mãnákut inûssut ilait milliûnigdlit toĸúngisáinásáput nunamile mâne inûjuásavdlutik
„uvanga makíssutauvdlungalo inũssutauvunga; uvavnut ugpertoĸ nauk toĸugaluarune inũsavoĸ; inûssordlo uvavnut ugpertoĸ kinalũnît toĸunaviásángilaĸ.“ — JUÁNASE 11:25, 26.
1. inuk toĸúngisáinásagpat, ĸanoĸ tamána pâsissariaĸarpa?
INUK toĸúngisáinásagune, tamána pâsissariaĸásaoĸ ingmíkut akuerineĸartoĸ táuna angutitut arnatutdlũnît toĸussugssáussusiliugaluardlune nuname mâne nâgssáungitdluínartumik inûjuásavdlune! túngaveĸardluartumik isuma tamána inertariaĸarparput, ilâ? isumavdlo tamatuma nâpertúngínerpai Jesusip oĸausê matuma ĸulânĩtut ukiut 1900-t sivnerdlugit matuma sujornagut oĸautigineĸartut? âp!
2, 3. (a) agdlagkat eprîarisût suna neriunartípât? (b) kristumiûneraĸatigît ugpeĸatigîgsortáine suna ugperissarineĸartarpa?
2 agdlagkane ivdlernartune eprîarisûne, Môrsasip agdlagai sujugdlît autdlarnerfigalugit Malakiap agdlagai tikitdlugit, ĸilangme inûsínaunigssamik neriûtigssaĸ erĸartorneĸángilaĸ, taimáitumik jûtit agdlagkat táuko kiserdluínaisa aulajangiutdlugit ugperissaĸartut ĸilangme inûnigssamik neriugissaĸarnatigdlo piumassaĸángitdlat. agdlagkatdle eprîarisût nâgssáungitsumik inûsínaunigssaĸ neriunartípât. (Tussiaat 37:29; Jûpe 14:13-15) Messiasip neriorssûtigineĸartup nâlagauvfigssâta atâne nuname nâgssáungitsumik inûnigssaĸ uviníkut jûtit kipineĸartut nalingínait neriugissarât ilimagissaralugulo.
3 ugpeĸatigîtdle kristumiûneraĸatigîngnut atassut tamána ilimagissaríngilât. táuko ugperissaĸardlutigdlo ajoĸersûteĸarput uvagut inuit timivta toĸussugssaussup iluane tarneĸarneranik toĸusuitsûssumik, atúngitsûgagssáungitsumigdlo toĸuvtigut tarneĸ táuna iperarneĸásassoĸ anersâtdlo najugãnut takugssáungitsumut aniguissugssauvdlune. tássane erĸartũneĸarumârpoĸ, Gûtivdlo autdlartíkumârpâ ĸilangmut pivdluangârfiussumut imalũnît, inuk kristumiûsimángíkune ilumôrtoĸ, pitdlagkat autdlartitaussarfiánut soraiuitsumik ániartitaunigssânut. kristumiûneraĸatigîngnutdlo atassut ugperissarât nunap, seĸernup, ĸáumatip uvdloríssatdlo sût tamavingmik ikuatdlangneĸarnigssãne nungutdlutik ikuatdlagkumârnigssât.
4. nunap mãnákut píssuseĸarneranik isumaliutigingnigtut ilarpagssuisa toĸúngisáinarsínaunigssaĸ sôĸ tusagagssatut nuánersûtínaviángilât?
4 ugperissarsiortut táukua isumât nâpertúsagáine ilumôrsínáungilaĸ ’mãnákut inûssut ilait milliûnigdlit toĸúngisáinásassut nunamilo mâne inûjuásavdlutik’. aperiumassoĸarsínauvortaoĸ: kiname inûjuarumásava nuname kângnerssuarnik, nápâlanerssuarnik, nunap sajugtarnerinik, sorssungnernik, inuiaĸatigît nagguveĸatigîtdlo ingmingnut ûmigssuineránik atugaĸarfiungârtume, atominigdlo sákugssamautit amerdliartortĩnarneĸarfigissãne inuiait nuname inûjuarnigssãnik ârdlerinartorsiortitsissumik? nuna mána soraiuitsumik tamákunínga nâgdliugtitaungârfiujuásagpat, inuit silatusârtut amerdlanerssaisa ĸimagkumásagaluarpât — toĸúsagaluarunigdlũnît!
