I nuusuttut aperipput:

Qanoq ilillunga sallusuissut nammineerlunga upperisarilersinnaavara?

„Jehovamut nalunaajaasutut peroriartorsimavunga, isumaqartuaannarsimavungalu taamaakkaanni isumaqartoq Jehova ilisarisimallugu. Taamali eqqarsarama kukkulluinnarsimavunga!“ — Antoinette

’SUNAANA sallusuissut?’ Apeqqut ilisarnarluartoq tamanna Pontius Pilatusip, Jesusip toqutaanissaanik akuersilluni tunniussisup apeqqutigisimavaa. (Juánase 18:38) Pilatusip peqqarniitsumik aperigami siunertaraa ammasumik oqaloqatigiinnerup aallartinnagu kipitinnissaa. Ilumoortumik oqassagaanni ’sallusuissutip’ suunerata paasinissa soqutiginngilaa. Illimmi? Sallusuissut soqutigaajuk?

Ukiuni hundredelikkuutaani isumaliutersortartut sallusuissut suunersoq eqqarsaatersuutigisarsimavaat, ilungersornitilli takussutissaasunik angusaqarfigivallaarsimanngilaat. Pilatusilli apeqqutaa akissutissaqarpoq. Jesus Kristusip nalunngilaa Guutip oqaasia sallusuissutaasoq. Imminut ’sallusuissut’-aanerarpoq. Apustili Johannes allassimavoq: ’Sallusuissut Jesus Kristusikkut pilerpoq.’ (Juánase 1:17; 14:6; 17:17) Kristumiut ajoqersuutaat, kingusinnerusukkut Biibilimut ilaatinneqalersoq, taamaattumik aamma taaneqartarpoq ’sallusuissut’ imaluunniit ’iivangkiiliup ilumoorsusia’. (Títuse 1:14; Galâsiamiut 2:14; 2 Juánase 1, 2) Kristumiut ajoqersuutaannut tamakkununnga ilaapput Guutip namminerisaminik atia, Guutip naalagaaffiata pilersinneqarnera, toqumit makitsitsinissaq, Jesusillu pilliutaa utertitsissutaasoq. — Tussiaat 83:19; Matîuse 6:9, 10; 20:28; Juánase 5:28, 29.

Inuusuttut tuusintilippassuit angajoqqaatik kristumiuusut aqqutigalugit sallusuissut Biibilimiittoq ilikkarsimavaat. Tamannali isumaqarpa ’sallusuissut eqqorlugu saqisut’? (3 Juánase 3, 4) Taammaattuaannanngilaq. Assersuutigalugu Jennifer 20-nik ukiulik Jehovamut nalunaajaasutut perorsarneqarsimavoq. Taanna oqarpoq: „Anaanama Jehovap Nalunaajaasuisa ataatsimeersuarnerinut ilagisarpaanga tusangiasaarisarlunilu kuisittariaqanginnersunga. Uvangali eqqarsartarpunga: ’Uanga Jehovamut nalunaajaasunngunngisaannassaanga. Nuannisaakalaaginnarusuppunga!’“

Inuusuttut ilaasa ilikkakkatik upperisarpaat, namminnerli ingerlaqqinneq ajorput Biibilimilu allassimasut itinerusumik paasisaqarfiginagit. Tamatuma suna navianaatigaa? Jesus mianersoqqusilluni oqarpoq ilaat ’sorlaqanngitsut’. Immaqa piffissap ilaa ingerlaqqikkaluarput, kisianni ’oqaaseq pissutigalugu naalliutitsisoqaleraangat qinuginnittoqaleraangallu katsornatik mamiatsaleraraat’. (Mákorse 4:17) Allat Biibilimi ajoqersuutit tunngaviatigut nassuiarsinnaalertarpaat, nammineerlutilli Guuti ilikkarsimanagu. Arnaq inuusuttoq Aneesamik atilik oqarpoq: „Isumaqanngilanga inuusunnerugallarama Jehova immikkut ittumik attavigisimallugu . . angajoqqaama attaveqarnerat ingerlatitsisuunerusimagunarpoq.“

Illimmi qanoq ingerlavit? Jehova angajoqqaavit kisimik Guutigivaat? Imaluunniit tussiaasiortutut oqarsinnaavit: „Kisianni tunaaraakkit illit [Jehova], oqarpunga: ’Illit Guutigaakkit’“? (Tussiaat 31:15) Pissutsit piviusut takusinnaanissaannut sapiissuseq pisariaqarsinnaavoq. Angut inuusuttoq Alexanderimik atilik oqarpoq imminut tunngatillugu „pingaarnerpaasimasoq unneqqarissumik imminut misissornissaq”. Taamaalioreeruit immaqa paasisinnaalissavat sallusuissut (tassa kristumiut ilinniartitsissutigisaat pingaarnerpaaq) nammineq uppernarsivissimanngisaannarlugu. Immaqa qularnak upperneq amigaatigivat misigisimallutillu inuunerit naparliinnarnerusoq, iluamik anguniagaqarfiunngitsoq.

