Biibili qanoq oqarpa?

Ajuallatsitsisimagaanni qanoq iliortariaqarpa?

MALUGISINNAAVAT ajortoqartoq. Kristumioqativit ilaata alanganiarsarisorujussuuaatit. Sooq taamaannerluni oqaluttuussimanngilaatit, ilassinaveersaartarpaatilli, aatsaallu illit ilassigaangakku ilassisarluni. Sumik ajortoqarnersoq paasiniarlugu ornittariaqannginnerpiuk?

’Nammineq ajornartorsiutigissavaa,’ immaqa eqqarsarputit. ’Uanni ajorisaqaruni ornissavaanga oqaloqatigalungalu.’ Ilumoorpoq eqqunngitsuliorfigineqartoq Biibilimi kajumissaarneqarmat qatanngumminut ornigunnissaanik, eqqisseqatiginiarlugu. (Naleqqiuguk Matîuse 18:15-17.) Eqqunngitsuliorfiginnittormi? Sumik akisussaaffeqarpa?

Jesus qaqqami oqaluutsimini ima oqarsimavoq: ’Taamaattumik tunissutissat tunisivimmi pilliutigiartorukku, tassanilu eqqaaleruit qatannguppit sumik patsiseqarfigigaatit, taava tunissutissat tunisiviup saanut qimallugu qatanngutit saammarsariartoqqaarallaak, kingornalu tunissutissat pilliutigiartoruk.’ (Matîuse 5:23, 24) Jesusip ajuallannermut pissutaasoq saaffigaa. Pissutsit aaqqinniarlugit taanna sumik akisussaaffeqarpa? Jesusip oqaasiisa tusarnaartaanit juutiusunit qanoq paasineqarnerat misissorutsigu akissut paasissavarput.

’Tunissutissat tunisivimmi pilliutigiartorukku’

Jesus takorlooruminartumik assersuuteqarpoq: Juuti ukiumoortumik nalliuttorsiornermut najuukkiartorluni Jerusalemimukarsimavoq. Tunissutissaminik nassarpoq, qularnanngitsumik uumasumik, Jehovamut pilliutissaminik.a Pilliuteqarneq tassaaqqajanngilaq ileqqulersuut pingaaruteqarpianngitsoq. Atuakkami Judaism — Practice and Belief-imi ima nassuiarneqarpoq: „Uumasumik puallaarissumik innarluuteqanngitsumillu toqqaaneq, tamakkuninnga ilisimasalimmit uumasup misissorneqarneranik isiginnaarneq, uumasumik tunisivimmit ikumasumit meterialunnik ungasitsigisumukaassineq, tunniussineq, minguttuujussuseq ajortuliallu pillugit isumakkeerfigeqqulluni qinuniarluni imaluunniit siunertanut allanut uumasoq illernartinniarlugu uumasup niaquanik attuineq, qungasiatigut pilatsineq imaluunniit tigumminniinnarneq, tamakkua tamarmik pisup pingaaruteqassusianik persuarsiornassusianillu uppernarsaaqataapput. . . . Aaqqissuussanik tamakkorpassuarnik Guutip peqqussutiginnissimaneranik upperinnittup kialuunniit . . . misigissutsimigut killitsisimaarnani tamakku tamaasa iliuuserisinnaanngilai.“

Taamaattumik Jesusip oqaasii Matîuse 5:23, 24-mi allassimasut pisumik juutit ataqqinningaarlutik nalliussisagaannik tusarnaartunut eqqaasitsipput. Biibilimik paasiniaasartup imatut oqaatigaa: „Pallorfiginnittoq naalaffeqarfimmut pisimavoq; silarliit ungalusat arlallit aqqusaarsimavai — Guutimik nalusut, arnat aamma angutit silarlii. Ilorpasinnerusumiippoq palasit silarliat, inuinnarnut iserfigeqqusaanngitsoq. Pallorfiginnittoq qarmap saniani nikorfavoq tunissutissamilu pilliutissap palasimut tunniunnissaanut piareeqqalluni; [uumasoq niaquatigut] attorsimavaa ajortuliaminik anngiiaatiginnikkusunnerminut ersiutaasumik.“

Tassa piffissami pingaartorujussuarmi tamatumani pilliiartortup eqqaalerpaa qatanngummi ajorigaani. Immaqa tamanna nalunngeqatiginnissutsimigut nalunngilaa, immaqaluunniit malugisinnaavaa qatanngutini eqqunngitsuliorfigineqarsimasutut misigisoq. Maanna unioqqutitsisoq qanoq iliorniassava?