Gûtip autdlarĸáumut nunamut sujunertarissâ
5. Gûtip inuk nunamut inigsserĸârmago, nuna ĸanoĸ píssuseĸarpa, Gûtivdlo inuiait ĸanoĸ isumaĸarfigai?
5 inuitdle píngorterĸâramigit, Píngortitsissup nuna inungnut túniúpâ nâgssáungitsumik angerdlarsimavfigssãnik. taimane nuna ’ajúngingârpoĸ’. bîbilip píngortitsinermik oĸalugtuagssartâne agdlagsimavoĸ Píngortitsissup nuna piarêrsarêramiuk inuit najugagssãnut angutdlo arnardlo sujugdlît tássunga inigssíkai, „[Gûtip] issigigamigit piliane tamaisa, takuvai ajúngingârtut“. (1 Môrsase 1:31) ajúngingârtísimángíkaluaruniuk Píngortitsissup ĸitornane nunamiut tássunga inigssísimásángíkaluarpai. píngortitsinermik oĸalugtuagssartamik agdlagtoĸ Gûte Píngortitsissoĸ pivdlugo oĸarpoĸ: „ĸaersûvoĸ; piliai agssuarnáiput, mássa avĸutigissai tamarmik ínardluíssutáuput; Gûtiuvoĸ ilumôrtoĸ iluáissuseĸángitsoĸ, iluartûvoĸ perĸusersuitdlunilo.“ (5 Môrsase 32:4) Gûte ajugaĸángitsoĸ suliaĸarsimángisáinarpoĸ utorĸatsíssutigissagssaminik. atâtaugame ajúngitsoĸ inuiait autdlarĸautânîtdle asavai. inuiait sule asavai. — Juánase 3:16.
6, 7. suna pivdlugo ĸularísángilarput Gûtip nunamik píngortitsisimanera inungnigdlo tássunga inigssîsimanera asulĩnarsimángitsut?
6 ĸujanartumik Gûtip nunamik píngortitsinera inungnigdlo tássunga inigssînera asulĩnartũngitdlat. angut arnardlo sujugdlît Gûtimut atarĸinautigssaussumik anguniagaĸartitdlugit, Gûtip Adam Evalo pigínauneĸartípai nãmagdluínartunik kinguâgssiorĸuvdlugit nunalo tamákerĸuvdlugo. ináneĸarpútaoĸ nuna ingmingnut nâlagtigiterĸuvdlugo tamarme pâratîsíngornigssânut, nâlagaorĸussauvdlutigdlo píngortitanut inungnit sianíssusikínerussunut nunamĩtunut tamanut. (1 Môrsase 1:28) alianaraluartumik, inuit ukiune 6000-ine piorêrneratigut misiligtagaĸarfigineratigutdlo, inuit ingmingnut suliarerĸussaĸ nãmagsíngitsôrsimavât. sule ajornerussumik, inuit mãna ingmingnut nakûsernerpaussúkut sûjungnaersínigssartik ârdlerisârutigât navssâtik maujungnangârtut sákugalugit. inuiaitdle nauk amerdlanerussutigut iluagtitsíngitsôraluartut, Gûte Píngortitsissoĸ iluagtitsíngitsôrsimángilaĸ.
7 Gûtip nunamut matumúnga autdlarĸáumut sujunertarissâ nãmagsiumârpoĸ. Gûtip tamána ĸularnavêrĸuserpâ! (Isaia 55:11) bîbilime akugdlîssup oĸausî 1:4-me agdlagsimavoĸ: „erĸardlerît ardlait pêrsut ardlait nagdliútarput, nunalo nâgssáungitsumik taimaigínarpoĸ.“ Isaia 45:18-ime ingminut pivdlune Píngortitsissoĸ oĸarpoĸ ’nunamik piliortûvdlune inerdlugulo’, nangitdlunilo oĸarpoĸ: „aulajangersardlugulo, mássalo píngortíngíkâ soĸángitsugssaĸ, kisiáne piliarigâ inoĸartugssaĸ: uvanga tássa [Jehova], avdlamigdlo nâme.“ pivfigssardlo Gûtip aulajangersimassâ nagdlerpat inoĸarumârpoĸ inuiangnik nãmagdluínartunik, inûneĸ nâgssáungitsoĸ tuníssutisiaralugo pivdluarĸussaussunik!
