Inuusuttut aperipput:

Rockimik tusarnaartitsisut tusarnaariassavakka?

Nipilersortartut tusaamaneqarluartut illoqarfinnut tikipput. Bilettit tuniniarneqalertoqaat, taamaattumik maannakkut aalajangertariaqarputit. Tusarnaariassavit?

NIPILERSUKKAMIK ineriartornartumik ajunngitsumik avatangiiseqarluni tusarnaarneq nuannersuusinnaavoq. Jehova Guutip pinngortissimavaatigut nipilersukkanik nuannarisaqarsinnaatilluta, nipilersukkallu assigiinngitsorpassuit akuerisarai.

Ullutsinni inuusuttut rockimik nipilersukkat assigiinngitsorpassuit tusarnaassallugit nuannarisarpaat. Amerlasuullu nuannarinerpaasarpaat nuannarisatik tusarnaartitsissutigineqartut tusarnaassallugit. Rockimilli tusarnaartitsinerni soqqusaatsumik piumasaarsortumillu pissusilersortoqartartoq tusaamaneqarmat, inuusuttunut Guutimik mianerinnittunut apeqqutinik pingaartunik pilersoqarpoq. Rockimik tusarnaartitsinerni qanorpiaq pisoqartarpa? Tusarnaariarneq silatusaarnerussava?

Nipilersukkanik misissuigit

Nipilersorneq immini sammeqqaariartigu. Nipilersukkat aqqutigalugit misigissutsinik assigiinngitsorpassuarnik nittaasoqarsinnaavoq qaffatsitsisoqarsinnaallunilu. Biibilip nalaani, Guutip innuttaasa Guutimut asanninnertik nipilersorneq aqqutigalugu ersersittarpaat. (Tussiaat 149:3; 150:4) Nipilersorneq nuannaarnermut, qiimmatsannermik aliasunnermillu ersersitsinermik aamma atorneqartarsimavoq. (1 Moses 31:27; Eqqartuussisut 11:34; 1 Samuel 18:6, 7; Matîuse 9:23, 24) Ajoraluartumik Biibilip nalaani nipilersukkat ineriartornartuujuaannarsimanngillat. Israelikkut Sinajip qaqqaani tammaarsimatillugit soqqusaatsumik pileritsannartumillu nipilersorneq Israelikkut ilaannut ajortuliornissamut kajumissaarisuusimasinnaavoq. — 2 Moses 32:1-6, 17, 18, 25.

Ilumoortumik oqaatigalugu rockimik nipilersugarpassuit assingusumik ajortunik — kinguaassiuutitigut eqqunngitsumik atoqatigiinnermik, ikiaroornartunik atornerluinermik, pikitsitsiniarnermik, anersaarsiornermillu — ineriartortitsisarput. Tamannali isumaqanngilaq nipilersukkat tamaasa ajattussagigut. Biibilimili kristumiut ima siunnersorneqarput: ’Naalakkap iluarisassaa sunaasoq misilittarniarsiuk’. (Evfisumiut 5:10) Nipilersukkanik qinersinitsinni immikkoortitsisinnaassuseqartariaqarpugut silatusaartariaqarlutalu.a

Nipilersukkat tusarnaartakkavit qanoq sunnertarpaatsit? Nuannaalersittarpaatsit, sallaatsunngortittarpaatsit eqqissisittarpaatsilluunniit? Kamalersittarpaatsit, pikitsitsiumalersittarpaatsit nikallortittarpaatsilluunniit? Danmarkimi angutip kristumiup heavy-metalimik, rockimik nipilersoriaatsit ilaannik, nuannarisaqarluarsimanini eqqaamavaa. Oqarpoq: „Sulitillunga tusarnaartarpakka. Kukkugaangamalu ima kamaammersinnaatigisarpunga tigumiakka miloriullugit aserorsinnaasarlugit.“ Inuusuttoq alla nassuerpoq: „Rapimik heavy-metalimillu nipilersoriaatsit kinguaassiuutitigut atoqatigiinnermik inooriaatsimillu silamiorpaluttumik pingaartitsisut tusarnaartarsimaqaakka. Nipilersukkat eqqarsaatinniitittualerpakka, taallartarineqartullu kipisaffigisalerpakka.“ Immiussaannaat taama sunniuteqarsinnaappata, tusarnaartitsineq atamanna sunniuteqartoq!

