Inuusuttut aperipput . . .

Rocki allatut ittoq uannut naleqquppa?

„Erinarsukkat uagut inuusuttut ajornartorsiutigisartakkatsinnut misigisartakkatsinnullu tunngasut nuannarineruakka.“ — George 15-inik ukiulik.a

„[Rocki allatut ittoq] popit heavy metalillu akornanniippoq.“ — Daniel 19-inik ukiulik.

„Nutaajuvoq allaanerullunilu. Nipilersoriaaseq tamanna iluanaarniutaananilu amerlasoorsuanngorlugu siaruarterneqartanngilaq.“ — Maria 17-inik ukiulik.

ROCKI allatut ittoq inuusuttorpassuit tusarnaassallugu nuannareqaat. Inersimasut ilaasa nuannarivallaanngilaat. Qularnanngitsumillu angajoqqaat amerlanersaasa suunersoq nalulluinnarpaat.

Nassuerutigisariaqarpoq rockip allatut ittup suunera nassuiassallugu ajornakusoormat. Inuusuttut allaanerusumik perusuttut, nipilersukkanit nalinginnaasunit tusartakkaminnit allaanerusumik tusagaqarusuttut, nipilersoriaaseq tamanna aallartissimavaat. Ilaat oqarniartarput nipilersoriaaseq tamanna aallartissimasoq Amerikami universitetini radioqarfiit nipilersoqatigiit ilisimaneqanngitsut — nipilersoqatigiit nipilersukkanik iluanaarniutiginninnermit avissaaqqalluinnarnerminnik pingaakujuutiginnittut — atugaannik atuisalermata. Nipilersortartut taama ittut nipilersukkanik nioqquteqartartorsuarnut nioqqutissioriaasiannullu, soorlu videoliortarnerannut, atassuteqarumanngillat. Aammattaaq nipilersukkani 40-ni pitsaanerpaatut toqqarneqartartuni sammineqarajunngitsut erinarsuusiarisarpaat.

Heavy metalit rapillu assiginagit rocki allatut ittoq suussusersiuminartuaannanngilaq imaluunniit immikkoortikkuminartuaannanngilaq. Allaat nipilersukkanik nioqquteqartartut immikkut ilisimasalittaasa akornanni rockip allatut ittup sorpiaanera isumaqatigiinngissutaasarpoq. Tamatumunnga pissutaavoq soorlu taaguutaatigut ersertoq nipinit misigissutsinillu assigiinngitsorpassuarnit katitigaanera. Angut inuusuttoq ima oqarpoq: „Immikkortikkuminaatsorujussuuvoq, ullumikkut nipilersoriaatsinit assigiinngitsorpassuarnit katitigaagami.“ Angut inuusuttoq alla ima nassuiaavoq: „Tamatigut sakkortuujuneq sallaatsuunerluunniit ajorpoq, tamatigut sukkasuujuneq sukkaatsuunerluunniit ajorpoq, tamatigut qiimasuullunilu avaanngunartuuneq ajorpoq.“ Inuusuttoq alla ima oqarpoq: „Naluara oqarsinnaanerlunga rocki allatut ittoq nuannaralugu, sorpiaanersormi ilisimarpianngilara.“

Rockili allatut ittoq ima siuarsimatigilersimavoq tamatuminnga nipilersortartut nuannarineqarnerit ilaat nipilersortartutut nalinginnaasutut isigineqalersimallutik. Angajoqqaat heavy metalimut nipilersukkanullu qoqianngunartunut allanut akerliusarnermissulli rockimut allatut ittumut akerliutiginngillat. Allaat angajoqqaat ilaasa ikittuinnaat nipilersoqatigiit imaluunniit nipilersukkat sorliit rockimut allatut ittumut ilaasut ilisimavaat. Nipilersoriaaserli tamanna mianersorfissaqarpoq.

Sooq taama nuannarineqartigaa?

Assersuutigalugu, eqqarsaatigeriaruk sooq inuusuttut taama amerlatigisut nipilersoriaaseq tamanna kajungerineraat. Inuusuttut amerlanersaat ikinngutiminnik ilaarsiinnartarput. Aammami tamanna sumik oqaluuserisaqarnissamut sulerinissamullu, soorlu båndinik CD-nillu paarlaattaqattaarnissamut, aallaaviusarpoq.

