Naartuersittarneq pillugu Biibilimi qanoq allassimasoqarpa?

Akissut Biibilimeersoq

Naartuersittarneq, tassa piaaraluni naartumik peersitsineq, Biibilimi eqqaaneqanngilaq. Kisianni Guutip inuunermut, aamma naarmiunut, isiginnit­taasianik ersersitsisunik Biibilimi allassimasoqarpoq.

Inuuneq Guutimit tunissutaavoq. (Mosesimik 1. 9:6; Tussiaat 36:10) Guutimut inuit tamarmik erlinnar­tuupput, aamma naarmiusut. Taamaammat arlaata piaaraluni ilumiuusoq peersippagu Guutip toqutsisutut isigivaa.

Guutip Israalikkunnut inatsisaani ima allaqqavoq: “Angutit paasut arlaata arnaq naartusoq sakallugu naartuanik anitsisippagu, arnarli allakkut innarler­neqanngippat, taava angut taamaalisitsisoq eqqartuussisut akuersineratigut arnap uiata taarsiis­sutigeq­qusaatut angitigisumik akiliisin­neqassaaq. Ajunaar­toqarsimappat taava tamanna naleqar­tissavarsi inuuneq inuunermik.” – Mosesimik 2. 21:22, 23.a

• Qaqugukkut inuuneq aallartittarpa?

• Naartuersis­simagaanni Guutimit isumakkeerfigineqar­toqarsinnaava?

• Anaanaasoq meerarluunniit navianar­torsiorpat naartuersinneq eqqunngitsuliornerua?

Qaqugukkut inuuneq aallartittarpa?

Naarmiugineqaleraangami Guutip isaani inuuneq aallartittarpoq. Biibilimi meeqqat inunngorsiman­ngitsut inuttut allaatigineqartarput. Guutip assigiissippai meeraq erniusimasoq aamma meeraq suli naarmiuusoq. Uku eqqarsaatigikkit:

• Guutimit isumassarsisitaalluni kunngi Daavi allappoq: “Ilumiuutil­lungali isigaarma.” (Tussiaat 139:16) Tassa Guutip Daavi suli inunngun­ngitsoq ilisimareerpaa inuttullu isigilereerlugu.

• Pruffiiti Jeremia suli inunngun­ngitsoq Guutip nalunngilaa immikkut suliassaqassasoq. Oqarfigaa: “Anaanavit timaata iluani piliarin­ngikkal­larakkilli ilisaraakkit, anaanavit timaanit aninngik­kallaravilli illernar­tippakkit; inuiannut pruffiitin­ngortippakkit.” – Jeremia 1:5.

• Biibilimik allaqataasup Lukkarsip nakorsaasup grækerisut oqaaseq ataaseq meeqqamut inunngorsiman­ngitsumut aamma meeqqamut inoorlaamut atorpaa. – Lukkarsi 1:41; 2:12, 16.

Naartuersis­simagaanni Guutimit isumakkeerfigineqar­toqarsinnaava?

Naartuersis­simasut Guutimit isumakkeerfigineqarsin­naapput. Naartuersis­simasoq inuunermut tunngatillugu Guutip isiginnittaasia nammineq pigilius­simaguniuk imminut pisuutit­tuartariaqanngilaq. Jehovab pillugu Biibilimi allassimavoq: “Naakkin­nillunilu saammaasuuvoq … Soorlu kangia kitaanit ungasissoq, taamatut unioqqutitsinivut ungasil­lisippai uatsinnit.” (Tussiaat 103:8-12) Jehovap ajortuliaminnik ilumoorlutik peqqissimis­sutiginnittut tamaasa, naartuersis­simasut ilanngullugit, isumakkeerfigiumaarpai. – Tussiaat 86:5.

Anaanaasoq meerarluunniit navianar­torsiorpat naartuersinneq eqqunngitsuliornerua?

Naarmiuusup inuunera pillugu Biibilimi allassimasut malillugit anaanaasup meeqqal­luunniit peqqissusianut navianar­torsior­titsisinnaasut naartuersin­nissamut utoqqatsis­sutaanngillat.

Taavami erninermi ajornar­torsiuler­toqarpat, tassa aalajanger­tariaqaleraanni anaanaasup naarmiul­luunniit inuunera annaassanerlugu? Taamaat­toqartillugu aappariit namminneq aalajanger­tariaqarput kina annaanniar­neqassanersoq.