Nipilersortut qanoq nipitutigissanersut aamma eqqarsaatigeriaruk. Ilumoorpoq tamatuma tungaatigut inuit assigiingitsunik piumanerusaqarmata. Nipilersukkallu nipituut Biibilip ajoriinnanngilai. Salomonip naalaffiata atoqqaarfissiorneqarnerani qarlortartartut 120-usimapput. (2 Israelikkut 5:12) Nipitusimassaqaat! Taamaakkaluartoq Guutip ataqqinaatissaanik nipituuliorneq rockimillu qoqianngunartumik nipilersorneq assigiinngeqaat. Rockimik tusarnaartitsinermi nipitussusia tusarnaartunik piitangersimaartitsiniarnermik siunertaqarajuppoq. Biibililli ’imerajunnerit’ imaluunniit ’nuannaarujunnipiluit’ ajorai. (Galâsiamiut 5:21) Nipilersukkamik nipitungaarami siutinnik ajoqusiisinnaasumik tusarnaarnissaq timimik ataqqinninneq pissutigalugu itigartittariaqarpoq. — Rûmamiut 12:1.

Eqqarsaatigisariaqartoq alla Job 12:11-mi ersersinneqarpoq: „Siutip oqaatsit aninneqartut misissortussaannginnerpai soorlu oqqap nerisassat ooqattaartarai?“ Tassa erinarsuutip taallai ’misissorneqartariaqarput’. Kristumiu inuusuttoq nassuerpoq: „Erinarsuutit nuannarisama taallartai tusarnaartalerakkit, tupaallaatigisannik paasivara kristumiunut tusarnaassallugit tulluartuunngitsut. Nipilersukkat tamakku pigiunnaartariaqarlugit misigisimavunga.“ (1 Korintumiut 14:20; Evfisumiut 5:3, 4) Aamma eqqumaffigiuk nipilersortartut amerlasuut saqqummersitatik nutaat tusarnaartitsinerni ussassaarutigisarmatigik, siusinnerusukkut nipilersugaannit immaqa pitsaanerusunit allaanerujussuusinnaasut.

Aammattaaq qulakkeertariaqarpat nipilersukkat anersaapilussiornermut tunngannginnersut — nipilersoriaatsini heavy-metalini ilaatigut tamanna nalinginnaasarmat. Heavy-metalimik nipilersortartut tusaamasaapput imminnut nipilersuutimillu puuinik anersaapiluit ilisarnaataannik satanisiortullu atortuinik isikkulersuisartutut. (Jâko 3:15) Tusarnaartitsisunut taamaattunut tusarnaarutta Guutimit iluarineqarnavianngilaq, taassumami ’Diaavulu assortoqquaa’. — Jâko 4:7, NV.

Aqunneerunneq

Tusarnaartitsisoqartillugu susoqartarpa? Inuusuttuaraq Staceymik atilik ikinngutinilu nipilersortartunut ippinnaateqanngitsuusorisaminnut tusarnaariarsimapput. Tusarnaartitsinerulli nalaani nipilersortartut appittartuat anersaarsiortutut pissusilersulerpoq, tusarnaartullu anersaat silarsuaannut atassuteqarniarnermi peqataaqqullugit kajumissaarlugit. Asuleerpa? Immaqa, Biibililli anersaarsiorneq qanoq ittorluunniit assuarimmagu, Stacey ikinngutinilu qimaguttariaqarlutik misigipput. — 3 Moses 19:31; 5 Moses 18:10-13; sarĸúmersitat 22:15.

Kristumiut inuusuttut allat assingusunik, aalassannartunik misigisaqartarsimapput, rockimik tusarnaartitsinerni ammasumik anersaarsiorneq immaqa nalinginnaanngikkaluartoq, imminut naalakkersorsinnaanngitsumik pissusilersorneq nalinginnaaqaaq. Tusarnaartitsinermi ataatsimi nipilersortartut perulluliornernik aallarniisimapput inuit 60-it aqqunarneqarnerannik dollarsillu 200.000-it nalinginik aseruinermik kinguneqartumik. Tusarnaartitsinermi allami inuusuttut pingasut qerlertoruunnersuaqarnerani toqutaapput. Soorunami rockimik tusarnaartitsinerni tamani perulluliornerit, aserorterinerit toqutaasoqarnerillu pineq ajorput, ersaripporli eqqumaffigisariaqartut. Ussatit 22:3-mi ima allassimavoq: „Silatuup perluk qanilliartortoq malugisarpaa qimarnguffissarsiortarlunilu, isumaatsorli soqutigittaalliuinnartarpoq tamannalu ajunaarutigisarlugu.“

Taamaattumik tusarnaartitsisunut ornigunniarlutit eqqarsaruit paasiniaaqqaartariaqarputit. Nipilersortartut naalagaarussimaartitsisartutut tusaamasaappat? Tusarnaartut qanoq ittut nipilersugaannut kajungertuuppat? (1 Korintumiut 15:33) Aalakoornartut ikiaroornartullu atugaappat? Inimi tusarnaartitsivik? Isumannaatsuunissap tungaatigut siornatigut ajornartorsiuteqartoqarsimava? Issiaviimmi? Tusarnaartitsineq akeqanngippat ajoqusertoqarnissaa ilimanarnerujussuuvoq.

