsarisimavara.“

Inuit ilaat aamma oqartarput ingammik nunani teknikkikkut atortorissaarfiusuni naartuersinneq isumannaatsuusoq — immaqalu inuusuttuaqqap naartuminik atatitsiinnarnissaanit isumannaannerulluni. Taamaammat suut tamaasa eqqarsaatigissagaanni naartuersinneq kissaatiginarnerunerarneqartarpoq. Taamaakkaluartorli pissutsit piviusut takutippaat naartuersissimasut ilarpassui kingornatigut peqqissimisartut. Arnaq ataaseq ima oqarpoq: „20-nik ukioqarlunga naartuersissimavunga. Maannakkut 34-nik ukioqarpunga, qanorlu iliorsimanera artungajappara. Uanga naartuersikkusussimanngikkaluarpunga, peeqqamali tamanna kissaatigisimavaa. Suli misigissutsikkut artorsaatigisarpara; inuunerma sinnera aliasuutigissavara.“

Misigissutsikkut qileqqut

Naartuersinneq ajornartorsiummik aaqqiipallannerinnaanani ajornartorsiutinik ajornerulersitsiinnarsinnaavoq. Qamuuna ilukkut suup ajunngitsuuneranik suullu ajortuuneranik misiginitsinnut — tassa nalunngeqatiginnissutsitsinnut Guutip inunnut ikkussimasaanut — akerliuvoq. (Rûmamiut 2:15) Aamma naartuersinniartup uumassusilimmut ilumini alliartortumut misigissutsiminik kipisinissaa pisariaqartarpoq. (Naleqqiuguk 1 Juánase 3:17.) Ilumut ingasak!

Marta oqarpoq: „Naartuersinninnit sapaatit-akunneri marlussuit qaangiummata aatsaat iliuuserisimasara pillugu imminut ajoralungalu kanngusulerpunga.“ Suli ajornerulersimavoq februaari — meeqqap inunngorfissaralua — nallermat. Eliasa oqaluttuarpoq: „Ukiut 15-it matuma siorna naartuersippunga. Tamatuma kingorna isumakkut artorsartorujussuuvunga arlaleriarlungalu katsorsartittariaqartarsimallunga. Allaat imminorusulersimagaluarpunga.“

Soorunami niviarsissat tamakkeratik taamatut qisuariartarput. Ilarpassuisa naartoq inuunngitsutut isigaat. Pinngortitsisorli — „inuunerup puilaffia“ — tamatumunnga atatillugu qanoq oqarpa? (Tussiaat 36:10) Biibilimi erseqqissumik takutinneqarpoq Jehova Guutip meeraq naap iluani alliartortoq inuunngitsutut isigeqqajanngikkaa. Taassuma kunngi David ima allannissaanut isumassarsitissimavaa: ’Taattoqanngikkallartunga isivit isigaannga, mappersagaatinnilu allassimapput ullut tamarmik nuiartortussat.’ (tugsiaut 139:16) Tassa allaat ’taattoqanngikkallaratta’ Pinngortitsisup inuttut kinaassusilittut isigaatigut. Taamaattumik aalajangersaasimavoq meeqqamik inunngorsimanngitsumik innarliisoq akisussaatinneqartassasoq. (2 Moses 21:22, 23) Aap, meeqqamik inunngorsimanngitsumik toqutsineq Guutip isaani inuarnertut ippoq. Taamaattumik niviarsissap Guutimik nuannaartitsiumasup naartuersinneq qinigassatut akuersornartutut qinersinnaanngilaa — tatiniarneqaraluaruniluunniit.b

Annertoqqusersugaaneq

Judy, aallaqqaataani eqqaaneqartoq, naartuersinngilaq. Oqarpoq: „Angajuma naartusunga paasigamiuk aallaqqaataaniilli ikiortarpaanga, ingammik misigissutsikkut. Allaat oqarluni aamma meerartaareeruma ikiortuarumallunga. Taamatorpiaq tusarnissara pisariaqartippara qamuuna ilukkut eqqortutut misigisama malinnissaanut. Aalajangersimaannarpunga meerartaarlungalu.“ Tamanna ukiut qulingiluat matuma siorna pivoq. Ernini arfineq-pingasunik ukiulik isigiitigalugu oqarpoq: „Naartuersissimasuuguma inuuninni kukkunima annerpaartarisimassagaluarpaat.“

Arnaq inuusuttoq, Natisa, assingusumik ima oqaluttuarpoq: „Ukiut tallimat matuma siorna naartuersittarfimmi issiavunga tullinnguunnissara utaqqillugu. Eqqarsaqqeriarama sussaaginnarlunga naartuersittarfimmit anivunga. Maannakkut erneqarpunga inequnaqisumik tallimanik ukiulimmik, aamma massakkut naartuvunga ataataannullu asannittumut katissimallunga.“

Aappariinnerup avataani naartulersoq kinaluunniit tuaviupiluttumik aalajangiisariaqanngilaq. Naak immaqa pissutsit ajorpasikkaluaqisut imaanngilaq neriuutissaqanngilluinnartoq. Annertoqqusersorneqarnissanili inersimasumillu unnersuunneqarnissani pisariaqartilluinnarpai. Angajoqqaanut uummammiunik aniatitsineq aallartilluarneruvoq, ingammik kristumiuuppata. (Ussatit 23:26) Soorunami immaqa aallaqqaammut aliatsallutillu kamassapput. Qularnanngitsumilli tupannertik qaangerunikku ikiuukkusulissapput. Immaqa naartunermi isumassorneqarnissaq isumagissavaat. Aamma pisortat ikiorsiissutigisartagaannik atuinissaq isumagisinnaavaat. Pingaarnerpaamillu, kukkuluttorsimasup ilagiinni utoqqaanertanit anersaakkut pisariaqartumik ikiorneqarnissaa isumagissavaat. — Jâko 5:14, 15.

Anaanat kisimiittut ilaasa meerartaatik meerarsianngortissimavaat, meeqqamut pitsaanerpaamik tunniussisinnaannginnisartik annilaanngatigigamikku. Meerarsianngortitsineq naartuersinnermit pitsaanerujussuugaluarpoq, Guutilli angajoqqaat ’inoqutiminnik isumaginnittussatut’ akisussaatippai. (1 Timûtiuse 5:8) Immaqa angajoqqaap kisimiittup meeqqani timip piisigut pitsaanerpaamik tunisinnaanngikkaluarpaa, pingaarneroqisumilli tunisinnaavaa — asanninnermik. (Ussatit 15:17) Taamaattumik amerlanertigut anaanap kisimiittup meeqqaminik perorsaanissaa pitsaanerusarpoq.

Meeqqamimmi perorsaanissamik suliassaq — inuunermilu allanngornerujussuit qularnanngitsumik takkussimasut? Tamakku tamarmik mersernarsinnaaqaat. Kisianni Biibilimi atoriaannaasunik siunnersuuteqarpoq inuit unamminiarnartunik taama ittunik atuinerminni ikiuutigisinnaasaannik. Anaanat katissimanngitsut peqqissimisut aamma anersaakkut ikiorneqarneq Guutip Oqaasianik tunngaveqartoq iluaqutigisinnaavaat. Aap, asannittumik annertoqqusersorneqarunik eqqortumillu unnersuunneqartarunik pissutsit ajornerpaalluunniit anigorsinnaavaat.c Naartuersinneq aaqqiissutissaanngilaq!

[Quppernerup ataani ilanngussat]

[Qupp. 26-mi assiliartaq]

Nukappissat arnaatitik naartuersinnissaannik amerlasuutigut pinngitsaalisarpaat