8, 9. (a) suna pivdlugo nunap inoĸarnigssânik Gûtip sujunertarissâta akerdleríngilâ ĸilaup nunavdlo mãnákut ítut nungúkumârnigssât? (b) „ĸilait nutât“ „nunalo nutâĸ“ sûnuko, táukulo pivdlugit bîbilime sumik neriorssûteĸarpa?
8 Gûtip sujunertarissânik ĸularnavêrĸussîssumik oĸauseĸaut matuma ĸulânĩtoĸ apustile Peterip agssortorniángilâ mianerssorĸussivdlune oĸarame ĸilait nunalo mãnákut ítut nungúkumârtut. sujunigssamime piumârtugssamik tamatumínga ungasigkungnaersimassumik erĸaisitserêrnermigut, nangitdlune oĸarpoĸ: „ilimagissaĸarpugut ĸilagssanik nutânik nunagssamigdlo nutâmik iluarssuseĸarfigssanik.“ (2 Pîtruse 3:10-13) ĸilagssanik nutânik nunamigdlo nutâmik Gûtip neriorssûtâ puiorneĸatsailivdlugo Isaia 65:17-ime agdlagsimavoĸ. ĸanoĸ sivisutigissumik atajumârnigssât pivdlugo, Isaia 66:22-me oĸalugtũneĸarpugut: „sôrdlo ĸilak nutâĸ nunalo nutâĸ píngortitagssáka aulajaitsut kĩnama sâne, oĸarpoĸ [Jehova], taimátaoĸ kinguâgssase atisilo aulajáisáput.“
9 âp, ĸilait nutât nunalo nutâĸ Jehovap sâne aulajáisáput; atáinásáput, piujuáinásáput, nâgssáungitsũsáput! nuna nutâĸ tássáusaoĸ inuiait iluartut nuname minguiagaussume najugaĸartugssat, Píngortitsissup piliaringmago „inoĸartugssaĸ“. (Isaia 45:18) „ĸilait nutât“, tássaussut píssauniligssuit iluartut nutât ĸilangmiussut, nunamut minguiagaussumut inuinutdlo iluartunut nákutigdlîssugssáuput. Jehova Gûtip nuna alutornangârtoĸ tupingnangârtordlo mána „soĸángitsugssa“tut píngortísimásángivigpâ. píngortitsissune ĸutsigsisíkumârpâ!
’nunamut nutâmut’ isertugssauvdlutik amiákûvdlutik inûssut
10, 11. (a) silarssuarmut agtûmássuteĸartunik misigssuissartut sujuligtuiniarnermingne suna nautsorssûtigineĸ ajorpât, tauvalo sume amiákûvdluta inûsínauvugut, sunalo angusínauvdlugo? (b) Noap ilaĸutaisalo ulerssuarme amiákûvdlutik inûsimanerat uvagut sumik ilíniutigisínauvarput?
10 silarssuarmut agtûmássuteĸartunik misigssuissartut ilimasârutigissaríngilât nuname amiákûssunik inoĸarnigssaĸ píssutsit ârĸigssũssaunigssãne nutâme pitsaunerussumilo inûjumârtugssanik. ĸujanartumik táukua erĸarsautait nunap Píngortitsissuata erĸarsautigíngilai, táukualo avĸutigissait táussuma avĸutigíngilai. (Isaia 55:8-11) táukua erĸarsautaisa túngavigíngilât itsarssuaĸ inûp Noap uvdluine nuname pisimassoĸ. inuiaĸatigît atominik ĸârtartuliaisa ĸârtûjassuliaisalo avdlat tamarmik sákortússusiagut naligisínáungilât ulerssuaĸ nuna tamákerdlugo pissoĸ ĸilangmit siagdlersorssûngmat silarssuatoĸaĸ nakûserneĸangârfiussoĸ táuna sûjungnaersitdlugo. nagdligtuingârnermigut Jehova Gûtip Píngortitsissup isumagâ ilaĸutarît inuit silarssûp taimane ítup ajunârnerssuákut naggatâne amiákûvdlutik inûnerat nuname inûjuarsínaorĸuvdlugit.