Ikiaroornartunik aalakoornartunillu atornerluineq rockinik tusarnaartitsinerni nalinginnaasorujussuuvoq. Angut kristumiu inuusuttuunermini rockinik nipilersortartunik nalinginnaasunik tusarnaariartarsimasoq, pakatsisimalluni oqarpoq: „Nipilersukkat tusarnaariarlugit inuit aggerneq ajorput. Aalakooriartarput.“ Taamani aalajangersimavoq rockimik tusarnaartitsisut orneqqinniarnagit. Inuusuttuaraq kristumiu assingusumik oqarpoq: „Misileraallutik nipilersortartunut tusarnaariarsimavunga. Maajunnaqaaq. Inuit marihuanamik pujortaapput. Oqaaserloqaat, najuuttut amerlasuut atisamikkut satanisiorpaluttuupput.“ Allaat sumiiffinnut ikiaroornartunik alakoornartunillu eqqussinaveersaartitsiffiusunut inuit takkukkaangamik malugisimaareertarnerat nalinginnaavoq. Pisuni taamaattuni najuunneq Biibilip inassutaanut, ’Guutimut naalanngitsuujunnaarluta silamiullu kajungerisaat atorunnaarlugit . . .iluartumillu ileqqoqarluta’ inuunissamut, naapertuuppa? — Títuse 2:12.

Avatangiisit sunniinerat

Allat qanoq iliorneri isumakuluutigisariaqarnagit immaqa misigivutit, inuunerlunnerannut peqataanngiinnaruit. Avatangiisinnilli sunnerneqartarputit. Biibilip Evfisumiut 2:2-mi eqqartorpaa ’silaannarmut anersaamullu naalasseriinnerup qitornaani maanna sunniisumut naalagaasoq’. Malugiuk silarsuaq manna ’anersaaqartoq’, isummamik qalliuniartumik. Sumi tamaaniippoq, silaannartulli. Malugiuttaarli anersaaq tamanna, imaluunniit isuma, ’naalagaassuseqarmat’ — eqqarsaatinnik, misigissutsinnik ileqqunnillu allanngortitsisinnaasumik — ilinnik sunniinissaa akuerigukku. Silaannaq pissaanilissuaq tamanna sunnertinnak najuussorsinnaanngilat.

Amerlanertigut rockimik tusarnaartitsinerit silarsuup anersaavanik saqqummersitsisarput. Soqqusaatsuliornerit nalinginnaagajuttut ilannguffigissallugit, nilliasulluunniit aalaaterisullu nipilersortartunik pallorfiginninnertut isikkoqangajattut peqataaffigisoornissaat, ajornanngitsuararsuusinnaavoq. Taamatut sualuttumik nuannarinningaarneq pallorfiginninnermik Guutip pissaanik miserratiginninneruvoq. Guutipilussiornermut qanittuararsuuvoq, tamannalu Biibilimi ersarissumik assuarineqarpoq. (1 Korintumiut 10:14; 1 Juánase 5:21) Nassataritinnissannut navianartorsiornissat kissaatigaajuk?

Qularnanngivippoq oqassalluni rockimik tusarnaartitsinernut peqataanerup navianaatai ajunngequtaanit malunnarnerungaartut. Soorunami angajoqqaatit tusarnaartitsinermut aalajangersimasumut tusarnaariassanersutit oqartussaapput. Namminerli aalajangiisinnaatitaaguit, silatuumik qinersigit. Peqqinnartunik aliikkusersuuterpassuaqarpoq rockimik tusarnaartitsinermut peqataanermi navianaatinut assingusunik peqanngitsunik. (gE 22/12 95)

[Quppernerup ataani ilanngussaq]

[Qupp. 23-mi assiliartaq]

Aalakoornartut, ikiaroornartut soqqusaatsuliornerillu rockimik tusarnaartitsinerni nalinginnaapput