Biibili Qanoq Oqarpa?

Guuti asannittoq qanoq ililluni mianerineqarsinnaava?

„PILLUARPOQ [JEHOVAMIK] MIANERINNITTOQ.“ — TUSSIAAT 112:1.

BIIBILIMI oqaatigineqartutut ’Guuti asassutaappat’ sooq taava mianerinissaa, imaluunniit oqaatsinut allanut nutsikkani oqaatigineqartutut ersiginissaa, pisariaqassava? (1 Juánase 4:16) Asanninneq ersinerlu imminnut kattutsitassaanngitsutut nalinginnaasumik isigineqartarput. Taamaattumik ersineq, imaluunniit mianerinninneq, Guutimut attaveqarnitsinni sumi inissisimasussaava? Sooq Guuti asannittoq mianerisariaqarparput? Oqaatsit „ersineq“ aamma „mianerinninneq“ qanoq Biibilimi atorneqarnersut misissornerugutsigu tamanna ilisimasaqarfiginerulersinnaavarput.

Oqaatsit amerlanersaanni oqaaseq ataaseq arlalinnik isumaqartinneqarsinnaasarpoq, ataqatigisai aalajangiisuusarlutik. Assersuutigalugu, oqaatsit ilaanni ima oqartoqarsinnaavoq: „Siku asavara,“ imaluunniit „Meeqqakka asavakka.“ Asanninneraanerit taakkua marluk isumaat oqaatigineqarnerallu annertuumik assigiinngissuteqarput. Taamatuttaaq Biibilimi ersinerit assigiinngitsut eqqartorneqarput. Oqaatsimi Guutimik pallorfiginninnermut atatillugu atorneqartumi, „mianerinninneq“-mi, pineqanngillat qunusiarineqarneq, siooraneq imaluunniit pillarneqarnissamik siooraneq. Guutimik mianerinninneq misigissusiuvoq ajunngitsoq — tassaagami ataqqinnilluinnarneq. Misigissuseq ajunngitsoq tamanna Guutimik asanninnermik kajungerinninnermillu ilaqarpoq, taassumannga qimaarusussutsimik toqqorusussutsimilluunniit pinnani.

Guutimik mianerinninnerup ersineq nuanniitsoq peersittarpaa. Inuk Guutimik mianerinnittoq pillugu tussiaasiortoq ima allassimavoq: „Ajunaarnermik tusaruni siooralissanngilaq pissutsimigut allanngujaatsuugami [Jehovalu] tatigalugu.“ (Tussiaat 112:7) Guutimik mianerinnikkutta inuit ajortut Satanilluunniit sioorasaarutaasa suulluunniit Jehovamik ataqqinninnerput millisissinnaanngilaat. (Lúkarse 12:4, 5) Guutimuttaaq qinunikkut saaffiginninnissarput ersiginavianngilarput. Tamatumani ’asanninneq ersinermik ilaqanngilaq’. — 1 Juánase 4:18.

Qilaat Guutillu ataqqinassusiat

Itsaq kunngi David Guutimik mianerinnittuusimavoq. Pinngortitarsuup kusanassusia angissusialu ataqqinningaarluni eqqarsaatigisarsimavaa. Ima oqarsimavoq: „Qutsavigissavakkit pinngortitaagama tupinnangaartumik, suliatit tupinnangaarput — tamanna nalunngilluinnarpara.“ (Tussiaat 139:14) Unnukkut qilak isiginnaajutigalugu oqarsimavoq: „Qilaap oqaluttuaraa Guutip naalannassusia.“ (Tussiaat 19:2) Takorloorneqarsinnaava Davidip isigisani ersilissutigisimassagai? Naamik, akerlianik Jehovamik unnersiutiginnilluni erinarsorusuummersimavoq.

Ullumikkut avataarsua pillugu ilisimasaqarnerulernerup suli ataqqinninnerulernissatsinnut pissutissippaatigut. Ullorissanik ilisimatuut Hubblep Avataarsuani Qinngussua atorlugu aatsaat taama ungasitsigisumiittunik assiliisimapput. Qilaap ilamininngua ungasingaarami inuup isaani sioqqatut ataatsitut isikkoqartoq qinngussuarnit nunarsuarmiittunit isigalugu ulloriaqanngitsutut isikkoqaraluartoq Hubble atorlugu misissorsimavaat. Assilisaat inunnit takuneqarsimanngisaannartunik takutitsipput, tassa ulloriarpassuarnik pinnatik, kisianni ulloriaqatigiippassuarnik ulikkaarput — tamarmik immikkut milliardilikkuutaanik ulloriartaqartunik!

