Biibili qanoq oqarpa
Nunarsuaq ikuallalluni nungussava?
Qanoq ililluni nungussanersoq isumaliutigineqartarpoq, atomip nukinga atorlugu sorsunnermi, seqinermit allisoorsimasumit Guutimilluunniit kamattumik ikuallatsitaalluni nungussasoq, amerlasuut Nunarsuaq, inuiaat angerlarsimaffiat, innerinnarmi piuneerutitaavilluni ikuallassasoq upperilluinnarpaat.
Inuit nunarsuarmut atornerluinerannut pillaatitut nunarsuaq Guutimit ikuallanneqartussaanerarlugu Biibilimi allassimaffiit uppernarsaatiginiarneqartarput. Allat Paul Daviesip, Adelaidemi, Australiami universititimi professorip isumaa issuartarpaat, taassuma nunarsuaq pinngitsoortinneqarsinnaanngitsumik ikuallattussaanerarlugu allaatigisimavaa. Atuakkiaminilu The Last Three Minutes-mi (Minuttit kingulliit pingasut) ima isummersimavoq: „Seqineq alliartortilluni . . . naggataatigut Nunarsuaq innermik nungussavaa. Nunarsuarput innermik poorneqassaaq.“ Nunarsuup siunissaa ilumoortoq suua? Biibilimi siulittuutit Nunarsuup innermik suujunnaarsitaalluinnarnissaatut nipeqarsinnaasut qanoq paasissavavut?
Nunarsuaq Guutip soqutigaa?
Nunarsuarmut tunngasut Guutip soqutigisarilluinnarpai. Jeremia 10:10-12-mi ima nalunaarfigaatigut: „[Jehova] ilumut Guutiuvoq . . . [Jehovap] nunarsuaq pinngortippaa pissaassutsimigut inuillu najugaat tunngavilerlugu ilisimassutsimigut, siuneqassutsimigullu qilak isivitippaa.“ Guutip nunarsuaq pinngortippaa tunngavilerlugulu. Ilisimassuseqarluni, asannissuseqarluni siuneqarsuseqarlunilu nunarsuaq inuiaat nuannersumik angerlarsimaffissaattut piareersaqqissaarsimavaa.
Guutip inunnik pinngortitsinera Biibilimi ima allaatigineqarpoq: „Pinngortippai tassaatillugit angut arnarlu. Guutillu pilluaqquai oqarfigalugit: ’Kinguaassiorlusi amerliartoritsi nuna tamakkerlugu ilissinnullu naalatsigitillugu.’“ (1 Moses 1:27, 28) Guutip pinngortitani naammassigamigit oqarpoq: ’Ilumut ajunngingaarput.’ (1 Moses 1:31) Taamaattuarnissaat kissaatigaa. Soorlu angajoqqaanngortussat meerartaassamik inissaat pequtilersortaraat, taamatut Guuti alianaatsumik naatsiiviliorpoq angummullu Adamimut alliartortequllugulu paareqqullugu. — 1 Moses 2:15.
Adamip nammineq qinersinermigut naammalluinnassutsi nunarsuullu paarinissaanut akisussaaffini annaavai. Pinngortitsisulli siunertani taamaatippaa? Jesaja 45:18-ip taamaannginnerarpaa: „Ima oqarpoq [Jehova], qilammik pinngortitsisoq . . . nunarsuarmik ilusiliisoq, . . . soqanngitsussanngornagu, kisianni inoqartussanngorlugu pinngortitsisoq.“ (Aamma takuuk Jesaja 55:10, 11) Naak inuit akisussaaffitsik unioqqutikkaluaraat Guutip nunarsuarmut inuunermullu siunertani allanngortinngilaa. Inatsisini itsaq Israelikkunnut tunniunneqartuni ukiut arfineq marlussaanni tamani ’nuna tamarmi qasuersaartitaassasoq’ allassimavoq. Tamatumunnga ilaapput uumasut isumassorneqarnissaannik inatsisit. (3 Moses 25:4; 2 Moses 23:4, 5; 5 Moses 22: 1, 2, 6, 7, 10; 25:4; Lúkarse 14:5) Guuti inuiannik nunarsuarmillu taakkua najugaannik ilumut soqutiginninneranut takussutissat tamakku ilaminiinnaraat, tamakkualu tamaasa inunnut paareqquai.