Kristumiutut ataatsimiinnerminni, Jehovap nalunaajaasuisa ilaatigut erinarsortarpaat ima qulequtalik: „Sallusuissut pigiliuguk“. Immaqa siunnersuut tamanna ilinnut tulluartuuvoq. Kisianni qanoq ilillutit sallusuissut nammineq upperisatut pigiliussinnaaviuk? Sumi aallartissavit?

Ilumut sallusuissutaanersoq uppernarsiuk

Apustili Paulus Rûmamiut 12:2-mi ima siunnersuivoq: ’Sianigilersiuk sunaasoq Guutip peqqusaa ajunngitsoq iluarisassarlu naammalluinnartorlu.’ Qanoq ilillutit taamaliussavit? ’Sallusuissut Guutimik mianerinninniutaasoq ilisarilerlugu.’ (Títuse 1:1) Qanga Beroami najugaqarsimasut tusakkatik apersoratik akueriinnanngilaat. Akerlianilli oqaatigineqarput ’ullut tamaasa allakkat misissortaraat tamakku [ilinniakkatik] [ilumut] taamaannersut misilikkumallugit’. — apustilit suliait 17:11.

Aamma tamannaavoq kristumiup niviarsiaqqap Erinimik atillip iliuuserisariaqarlugu paasisaa. Taanna oqarpoq: „Misissuillunga aallartippunga. Imminut aperivunga: ’Qanoq ilillunga nalunngissinnaavara tamanna tassaasoq upperisaq ilumoortoq? Suut uppernarsaatissaraakka Guuteqartoq Jehovamik atilimmik?’ Soormi aamma illit nammineq atuaqqissaarnissannut pilersaarusioruit? Atuagaq Biibili tungavigalugu allataq Ilisarsineq inuunermut naassaanngitsumut sammisoqa aallartissutigisinnaavat. Peqqissaartumik tamaat atuaruk. Allassimaffiit takoqquneqartut tamaasa misissukkit, maluginiarlugillu atuakkap imarisaanut qanoq attuumassuteqarnersut. Tupigusuutigissavat sallusuissummik isiginninninnerpit allanngorluinnarnera illit nammineq misigileruit ’misiligaalluartutut sulisartuullutit pakatsisussaanngitsutut oqaatsimik sallusuissutsip pianik tunioraalluartutut’. — 2 Timûtiuse 2:15.

Apustili Peter oqarpoq Biibilimi allassimasut ilaat ’paasineq ajornartunik ilaqartartut’, aamma illit nammineq tamanna paasissavat. (2 Pîtruse 3:16) Guutilli anersaavata ikiorsinnaavaatit paasiuminaakkaluit paasisinnaalersillugit. (1 Korintumiut 2:11, 12) Paasiuminaatsitaqaraangavit Guutimut ikioqqullutit qinusarit. (Tussiaat 119:10, 11, 27) Oqaluuserisaq Napasuliaq Alapernaarsuiffiup Peqatigiiffiata atuagassiaatai atorlugit itinerusumik misissoruk. Qanoq iliornissat nalugukku angajoqqaatit ilagiinniluunniit kristumiut inersimalluartut arlaat ikioqqullutit qinnuigisinnaavat.

Aamma pitsaavoq eqqaamassallugu ilisimalikkatit pingaakujuutiginiaannarlugit misissuissannginnavit. Angut inuusuttoq Collinnimik atilik nassuiaavoq: „Anguniagaq tassaasariaqarpoq Jehovap pissusii suusut ilinniassallugit.“ Atuakkatit uummatinnut anngunniassammata suunerisa eqqarsaatiginissaannut piffissaqartarit. — Tussiaat 1:2, 3.

Aamma ikiuutavoq kristumiut ataatsimiinnerinut najuuttarluni. Soorlu apustili Paulus allattoq ilagiit tassaapput ’ilumoornerup sukaralugulu tunngavigisai’. (1 Timûtiuse 3:15) Inuusuttut ilaasa naammagittaalliutigisarpaat kristumiut ataatsimiinneri qasunarnerarlugit. „Piareersanngikkaanni ataatsimiinnerit iluamik pissarsiviusinnaanngillat,“ Collin oqarpoq. Ataatsimiigiartinnak piareersareertarit. Ataatsimiinnerit soqutiginarnerujussuanngussapput nammineq tusarnaartuinnaanak peqataaguit.

Biibilip atuarnissaanut ulapippallaarpit?