Avataarsuata annertussusiata, paasiuminaannerata tupinnarneratalu isiginnaartoq ataqqinningaartilertarpaat. Tupinnartulli tamakku tassaannaapput Pinngortitsisup naalannassusianut pissaaneranullu ersiutaasut. Biibilimi Jehova Guuti taaneqarpoq ’pavannga qaamasut Ataataat’ allassimavorlu taassuma ’ullorissat qassiussusissaat aalajangeraa tamaasalu immikkut atsersorai’. — Jâko 1:17; Tussiaat 147:4.

Avatarsuata annertussusia aamma takuneqarsinnaavoq tamatumani pisimasut sivisussusiat eqqarsaatigigutsigu. Ulloriaqatigiit Hubblep Avataarsuani Qinngussuanit assilineqartut qaarmarnat ukiuni milliardilikkuutaani avataarsuatigut ingerlasimavoq! Tamatumunnga naleqqiullugu inuunitta sivikissusia inuttullu mikitigissuserput eqqarsaatigalugit ullorissanik Pinngortitsisoq ataqqillugulu mianerisariaqannginnerparput? (Jesaja 40:22, 26) Paasigatsigu tamakkuninnga tamanik Pinngortitsisup aamma ’inuk eqqaasaraa inuullu qitornaa isumagisarlugu’ Taanna ataqqinerulerparput ilisarerusulerlugu taassumunngalu iluarisaajumalerluta. (Tussiaat 8:4, 5) Ataqqinningaarneq pingaartitsinerlu tamanna Biibilimi Guutimik mianerinninnermik taaneqartarpoq.

Guuti isumakkeerfiginnittartoq

Tamatta naammalluinnanngitsuuvugut. Allaat eqqortuliorniaraluaraangatta piaarinata ajortuliortarpugut. Taama pisoqaraangat Guutimut iluarisaajunnaarnissarput siooragisariaqarparput? Tussiaasiortoq ima allassimavoq: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]? Illilli isumakkeerfiginnittarputit mianerineqarnissat pillugu.“ (Tussiaat 130:3, 4) Pinngortitsisoq taama inussiarnertigimmat isumakkeerfiginnitsigimmallu pallorfiginnittai pingaartitsingaarlutillu mianerinnittuupput. — Jesaja 54:5-8.

Guutimik mianerinninnerup eqqortuliornissatsinnut aammalu Guutip ajorneragaanik iliunnginnissatsinnut killittarpaatigut. Ataatatsinnut qilammiittumut attaveqarnerput ataataasup ajunngitsup qitornaminut attaveqarneranut assersuunneqarsinnaavoq. Ilaannikkut meeqqat immaqa puiortoorsinnaasarpaat sooq ataatamik aqqusinermi pinnguarneq inerteqqutigisimagaa. Taamaattorli arsaq aaniarlugu aqqusernup qeqqanut arparusuummissagaluarunik ataatamik inerteqqutaa eqqaallugu uniinnassapput — immaqalu ajunaarnissaq pinngitsoorlugu. Tamatumunnga assingusumik inersimasoq Jehovamik mianerinninnerata nammineq inuillu allat ajoqutissaannik kinguneqarsinnaasumik ajortuliunngitsoortissinnaavaa. — Ussatit 14:27.

Guutip eqqartuussutissaanut siooraneq

Tamatumunnga akerliusumik inuk nalunngeqatiginnissutsiminit Guutip iluarinngisaanik iliunngitsoortinneqanngitsoq mianerinninneq imaluunniit siooraneq allaanerulluinnartoq misigissallugu pissutissaqarpoq. Soorluttaaq naalakkersuisut pinerluttuliortut pillartaraat Guutip piaaralutik peqqissiminatillu eqqunngitsuliortut eqqortumik iliorfigisinnaavai. Guutip ajussutsimik ilaginnaagallarnerani ilaat eqqunngitsuliortartutut qussalaallisimapput. Biibilimili ersarissumik takutinneqarpoq Guutip erniinnaq inuit ajortut tamaasa nunarsuarmit piiassagai. (Tussiaat 37:9, 10; Nalunaajaasup oqaasii 8:11; 1 Timûtiuse 5:24) Ajortuliortut peqqissimiumanngitsut Guutimit pillarneqarnissartik siooragissallugu pissutissaqarluarput. Siooranermilli taama ittuunngitsumik pigisaqarnissarput Biibilimi kajumissaarutigineqarpoq.

Akerlianilli Jehovamik mianerinninneq inuunermi nuannersunut Biibilimi attuumassuteqartinneqarpoq — erinarsornermut, nuannaarnermut, neriunnermut, ilisimassummut, sivisuumik inuunermut, tatiginninnermut, iluatsitsinermut eqqissinermullu, ilaannaat taassagaanni.a Jehova mianeralugu saqiuarutta pilluaqqusaanerit taamaattut naassaanngitsumik nuannaarutigisinnaassavavut. — 5 Moses 10:12-14. (gE 8/1 98)

[Quppernerup ataani ilanngussaq]

[Qupp. 26-mi suminngaanneernera]

Asseq: David Malin, Anglo-Australian Observatory