Angajoqqaat kisermaat ingerlalluar­sinnaapput!

1-3. Ilaqutariit kisimiit­tunik pilersuisul­lit amerliar­tor­neran­nut suut pis­sutaasimap­pat, akulius­saasul­lu qanoq eq­qor­neqar­tar­pat?

ILAQUTARIIT kisimiit­tunik pilersuisul­lit USA-mi ilaqutariit amerliar­tor­nersaat­tut taaneqarsimap­put. Aam­ma nunani al­lani taamaap­poq. Avin­nerit averuser­neril­lu amerlal­luin­nar­tut, aam­malu ar­nat sumigin­nar­neqar­tar­nerat aap­pariin­nerul­lu avataatigut meeq­qior­neq, angajoq­qaanut meeq­qanul­lu mil­lionilik­kuutaanut an­ner­tuumik kinguneqarsimap­put.

² „Uil­lar­neruvunga 28-nik ukiulik, marlun­nil­lu meeraqar­punga,“ anaanaq al­las­simavoq. „Er­numaqaanga, meeq­qamami ataataqaratik peroriar­tor­nis­saat kis­saatigin­ngilara. Soorlumi tas­sa eq­qarsaatigineqan­ngitsunga. Meeq­qama qiasunga takukulasaqaan­nga, taman­nalu taak­kunin­nga at­tuisar­poq.“ Misigis­sutsinik soorlu kaman­nermik, im­minut pisuutin­nermik kiserlior­nermil­lu akiugas­saqar­nermik saniatigut pilersuisut kisimiit­tut amerlanersaat nak­kutigisas­samin­nik sulif­feqaan­naratik aam­ma il­lumi sulias­sanik naam­mas­sisas­saqar­tar­put. Ataaseq ima oqarsimavoq: „Kisimi pilersuisuul­luni soorlumi tas­sa arlalin­nik nak­kaanaveersaarisar­tuul­luni. Ukiup ataatsip af­faata ingerlanerani arsanik sisamanik ataatsik­kut nak­kaanaveersaarineq ilik­kar­neqar­tar­poq. Taman­nali ilik­kar­niariarlugu suli arsamik ataatsimik milorius­sivigitit­toqar­tar­poq.“

³ Ilaqutariin­ni kisimiit­tunik pilersuisulin­ni meeq­qat amerlasuutigut nam­min­neq akiugas­saqar­tar­put. Misigis­sutsit angajoq­qaamik arlaata toqunerata imaluun­niit najuiun­naar­nerata kingor­na pilersut iluarsar­tuun­niar­tariaqar­tar­paat. Nalunan­ngilaq angajoq­qaat arlaata peqan­ngin­nera inuusut­tor­pas­suar­nut ajor­tumik sun­niuteqar­tar­toq.

4. Qanoq ilil­luta nalun­ngilar­put Jehovap ilaqutariin­nik pilersuisut kisimiit­tut soqutigigai?

⁴ Aam­ma Biibilip nalaani kisimiit­tunik ilaqutariin­nik pilersuisoqarsimavoq. ’Iliarsuit’ aam­ma ’uil­lar­nerit’ Biibilimi eq­qaaneqakulasorujus­suup­put. (2 Moses 22:22; 5 Moses 24:19-21; Job 31:16-22) Jehova Guutip taak­kua qanoq ingerlanerat soqutigil­luin­narsimavaa. Tus­siaasior­tup Guuti tas­saanerarsimavaa „iliarsuit ataataat uil­lar­neril­lu ser­nis­sor­taat“. (Tus­siaat 68:6) Ul­lumik­kut ilaqutariin­nik pilersuisut kisimiit­tut aam­ma taamatut Jehovap soqutigai. Oqaasii najoq­qutas­sianik ilaqutariit­tut inuunermin­ni iluaqutigisin­naasaan­nik imaqar­put.

