Inuusuttut aperipput:

Angajoqqaakka ileqqorluttuuppata qanoq iliussaanga?

„Ataataga ukiuni qulini kristumiuusimavoq, suliaqanngitsuuvorli. Biibilimik atuaqqissaarneq ajorpaa aalajangersimasumillu ataatsimiigiarneq ajorluni. Ilagiinni kristumiutut qatanngutini isornartorsiortuaannarpai. Taakkuinnaanngillallu, amerlasuut silamiorpaluttumik isumaqarfigai, soorlu ammip qalipaataa tunngavigalugu immikkoortitsineq. Kukkussuterpassuaqartoq takusinnaavara.“ — Niviarsiaraq.

ANGAJOQQAANIK naammalluinnartoqanngilaq. ’Tamarmik ajortuliorput Guutimi nersornaammik ajorsarlutik,’ Biibilimi allassimavoq. (Rûmamiut 3:23) Allaavorli anaana ataataluunniit allamiitsillutik kristumiuulluartutut ileqqoqarpata, angerlarsimatillutilli ileqqorluttuuppata. „Allanik tusaasoqartillugu ataataga pitsaasarpoq,“ niviarsiaraq oqarpoq, „angerlarsimaffiulli iluani allaalluinnarpoq. Tassani peqqarniitsuuvoq. Qanoq iliuutsikka tamarmik ajortuupput, ilaqutaariinniittut tamarmik ilagitillugu nuanniilliortarput. Inuunermi nuannaarutissaaruttutut misigivunga. Uumigaara.“

Ingammik inuusuttut assigiinngitsutigut atornerlunneqarnermik nipaatsumik atuisariaqartut, sakkortuunik misigissuseqarput soorlu kamannermik narrutsannermillu. Niviarsiaraq Marymik atilik ataataminit, isertortukkut imerajutuusumit, „pinerluffigineqartarsimavoq, paquminartuliorfigineqartarsimalluni, assigiinngitsunillu tamanit atornerlunneqartarsimalluni“. Narrujuumminartumik eqqaamavaa: „Inuit ornittarpaatigut oqarlutillu nalissaqanngitsumik ataataqartugut pilluangaarnerarlutalu.“

Ilumoortuusaarnerit tamarmik Biibilimi assuarineqarput. (Jâko 3:17) Mianersoqqusilluni oqarpoq allaat Guutip pallorfiginnittaasa ilumoortut akornanni ’peqquserluttoqassasoq’. (Tussiaat 26:4; naleqqiuguk Jûtarse 4.) Ilisimasalli tamatuma pissutsit oqinnerulersinnaviarunanngilai nammineq ataatagisaq anaanagisarluunniit ilumoortuusaartuuppat. Angajoqqaammi asaneqarnissaat ataqqineqarnissaallu piumaffigineqarpoq. Taamaattumik inuusutut ilaat misigissutsinik imminnut akerliusunik artorsartinneqartarput. Niviarsiaraq anersaarululluni oqarpoq: „Ikiortariaqarpunga. Biibilimi allassimavoq ’ataatat ataqqissavat’, taamaaliorsinnaanngilangali.“

Angajoqqaanik ataqqinninneq qanoq isumaqarpa?

Ilumoorpoq angajoqqaanik ataqqininnissamik Biibilimi peqqussummi inuusuttut angajoqqaamik ataqqineqarnermik taamaattumik pisariaqannginnerinik isumaqarneri pillugu ataqqininngitsoorsinnaaneranik aalajangersagaqanngimmat. (Evfisumiut 6:1, 2) Angajoqqaanilli ataqqinninneq isumaqartariaqanngilaq inooriaasiannik akuerinninneq imminullu iliorfiginninnerinik nuannarinninneq. Biibilimip oqaatsinik atuinerani „ataqqinninneq“ isumaqaannarsinnaavoq oqartussaatitaasumik naleqquttumik akuersineq.

