Suliffiit qatsuppiuk?

TAAMAAPPAT ullormut nalunaaquttap-akunnerisa arfineq-pingasut missaanni sulisaruit taava piffissaq sivisuallaartoq pikkunaalliornermut atortarsimassavat. 1900-kkunni makkunani suliat ilarpassui assigiiaaginnavissuupput sulisunillu tulluusimaarutissiivallaassanatik.

Taamaattumik suliffippit soqutiginarsarneratigut annertuumik iluaqutissarsisinnaavutit. Sulinerit nuannarinerulersinnaavat siunissamilu suliffigilersinnaasavit suulluunniit soqutiginarnerulersinnissaat ilikkassallugu. Qanoq taamaaliortoqarsinnaasoq atagu misissoriartigu.

Suliffinnut tunniusimalluinnarit

Ilisimasallit ilaat siunnersuisarput suliaq nuannarisuusaarlugu ingerlanneqarsinnaasoq. Taamaaliornikkut suliaq nuannarinerulerneqarsinnaavoq.

’Kisianni uanga suliffiga nuannarilinngisaannassavara!’ immaqa oqarputit. Imaassinnaavoq assigiiginnavimmik suliaqartutit, soorlu suliffissuarmi ingerlaartitanik. Imaassinnaavorluunniit taama ukiuni amerlatigisuni assigiiginnavimmik suliaqarsimagavit suliat soqutiginarseqqinnavianngitsoq. Siunnersuutilli suunngitsunnguugaluit malikkukkit, soorlu qungujulaneruleruit timit nappaarinnerutilerukku immaqa suliffiit nuannarinerulersinnaavat.

Aamma suliat tamakkiisumik sammigukku iluaqutaassaaq. Eqqarsaatitit allarluinnarmiitinnaveersaartakkit, ulloqeqqarnissallu imaluunniit weekendernissat naammassisassatilluunniit allat eqqaallattaajuarnaveersaakkit. Taava suliat nuannarinerulissavat, piffissarlu ingerlalertornerussaaq.

Nuannarisamik ulapputeqarnermi piffissaq ingerlalertortarpoq. Taamatuttaaq issaaq suliat pikkunaagisaraluit tamakkiisumik sammigukku.

Sapinngisannik iliorit

Sapinngisannik ilioruit suliffiit nuannarinerulissavat. Soorunami siunnersuutit tamakkua paasinnittaatsimut nalinginnaasumut akerliupput, tassa suliffik pikkunaagigaanni sapinngisamik ilungersuutiginaveersaaginnassasoq. Ilungersuussinngikkuilli, arriisaaruit imaluunniit annikitsuinnarmik naammassisaqaruit, qularnanngitsumik nukissaarukkiartulissaatit, isumakululerlutit qasoqqalerlutillu. Taamaattumik sulereerlutit angerlaraangavit stressernerit, isumakulunnerit nukissaarulluinnarsimanerillu naammassisaqarpiarsimannginninnik ilaatigut pissuteqarsinnaavoq.

Biibili naapertussagaanni pilersaarusiamik ilungersuussilluni suliaqarneq allaat sunngiffeqarnissamut piffissaqarnerulernermik kinguneqarsinnaavoq. „Inuk iluanaarnerussagaluarpoq nerillunilu imeruni suleruloornerminilu imminut ullunik atugarissaarfissaqartilluni.“ (Nalunaajaasup oqaasii 2:24) Immaqa tamanna inuit ilaannut itsangasutut nipeqaraluarpoq, kisianni inoqarpoq najoqqutassiamik pisoqalineq ajortumik tamatuminnga maleruaasunik. Taakkua ’suleruloornermi imminut ullunik atugarissaarfissaqartilertarneq’ isumaqatigaat. Atuakkami The Joy of Working-imi ima allassimasoqarpoq: „Naammassisaqarluarneq qamuuna nalerisimaarnermik nassataqartarpoq.“

Suliat sapinngisannik pitsaanerpaamik suliariuk, qularnanngitsumillu misigissaatit nukissaqarnerulerlutit. Sapinngisamik annikitsumik naammassisaqarniartanngikkuit nuannaarnerulissaatit. Suliassatit pingaarnerit naammassiniaqqaartakkit, taava suliassaminik kinguartiteriinnarnini pissutigalugu imminut qasutittartumit annermik ulloqeqqarnitit weekendernitillu iluarusuutiginerusalissavatit. — Naleqqiuguk Esterimik allakkat 10:2; Rûmamiunut agdlagkat 12:11; Timûtiusimut agdlagkat áipait 2:15.

