Naatsiivik alianaatsoq

NUNA manna takuuk! Ila kusanaq! Ivikkat orpiillu, naasut uumasullu takoriakkit. Nagguaatsoq liivillu tikkuarsinnaavigit?

Naatsiivik alianaatsoq taanna qanoq pinngorsimava? Guutip qanoq iliorluni nuna uatsinnut piareersaraa tusariassagit.

Siullermik, Guutip ivikkat qorsuusut naatippai nuna qalleqqullugu. Pinngortitsivorlu naasunnguanik orpikkanillu orpinnillu assigiinngitsorpassuarnik. Taakkua nuna kusanarsarpaat. Aammattaarli ilaat amerlasuut inerititaqartarput nerisassanik mamaqisunik.

Kingornatigut Guuti pinngortitsivoq aalisakkanik imaani uumasussanik timmissanillu qilammi timmisussanik. Qimmit qitsuillu hiistillu aamma pinngortippai. Uumasut suut ilissi eqqassinniippat? Qujanassusia Guutip tamakkuninnga tamanik pinngortitsissummatigut, ilaa?

Kiisalu Guutip nunarsuup ilaa aaqqissorlugu immikkut ittunngortippaa. Edenip naatsiivianik taavaa. Pitsaalluinnarpoq. Alianaaqalunilu kusanaqaaq. Guutillu siunertaraa nuna tamarmi naatsiiviliamisut kusanartutut ittunngussasoq.

Naatsiiviliarli qiviaqqiguk. Suna amigaataasoq Guutip takugaa nalunngiliuk? Tusariartigu.