Inuit millionilikkuutaat najuuffigissavaat — Illittaaq aggissavit?
UKIUT tamaasa nunarsuaq tamakkerlugu Jehovap Nalunaajaasuisa ataatsimeersuarneri inunnit 8 millioninit amerlanerusunit najuuffigineqartarput. Aasaq manna Danmarkimi qulingiluanik, Savalimmiuni ataatsimik Kalaallit Nunaannilu ataatsimik ataatsimeersuarneqassaaq. Qulequtaq tassaavoq „Guutip oqaasia siulittuutaasoq“. Ataatsimeersuarnerup ulluani siullermi nalunaaqutaq 9.30 saqqummiussassat nipilersornermik aallartinneranniilli najuunnissannut tikilluaqquneqarputit.
Ullaap tungaa tikilluaqqusisoqassaaq ataatsimeersuarnerullu qulequtaa tunngavigalugu oqalugiartoqassaaq qulequtalimmik: „Guutip oqaasia siulittuutaasoq aalluttaruk“. Ualikkut oqalugiaatini ataqatigiinni „Guutip oqaasiata atuartarnera qiimmattaatigiuk“-mik qulequtalinni siunnersuuteqassaaq qanoq ililluni Biibilimik atuarneq pissarsiffiulluarsinnaasoq nuannersuutinneqarsinnaasorlu. Ullormi tamatumani naggasiullugu oqalugiaatigineqassaaq „Guutimut akerartorumasut iluatsissanngillat“, tassani Guutip naalagaaffianik oqaluussissutiginninnermut assortuisimanerit sammineqassapput.
Ataatsimeersuarnerup ulluisa aappaanni ullaap-tungaa kuisinnerup nassatai pillugit oqalugiartoqassaaq ataatsimeersuariartunillu piumasaqaatinik naammassinnittunik kuisittoqassaaq. Ualikkut Latinamerikami, Afrikami Europallu kangiani nunani assigiinngitsuni aamma Asiami Kasakhstanimi inuppassuit Biibilip tusarliussaanut ajunngitsumik qisuariarnerannik kajumissinartumik nalunaarutit tusarliunneqassapput. Ima qulequtaqassaaq: „’Erlinnartuutinik’ Jehovap illua immerneqarpoq.“ Ullut aappaat oqalugiaatinik marlunnik ukuninnga naggaserneqassaaq: „Allakkat siulittuutaasut eqqumanissatsinnut ikiorpaatigut“ aamma „Naggatissap nalaani oqaaseq siulittuutaasoq“. Oqalugiaammi kingullermi Danielip allagai sammineqassapput, paasitinneqassaagullu sooq tassani siulittuutigineqartut eqqumaffigisariaqarivut.
Ataatsimeersuarnerup ulluisa pingajuanni ullaap-tungaa oqalugiaatit pingasut ataqatigiit ima qulequtaqassapput: „Piffissamut aalajangersakkamut oqaatsit siulittuutaasut“. Oqalugiaatini Habakkukip allagai misissorneqassapput, paasinarsisinneqassaarlu Biibilimi allakkat naatsut taakku qanoq kristumiunut ullumikkut inuusunut qiimmassaataatigisut. Tamakkua kingornatigut Jakob aamma Esau pillugit oqaluttuaq Biibilimeersoq tunngavigalugu isiginnaagassiaqassaaq. Qulequtaa tassaavoq: „Kingornussatit anersakkut ittut pingaartikkit.“ Ullaap-tungaa naggaserlugu kajumissinartumik oqalugiaateqassaaq: „Kingornussarput naleqangaartoq ilinnut qanoq pingaaruteqartigaa?“ Ualikkut tamanut ammasumik oqalugiaateqassaaq: „Siulittuutigineqartutut Guutip suut tamaasa nutaanngortissavai“.
Najuunnissat maannakkut piareersalereeruk. Maani nunatsinni ataatsimeersuarneq pissaaq Nuummi tallimanngorneq juulip 30-aniit sapaat aggustip aallaqqaataa ilanngullugu. Danmarkimi Savalimmiunilu ataatsimeersuarnerit qaqugu sumilu pinissaat Vagttårnet-imi 15. februaari 1999-imoortumi nalunaarutigineqarsimapput. (gE 8/6 99)