Inuusuttulli amerlanersaasa rockimi allatut ittumi nipi oqariartuutillu kajungerisarpaat. Inuusuttorpassuit misigisimapput misigisartakkat misigissutsillu erinarsuutigineqartut namminneq atukkaminnut tulluartuusut. Atuagassiami Time-mi tamanna ima allaatigiserineqarpoq: „Popini amerlanertigut asanninneq erinarsuutigineqartarpoq, rockimili allatut ittumi misigissutsit sakkortunerusut sammineqartarput: ernumaneq, pilerissuseq, paatsiveerusimaarneq. . . . Inuusuttuaraaguit 20-lluunniit qaangerlugit ukioqaruit, immaqa angajoqqaatit avissimapput. Nipilersoriaaseq allatut ittoq tassaalersimavoq misigissutsit nipaat, inuusuttut qimagaasimanermikkut naapertuilluanngitsumillu pineqarsimanermikkut misigissusiinut toqqortanut toqqaannartumik ’oqaluttoq’.“ Discjockey 21-nik ukiulik ima oqarpoq: „Silarsuarmi soqutigisaqannginnerput pissutigalugu nipilersukkat tamakku uannut ikinngutinnullu naleqqulluartuupput. Atuarfimmi naammassigutta qilanaarisassaqanngilagut.“

Kristumiuttaaq inuusuttut ilaasa rocki allatut ittoq nuannerilersimavaat. Soorunami amerlanersaasa nipilersukkat sakkortunerusut, pikitsitsiniarpalunnerusut, kiisalu nakuusernermut kanngunartunullu tunngasut ingalanniartarpaat. Inuusuttulli taakkua ilaasa erinarsukkanik ajoqutaannginnerusutut isikkulinnik isumakuluutiginninnertik ersersissimavaat. Inuusuttoq Danimik atilik ima oqarpoq: „Erinarsortartut ilaat anguteqatinoortartutut arnaqatinoortartutullu imaluunniit ikiaroortartutut ilisimaneqarput, erinniaallu inooriaasiannik ersersitsipput.“ Inuusuttoq alla Jackimik atilik ima oqarpoq: „Nipilersoqatigiit ilaat isumaqarput namminneq, ajornartorsiutitik ullumikkullu inuusuttut siunissaat kimilluunniit soqutigineqanngitsut, tamannalu erinarsuusiaminni ersersittarpaat. Ilarpassui kajumissuseqaratillu neriuuteqanngillat.“

Oqaatsit mianersoqqussutaasut

Biibilimi paasitinneqarpugut silarsuaq tamarmi ajortup, Satan Diaavulup, pissaaneqarfigigaa. (1 Juánase 5:19) Taamaattumik tupaallaatigisariaqanngilaq Satan ilaatigut nipilersukkat atorlugit inunnik tammartitsiniartarmat. Atuagassiami matumani aappaanilu, Napasuliaq Alapernaarsuiffik-mi, ilanngutassiani tamanna erseqqissarneqartuartarsimavoq.b Nipilersoriaatsit, heavy metal aamma rap, pillugit atuagassiani taakkunani mianersoqqussutaasarsimasut aamma rockimut allatut ittumut tunngatinneqarsinnaapput. Biibilimi ima allassimavoq: „Silatuup alloriarnini sianigeqqissaartarpai.“ — Ussatit 14:15.

Nipilersukkallu nammineq nuannarisat eqqarsaatigalugit allat ilaaginnarnissaat silatusaarneruallaanngilaq. Allat ilinnut tunngasunik aalajangiisittarukkit Biibilimi najoqqutassiaq manna malugeriaruk: ’Naluisi, kimut kiffaritittaraangassi naalakkumallugu, naalakkassi taassuma taava kiffarigaasi.’ (Rûmamiut 6:16) Inuusuttunut kristumiuusunut pingaartoq tassaanngilaq suna peqatit iluarineraat, tassaallunili suna ’Naalakkap iluarineraa’. (Evfisumiut 5:10) Aammami inuusuttut qanoq ittut rockimik allatut ittumik nuannarisaqarpat? Inuusuttut pilluarpasissut, isumakkut aalajaappasissut anersaakkullu tunngasunik soqutigisallit? Imaluunniit inuusuttut naammagittaatsut, pilluaatsut allaalluunniit kamanniaannavissut?

Immaqami aamma inuusuttut qiimasut isumagissullu rockimik allatut ittumik nuannarisaqartaraluarput. Mannali eqqarsaatigeriaruk: Kristumiut, inuusuttut utoqqaallu, siunissamik nuanningaartumik qilanaarisaqarput. (2 Pîtruse 3:13) Guutip neriorsuutaasa eqquulluinnartarnerannik apustilip Paulusip eqqaasippaatigut ima oqarami: ’Guuti sallusinnaanngilaq.’ (Eprîarit 6:18) Taava sumut iluaqutaassava rockinik allatut ittunik siunissamik nillertumik nuanniitsumillu isiginninnermik ersersitsiviusartunik tusarnaartaraanni? Nipilersukkanit ersinermik, isumalluannginnermik neriuuteqannginnermillu ersersitsisunit tiguartinneq uppernikkut sanngiilliartuutaassannginnerpa? Aammalu nipilersukkanik taama ittunik tusarnaartuarneq misigissutsinut qanoq sunniuteqarsinnaava?