Assersuutigalugu apustilip Peterip kristumiut peqquai ’kunngi ataqqeqqullugu’. (1 Pîtruse 2:17) Peterip nammineerluni misigisimavaa kunngit ileqqorluttorujussuusinnaasut. Soorlu kunngi Herodes Agrippa I piisaapiluttuusimavoq inuunerluttuullunilu. Palæstinap kunngiatut Romamit toqqarneqareerluni kristumiunit malersuisitsilersimavoq. ’Jakobilu Johannesip qatanngutaa panamik toqutippaa. Juutillu iluarigaat malugigamiuk nangilluni Peterittaaq tigutippaa.’ (apustilit suliait 12:1-3) Pikitsitsinissaannik kajumissaarnagit Peterip allaffigai kunngi naalaqqullugu — eqqortumik oqarpoq, silamiummi naalakkersuisuinut naalannissaq Jehovap piumasaanut naapertuuppoq. Peterip nalaani kunngit ilaat tamakkiisumik pissaaneqarsimapput oqartussaassuseqarsimallutillu. Salomonilu oqarsimavoq: „Kunngi nammineq piumasaminik iliorsinnaavoq. . . . Kunngimi pissaaneqarpoq piumasaminik iliorsinnaalluni. Taassumunnga ima oqartoqarsinnaanngilaq: ’Suit?’“ — Nalunaajaasup oqaasii 8:2, 4.

Angajoqqaatit qanorluunniit kukkussuteqaraluarpata assingusumik aqutsinerisa ataaniipputit, inuunerillu annertuumik oqartussaaffigaat. Taamaattumik naalasseriinnissat asissornissalluunniit silatusaarnerunngilaq. Imminut inuuninnik artorsaatissiinnarnak, aammali Guutimut iluarisaajunnaarnermik kinguneqarsinnaavoq. (Naleqqiukkit Ussatit 30:17; Nalunaajaasup oqaasii 10:4.) Sapinngisalli naapertorlugu suleqataaniaruit ilimanarsinnaavoq angajoqqaannut attaveqarneq ajorpallaanngitsoq pigiinnarsinnaagit. — Kulorsamiut 3:20.

Kamanneq uumissuinnerlu qanoq aqunneqarsinnaasut

Ajuallatsitsisimasorli pakatsisitsisimasorluunniit qanoq ilillutit ataqqisinnaaviuk? Oqitsuunngilaq. Kukkussutaali amigaataalu eqqarsatigiinnarukkit uumissuinnerit alliartuinnassaaq. Immaqa isumalluarnerusumik angajoqqaatit eqqarsaatigisariaqarpatit, qularnanngitsumik ajunngitsunik pissuseqassapput pissutsillu tamakkua eqqumaffiginerusariaqarpatit.

Ussatit 19:11-mi allassimanera malugeriaruk: „Inuk silatussusiata kamajaatsunngortittarpaa.“ Angajoqqaatit paasiniarsarigukkit, qularnanngitsumik allatut isigilissavatit. Ataatat ilumut peqqarniitsuuva? Immaqaluunniit sanngiitsuuginnarpa, nikallungaannarluni ikiortariaqarlunilu? Pissusilersorneranut nappaammik, isumatsangaarnermik, kiserliornermik suliaqarpallaarnermilluunniit pissuteqarpa? Taamaappat ajornartorsiutinut taamaattunut paasinninnerusinnaaguit immaqa iluaqutigissavat. Qularnanngitsumik misiginneqatiginerulersinnaavatit kamannerillu millisillugu.

Pissutsit qanorluunniit ikkaluarpata, ajornartorsiutit pillugit allamik oqaloqateqarneq iluaqutaavoq. (Ussatit 12:25) „Ataata imertarsimavoq,“ niviarsiaraq oqarpoq. „Qanoq misigisaqarnera pillugu angajoqqaakka oqaloqatigisinnaasimanngilakka, taamaattumik nipangiusimaannarsimavakka.“ Illilli kisimiittariaqanngilatit. Angajoqqaatit taarsernagit kristumiut ilagiiviniittut inersimasut inersimalluartut angerlarsimaffimmi isumassuinermik amigaataasut tamaasa isumagisinnaavaat. (Naleqqiuguk Mákorse 10:30.) Ussatit 17:17-mi allassimavoq: „Ikinngutaasup asannissutsi tamatigut takutittarpaa, eqqarliusorlu erniusimavoq annikilliornermi ikiortissaalluni.“

’Allanngortissinnaavakka’

Inuusuttut ilaat misigissutsikkut artorsaateqarput paatsuinikkut akisussaassutsimik misigissuseqaramik. Mary imminut qatanngutinilu pillugit oqarpoq: „Ataatap imerajuttuunera allanik paasineqarnissaa sioorassutigiuarsimavarput.“ Allat angajoqqaamik paarsinerlunnerat allanngortinniaraluarlugu tamaviaartarput.

Angajoqqaatit isumakuluutigigaluarlugit asangaaraluarlugillu, kukkuneri akisussaaffiginngilatit. Ataataasup anaanaasulluunniit Guutimut ’nammineq nammagassani nammattariaqarpaa’. (Naleqqiukkit Galâsiamiut 6:5; Jâko 5:14.) Angajoqqaappit pissusilersorneri akisussaaffiginngilatit nakkutiginiartariaqarnagilluunniit. Angajoqqaatit oqalorujuuteruusaartuaannarukkit isornartorsiortuaannarlugilluunniit kamatsiinnassavatit.