’Tunissutissat tunisiviup saanut qimallugu’

Jesus oqarpoq: ’Taava tunissutissat tunisiviup saanut qimallugu [anigit].’ Sooq? Pilliuteqarnissamit suna pingaarnerusinnaagami? Jesus nangilluni oqarpoq: ’Qatanngutit saammarsariartoqqaarallaak, kingornalu tunissutissat pilliutigiartoruk.’ Unioqqutitsisunngooq pilliutissani, suli toqunneqanngitsoq, pilliiviup saavanut qimaannassavaa qatanngutinilu ajuallassimasoq ujarlugu.

Nalliuttorsuummat qularnanngitsumik qatanngut ajuallassimasoq Jerusalemimukaasimasorpassuit akornanniippoq. Illoqarfik amitsunik aqqusineqarpoq eqimasunillu illoqarluni, illoqarfiullu inui amerlareerput. Tikeraarpassuilli pissutigalugit illoqarfik ulikkaarluinnarsimavoq.b

Naak inuit nunaqqatigiit angalaqatigiissimagaluartut Jerusalemimilu najugaqatigiikkaluartut qularnanngitsumik inuk aalajangersimasoq inuppassuit illoqarfimmi katersuussimasut akornanni naniuminaatsorujussuussaaq. Tupiusaliorfissiornermilu tikeraat illoqarfimmi sumi tamaani, aqqusernit sinaanni illoqannginnersanilu, tupiusanik nappaatiterisarput. (3 Moses 23:34, 42, 43) Taamaakkaluartorli unioqqutitsisoq pisussaatinneqarpoq qatanngutimi ajuallatsissimasami naninissaa tikillugu ujarnissaanut. Taava tamatuma kingorna qanoq iliussava?

’Qatanngutit saammarsaruk,’ Jesus oqarpoq. Griikerit oqaasiata ’saammarsarpaa’-mik nutserneqartup nagguigaa oqaluut diallasʹso, isumaqartoq „allannguinissaq sulissutigaa“, „taarserpaa“ taamaattumillu „saammaateqatigaa“. Unioqqutitsisup ilungersorluni qatanngutini ajuallassimasoq ujareerlugu nanigamiuk eqqisseqatiginissaa kissaatigaa. Kingornalu, Jesus oqarpoq, naalaffimmut utersinnaalissaaq tunissutissanilu pilliutigalugu. Taava aatsaat tunissutaa Guutip ilassisinnaalissavaa.

Taamaattumik Jesusip oqaasii Matîuse 5:23, 24-mi allassimasut pingaartumik ilinniarfigisinnaavavut: Saammaateqatigiinneq, imaluunniit eqqisseqatigiinneq, pilliuteqarnissaq sioqqullugu pisariaqarpoq. Kristumioqatitsinnut iliorfiginninnerput Guutimut attaveqarnitsinnut sunniuteqartorujussuusarpoq. — 1 Juánase 4:20.

Eqqunngitsuliorfiginnissimagaanni taava?

Taavami aallaqqaataani eqqartorneqartutut malugisinnaagaanni qatanngummik ajuallatsitsisimalluni? Qanoq iliortariaqarpa?

Jesusip siunnersuutaa malillugu qatanngummut ornigunnissaq pingaartorujussuuvoq. Suna siunertaralugu? Qularunnaarsinniarlugu pissutissaqanngitsumik ajuallassimasoq? Naamerluinnaq. Immaqa paatsuulaaginnarsimaneq kisimi pineqanngilaq. ’Qatanngutit saammarsariartoruk,’ Jesus oqarpoq. Ajornanngippat akaarinninnginneq sunaluunniit uummataanit peerneqartariaqarpoq. (Rûmamiut 14:19) Ajuallassimasup misigissusii suusupagalugit tunuartiinnarnagit qajassuutikkit. Aamma ajuallassimasoq aperineqarsinnaavoq qanoq ilioraanni ajuallassimanera aaqqinneqarsinnaanersoq. Ilumoorluni utoqqatserneq amerlasuutigut naammattarpoq. Ilaannikkulli ajuallatsitaasimasoq misigissutsimigut pitsanngorniarnissaminut piffissamik pisariaqartitsisarpoq.

Taavami arlaleriarluni misileereeraluarluni saammaateqatigiinneq angusinnaanngikkaanni? Rûmamiunut agdlagkat 12:18-imi allassimavoq: ’Ajornanngippat sapinngisassinnik inuit tamaasa eqqissiveqatiginiarsigik.’ Eqqisseqatigiinnissaq anguniarlugu sapinngisat tamaat ilioreersimaguit qularutigisariaqanngilat pallorfiginninnerit Guutip iluarigaa. (gE 8/2 96)

[Quppernerup ataani ilanngussat]