’Narrutuujugit’

Imaanngilarli oqarniartugut nipilersukkat ’allatut ittutut’ taaneqartut tamarmik ajortuusut imaluunniit ajuallannartuusut. Takorlooriassagilli paasilerit arlaata toqunartutorteriaraluarsimagaatit. Soorunami tamanna pissutigiinnarlugu nerisarunnaarluinnarumanavianngilatit, kisianni nerisatit mianersuutiginerulissavatit. Inuunermik isiginnittaatsinnik Satanip ’toqunartuliiniarnera’ pissutigalugu nipilersukkat tusarnaartakkatit suunersut sianigisariaqarpat. Soorlu Biibilimi allassimasoq: „Siutip misilittarpai oqaatsit oqaaserineqartut, soorlu oqqap nerisassat taamatut misilittarai.“ (Job 34:3) Allanik ilaarsiinnarnak nipilersukkat nuannarisatit misissortariaqarpatit.

Qanoq iliorluni taamaaliortoqarsinnaava? Immikkoortoq „Nipilersukkanik qinersiniarnermi ikiuut“-mik qulequtalik pitsaasunik misilissinnaasannik imaqarpoq. Angajoqqaatittaaq kristumiuusut aperikkit nipilersukkanut tusarnaartakkannut qanoq isumaqarnersut. (Ussatit 4:1) Immaqa akissutaat tupaallaatigissavat. Soorunami angajoqqaatit kinguaariinnit ilinnit utoqqaanerusuneersuupput, nipilersukkallu illit nuannarisatit taakkua ilittulli nuannaaritiginngippatigik paasinarpoq. Isumaqarpatali nipilersukkat tusarnaartakkatit ajuallannartuusut, nikassaasuullutik imaluunniit maajunnarlutik, taava isumaat suusupagiinnassaviuk? Biibilimi ima allassimasoqarpoq: ’Inuk sianisooq tusartoq suli annerusumik ilisimasaqalersarpoq.’ — Ussatit 1:5.

Nipilersukkat qanoq ilinnut sunniuteqartarnersuttaaq eqqarsaatigisaruk. Kamassimaalersittarpaatsit, akerliuniakujuinnalersittarpaatsit imaluunniit nikallortittarpaatsit? Taamaappat tamanna sumiginnartariaqanngilat! Taarsiullugu nipilersukkanik eqqissinartunik, saammisaarnartunik imaluunniit qiimmannartunik tusarnaartalersinnaavutit.

Nipilersoriaatsit allanngorartuarput. Sivitsorianngitsoq nipilersoriaatsinik allanik mutinngortoqareertaraaq. Illilli maleruutiinnarnaveersaarniarit. Nipilersukkanut atatillugu ’narrutuujuniarit’ immikkoortitsisinnaassuseqarlutillu. Peqqinnartunik ineriartornartunillu tusarnaarniartarniarit. (Filípimiut 4:8) Taava nipilersukkat tassaasinnaassapput inuunerpit ilai nalillit nuannaalersitsisartullu!

[Quppernerup ataani ilanngussat]

[Qupp. 12-mi issuagaq]

„Popini amerlanertigut asanninneq erinarsuutigineqartarpoq, rockimili allatut ittumi misigissutsit sakkortunerusut sammineqartarput: ernumaneq, pilerissuseq, paatsiveerusimaarneq.“ — Atuagassiaq Time.

[Qupp. 13-mi ungalusaq]

Nipilersukkanik qinersinermi ikiuut

◆ Puua misissoruk. Taamaalillutit paasissavat nipilersukkat qanoq ittuusut, nipilersortartullu qanoq ittut nipilersugarigaat. Assiliartai nakuusernermut anersaapilussiornermullu tunngarpasippata nipilersortartullu eqqumiitsunik toriitsunillu atisaqarpata, imaluunniit atisaqanngitsortaqarpata, mianersorit.

◆ Taallartaasa oqaasertai misissukkit. Oqaasertai nipilersortartut eqqarsartaasiannut inooriaasiannullu takussutissaasarput. Eqqarsaatinik sunik akuereqqusaagaqarpat?

◆ Nipilersukkat nipaatigut misigissutsit assigiinngitsut qaffatsinnissaat nipilersortartut anguniartarpaat, soorlu maqaasisaqarneq, nuannaarneq, assortuineq, kinguaassiuutigut perusussuseq, eqqissineq imaluunniit nikallorneq.

◆ Nipilersortartunik nuannarinnittut kikkuunersut paasiniaruk. Inuit taakkuninnga nuannarinnittut assigerusuppigit imaluunniit ileqqoqatigerusuppigit?

[Qupp. 13-mi assiliartaq]

Ullumikkut nipilersukkat erinartaat inuusuttut ilarpassuisa imminnut tulluartittarpaat