ILLUMI INGERLATSINEQ

5. Angajoq­qaat kisimiit­tut aal­laq­qaataani suut ajor­nar­torsiutigisar­paat?

⁵ Il­lumi ingerlatsineq as­sersuutigeriar­tigu. „Il­lumi angutitaqar­nis­saq ilaan­nik­kut kis­saatigium­mer­nar­tar­poq,“ ar­naq avin­neq oqar­poq, „as­sersuutigalugu, biili eq­qumiitsumik nipiliuleraangat nalul­lugulu nipi sumin­ngaan­neer­nersoq.“ Taamatut­taaq angutit aveq­qam­mersut imaluun­nit nuleeq­qam­mersut il­lumi sulias­sar­pas­suit maan­na suliarisariaqalik­katik merserium­mer­tar­paat. Angerlarsimaf­fim­mi paatsiveerusimaar­neq meeq­qat toq­qis­sisiman­ngin­neran­nik sak­kor­tusaasin­naavoq.

6, 7. (a) „Nuliaal­luar­toq“ Us­satit-ni eq­qar­tor­neqar­toq qanoq maligas­siuil­luar­pa? (b) Il­lumi sulias­satigut eqiasuitsuuneq qanoq iluaqutaatigaa?

⁶ Suna iluaqutaasin­naava? ’Nuliaal­luar­tup’ Us­satit 31:10-31-mi al­laatigineqar­nera malugiuk. Naam­mas­sisin­naasai malugisariaqar­tuup­put. Pisiniar­tar­poq tuniniaasarlunilu, mersor­tar­poq, nerisas­sior­tar­poq, pigisanik aalaak­kaasunik aningaasaliisar­poq, nunaateqar­nermik ingerlatsisar­poq angerlarsimaf­fim­milu nioq­qutis­sior­tarluni. Qanoq ilil­luni tamak­kor­pas­suit naam­mas­sisar­pai? Eqiasuitsuuvoq, sulias­sani naam­mas­siumal­lugit itiaar­tar­poq un­nus­suarmul­lu sulisarluni. Aam­ma aaq­qis­suus­sil­laq­qis­suuvoq. Nam­mineq al­lanik suliaqar­til­luni sulias­sat ilaat al­lanut suliak­kiis­sutigisar­pai. Taamaat­tumik tupin­nan­ngilaq nersualaar­neqarmat!

⁷ Kisivit pilersuisuuguit il­lumi sulias­sat peq­qis­saar­tumik isumaginiar­tariaqar­patit. Tamak­kunin­nga suliaqar­neq nuan­nariler­niar­niaruk, taamaap­pam­mi meeq­qavit nuan­naar­nerat al­lisis­savat. Pilersaarusiorluar­nerli aaq­qis­suus­sinerlu pisariaqar­put. Biibilimi ima al­las­simavoq: „Eqiasuitsup eq­qarsarluaq­qaar­nera iluanaarutis­sarsisitsisar­poq.“ (Us­satit 21:5) Ataataq kisimiit­toq ima oqarsimavoq: „Kaaleraangama aatsaat nerinis­saq eq­qarsaatigiler­tar­para.“ Aalajangersimasumil­li nerif­feqar­neq piumal­lerlunilu nerisas­siupal­lat­tar­nermit pitsaaneruvoq. Imaas­sin­naavoq aam­ma sulias­sat arlaat ilin­niar­tariaqar­toq. Atuak­kat nam­mineq ilin­niutis­sat ikior­tigalugit ikin­ngutil­lu ikiuiumatuut im­maqa suliamut pineqar­tumut ilin­niarsimasut imaluun­niit qanoq suliarineqar­nis­saanik ilisiman­nit­tut paasiniaaviginerisigut, anaanat kisimiit­tut ilaat qalipaanermik, VVS-imut tun­ngasunik suliaqar­nermik biilinil­lu ajor­nan­ngin­nerusunik iluarsaas­sinermik ilin­niarsimap­put.