Allanut unammillernissamut taarsiullugu imminut qaangerniartarit. (Galâsiamiut 6:4) Najoqqutarisatit qutsissisikkit, nutaanillu anguniagaqartarit. Siumukarniartuarit. Arnap ataatsip mersortartutut assigiiaaginnavimmik suliaqartup — immaqa inuit ilaasa pikkunaalluinnartutut isigisaannik suliaqartup — nuannariinnarlugu ’piffissaq unammisarpaa’. Nalunaaquttap-akunneri tamaasa naammassisani naatsorsortarpai taavalu annertusisinniartarlugit. Sapinngisani tamaat naammassisaqarniarsarisarnini pissutigalugu suliani nuannaraa. — Ussatit 31:31.

Suliat ’pinnersaruk’

Nakorsat Dennis T. Jaffe aamma Cynthia D. Scott ima siunnersuuteqarput: „Takorlooriaruk suliffiit tassaasoq illu soqanngitsoq. Illumut nuupputit ilusilersugaaneralu qimerloorlugu. Taava piginnaanitit malillugit iliuuseqalerputit. Aalajangerputit qanoq iliorlutit inissat atorluassallugit, qanoq init pinnersassallugit illulu illit angerlarsimaffittut pisatsersussallugu. Nammineq inuttut nuannarisannik pisatsersorpat.“

Arlaannik suliaqassaguit arlaatigut najoqqutassinneqarlutillu ilitsersuunneqassaatit. Naatsorsuutigineqartut kisiisa suliarisaraanni assigiinnarpaa illumi soqanngitsumi inuttut ilisarnaateqanngitsumi ineqarluni. Namminerli inuttut ilisarnaatinnik ’kusassarukku’ suliat soqutiginarnerulissaaq. Marlunnik inoqanngilaq suliffimmik ataatsimik assigiimmik ’kusassaasinnaasunik’. Immaqa saqisoq ataaseq aggertartutoqqat piumanerusartagaannik eqqaamallaqqippoq. Immaqa alla inussiarneqalunilu inoroorsaallaqqippoq. Marluullutik suliartik nuannaraat namminneq piginnaanitik atorlugit suliartik aallukkamikku.

Ilinniartuarit

Aamma ilinniartuarneq suliamik nuannernerulersitsisinnaavoq. Atuakkami Tension Turnaround-imi nassuiarneqarpoq alliartortilluta qaratsatta paasissutissanik suliarinninnissamut pisinnaasai annertusiartortartut. Tamatuma paasinarsisippaa sooq siornatigut pissanganartitavut pikkunaagilertarivut. Tamatumunnga aaqqiissutissaavoq nutaanik ilinniarnikkut qaratsap paasissutissanik ’perusuttuarneranik’ matussutissiineq.

Suliffigisamut tunngasunik ilinniagaqarneruneq immaqa kingorna pissanganarnerusumik suliffeqalernermik kinguneqarsinnaavoq. Taamatulluunniit pisoqanngikkaluarpat ilinniarsinnaassutsip suliaq soqutiginarnerulersillugulu nalerisimaarnarnerulersissavaa. Atuakkiortut Charles Cameron aamma Suzanne Elusorr ima oqarput: „Ilinniarneq, piginnaanerit ineriartortinneqarnerat pissutigalugu, imminut tatigilersitsiinnarani, aamma inuunermut isiginnittaatsimut tamarmut sunniuteqartarpoq. Paasinarsisarpoq ajornartorsiutit aaqqinneqarsinnaasut, ajornakusoortut qaangerneqarsinnaasut, annilaanganeq millisinneqarsinnaasoq takorluukkamillu annerujussuarmik naammassisaqartoqarsinnaasoq.“

’Kisianni,’ immaqa akerliliivutit, ’suliffiga pillugu ilisimasassat tamaasa qangarsuarli ilikkareernikuuakka!’ Taamaappat taava suliffinnut toqqaannanngikkaluamik attuumassuteqartut ilinniarsinnaanngiligit? Imaassinnaavoq atortunnut tunngasut imaluunniit inunnik allanik peqateqarnermut tunngasut ilinniarsinnaagitit. Immaqa pitsaanerusumik allaffimmi allakkiorneq ilinniarsinnaavat, imaluunniit qanoq ililluni ataatsimiinnermik aqutsinermut pikkorinnerulersoqarsinnaasoq. Aamma qanoq ililluni pitsaanerpaamik qullersarisanut suleqataasoqarsinnaasoq ilinniarsinnaavat.