11 itsarssuaĸ silarssûp tamatuma naggatâne amiákûvdlutik inûssut arfineĸ pingasũput, tássa Noa nulialo, ernerilo pingasut táukualo nulê pingasut. inuit tarniussut arfineĸ pingasut táuko nagguvigalugit inuiait autdlarterĸigput, iluarssuseĸ atordlugo. (2 Pîtruse 2:5; 3:6) tamána ungasíngitsúkut piumârtugssamut takússutauvoĸ. (1 Môrsase 9:1-7) tamatuma takutípâ sôrdlo Noa ilaĸutailo uvdlumingne silarssûp naggatâne amiákûvdlutik inûssut, taimatútaoĸ uvagut silarssûp matuma naggatigssâne amiákûvdluta inûsínáusassugut píssutsit ârĸigssũssaunigssamut nutâmut ungasigkungnaersimassumut isísavdluta!
12, 13. (a) suna pivdlugo uvdlumíkut inûssut milliûnigdlit píssutsit ârĸigssũssaunerata pisorĸap matuma naggatigssâ sujôragíngilât? (b) ĸínutip inûp ernerata uvavtínut ĸínutigerĸuvdlugo ajoĸersûtigissâta nuna mána pivdlugo sumik neriorssorĸigsârpâtigut?
12 uvdlumíkut inûssut ilaisa milliûnigdlit ugperât „ĸilait nutât“ ãmalo ’nunap nutâp’ sujunigssame ĸaningnerme íkumârnigssât. silarssuatorĸap matuma naggatigssâ sujôragíngilât, nauk nagdliungnigssâne sôrdlulusôĸ ingnerup ĸilak nunalo ulísagaluarai. tamanik Píngortitsissup oĸausianit tutsuviginartûssumit nalúngilât nuna piviussoĸ mána nungúsángitsoĸ sôrdlo nuna mána nungúsimángitsoĸ silarssûp sujugdliup naggatâne sujuaissatigut nagguvigissap Noap uvdluine pisimassume. nuna mána pivdlugo tugsiausiortoĸ Gûtimit isumagssarsisíneĸartoĸ imáitumik oĸauseĸarpoĸ: „ĸilait [Jehovap] pigai, nunale túniúpâ inuit ĸitornainut.“ — tugsiaut 115:16, kalâtdlisũngortitaƙ atortugssautíneƙartoƙ.
13 „inuit ĸitornait“ píngortitáuput, ĸilangme inûssugssaunatik, nunamile inûssugssauvdlutik, Píngortitsissuvdlo tássane najugaĸartípai. nuname mânîtitdlune Ajoĸersuissorssûp, ingminut taissup „inûp ernera“nik, ajoĸersugkane ajoĸersorpai Píngortitsissumut ĸinussásassut, oĸarĸuvdlugit: „atâtarput ĸilangmiussutit, arĸit ivdlernarsile; nâlagauvfît tikiutdle; perĸussat ĸilangmisut nunamísaoĸ pile.“ (Matîuse 24:37; 6:9, 10) ’ĸínutinik tusartartup’ ĸínut tamána tusásangmago nâlagauvfingme ĸilangmĩtup tikiúnigssâgut, nuna piviussoĸ mána aserortariaĸángilaĸ píssutsit ârĸigssũssaunerata aserortugssángortup matuma naggatigssâne ĸanigdliartortume. (Tussiaat 65:3) nunamîtdlutik inuiait ánagtut atâtap ĸilangmiussup perĸussânik iliúsáput, sôrdlútaoĸ íngilit ĸilangmĩtut ilumôrdlutik iliortartut.
14. ’nunap nutâp’ kíkut autdlarĸautigísavai, nunavdlo nutâp kíkut ilássutigísavai?