8. Ilaqutariin­ni kisimiit­tunik pilersuisulin­ni meeq­qat angerlarsimaf­fim­mi qanoq ikiuus­sin­naap­pat?

⁸ Meeq­qat ikiuuteq­qus­sal­lugit ajun­ngila? Anaanaq kisimiit­toq ima oqarsimavoq: „Meeq­qat oqilisaavigineratigut ataatamin­nik an­naasaqar­nerat taar­teqar­tin­niarsarinar­tar­poq.“ Taman­na paasinar­poq, im­maqali tamatigut meeq­qanut pitsaaner­paajun­ngilaq. Biibilip nalaani meeq­qat Guutimik mianerin­nit­tut ikiuut­tus­saasimap­put. (1 Moses 37:2; Taal­liat Asan­nin­nilersaarutit 1:6) Naak meeq­qat nam­mak­kersor­pal­laar­nis­saat mianersuutigisus­saagaluarlugu silatusaar­nerus­saaq arlaan­nik sulias­saqar­tit­tas­sal­lugit. Im­maqa erruisar­nis­saat inimin­nilu iper­taajaasar­nis­saat piumasarineqarsin­naavoq. Il­lumi sulias­sat ilaat im­maqa suleqatigiis­sutigineqarsin­naap­put. Taman­na tamanut nuan­naarutaasin­naavoq.

SULIFFIK

9. Sooq anaanat kisimiit­tut aningaasatigut ajor­nar­torsiorajup­pat?

⁹ Pilersuisut kisimiit­tut amerlanersaat aningaasatigut amik­kit­tuukulasar­put, anaanal­lu inuusut­tut aap­paqan­ngitsut suli atugarlior­nerusar­put.a Nunani pisor­tanit tapiif­figineqarsin­naaf­fiusuni sulif­fit­taar­nis­sap tungaan­naanul­luun­niit tamak­kunin­nga pisar­tagaqar­nis­saq silatusaar­nerus­saaq. Pisariaqaraangat aaq­qis­suus­sanik taama it­tunik kristumiut atuisar­nis­saat Biibilimi akuerineqar­poq. (Rûmamiut 13:1, 6) Aam­mat­taaq uil­lar­nerit avin­neril­lu aningaasatigut ajor­nar­torsiorsin­naap­put. Ukior­pas­suar­ni angerlarsimaf­fim­mi ningiooreersimal­lutik sulif­feqar­tariaqalersut ilar­pas­sui an­nikitsunik akis­sarsiorfiusunik taamaal­laat sulif­fis­sarsisin­naasar­put. Ilaasa pis­sutsit atuk­katik pitsaanerulersis­simavaat sulif­fin­ni pik­koris­sar­titsiner­nut peqataanermik­kut.

10. Anaanap kisimiit­tup sulif­feqar­tariaqaler­nerminik meeq­qani qanoq nas­suiaas­sin­naavai?

¹⁰ Tupaal­las­san­ngilatit sulif­fis­sarsior­nerit meeq­qavit nuan­narival­laan­ngip­pas­suk, ilerasoqinal­lu. Soorli sulif­feqar­tariaqaler­nin­nik nas­suiaatik­kit, ikiuk­kil­lu paaseq­qul­lugu taak­kunin­nga pilersuinis­sat Jehovap piumasarigaa. (1 Timûtiuse 5:8) Sulif­feqaler­nerit meeq­qat sungiuk­kiar­tus­savaat. Ulapik­kaluaqalutil­li sapin­ngisan­nik pif­fis­saqarfiginiar­tak­kit. Taamatut asan­nit­tumik isumas­suineq ilaqutariin­ni aningaasatigut naam­mat­tusaarisariaqar­nermut oqilisaaqataasin­naavor­taaq. — Us­satit 15:16, 17.

KIKKUT KIKKUNNIK ISUMAGINNISSAPPAT?

11, 12. Pilersuisut kisimiit­tut kil­lis­sat suut atatit­tariaqar­paat, qanorlu iliorlutik?

¹¹ Angajoq­qaat kisimiit­tut meeq­qamin­nut qanit­tuaq­qamik at­taveqaler­tar­nerat pis­susis­samisoor­poq. Angajoq­qaal­li meeq­qal­lu akor­nan­ni Guutip kil­lilius­saasa atorun­naarsin­ngin­nis­saat sianigisariaqar­poq. As­sersuutigalugu, anaanap kisimiit­tup er­nermi il­lumi it­tuusup akisus­saaf­fianik tigusinis­saa naatsorsuutigip­pagu, imaluun­niit panini ajor­nar­torsiutiminik oqalut­tuarfigisarlugu nam­mak­kersor­tar­pagu, ajor­nar­torsiutinik an­ner­tuunik pilersoqarsin­naavoq. Meeq­qanik pisariaqan­ngitsumik nam­mak­kersuineq im­maqalu taak­kunin­nga paatsiveerutitsineq iluan­ngilaq.