Qanoq iliorluni tamakku ilinniarneqarsinnaappat? Imaassinnaavoq suliffippit pikkorissarnissamik neqeroorfigisinnaagaatit. Immaqaluunniit atuakkanik atorniartarfimmi atuakkat pisariaqartitarluinnatit pissarsiarisinnaavatit. Paasissutissanik aallerfissat saqqumilaannginnerusut arajutsinaveersaartakkit. Suleqatit nukittoqutaat sanngeequtaallu qimerloorlugit ilikkagaqarnarsinnaavoq. Naammassisatit pitsaasut kukkunitillu ilinniutigisinnaavatit iliuuserisimasavit eqqortut paasiniarnerisigut. Nammineq misilittakkakkut allallu qimerloornerisigut ilikkakkatit immaqa atuakkanik atuarnikkut pikkorissarnikkulluunniit pissarsiarisinnaanngisannik paasisaqassutigisinnaavatit.

Naggammik siunnersuutit

Aammattaaq suliffiit isiginnittaatsimit allamit qimerloorsinnaavat. Isummersinnaavutit pitsaanerusumik pisariaqaraluarlutit — allat tamarmik suliffissanik pitsaasunik neqeroorfigineqartartut, illilli kissaatigisannik suliffittaanngisaannarsimallutit. Allat ilinnut isumaqataasut sivisoorujussuarmik oqaloqatigisinnaagaluarpatit, imminullu qularunnaarsillutit taamatut isumaqarnerit eqqortuusoq.

Imaassinnaavorli isummat eqqunngitsoq. Inuppassuit suliffimminnik nuannarinnittut nuannarinnilernissartik ilikkarsimavaat. Immaqa illunik pisatsersuinermik nuannarisalerujussuup bussimik ingerlatitsineq nuannarilersinnaavaa. Sooq? Pilersitsisinnaassuseqarpaluttumik suliffimminik isiginneriaatsimi nuannaalersillunilu nalerisimaalersimmani.

Eqqarsariaaseq nuanniitsoq, sapaatip-akunneranik suliffiusumik weekendimut naleqiullugu nuanniitsorujussuanngortitsisoq, qimanniarsariuk. Kukkunerisimasavit kukkuneriumaakkavillu isumaliutiginerannut piffissaq atulussinnaqinagu. Allat ilinnik qanoq isumaqarfiginninnerat isumakuluutigiunnaarniaruk. Suliassatit tamakkiisumik sammikkit. Tamakkiisumik aallutikkit. Ilungersortumik iliuuseqarit suliarissallugu nuannarinerpaasattulli tiguartiffigitigiumallugit. Sapinngisannik iliuuseqarit, naammassilluakkatillu nuannaarutigikkit. (gE 22/12 97)

[Qupp. 11-mi ungalusaq/assiliartaq]

Suliffiit sumiginnaqinagu

Ussatit 27:23, 24-mi allassimavoq: „Maluginiarluarniakkit savaativit qanoq issusii, nersutaatitillu paarilluarniakkit! Pisuussutimmi atattuinnartussaanngillat, pinnersaat niaqormioq kinguaariinni pigittuinnarneqartanngilaq.“ Tamanna qanoq paasisariaqarpa?

Isumaqarpoq „pisuussutit“ aamma „pinnersaat niaqormioq“ (ataqqisaaneq) ujartoraanni, angugaannilu, paasinarsisartoq ataavartumik piunavianngitsut. Biibilip nalaani savanik paarsisoq silatussutsimik ersersitsisarpoq peqqissaarluni savaatini isumagigaangamigit, tassa ’nersutaatini paarilluaraangamigit’. Soorlu versini tulliuttuni pingasuni ersertoq tamanna kinguneqassaaq savanik paarsisup ilaqutaasalu pigisatigut isumannaatsumik atugaqalernerannik. — Ussatit 27:25-27.

Ullumikkut inuit ilaat pisuussutinik ataqqisaanermilluunniit sakkortuumik anguniagaqartarput suliffigisartik qimakkumallugu. Ilaat piviusorsiortunik pilersaaruteqartarput; ilaat takorluuiinnartarput. Qanorluunniilli ikkaluarpat maannakkut suliffigisamik narruginninnissaq sumiginnaanissarluunniit silatusaanngitsuliorneruvoq. Maannakkut suliffigisaq isertitaqarfiuvoq qularnaannerpaaq, immaqalu taamaattuassalluni. Silatusaarnerunerpaavoq ’nersutaatinik paarsilluarnissaq’, suliffigisamik tamakkiisumik aallussinissaq. Taamaaliornikkut maannakkut siunissamilu pigisatigut isumannaatsumik atugaqarnissaq qularnanngitsumik qulakkeerneqarsinnaavoq.