Biibili qanoq oqarpa?

Anisitsineq asannittumik aaqqissuussaava?

ANISITSINEQ, imaluunniit ilagiinnut ilaasortaajunnaarsitsineq, tamatuminnga eqqarsaataannarluunniit inuit upperisarsiortut ilarpassuini misigissutsinik assigiinngitsunik pilersitsisarpoq.a Upperisarsiornerit tamarmik arlaatigut maleruagassaqartitsinissaat inuit amerlaasa isumaqatigisarpaat. Inuilli ilarpassuisa anisitsineq itsaq ileqqut amiakkuattut, sukannersumik perorsaatissiinertut arnaqquassaanik malersuisarnerup allamillu upperisalinnik killisiuisarnerup nalaannik eqqaasitsisutut, isigaat.

Silamiorpalussutsimik sakkortuumik sunnerneqarneq isummamik tamatuminnga siuarsaasimavoq. Taamaattumik kristumiuuneraqatigiit ilagiivi amerlanerit oqaaseq ’ajortuliorneq’ pillugu nutaalererpalaarnerusumik isumaqalersimapput. Tupinnanngitsumik episkopalilerisut ilagiivini palasi ima oqarsimavoq: „Ilagiinnut ilaasortaajunnaarsitsisarneq ileqqutoqqatsinnut ilaagaluarpoq, isumaqanngilangali ukiuni hundredelinni makkunani atortinneqarsimasoq.“

Immaqa inuit ilaat tupaallassapput tusarunikku anisitsisarneq (tassa ilagiinnut ilaasortaajunnaarsitsisarneq) Jehovap Nalunaajaasuisa akornanni ilumoorunneqartoq. Anisitsineq oqitsuunngilaq, tassaavorli asannittumik aaqqissuussaq. Qanoq ililluni?

Guutip aqqanik qutsissisitsivoq

Jehova Guutiuvoq illernartoq. Imminut pallorfiginnittuunerartut piaaralutik ajortulioqattaartuartut akueriinnarneq ajorpai. Apustili Peter kristumiunut ima allassimavoq: ’Illernartoq qaaqqusisersi malillugu ilississaaq qanoq iliornissigut tamatigut [illernartunngoritsi], allassimammat: „[Illernartuussaasi], uanga illernartuugama.“’ (1 Pîtruse 1:15, 16) Ajortuliortut peqqissiminngitsut anisitaagaangata Guutip aqqa illernartoq qutsissisinneqartarpoq; anisitsineq atermut tamatumunnga asanninnermut ersiutaavoq. — Naleqqiuguk Eprîarinut agdlagkat 6:10.

Tassa imaappa kristumiu sanngiissutsiminut nakkaannartoq imaluunniit ingasattumik assuarnartuliortoq ingerlaannaq ilagiinnit kristumiunit anisinneqartartoq? Naamerluinnaq! Jehova tassaanngilaq kisermaassilluni naalakkersuisoq peqqarniitsoq. Naakkinnittuullunilu paasinnittuuvoq naammalluinnanngitsuunerpullu eqqaamallugu. (Tussiaat 103:14) Jehovap paasivaa inuit ’tamarmik ajortuliortartut Guutimilu nersornaammik ajorsarlutik’. (Rûmamiut 3:23) Kukkuluttorsimasup ingasattumilluunniit ajortuliorsimasup ilagiinnit anersaakkut ikiorneqarsinnaanissaa Guutip isumagisimavaa, asannittumik saamasumillu ’iluarsisinneqaqqullugu’. (Galâsiamiut 6:1) Naapertuilluassutsip aqqutaanit nigorsimagaluartoq unnersuussutinik Guutip oqaasianeersunik ilassinnikkuni, assut aliasulluni allamillu isumataarnerminik piviusumik ersersitsiguni anersaakkut peqqisseqqissinnaavoq. — Jâko 5:13-16.

Taavami kristumiu kuisimasoq ingasattumik assuarnartuliorpat ajunngitsumillu ingerlaleqqinnissaanik ikiuiniaraluarnerit tamarmik iluatsinngippata? Imaluunniit, allatut oqaatigalugu, unioqqutitsisup ajortuliortaqattaarnini uteriilluni soraarukkumanngippagu?

Ilagiinnut sernissuutaavoq

Kristumiut Biibilimi ima inanneqarput: ’Allaffigaassi imaattut ilagisaqqunagit: Qatanngummik taaneqartoq uersaasuuppalluunniit piumatuuppalluunniit guutipilussiortuuppalluunniit, oqarnittuuppalluunniit imerajuttuuppalluunniit arsaarisuuppalluunniit, taama ittoq nereqatigissanngilarsiluunniit.’ — 1 Korintumiut 5:11.

Biibilip inatsisai sukannerpallaarlutillu nikanarsaavallaarpat? Manna eqqarsaatigeriassagit: Pinerluttumik inatsisinik unioqqutitsiuaannartumik parnaarussineq sukannerpallaartuliornerua? Naamik, inuiaqatigiimmi eqqissinermik isumannaassutsimillu sernissuinissaminnut pisinnaatitaaffeqarput. Iluamik oqaatigalugu, pinerluttoq pillaatisiatut parnaarussaanermini inuiaqatigiinnit inatsisinik maleruaasunit anisitaaqqasarpoq.