¹² Ataatatut anaanatul­luun­niit meeq­qatit paasitik­kit il­lit taak­kunin­nga isumas­suisus­saasutit, taak­kua ilin­nik isumas­suisus­saanatik. (Naleq­qiuguk Korintumiunut agdlagkat áipait 12:14.) Im­maqa siun­nersor­neqar­nis­sat tapersersor­neqar­nis­sal­lu ilaan­nik­kut pisariaqar­tit­tas­savatit. Pisariaqar­titsileraangavit kristumiunut utoq­qaaner­tanut ar­namul­luun­niit kristumiumut inersimal­luar­tumut saaf­figin­nit­tarit, meeq­qan­nut mikisunut pin­nak. — Títuse 2:3.

OQARTUSSAASSUTSIT ATATIGUK

13. Anaanat kisimiit­tut meeq­qamin­nik perorsaatis­siiniar­tar­nermin­ni suna ajor­nar­torsiutigisin­naavaat?

¹³ Ataq­qitin­nis­saq im­maqa angum­mut ajor­nar­torsiutaaval­laar­neq ajor­poq, ar­namul­li ajor­nakusoorsin­naavoq. Anaanaq kisimiit­toq ima oqarsimavoq: „Er­nik­ka angutitut timeqarlutil­lu nipeqar­put. Ilaan­nik­kut aalajangersimar­palun­ngitsumik oqalun­naveersaar­nis­saq taak­kunun­ngalu naleq­qiul­luni san­ngiin­neror­palun­naveersaar­nis­saq ajor­nakusoor­tar­poq.“ Tamatumalu saniatigut im­maqa aap­pan­nik asasan­nik an­naasaqar­nerit suli aliasuutigaat, im­maqaluun­niit aap­pariin­nis­si aseror­neranut im­minut pisuutil­lutit taman­naluun­niit kamaatigalugu. Aap­pakut meeq­qas­sin­nik najuisin­naatitaap­pat im­maqa meeq­qavit taas­sumin­nga ungagin­nin­neruler­nis­saa an­nilaan­ngatigisar­pat. Tamak­kua tamarmik oqimaaqatigiis­sumik perorsaatis­siisar­nis­saq ajor­nakusoor­tis­sin­naavaat.

14. Pilersuisut kisimiit­tut perorsaatis­siisar­neq qanoq oqimaaqatigiis­sumik isumaqarfiginiarsin­naavaat?

¹⁴ Biibilimi al­las­simavoq ’meeq­qap isumamineersitap anaanani kan­ngusuutis­sior­taraa’. (Us­satit 29:15) Ilaqutariin­ni maleruagas­sior­nis­san­nut maleruagas­sanil­lu ator­titsinis­san­nut Jehova Guuti tapersersor­tis­saraat, taamaat­tumik im­minut pisuutin­neq, im­minut ajorineq an­nilaanganerlu nak­kaan­narfigeqinagit. (Us­satit 1:8) Biibilimi najoq­qutas­siat sumigin­nan­ngisaan­nak­kit. (Us­satit 13:24) Ingasat­tajaar­naveersaarlutil­lu aalajangersimaniarsarigit. Taman­na meeq­qat amerlanersaasa ajun­ngitsumik qisuariarfigisalersar­paat. Soorunami meeq­qavit misigis­susii tamatigut eq­qarsaatigiumas­savatit. Ataataq kisimiit­toq ima oqarsimavoq: „Perorsaatis­siisar­nera meeq­qamalu anaanamin­nik an­naasaqar­nermin­ni tuparujus­suarsimaneran­nik paasin­nin­nera oqimaaqatigiis­saar­niar­tariaqar­tar­pak­ka. Periarfis­sani tamani oqaloqatiginiar­tar­pak­ka. Nerisas­sioraangat­ta nuan­nisar­tar­pugut. Pif­fis­sani tamak­kunani uum­mam­miumin­nik aniatitsif­figisar­paan­nga.“

