Anisitsineq asannittumik aaqqissuusinerua?
’ILLERNARPOQ, illernarpoq, illernarpoq [Jehova] Guuti ajugaqanngitsoq.’ (sarĸúmersitat 4:8) Allaatigineqartumut tamatumunnga napertuuttumik najoqqutassianut illernartunut tamanut Jehova pilerfiuvoq. Najoqqutassiat illernartut taakkua „allakkani illernartuni“ allassimapput, kristumiullu malittussaavaat. Jehovap isaani minguttuusut tamaasa ingalassimasariaqarpaat. — 2 Timûtiuse 3:15; Jesaja 52:11.
Biibili ersarissumik ima peqqussuteqarpoq: ’Illernartoq qaaqqusisersi malillugu ilississaaq qanoq iliornissigut iluartunngoritsi, allassimammat: iluartuussaasi, uanga illernartuugama.’ (1 Pîtruse 1:15, 16) Kristumiut ilagiivi ukiut 1900-t matuma siornagut pilersinneqarmatali, kristumiut ilumoortut anersaakkut ileqqussatigullu minguttuunermut illersorniarlutik akiugaqangaartarsimapput. — Jûtarse 3.
Sooq illersuut pisariaqartoq
Guutip kiffaasa tamarmik ileqqussatigut anersaakkullu minguitsuujuarnissaq sulissutigisariaqarpaat, tamannalu ajornakusoortuuvoq. Taamaaliorniarlutik akeqqat pissaanillit pingasut — Satan, Satanip silarsuaa namminerlu timikkut ajortulioqqajaanitik — assortortariaqarpaat. (Rûmamiut 5:12; 2 Korintumiut 2:11; 1 Juánase 5:19) Satanip silarsuaata ileqqorluttunngortinniarpaatigut, inooriaatsiminik sunnerniarsaraatigut, nunallu piisigut pigissaarnermik, tusaamasaanermik, atorfimmik, ataqqisaanermik pissaanermillu neqeroorfiginiartarluta. Upperisamilli ilumoortumik malinninniarlutik aalajangiussisimasut Satanip neqeroorutaanik assortuipput ’silarsuarmillu mingutsinnaveersaarlutik’. Sooq? Isumassorneqarneq illersuutasoq asannittorlu Jehovap peqatigiissortaani minguitsuniittoq pigiinnarumagamikku.— Jâko 1:27; 1 Juánase 2:15-17.
Kristumiut ilagiivini inuup sanngiissutaa pissutigalugu Satanip ussernartuutaanut nakkaannarsimasut tamarmik ikiorneqarnissaat Jehovap isumagisimavaa. Utoqqaanertat anersaakkut piginnaanillit ilagiit illersorniarlugit toqqarneqarsimapput. Ajortuliaminnik peqqissimissutiginnittut pisariaqartunillu allanngortitsiumasut asannittumik anersaakkut ikiussavaat. Kristumiu ajortuliorsimasoq uternissaanut ajortumillu tununnissaanut naammagittarluni ikiortariaqarpoq. — Galâsiamiut 6:1, 2; Jâko 5:13-16.
Sooq anisitsineq asanittumik aaqqissuusinerusoq
Jehovamut kiffaasut kuisimasut piaaralutik Guutip piumasaanik unioqqutitsisimasut allamillu isumataarumanngitsut, takutippaat manngertissimallutik. Taamaattumik kristumiut peqatigisariaqanngilaat. (Naleqqiuguk 1 Juánase 2:19.) Kristumiut ilagiivini minguitsummiginnartitaasinnaanngillat taamaalillutillu minguttunngortillugu. Peersinneqartariaqarput.
Ajortuliortunik anisitsinerup peersitsinerulluunniit eqqortuunera pisimasumik matuminnga assersuusiorneqarsinnaavoq: [Canadami] atuartut saassunneqartartut pinerlineqartartullu amerliartornerat pissutigalugu, atuarfiit ilaat aalajangiisimapput „atuartut sakkulersortut sakkulersorniarlutilluunniit siorasaarisut, inuunertik naallugu peersinneqassasut,“ Torontomi aviisi The Globe and Mail allappoq. Taamaaliortoqarpoq atuartut pinerluffigineqarnatik ilinniartitaajumasut illersorniarlugit.
