Nunarsuaq tamakkerlugu aaqqiissutissaqarpa?
IMMIKKUT ILISIMASALLIT isumaqatigiissutigaat tuberkulose (TB) nunarsuarmi tamarmi ajornartorsiutaasoq nunarsuarmut tamarmut atuuttumik aaqqiissutissinneqartariaqartoq. Nuna ataaseq sunaluunniit nammineerluni TB-mik nakkutiginninniarsinnaanngilaq, inuit millionilikkuutaat sapaatit-akunneri tamaasa nunamit nunamut angalajuarmata.
Inuppassuit isumaqarput nunarsuaq tamakkerlugu suleqatigiittoqassappat naalagaaffiit pisuut naalagaaffinnik piitsunik, TB-mit eqqorneqarnerpaasunik, ikiuisariaqartut. Dr. Arata Kochip oqarneratut „nunat pisuut soqutigisaraat namminneq nunaminni tuberkulosimik akiuiniartariaqalinnginnerminni nunat ineriartortinniakkat tuberkulosimik akiuiniarneranni ikiornissaat“.
Nunalli pisuut suliassatut ajornartorsiutitullu nukinginnarnerusutut isigisaminnik aaqqiiniarlutik ulapputeqaqisut ikiuiniarsimanngillat. Nunat piitsut ilaat peqqissaaveqarnermik sumiginnaallutik sakkutooqarnermut aningaasanik annertuumik atuisarput. 1996-ip qiteqqunnerani nunarsuarmi tamarmi TB-rtut 10 procentiinnaat suliniuteqarnermik DOTS-imik sullinneqarsimapput — nappaalanersuarmik pinaveersaartitsissagaanni ikippallaarlutik.
WHO oqarpoq: „Ukiuni qulikkaani TB-mik ajorunnaarsitsinissamut ilisimasat nakorsaatillu akikitsut pigineqarsimapput. Silarsuarmi maanna pisariaqartinneqartoq tassaavoq inuit pissaanillit, sunniutillit naakkinnittullu nakorsaatit tamakku nunarsuarmi tamarmi atorluarneqarnissaannik kissaateqartut ilungersorlutik iliuuseqarnissaat.“
TB ajugaaffigineqassaaq
Inuit pissaanillit sunniutillillu ajornartorsiummik aaqqiinissaannik isumalluarfigisinnaavavut? Tussiaasiortoq Guutimit isumassarsisitaasoq ima allassimavoq: „Tunaareqinasigit naalagaanertat, inuit annaassisinnaanngitsut.“ Kinami tunaarisinnaavarput? Nangilluni allassimavoq: „Pilluarpoq Jaakup Guutianik ikiorteqartoq, [Jehovamut] Guutiminut neriulluartoq, qilammik nunamillu immamillu tamanillu tassaniittunik pinngortitsisumut.“ — Tussiaat 146:3, 5, 6.
Nunarsuarmik Pinngortitsisutut Jehova Guuti nappaatinik suujunnaarsitsinissamut pissaaneqarlunilu ilisimassuseqarpoq. Naakkinnittuuami? Pruffiitini isumassarsisitani aqqutigalugu Jehova ima neriorsuivoq: „[Innuttakka] qajassuutissavakka, soorlu ataatap ernini kiffartortini qajassuuttarai.“ — Malakia 3:17; takujuttaaq Jâkup agdlagai 5:11.
Biibilimi kapitalimi kingullerpaami apustilip Johannesip takorruuisitaanera allaaserineqarpoq. Takorruuisitaanermini takusimavaa ’orpik inuunartoq aqqaneq-marlunnik inerititsisartoq’. Orpik inerititaalu assersuutaapput Jehovap aaqqissuussaanut inunnik naalattunik naassaanngitsumik inuusinnaalersitsisussanut. — sarĸúmersitat 22:2.
Johannes nangippoq: ’Orpiullu taassuma pilutai inuiaqatigiinnut katsorsaataapput.’ Piluttat assersuutaapput pilluaqqusaarnernut Guutimeersunut inuiaat anersaakkut timikkullu ajorunnaarsinneqarnerannik kinguneqartussanut. Taamaattumik qularinngissinnaavarput silarsuassami nutaami naapertuilluassuseqarfiusumi Guutip naalagaaffiata ataani TB naassaanngitsussamut suujunnaarsinneqarumaartoq. — sarĸúmersitat 21:3, 4. (gE 22/12 97)
[Qupp. 8, 9-mi assiliartaq]
Guutip inuiaat ajorunnaarsilluinnarneqarnissaat neriorsuutigaa