15. Angajoq­qaajusup aap­pakuni eq­qar­toraangamiuk suna pinaveersaar­tariaqar­paa?

¹⁵ Avis­simaguit, iluaqutaanavian­ngilaq aap­pakun­nut ataq­qin­nin­neq mil­lisar­nias­saguk­ku. Angajoq­qaat as­sor­tuut­tut tusaal­lugit meeq­qanut avaan­ngunar­torujus­suuvoq, taman­nalu angajoq­qaamin­nut tamanut ataq­qin­nik­kun­naar­neran­nik kinguneqar­tar­poq. Taamaat­tumik oqaatsit an­ner­nar­tut ator­naveersaar­tak­kit, soorlu imaat­tut: „Ataatat­torluin­naq pis­suseqar­putit!“ Qanorluun­niit aap­pakuit aliasuutis­sitsigisimagaluar­patit, suli meeq­qavit ataatagaa imaluun­niit anaanagaa, meeq­qal­lu ataataminit anaanaminil­lu asaneqar­nis­sani, soqutigineqar­nis­sani perorsaatis­sin­neqar­tar­nis­sanilu atorfis­saqar­tip­pai.b

16. Anersaak­kut ajoqersuineq suna ilaqutariin­ni kisimiit­tunik pilersuisulin­ni aalajangersimasumik aaq­qis­sugaasariaqar­pa?

¹⁶ Soorlu kapitalini matuma siuliiniit­tuni oqaatigineqareersoq perorsaatis­siinermut ilaap­put ajoqersuus­sineq un­nersuus­sinerlu, pil­laanerin­naan­ngitsoq. Anersaak­kut ajoqersuineq aaq­qis­suul­luagaq ajor­nar­torsiuter­pas­suar­nik pin­ngitsoor­titsisin­naavoq. (Filípimiut 3:16) Kristumiut ataatsimiin­nerinut najuut­tuaan­nar­nis­saq pingaar­tuuvoq. (Eprîarit 10:24, 25) Aam­ma sapaatip-akun­neranut ilaqutariit­tut Biibilimik atuaq­qis­saaqatigiit­tar­nis­saq pingaar­tuuvoq. Taamatut atuaq­qis­saar­nerup ingerlan­nis­saa oqitsuun­ngilaq. „Ul­loq tamaat sulereersimal­luni eq­qis­sisimaagin­narusun­nar­taraluar­poq,“ anaanaq nalun­ngeqatigin­nis­sutsiminik malin­nil­luar­niar­toq oqar­poq. „Panin­nil­li atuaq­qis­saaqatigin­nin­nis­sara siun­niusimajuar­niar­tar­para, nalun­ngin­nak­ku naam­mas­sinis­saa pingaar­tuusoq. Ilaqutariit­tul­lu atuaq­qis­saaqatigiit­tar­ner­put nuan­narisorujus­suuaa.“

17. Paulusip suleqataata Timoteusip perorsarluar­neqarsimanera sumik ilin­niarfigisin­naavar­put?

¹⁷ Apustili Paulusip suleqataa Timoteus qular­nan­ngitsumik anaanaminit aanaminil­lu, ataataminiun­ngitsoq, Biibilimi najoq­qutas­sianik ajoqersor­neqarsimavoq. Timoteusili kristumiuul­luar­tun­ngorsimavoq. (apustilit suliait 16:1, 2; 2 Timûtiuse 1:5; 3:14, 15) Aam­ma il­lit ilungersorlutit meeq­qatit ’perorsarlugil­lu Jehovamit iner­ter­taruk­kit’ neriuutigisin­naavat ajun­ngitsumik kinguneqarumaar­toq. — Evfisumiut 6:4.

KISERLIORNEQ AJUGAAFFIGIUK

18, 19. (a) Pilersuisup kisimiit­tup kiserlior­nera qanoq ilil­luni ersersin­naava? (b) Un­nersuus­sut suna timip kajungerisaanut akiuun­nermi iluaqutaasin­naava?