Sooq oqartoqarsinnaava ajortuliortumik peqqissiminngitsumik anisitsineq asannittuliornerusoq? Siullermik Jehovamut aqqutigeqqusaanullu asanninnermut ersiutaavoq. (Tussiaat 97:10) Aappassaanik iluartuliorusuttunut asanittuliorneruvoq ajortumik sunniisinnaasut taakkunannga persikkaanni. Ilagiit minguitsuunissaat aamma illersorneqassaaq. (1 Korintumiut 5:1-13) Ileqqorlunneq anersaakkulluunniit minguttuuneq ilagiinni akuerineqarpat, ilagiit minguttuulissapput Jehovamullu, illernartuusumut, illernartumik kiffartornissamut atorsinnaajunnaarlutik. Aammattaaq anisitsinikkut eqqunngitsuliornerup ilungersornassusianik takunnissinnaanissaanik, allamik isumataarnissaanik pisariaqartunillu allanguinissaanik ajortuliortoq ikiorneqarsinnaavoq, taava ilagiinnut ilanngussinnaaleqqissillugu.
Allanut sunniuteqarnera
Ilagiinnut ilaasortaasoq sualuttumik ajortulioruni, soorlu allasioruni, Jehovap uummataa nuannaartissanngilaa. (Ussatit 27:11) Ersarippoq kristumiut kanngunartuliornermut nakkaannartut Josefitut Potifarip nuliata innaanniaraluarmani eqqarsarsimanngitsut. Josef ima qisuariarpoq: „Qanoq taama kanngunartigisumik iliussaanga Guutimut ajortuliorlunga?“ (1 Moses 39:6-12) Jehovap najoqqutassiai illernartut Josefip ataqqivai qimaallunilu. Allasiortorli Guutimut ima asannitsiginngilaq timip pilerigisaanik naammassinninnissani ingalassimaniarlugu. — Galâsiamiut 5:19-21.
Kristumiu kuisimasoq Guutip inatsisaanik unioqqutitsisoq, uppernikkut qanigisami ajoqusernissaanik aliasutsinnissaannillu isumakuluuteqanngilaq. Misigissutsikkut artorsinneqarneq tamanna atoruminaappoq. Arnap kristumiup ernermi kanngunartuliornera paasereerlugu allappoq: „Qatanngutitsinni ikittuinnaat, peqassaguni, paasisimavaat qanoq ajuallassimatigisugut nikallungatigisugullu. . . . Aliasoqaagut.“ Ilaqutaasut tamarmik tusaamasaalluarnerat apeqquserneqarsinnaavoq. Ilaqutariinnut ilaasortaasut aalajaatsut pisuusutut misiginermik nanertuuteqalersinnaapput isumatsangaalersinnaallutillu. Ajortuliortup ileqqorluttuliornera ilaqutaasunut aliasuutaangaassaaq.
Anisitaasup ilaqutaanut ikiuut asanittoq
Ilaqutariinni kristumiuni aalajaatsuni anisitaasoqarsimasumi, ilaqutaasut sinnerisa eqqaamasariaqarpaat anisitsineq aaqqissuussinerummat asannittoq illersuutaasorlu. Unioqqutitsisoq ikiorniarlugu suna tamaat iliuuseriniarneqassaaq. Guutimulli naalasseriitsuuppat allamillu isumataarumanngilluinnarluni, ilagiit illersorneqartariaqarput allamillu periarfissaqanngilaq Guutip oqaasiini unnersuut maleruartariaqarpoq: ’Ajortoq taanna ilissinnit peersissiuk.’ (1 Korintumiut 5:13) Jehovap nalunaajaasua oqarsimavoq: „Anisitsineq Jehovamut ilumoornermut tunngavoq.“
Anisitaasoqagaangat ilaqutaasunut anniaataasaqaaq. Taamaattumik utoqqaanertat toqqagaasut sapinngisartik tamaat ilaqutaasut anersaakkut kaammatorniartariaqarpaat. (1 Tásalûníkamiut 5:14) Utoqqaanertat qinnussinnaavaat qinoqatigalugillu. Kristumiut aalajaatsut taakkua pulaarnissaannut periarfissaqartarpoq eqqarsaatinillu ineriartornartunik oqaloqatigiittoqarsinnaasarluni. Kristumiut ataatsimmiinnerisa siornagut kingornagullu savaatit paarsisuisa periarfissat tamaasa atortariaqarpaat uppeqatit erlinnangaartut taakkua anersaakkut nukittorsarniarlugit. Aamma oqaluusseqatigisinnaavaat taamalillutillu qiimmassarlugit. (Rûmamiut 1:11, 12) Anersaakkut paarsisuusut Jehovamut kiffaasut aalajaatsut taakkua asanninnermik soqutigineqarnermillu pisassaannik nittaavigisariaqarpaat. — 1 Tásalûníkamiut 2:7, 8.