14 Gûtip perĸussânik iliortartut tamarmik nuname minguiagaussume suliagssaisa písanganássusigssâ! silarssûp mãnákut ítup naggatigssâne nuname amiákûvdlutik inûssugssat, atâtamik ĸilangmiussumik nuname pâratîsiussume inûvdlutik nâgssáungitsumik kivfartũssinigssamingnut ĸilanârtut, ’nunap nutâp’ autdlarĸautigísavai „ĸilait nutât“ Messiasip pîsa atâne. kingornagut ’nunap nutâp’ neriorssûtigineĸartup ilássutigísavai toĸussut utertíneĸartut makítugssat, táukulo nâpertuivdluarnigssamik ajoĸersorneĸarumârput iluarnermigdlo iliortarnigssamingnik ilimagineĸásavdlutik. (Juánase 5:28, 29) tamána erĸarsautigalugo, uvagut silarssûp matuma naggatigssâne amiákûvdluta inûsínaussugut ĸanoĸ iliúsaugut?
15, 16. (a) silarssûp matuma naggatigssâne amiákûvdlutik inûjumârtugssat ĸanoĸ erĸortumik ilerĸoĸartariaĸartut apustile Peterip takutípâ? (b) ulerssûp sujornatigut Noa inugtut ĸanoĸ ítûva, taimatutdlo ilerĸua nangmineĸ ilaĸútamilo ĸanoĸ iluaĸutigât?
15 tamána aperĸutauvdluarpoĸ. ukiut 1900-t sivnerdlugit matuma sujornagut apustile Peterip takutípâ suna aperĸúmut tamatumúnga akíssutigssaussariaĸaraluartoĸ, agdlagkame: „tamáko tamarmik taima nungúkumârmata, sôruname iluartumik ilerĸoĸardluse mianeringnigtariaĸarpuse. Gûtip uvdlugssâta nagdliuvfigssâ ilimagalugo ĸilanâralugulo, ĸilait tauva ikumavdlutik augkumârmata píngorĸârtutdlo ikuatdlagdlutik ũkumârmata.“ (2 Pîtruse 3:11, 12) ukiut 1900-t matuma sujornagut romamiut nâlagauvfigssuata píssagterugtorfiane apustilip Gûtimit isumagssarsisíneĸartup oĸautsinik táukunínga agdlangnigssâ nalerĸútûngmat, sule nalerĸúnerungãsaoĸ oĸautsit kãmagtûtaussut táukua Jehovap nalunaiaissuinut píssutsit ârĸigssũssaunerata matuma uvdluine kingugdlerne torârtíneĸarnigssât. ’Jehovap uvdlugssâta nagdliuvfigssâta’ sákortuserugtorfigísavâ ’nunap ássersûtaussup tássanilo suliarissaussut’ augtitsivingmilusôĸ augkumârnigssât. — 2 Pîtruse 3:10.
16 silarssûp ulerssûp sujornagut ítup uvdluine kingugdlerne „Nûa inôĸatimine angutauvoĸ iluartoĸ inûsia tamarmiussoĸ; Gûte saĸeĸatigâ“. (1 Môrsase 6:9) ilaĸútamingnut angnikitsunut ítûvdlune Noap taimatut saĸinera píssutaoĸatauvoĸ tamarmik ánagtitauneránut Gûtimit Noap ’saĸeĸatigi’ssânit. umiarssuarmit ánássutigissamingnit ánagdlutik anerêramik, Noa ilaĸutailo atorneĸarput iluarssutsíkut Jehovavdlo Gûtip pivdluarĸussineratigut píssutsit ârĸigssũssaunerat nutâmik autdlartitsinigssamut. tauva Gûtip ulerssuarme amiákûvdlutik inûssut angerfigeĸatigai inuiait nunamĩtut nunarssuaĸ tamákerdlugo ulerssuarmik nagdliutitsivfigerĸigkumârnagit. — 1 Môrsase 9:8-17.
17. ulerssûp sujunitsiánguagut sujuningâvatigutdlũnît Noa kalerrisârneĸarpa, tamatumalo uvdlumíkut píssuseĸ suna naligâ?