¹⁸ Anaanaq kisimiit­toq anersaamil­luni oqar­poq: „Angerlaraangama sulias­saarul­lungalu, kiserliuum­mer­nerujus­suup tikit­tar­paanga — ingam­mik meeq­qat in­nareersimagaangata.“ Aap, kiserlior­neq angajoq­qaat kisimiit­tut ajor­nar­torsiutaasa an­ner­paar­tarigajup­paat. Aap­pariin­nermi qanitsigiin­nermik atoqatigiit­tar­nermil­lu kipisagisaqar­neq pis­susis­samisoor­poq. Sunali tamaat akigalugu ajor­nar­torsiut taman­na aaq­qin­niar­tariaqar­pa? Apustilip Paulusip nalaani uil­lar­nerit inuusut­tut ’kinguaas­siuutitigut il­ligus­sutsitik nam­min­neq Mes­siasil­lu akor­nan­ni as­siaqutalius­simavaat’. (1 Timûtiuse 5:11, 12, NV) Timik­kul­li kis­saatigisat anersaak­kut soqutigisanit pingaar­nin­ngor­tis­sal­lugit ajoqutaas­saaq. — 1 Timûtiuse 5:6.

¹⁹ Angut kristumiu ima oqarsimavoq: „Kinguaas­siuutit sak­kor­toorujus­suup­put, nununeqarsin­naap­pul­li. Eq­qarsaatit ilaat unin­ngavigineqas­san­ngil­lat, ingerlaan­narli tunuar­tin­neqar­tariaqarlutik. Aam­ma meeq­qanik eq­qarsaatigin­nin­neq iluaqutaasar­poq.“ Guutip oqaasiani ima siun­nersuuteqar­poq: ’Avatisi nunamiusut toqulersis­sigik . . . [kinguaas­siuutitigut] il­ligun­nermut.’ (Kulorsamiut 3:5) Nerrersual­laar­nerit akior­niaruk­ku atuagas­siat nerisas­sanik mamarunar­tunik as­sital­lit isigin­naarumas­savigit, imaluun­niit inuit nerisas­saan­navin­nik oqal­liseqar­tut ilagiumas­savigit? Naamik, ilaa? Timip kajungerisai eq­qarsaatigalugit aam­ma taamaap­poq.

20. (a) Up­pin­ngitsumik peeraqar­tut im­min­nut qanoq ulorianar­torsior­tip­pat? (b) Ukiuni hundredelin­ni siul­ler­ni nalitsin­nilu kisimiit­tut qanoq ilil­lutik kiserlior­nermut akiuus­simap­pat?

²⁰ Kristumiut ilaat up­pin­ngitsumik peeraqalersimap­put. (1 Korintumiut 7:39) Kisimiit­toq taamaalior­toq ajor­nar­torsiutaarut­tar­pa? Naamik. Ar­naq kristumiu avin­neq ima oqarsimavoq: „Kisimiit­tuunermit ajor­nerujus­suaqar­poq. Tas­sa kuk­kusumik aap­paqar­neq!“ Ukiuni hundredelin­ni siul­ler­ni uil­lar­nerit kristumiut qular­nan­ngitsumik ilaan­nik­kooriarlutik kiserlior­tarsimas­sap­put, ilaal­li silatusaarlutik ulapit­tarsimap­put ’il­lusisitsisarlutik, iluar­tut isigaat asat­tarlugit naal­liut­tul­lu ikior­tarlugit’. (1 Timûtiuse 5:10) Aam­mat­taaq nalitsin­ni kristumiut aalajaatsut aap­pas­samin­nik Guutimik mianerin­nit­tumik nas­saar­nis­samik tungaanut ulap­puteqar­tarsimap­put. Uil­lar­nerup kristumiup 68-inik ukiul­lip kiserlior­tutut misigileraangami uil­lar­neqatini pulaar­talersimavai. Oqalut­tuar­poq: „Taamatut pulaar­tarama, nam­mineq angerlarsimaf­fin­nik paarsil­lunga anersaak­kul­lu peq­qis­sutsin­nik sianigin­nil­lunga, kiserlior­nis­san­nut pif­fis­saqan­ngil­luin­nar­punga.“ Ingam­mik inun­nik al­lanik Guutip naalagaaf­fia pil­lugu ilin­niar­titsineq iluaqutaasar­poq. — Matîuse 28:19, 20.

21. Qinusar­neq ikin­ngutinil­lu pitsaasunik peqateqar­tar­neq kiserlior­tutut misiginermik ajugaaf­figin­nin­niar­nermi qanoq ilil­lutik iluaqutaasin­naap­pat?