Ilaqutariinni ataaseq ajortumut sangusimappat, ilaqutariinni Jehovamut aalajaattuarsimasut sumiginnarnissaannut utoqqatsissutaanngilaq. Israelip kunngia ajortoq Saul Guutimit ajattorneqarpoq, tamannali Davidip Saulip erneranut Jonatanimut tunniusimanerminut sunniuteqartinngilaa. David Jonatanilu qanittumik ikinngutigiilerput. (1 Samuel 15:22, 23; 18:1-3; 20:41) Taamaattumik ilagiinniittut tamarmik Jehovamut ajortuliorsimasumik ilaqutaqartut asanittumik tapersersortariaqarpaat.
Taamatut kristumiut aalajaatsut sumiginnassallugit inussiarniitsuliorfigisallugilluunniit asanninngitsuliornerungaassaaq. Ilaqutariinni ilaasortaasut ilumoortut qiimmassarneqarnissaq immikkut pisariaqartippaat. Immaqa kiserliorput pissutsillu artornangaartutut isigalugit. Taamaattoqartillugu immaqa sianernikkut eqqarsaatinillu ineriartornartunik misigisamilluunniit oqaluttuunnerisigut misiginneqartaanermik ersersitsinikkut ikiorneqarsinnaapput. Anisitaasup telefoni tiguppagu kristumiumik ilaqutaanik oqaloqateqarniaannarsinnaavoq. Aamma anisitaasup ilaqutai katerisimaarnermut nereqatigiinnermulluunniit qaaqquneqarsinnaapput. Pisiniartilluni naapikkaanni, isumalluarnartumik oqaloqatigineqarsinnaapput. Eqqaamajuk kristumiut ilumoortut anisitaasumik ilaqutallit Jehovap peqatigiiffianut minguitsumut suli ilaasortaammata. Immikkoortutut misigeriataarsinnaapput nikallungasinnaallutillu. Taamaattumik asannittuliorfiginissaat eqqumaffigikkit. ’Uppeqatitsinnut tamanut’ ajunngitsuliortuarta. — Galâsiamiut 6:10.
Jehovap aaqqissuusinera pingaartiguk
Jehovap pallorfiginnitsini silarsuaq tamakkerlugu ilaqutariinniittut ataasiakkaarlugit ilumoorluni soqutigimmagit qujamasuutigisinnaavarput. Peqatigiissortani aqqutigalugit aaqqissuusisimavoq naapertuilluarnerup aqqutaaniiginnarnissatsinnut iluaqutissatsinnik. Naak ilaqutariinni ilaasortaasup ajortuliorneq toqqarsimagaluaraa ilagiinnillu anisitaasariaqarluni, ilumoortumik peqqissiminermik nittaappat uternissaanut periarfissaqarpoq. Tamanna assersuummik matuminnga ersersinneqarpoq:
Utoqqaanertat arnaq Annamik taasinnaasarput ikiorniaraluarsimavaat; pujortartarninili, imertarnini ikioroortarninilu ingerlatiinnarpai. Allamik isumataarumanngilaq uterumananilu taamaattumillu ilagiinniiginnarsinnaanani. Sivitsunngitsorli Jehovap ilagiivini minguitsumi asanittumik peqatigiinneq maqaasilerpaa Guutimullu ikioqqulluni qinulluni. Utoqqaanertat ajortumut sangusimasunut isumassuinerat tamakkiisumik pingaartissimanagu nassuerpoq. Anna ataatsimiigiaqqittalerpoq, allamillu isumataarnermik kinguneqarpoq. Tamatuma kingorna ilagiinnut asannittunut illersuutaasumullu ilaasortanngoqqippoq. Jehovap malittareqqusai qutsissut Annap maleqqilerpai. Utoqqaanertanit asannittuliorfigineqarsimanini qujamasuutigaa, oqarporlu: „Kristumiut atuagassiaataasa qanoq uannut iluaqutaasimatigineri takorloorsinnanngilarsi. Pisariaqartitavut Jehovap pitsaanerpaamik isumagai.“
Aap, anisitaasimasut kingusinnerusukkullu allamik isumataarsimasut ilagiinnut uteqqinnissaat Guutip isumagaa. Uppernarsisimavarputtaaq anisitsineq asannittumik aaqqissuussinerusoq. Pitsaanerungaassaarli misigisap alianartup tamatuma pinngitsoornissaa Guutitta illernartup napertuilluartumik aqqutaatigoortuarnitsigut. Jehovap peqatigiissortaanut minguitsunut, asanittunut illersuutaasunullu ilaasutut unnersiutiginissaanut immikkut pisinnaatitaaffipput qujamasuutigijuartigu. (wE 15/7 95)
[Qupp. 21-mi assiliartaq]
Anisitaasimasumut ilaqutaasut aalajaatsut ilagiinniittut asannittuliorfigisarpigit?