’Nuna siulleq’
Biibilimi imminnut akerleriissutut ittut qanoq paasisariaqarpat? Taamatut ittut ilagaat 2 Pîtruse 3:7, ima allassimasoq: ’Qilaat nunalu maannakkut ittut taassuma oqaasiagut uninngagallartitaapput, ikuallattussaallutik toqqorsimasut ulloq inuit iluaatsut eqqartuutiffissaat aserorfissaallu nalliutserlugu.’ Alla sarĸúmersitat 21:1-miippoq, ima allassimasoq: ’Qilak nutaaq nunalu nutaaq takuakka; qilak siulleq nunalu siulleq peermata.’
Peterip oqaasii assersuutaanngitsutut paasissagaanni Nunarsuarlu innermik piuneerutitaassappat, taava qilaat piviusut — ullorissat taamaaqataallu — aamma innermik nungunneqartussaasimassapput. Taamali isumaqarneq Biibilimi allassimaffinnut soorlu Matîuse 6:10-mut akerliuvoq, tassani ima allassimavoq: ’Peqqusat qilammisut nunamissaaq pili.’ Aamma Tussiaat 37:29-mut, ima allassimasumut: „Iluartut nuna kingornutissavaat najugaqassallutillu tassani naassaanngitsussamut.“ Aammattaaq seqinermut ullorissanullu kissaqisunut atomip nukingata qaararfigiuariigaannut inneq qanoq annertutigisumik sunniuteqarsinnaassagami?
Biibilimi oqaaseq „nuna“ assersuutitut atorneqarajuppoq. Assersuutigalugu 1 Israelikkut 16:31-mi allassimavoq: „Qilak nuannaassaaq nunalu qiimmattassalluni.“ Tassani oqaaseq „nuna“ inuiannut tamanut tunngatillugu atorneqarpoq. 2 Pîtruse 3:5, 6-p ataqatigisaasa takutippaat „nuna“ assersuutitut atorneqartoq. Tassani Noap nalaa innersuussutigineqarpoq, taamani inuiaat ajortut ulersuaqarnerani piuneerutsitaammata, Noali inoqutaalu nunarsuarlu sernigineqarlutik. (1 Moses 9:11) Assingusumillu 2 Pîtruse 3:7-mi allassimavoq aserugaasussat tassaasut ’inuit iluaatsut’. Paasinnittaaseq taamaattoq Biibilip sinneranut naleqquppoq. Innuttaaqatigiit ajortut piuneerutitaasussat aamma tassaapput sarĸúmersitat 21:1-mi siusinnerusukkut issuarneqartumi ’nunamik siullermik’ taaneqartut.
Ataatatut nunamiuusutulli angerlarsimaffimmi ajoquserneqannginnissaanik qulakkeerisutut Jehova Guutip pinngortitani soqutigilluinnarpai. Inuit ileqqorluttut ajortullu Jordanip qooruanik naggorissumit peersissimavai, nunasisullu nutaat imminik angerfiginnissimasut neriorsorlugit inatsisiminut naalappata ’nunamit piiarneqarnavianngitsut soorlu taakku siuniisigut inuit piiarsimagai’. — 3 Moses 18:24-28.
’Nuna nutaaq’
Ullumikkut innuttaaqatigiit kinguaassiuutitigut atoqatigiinnikkut ajortunngorsimapput nakuusersuullutillu, nunarsuarlu politikkikkut peqquserlunnermik mingutsitaasimalluni. Guutip kisimi aniguisissinnaavai. Taamaaliussaarlu. sarĸúmersitat 11:18-mi neriorsuivoq ’nunamik aseruisut aserussallugit’. Nunarsuaq iluarsaqqitaq Guutimik mianerinnittunik tullerminnillu ilumoortumik asannittunik inoqalissaaq. (Eprîarit 2:5; naleqqiuguk Lúkarse 10:25-28) Guutip qilammi naalagaaffiata ataani allanngorneq ima annertutigissaaq Biibilip ’nunamik nutaamik’ allaat taallugu — imaanngitsoq nunarsuaq nutaaq alla, kisianni innuttaaqatigiit nutaat.
Tussiaat 37:29 atuarutsigu Kristusillu Matîuse 6:10-mi oqaasiinut naleqqiukkutsigu qulariunnaassavarput pinngortitap nukingisa inuilluunniit aserorterisinnaassusiata nunarsuarput piuneerutinnavianngikkaa. Guutip siunertaanik akornusiinavianngillat. (Tussiaat 119:90; Jesaja 40:15, 26) Inuiaat aalajaatsut nunarsuarmi alutornangaartumi naassaanngitsumik nuannaarlutik inuussapput. Tamanna nunarsuup siunissaraa, inuiaammi Pinngortitsisuata asannittup tamanna siunertarisimavaa sulilu siunertaralugu. — 1 Moses 2:7-9, 15; sarĸúmersitat 21:1-5.