²¹ Nas­suerutigisariaqar­poq kiserlior­nermut tupin­nar­tuliak­kut nakorsaatis­saqan­ngim­mat. Jehoval­li ikiuineratigut nikal­lujuil­luni ator­neqarsin­naavoq. Kristumiup nukis­saq taman­na pisin­naavaa ’soraarani qinusar­nermigut ul­luk­kul­lu un­nuak­kul­lu torlulasar­nermigut’. (1 Timûtiuse 5:5) Torlulasar­nerit tas­saap­put ikioq­qul­luni ilungersorluni qin­nutit, im­maqa nil­lerujus­suar­tar­ner­nik qul­liliner­nil­lu malitseqar­tut. (Naleq­qiuguk Eprîarinut agdlagkat 5:7.) ’Ul­luk­kul­lu un­nuak­kul­lu’ uum­mam­miunik Jehovamut aniatitsisar­neq iluaqutaasar­poq. Kiserlior­nermut akiuun­nermi iluaqutaasin­naasoq al­la tas­sa ikin­ngutinik pitsaasunik peqateqar­neq. Taak­kuami Us­satit 12:25-mi oqaatigineqar­tutut ’oqaatsinik inus­siar­nersunik’ qiim­mas­saasin­naap­put.

22. Kiserliuleraan­ni suna eq­qarsaatigisariaqar­pa?

²² Ilaan­nik­kut kiserlior­taraan­ni, taman­nami ilimanar­torujus­suum­mat, eq­qaamasariaqar­poq inoqan­ngim­mat ajor­nar­torsiuteqan­ngivis­sumik. Tas­sami ’silarsuarmi qatan­ngutigisavut’ tamavim­mik arlaatigut misilin­neqar­tar­put. (1 Pîtruse 5:9) Sior­natigut atugarisimasatit uteq­qiaf­figinaveersaar­tak­kit. (Nalunaajaasup oqaasii 7:10) Pis­sutsit atuk­kavit ajun­ngitsor­tai eq­qarsaatigisak­kit. Tamanil­lu pingaar­ner­paamik, as­suar­naas­sutsivit at­tat­tuaan­nar­nis­saa Jehoval­lu uum­mataanik nuan­naar­titsinis­sat aalajangiusimajuak­kit. — Us­satit 27:11.

ALLAT QANOQ IKIUISINNAASUT

23. Kristumioqataasut angajoq­qaanut kisimiit­tunut ilagiin­niit­tunut sumik akisus­saaf­feqar­pat?

²³ Kristumioqatit tapersersuinerat ikiuineral­lu qujamasun­nar­torujus­suuvoq. Jâko 1:27-mi ima al­las­simavoq: ’Guutisior­neq Guutip Ataatap minguitsuutitaa as­suarin­ngisaalu tas­sa imaat­toq: iliarsuit uil­lar­neril­lu naal­liun­neran­ni takusar­tarlugit.’ Aap, kristumiut ilaqutariin­ni pilersuisunik kisimiit­tunik ikiuinis­samin­nut pisus­saap­put. Qanorli iliorluni taamaalior­toqarsin­naava?

24. Ilaqutariit kisimiit­tunik pilersuisul­lit ajor­nar­toor­tut qanoq ikior­neqarsin­naap­pat?

²⁴ Timip piisigut ikiuisoqarsin­naavoq. Biibilimi al­las­simavoq: ’Silal­li matuma piinik pil­lup qatan­ngun­ni ajorsar­toq takugaluarlugu uum­man­ni taas­sumun­nga matuguniuk, qanormi taava ilil­luni Guutip asan­nin­nera ilumigut pigiuas­savaa?’ (1 Juánase 3:17) Oqaaseq griikerisooq tas­sani ’takuaa’-mik nutser­neqarsimasoq isumaqaan­nan­ngilaq qiviatsiar­paa, kisian­ni isigaa. Tamatuma takutip­paa pis­sutsit ilaqutariit atugaat pisariaqar­titaal­lu kristumiup uum­matigis­sup im­maqa siul­liul­luni ilisimaarilerai. Im­maqa aningaasanik amigaateqar­put. Im­maqa ilaat arlaatigut iluarsaas­sas­satigut ikior­neqar­nis­samin­nik atorfis­saqar­titsip­put. Im­maqaluun­niit neriar­toq­quneqar­nis­sar­tik katerisimaar­nermul­luun­niit qaaq­qusaanis­sar­tik qujarutis­saqaat.