Imaanngilaq iliuuseqarsinnaanngivissutit. Soorlu angajoqqaappit pitsaanerulernissaat ’kipisuitsumik qinnutigisinnaavat’. (1 Tásalûníkamiut 5:17) Aammattaaq asanninninnik nittaavigiuarukkit naleqquttumillu uummammik ilumoortumik nersualaartarukkit qularnanngitsumik killissinnaassavatit. Tamatuma saniatigut immaqa sapinngisannik qasusuittuaannartariaqarputit.a

Ilaqutariinni kristumiuugussi ataatallu anaanalluunniit aalakoornartut pinngitsoorsinnaanngippagit aqussinnaanngisaminilluunniit kamarujussuartarpat, soorunami ilagiinni utoqqaanertanik oqaloqateqarnissaannik qulakkeerisussatut pisussaasutut misigissaatit. (Jâko 5:14) Tamanna ilumuunngitsuliornerunngilaq, asannittumilli pisariaqavissumillu ikiuiniarneruvoq. Angajoqqaat ilaasa kamallutik kukkussutit tamaasa miserratigisimagaluarpaat, isertortukkullu meerartik pillarsimallugu, inuusuttulli tassunga tunngatillugu ’iluarneq pillugu naalliuttut’, qularutigissanngilaat sapiitsuliornerat Jehovap akuerigaa piffissanilu nallerpat ilumoortoq paasineqartissagaa. — 1 Pîtruse 3:14; 1 Timûtiuse 5:24, 25.

Annannissat sulissutigiuk

Salomon oqarsimavoq: „Qunutitsinerup ilisimasoq sianiitsumik iliulersissinnaavaa.“ (Nalunaajaasup oqaasii 7:7, NV) Ajoraluartumik inuusuttut ilaat angajoqqaamik maligassiuinerlunerat narrutsassimaarutigilersimavaat namminerlu sianiitsuliulerlunik. Ilaasami Guuti kamaatilersimavaat kristumiutullu inuuneq qimassimallugu. (Ussatit 19:3) Biibili mianersoqqusivoq: ’Kamannerup peerseqinavaatit patikkunisit . . . Mianersorit iluaatsuliornermut saaqqunatit.’ — Job 36:18-21, (versi 18 nutsigaq pisoqaq naapertorlugu).

Angajoqqaappit Guutimut attaveqarnerat isumakuluutigiinnarnagu, ’annannissat mianersorlutit uulillutillu’ sulissutigisariaqarpat. (Filípimiut 2:14) Biibilip nalaani kunngissaq inuusuttoq Ezekias taamaaliorsimavoq. Ataataa, kunngi Akaz, Jehova pallorfiginerarpaa. (Jesaja 7:10-12) Guutimilli nalusut guutii pallorfigai ernermilu ilaat pilliutigisimallugu. (2 Kunngit 16:1-4) Eqqarsaatigeriaruk Ezekiasimut inuusuttumut tunussinermik tamatuminnga isiginnittuulluni qanoq ajortigissasoq. Tussiaat 119:28 kuungissamut inuusuttumut pigitinneqartartoq, imaappoq: „Isumakuluuteqaqaanga, makitinnga oqaatsisit malillugit.“

Jehovalu taamatorluinnaq iliorpoq. Qinusarnikkut Guutillu oqaasiinik atuaqqissaartarnikkut avatangiisini ajoraluartut Ezekias anersaakkut ineriartorsimavoq. (Tussiaat 119:97) Kinalu ilagisarnerlugu sianigeqqissaarsimavaa. (Tussiaat 119:63) Naak ataatani ilumoortuusaartoq maligassiuinerlukkaluartoq ’Jehova attavigiuarsimavaa qimanngivillugulu’. (2 Kunngit 18:6) Illittaaq taamaaliorsinnaavutit. Angajoqqaatit ilumoortuusaartuusinnaagaluarput, ilaarniartariaqanngilatilli. Jehova attavigiuaruk. Immaqa aalajaallutit maligassiuinerpit angajoqqaatit siunissami pitsaanerulertissinnaavai. (gE 22/5 95)

[Quppernerup ataani ilanngussaq]

[Qupp. 27-mi assiliartat]

Naak angajoqqaatit eqqunngitsulioraluartut, illit taamaaliortariaqanngilatit