Ilumoorpoq Biibilimik atuaqqissaarnissap piffissaqarfiginissaa unamminiarnartuusinnaammat, ilinniagassat angerlarsimaffimmilu pisussaaffiit aamma angumeriniartussaatillugit. Niviarsiaraq Susanimik atilik allappoq: „Ukiorpaaluit nalunngilara ataatsimiinnernut piareersartariaqarlungalu nammineq atuaqqissaartariaqaraluarlunga, kisianni tamaviaarutinngisaannarsimavara.“

Susanip ilikkarpaa suliassanit pingaaruteqannginnerusunit ’piffissap pisiarinissaa’. (Evfisumiut 5:15, 16, NV) Atuartariaqakkani tulleriiaarlugit allattorlugit aallartippoq. Tulliullugu piffissaq atorfissaqartitani immikkoortippaa. Kisianni pilersaarutimini qasuersaarnissamut piffissaqarnissani aamma isumagaa. Imatut siunnersuuteqarpoq: „Minutsit tamarluinnaasa pilersaarusiorfigeqinagit. Tamatta qasuersaalaarnissamut piffissaqartariaqarpugut“. Illittaaq pilersaarusiornissat iluaqutigissavat.

Ilikkakkannik allat oqaluttuuttakkit

Inuttut pissutsinnut ilaalissappata ilikkakkavit atornerat iluaqutaasorujusuussaaq. Misiliguk ilikkakkatit allanut oqaluttuareqqillugit. Tussiaasiortoq oqarsimavoq: „Qanera isumatuunik oqalussaaq, eqqarsaatikkalu silatuujupput.“ — Tussiaat 49:4.

Nutarsiassaq nuannersoq kanngusuutiginngikkukku nangaanak atuaqatitit naapitatillu allat tamanna pillugu oqaluttuukkumassavatit. (Rûmamiut 1:16) Allat sallusuissummik oqaluttuunnissaannut periarfissat taamaattut atorluarnerisigut ilikkakkatit atorsinnaavatit. Taamaalillutit sallusuissut uummatikkut pigiliutissavat.

Peqqissaarlutit ikinngutissarsiortarit

Ukiuni hundredelinni siullerni kristumiut anersaakkut siuariartorluarsimapput. Kisianni piffissaq sivitsunngitsoq apustili Paulusip allaffigalugit aperisariaqarsimavai: ’Kia unitsippaasi sallusuissummut naalakkunnaaqqullusi?’ (Galâsiamiut 5:7) Tassunga assingusumik nukappiaqqamut Aleximik atilimmut pisoqarpoq. Nassuerpoq Biibili atuartarsimanagu „ikinngutit ajortut peqatigisarnerat“ pissutigalugu. Anersaakkut siuariartussaguit tamatumuunakkut allannguisariaqarputit.

Akerlianilli ikinngutit ajunngitsut siuariartornissannut ikiussavaatsit. Ussatit 27:17-imi allassimavoq: „Savimineq saviminermik ipissarneqartarpoq, inuillu imminnut ipissaqatigiittarpullusooq.“ Sallusuissut malillugu inuusunik maligassaalluartunik ikinnguteqarit. Immaqa illit nammineq ilaquttanni nassaarisinnaavatit. Inuusuttoq Jennifer ima oqarpoq: „Anaanama angutaa uannut maligassaalluarnerpaavoq. Sapaatit tamaasa nalunaaquttap-akunneri pingasut atortarpai Napasuliaq Alapernaarsuiffik atorlugu atuaqqissaarnissamut piareersarluni. Allassimaffiit ilanngutassiami innersuussutigineqartut tamaasa qupperlugit takusarpai. Biibilimik nutsikkat arlallit atortarpai, oqaatsinik qinerlerfissiaatini atorlugit oqaatsit assigiingitsut isumaat paasiniartarpai. Biibilip annikitsualuttai ilisimasaqarfigilluarpai. Qanorluunniit aperigaluaraanni akisinnaasarpai.“

Sallusuissut nammineq pigiliullugu upperisarilerukku nalilerujussuarmik peqalissaatit — sunaluunniit akigalugu taamaatikkusunngisaannagassannik. Sallusuissut „angajoqqaavit kisimik upperisaattut“ isigilinngisaannaruk. Tussiaasiortulli qularani isumaqarneratut isumaqalerit, ima oqarami: „Ataatamami anaanamalu qimakkaluarpannga [Jehovap] ilasiarissavaanga.“ (Tussiaat 27:10) Biibilip ajoqersuutaanik ilisimasaqarnerulernikkut, upperineratigut, allanut oqaluttuarineratigut, tamanillu pingaarnermik, inooriaaserilerneratigut, sallusuissut nammineq upperisattut pigiliussimallugu takutissavat. (gE 22/10 98)

[Quppernerup ataani ilanngussaq]

[Qupp. 13-mi assiliartaq]

Sallusuissut nammineq pigiliuguk atuaqqissaarnikkut misissuinikkullu