25. Kristumiut up­peqataasut qanoq ilil­lutik pilersuisunut kisimiit­tunut misigin­neqataanermik ersersitsisin­naap­pat?

²⁵ Aam­mat­taaq Pîtrusip agdlagai sujugdlît 3:8-mi ima kajumis­saaruteqar­poq: ’Kiisalu tamas­si isumaqatigiigitsi ilas­seqatigiil­lusilu qatan­ngutigiin­nil­lu asan­nil­lusi nal­lit­tuil­lusilu.’ Anaanaq kisimiit­toq arfinilin­nik meeralik ima oqarsimavoq: „Ar­tor­narsimaqaaq, ilaan­nik­kul­lu saperluin­naler­tar­punga. Ilaan­nik­kul­li [ilagiin­ni] qatan­ngutit angutit ar­nal­lu or­neriarlunga oqarfigisar­paan­nga: ’Joan, nuan­neq takul­lutit akiuul­luar­tutit. Qularis­san­ngilat ilungersor­nitit kinguneqarluarumaar­tut.’ Al­lat uan­nik eq­qarsaatigin­nin­nerat soqutigin­nin­neral­lu paasil­lugu nuan­nersorujus­suuvoq.“ Ingam­mik ar­nat kristumiut utoq­qasaat anaananik inuusut­tunik kisimiit­tunik ikiuil­laq­qis­sin­naasar­put, angum­mut oqaloqatigiis­sutigiuminaatsitamin­nik ajor­nar­torsiuteqaraangata tusar­naar­tar­nerisigut.

26. Kristumiut angutit inersimal­luar­tut qanoq iliorlutik ’iliarsun­nik’ ikiuisin­naap­pat?

²⁶ Angutit kristumiut al­latigut ikiuisin­naap­put. Job naaper­tuil­luar­toq ima oqarsimavoq: ’Inukulun­nguaq ikioq­qul­luni nil­liasoq an­naat­tar­para iliarsul­lu ikior­teqan­ngitsoq ikior­tarlugu.’ (Job 29:12) Ul­lumik­kut­taaq angutit kristumiut ’iliarsun­nik’ ilumoorlutik soqutigin­nit­tuup­put isumapiloqar­natil­lu ’uum­matimik­kut minguil­lutik asan­nin­nermik’ ersersitsivigin­nit­tarlutik. (1 Timûtiuse 1:5) Nam­mineq ilaqut­tatik sumigin­nan­ngik­kaluarlugit im­maqa ilaan­nik­kut meeq­qat inuusut­tul­lu taama it­tut kristumiutut oqaluus­sinermi suleqatigisarsin­naavaat, imaluun­niit ilaqutariit­tut atuaq­qis­saar­nermin­nut arlaan­nil­lu aliik­kusersoqatigiin­nermin­nut qaaq­qusarlugit. Inus­siar­nisaar­nerup taama it­tup ’iliarsuk’ aq­qutik­kut ajor­tuk­kuuler­nis­saraluanit an­naas­sin­naavaa.

27. Pilersuisut kisermaat suna qularin­ngis­sin­naavaat?

²⁷ Soorunami pilersuisut kisimiit­tut pingaar­ner­paamik ’akisus­saaf­fik nam­magas­sar­tik nam­min­neq nam­mat­tus­saavaat’. (Galâsiamiut 6:5) Taamaak­kaluar­torli asan­nin­neq kristumiutut qatan­ngutimik angutit ar­nal­lu aam­ma Jehova Guutip ersersitaat nuan­naarutigisin­naavaat. Jehova Guuti pil­lugu Biibilimi ima al­las­simasoqar­poq: „Ikior­pai iliarsuit uil­lar­neril­lu.“ (Tus­siaat 146:9) Guutip asan­nit­tumik tapersersuineratigut naak ataasiin­narmik pilersuisoqaraluar­toq ilaqutariit inuunermi ingerlal­luarsin­naap­put.