17 ulerssûp sujuningâvatigut Noa kalerrisârneĸarpoĸ ervngit nákarumârnigssãnik nunarssûp tamarmiussup ĸarssúneĸarnigssânut nãmagtugssanik. taimatútaoĸ ukiut untritigdlit 20-gssãne matumane Jehovap nalunaiaissue silarssûp naggatigssâta sujuningâvatigut nagdliúnigssânik kalerrisârneĸarput. kalerrisârutip túngavigai bîbile Gûtimit isumagssarsiarineĸartoĸ bîbilimilo sujuligtûtit erĸũnere nalunarungnaersitsissut píssutsit ârĸigssũssaunerata nakûserneĸangârfiussup matuma naggaserneĸarnigssâta ĸanigdliartorneranik.
toĸusimassut nuname inûnigssamut tikitdluarĸuneĸarnigssât
18. nuname toĸussut makínigssãnik sujuligtûteĸarneĸ sarĸúmersitane univkârutigineĸartoĸ suna nalunaiaissut milliûnigdlit uvdlumíkut ĸilanâralugo nuánârutigât?
18 uvdlumíkut Jehovap nalunaiaissuisa Gûtimik saĸeĸatigingnigtut milliûnigdlit sarĸúmersitane 20:11-14-ime sujuligtûtigineĸartoĸ tipaitsûtigât, tássanilo atuarparput: „takuvaralo igsiavíssârssuaĸ angisôĸ ĸaĸortoĸ tássanilo igsiassoĸ; táussuma kînânit nunalo ĸilagdlo ĸimãput inigssarsineĸarungnaerdlutigdlo. toĸussutdlo mikissut angisûtdlo igsiavíssârssûp sâne ĸeĸartut takuváka, magpersagkatdlo ĸavsît magperneĸarput, magpersagkatdlo avdlat atautsit magperneĸarput, tássa magpersagkat inûnerup pê; toĸussutdlo erĸartũneĸarput magpersagkane agdlagsimassut maligdlugit, suliatik nâpertordlugit. ímavdlo toĸussut ingminĩtut túniúpai, toĸuvdlo toĸussutdlo inâta toĸussut ingmingnĩtut túniúpait; erĸartũneĸarputdlo nungutdlutik suliatik nâpertordlugit. toĸulo toĸussutdlo inât tatsimut ingnerussumut igitáuput. tássa toĸup áipâ, taseĸ ingnerussoĸ.“
19. nunamiut toĸungassut nuname ĸanoĸ píssusilingme makísápat, inûnerdlo nutâĸ autdlarnerdlugo ĸanoĸ iliorfigineĸásápat?
19 bîbilime sujuligtût táuna nâpertordlugo toĸussunit makítugssat nunamut inuerúsimassumut tikerĸísángitdlat. Jehovamut nalunaiaissut ingmingnik túniutdluínarsimassut kuisimassutdlo milliûnigdlit ilimagât ĸilatorĸat nunatorĸavdlo ássersûtaussut ĸimânigssãne amiákûvdlutik inûnigssartik, toĸussunigdlo makítugssanik ilagsingningnigssartik nuname nunarssuaĸ tamákerdlugo pâratîsíngortíneĸarumârtugssauvdlune naggorigsagaussume tikitdluarĸúsavdlugit. (Lúkarse 23:43, NW) taimaníkugssaĸ píssutsit ârĸigssũssaunerat nutâĸ autdlartitdluarêrsimásaoĸ. silarssuatorĸap matuma naggatâne amiákûvdlutik inûssut toĸussut utertitagssaussut makínigssame uternigssât asangnigtumik angnertûmik piarêrsimavfigisimásavât.
20. Lazarus Jairusivdlo pania makiterêramigit Jesusip ilitsersũssutaisa sût takutípât amiákûvdlutik inûssugssat suliagssarísagât makítugssanik milliârtilingnik isumagingningnigssaĸ?
20 amiákûvdlutik inûssut milliûnigdlit táukua erĸáisavât ĸanoĸ Jesusip ikíngúne asangâgkane Lazarus Betaniame, Jerusalemip erĸânĩtume, ilivermit ĸârusuliaussumit makiterêramiuk, tupingnartuliamik issigingnigtut perĸugai toĸúngasai pêrĸuvdlugit nermússaiarĸuvdlugulo. ãmátaoĸ, jûtine nâlagkersuissup Jairusip pania toĸussunit makitíkamiuk, Jesusip ’nerissagssânik tunerĸuvâ’. (Lúkarse 8:55; Juánase 11:44) ĸularnángitsumik ĸilangmíngãnît ilitsersûtigssaĸarumârpoĸ amiákûvdlutik inûssut piarêrsainigssãnut toĸussut milliârtigdlit makínigssame uternigssât piarêrsimavfigerĸuvdlugo.