Taamatuttaaq ilagiit kristumiut ajortuliortunik peqqissiminngitsunik akunnerminnit peersitsinissaminnut pisinnaatitaapput. Sooq? Ilagiit oqquiffittut toqqissisimanartutut ittussaammata — kanngunartuliortoqaratik piaaralutillu ajortuliortoqaratik.

Apustilip Paulusip nalunnginnamiuk ’ajortuliortoq ataasiinnaagaluartoq ajunngitsorpassuarnik suujunnaarsitsisinnaasoq’, uppeqatini ima peqqusimavai: ’Ajortoq taanna ilissinnit peersissiuk.’ (Nalunaajaasup oqaasii 9:18; 1 Korintumiut 5:13) Taamaaliornikkut ajortuliortup ilagiinnik ajortunngortitsinissaralua pinngitsoortinneqassaaq ilagiillu tusaamasaalluarnerat sernissorneqassalluni. — Naleqqiuguk Timûtiusimut agdlagkat sujugdlît 3:15.

Ataasiakkaat sernissorneqassapput

Ilagiinnut ilaasortaasut ataasiakkaat sernissorneqarnissaattaaq anisitsisarnermi siunertaavoq. Assersuutigalugu, takorlooriaruk biilip siggartarpaluanit nilliatitserpaluanilluunniit itertinneqartutit. Tupaqaatit nipilu qoqianngunartoq tusaanngitsuusaaginnarsinnaanagu. Aamma ilagiinnit anisitaasoqarnera ilagiinni ilaasortat tamarmik immikkut eqqumanerulernissaannut ilasaaqataaqqunarpoq. Taamaattoqartillugumi isumakulunngitsoorfiunngilaq, sumiginnaasoqarsinnaananilu. Tamanna qanoq ililluni sernissuutaasinnaava?

Oqaluussisartut ilaat ima oqaluttuarpoq: „Naalagaaffilersaartarfimmi anisitaasoqarneranik nalunaaruteqartumik tusaqqaarama tupattorujussuuvunga. Kingornatigulli maniguuttumik isummerpunga. Paasivara aamma uanga nakkariataarsinnaallunga.“ Oqaatsit tamakku ersersippaat anisitsisoqarnera inuunermik nalileeqqissutaasinnaasoq. — 1 Korintumiut 10:12.

Imatut imminut aperinitsigut: ’Inuuninni anersaakkut ikilertiaffeqarpunga?’ nammineq Guutimut attaveqarnerput misissorsinnaavarput. Taamaalilluta ’mianersorluta uulillutalu annannissarput sulissutigiuarsinnaavarput’. — Filípimiut 2:12.

Guutimut uterneq

Arnaq kristumiu piffissap ilaani anisitaaqqasimasoq ima oqarpoq: „Taamanikkut artornaqaaq, perorsaatissinneqarnissarali pisariaqarsimavoq. Pisariaqartissimaqaara, paasinarsivorlu inuuninnut annassutaasoq.“ Tamatuma anisitsinerup ilaa pingaartoq erseqqissarpaa. Anisitaaneq allanngorumanatik ajortuliortuusimagaluit Guutimut uternissaminnut alloriarnerisinnaavaat siulleq.

Apustili Paulus ima oqarsimavoq: ’Asasani Jehovap perorsartarpai.’ (Eprîarit 12:6) Taamaattorli ’perorsaammik pineqarneq nuannertarinngikkaluarluni, qiimanaatsuullunilu, kingorna eqqissinartumik iluarsinissamik tassuuna sungiusagaasut pissaannik kingunissaqararaaq’. — Eprîarit 12:11.

Tamanna Richardimut pisimavoq. Ukiuni marlungajanni anisitaaqqareerluni isumataarpoq ileqqunilu Guutimut ataqqinaataajaasoq qimallugu, ilagiinnullu kristumiunut ilaaqqilerluni. Kingumut qiviarluni misigisimasani ima oqaluttuarai: „Maanna paasisimavara anisitaanissara pisariaqarsimasoq tamannalu pisassarilluinnariga. Anisitaanera iluaqutigalugu paasivara qanoq ajortigisumik ingerlalersimallunga Jehovamullu isumakkeerfigeqqunissara pisariaqartillugu.“

Perorsaatissinneqarneq artornartutut issinnaavoq. Guutimit perorsaatissinneqarneq ilassissagaanni maniguunneq pisariaqarpoq, tamatuminngali ilinniutiginnittut kinguneqarluartitsisarput.

Tassa anisitsineq asannittumik aaqqissuussaavoq Guutip aqqanik illernartumik qutsissisitsigami ilagiinnullu ajortip sunniipilunnerinut sernissuutaagami. Aammattaaq unioqqutitsisumut asanninnermut ersiutaavoq, tassami kajumissaarneqarpoq isumataaqqullugu ’saanniaqqullugulu, ajortini piiarneqaqqullugit, ullut inuummarissiviusut Jehovap kiinaanit nalliuteqqullugit’. — apustilit suliait 3:19. gE 8/9 96

[Quppernerup ataani ilanngussaq]

[Qupp. 14-mi suminngaanneernera]

The New Testament: A Pictorial Archive from Nineteenth-Century Sources Don Rice/Dover Publications, Inc.