21, 22. (a) ârĸigssũssauneĸ suna atordlugo amiákûvdlutik inûssugssat toĸussut makítugssat ikiúsavait Kristusip toĸunerata iluaĸutigssartai iluaĸutigerĸuvdlugit? (b) suna pivdlugo „nuna nutâĸ“ autdlarnernerminîtdle iluartũsava?
21 ãmátaoĸ ilíniartitsinerup tungâtigut angnertûmik suliagssaĸarumârpoĸ. tamatuma nâpertúsavâ Gûtip sujunertarissâ inuit toĸussut utertugssat tamákîssumik iluaĸutigisínáusangmatigik Jesus Kristusip pigdliutâta utertitsíssutaussup iluaĸutigssartai. taimailiorunik aitsât nuname Edenitut píssuseĸartume, inugtut nãmagdluínartutut, inûsínautitáusáput. mãnákut agdlât „amerdlangârtut“ ’angnikitdliornartugssame angisûme’ amiákûvdlutik inûsínaunigssamik ilimagissaĸartut piarêrsarput ilíniartitsinigssamik ârĸigssũssaunigssamut nuáningârtumut peĸatauniarnigssamingnut. ’Gûtip savârâta’, Jesus Kristusip, pigdliutitut toĸunerata iluaĸutigssartai nangmingnêrdlutik atulerêrsimavait. (Juánase 1:29) tamána sarĸúmersitat 7:9-14-ime takutíneĸarpoĸ, avdlanut ilángutdlugo táuko pivdlugit agdlagsimangmat: „tássa-uko angnikitdliornartumit angisûmit pissut, atissatigdlo takisût savârĸap auanik errorpait ĸaĸorsardlugitdlo.“ Kristusip utertitsíssutigssâta iluaĸutigssartai pigamíkik, takutíneĸarput „takisûnik ĸaĸortunik atissa“ĸardlutik.
22 „amerdlangârtut“ táuko pivdlugit ássersûtíkut agdlagsimavortaoĸ: ’Gûtip nâlagfiutâne kivfartũpât uvdlúkutdlo únuákutdlo.’ (sarĸúmersitat 7:15) ’angnikitdliornartugssame angisûme’ ungasíngitsúkut nagdliúkumârtume, atissamingnik ĸaĸortunik arsârneĸásángitdlat, aulajaitdlutigdle Jehova Gûte ivdlernartumik kivfartũtuarumârpât táussuma sernigssuineratigut. (sarĸúmersitat 7:17) ássersûtaussunik „takisûnik ĸaĸortunik atissagdlit“ ’nunap nutâp’ autdlarĸautigalugit ilagísavai, taimailivdlunilo autdlartíneranîtdle iluarssuseĸarfiúsaoĸ. — 2 Pîtruse 3:13. (wD 1/1 84)
aperĸutit uterĸitagssat
□ sujunigssame inûnigssaĸ inuit ĸanga mãnákutdlo inûssut ĸanoĸ isumaĸarfigissarpât?
□ Gûtip nuna sumik sujunertarissaĸarfigâ, tamánalo bîbilimit ĸanoĸ pâsineĸarsínauva?
□ Noamut ilaĸutainutdlo pisimassut ĸanoĸ isumavdlûtigisínauvavut inuit mãnákut inûssut ilaisa milliûnigdlit toĸúngisáinarnigssãnut nunamile mâne inûjuarnigssãnut?
□ toĸussut makigpata kíkut tikitdluarĸúsavait, sunigdlo upalungaersarneĸásápat?
[Qupp. 13-mi assiliartaq]
Noa ilaĸutailo ulerssuarme amiákûvdlutik inũput. inuit milliûnigdlit silarssûp matuma naggatigssâne amiákûvdlutik inûjumârput
[Qupp. 14-mi assiliartaq]
sôrdlo Lazarus makíkame inûlerĸingnermut tikitdluarĸuneĸartoĸ, taimatútaoĸ Harmagedonime amiákûvdlutik inûssugssat toĸussut makigpata inûlerĸingnermut tikitdluarĸujumârpait